ವ್ಯಾಲೆಂಟೈನ್ಸ್ ಡೇ

ಪ್ರೇಮದ ಹುಚ್ಚಿಗೆ ಹತ್ತು ಮುಖ!

Tue, 10 Feb 2009 17:57:44 +0530

ನಾಗೇಂದ್ರ ತ್ರಾಸಿ

ಹಿಂದೆಂದೂ ಈ ತೆರನಾದ ಆದ್ಯತೆ ಪ್ರೇಮಿಗಳ ದಿನಾಚರಣೆಗೆ ಸಿಕ್ಕಿಲ್ಲ, ಈ ಬಾರಿ ಶ್ರೀರಾಮಸೇನೆಯ ಅಬ್ಬರದಿಂದಾಗಿ ಆ ಸಂದರ್ಭ ಒದಗಿ ಬಂದಿದೆ. ಇಂದು ಎಲ್ಲವೂ ವಿವಾದದ ಕೇಂದ್ರ ಬಿಂದುವಾಗುತ್ತಿರುವುದು ಸ್ಪಷ್ಟ. ಸಾಮಾನ್ಯ (?!) ವಿಷಯ ಕೂಡ ಗಂಭೀರ ಸ್ವರೂಪವನ್ನು ಪಡೆಯುತ್ತಿದೆ. ಅದಕ್ಕೀಗ ಪ್ರೇಮಿಗಳ ದಿನಾಚರಣೆಯೂ ಸೇರ್ಪಡೆಗೊಂಡಿದೆ. ಪ್ರೇಮಕ್ಕೂ ದಿನಾಚರಣೆ ಬೇಕಾ ?ಎಂಬ ಪ್ರಶ್ನಿಸಿಕೊಳ್ಳಬೇಕಾಗಿದೆ. ಪ್ರೇಮಿಸಿಲ್ಲ ಎಂಬ ಒಂದೇ ಕಾರಣಕ್ಕೆ ಮುಗ್ದ ಯುವತಿಯರ ಮುಖದ ಮೇಲೆ ಆಸಿಡ್ ದಾಳಿ ನಡೆಸಿದ ಪ್ರಕರಣವೂ ನಮ್ಮ ಕಣ್ಣ ಮುಂದಿದೆ...ಇದ್ಯಾವ ಪ್ರೇಮ ? ಲಂಗು-ಲಗಾಮಿಲ್ಲದ ಪ್ರೇಮದ ಹುಚ್ಚಿಗೆ ಸಿಕ್ಕಿ ಛಿದ್ರವಾಗುವ ಬದುಕಿನ ಬಗ್ಗೆಯೂ ಆಲೋಚಿಸಬೇಕಾಗಿದೆ. ಪ್ರೇಮದ ಹುಚ್ಚಿಗೆ ಹತ್ತು ಮುಖಗಳು...ಅದರಲ್ಲಿ ಪ್ರೀತಿ, ವಿಶ್ವಾಸ, ವ್ಯಾಮೋಹ, ನಿರೀಕ್ಷೆ, ಮೋಸ, ಹಪಾಹಪಿ, ವೈರಾಗ್ಯ, ಆತ್ಮಹತ್ಯೆ, ನಿರಾಸೆ...ಹೀಗೆ ಎಲ್ಲವೂ ಇದೆ.

ಘಟನೆ-1: ಉಡುಪಿ ಜಿಲ್ಲೆಯ ಪ್ರತಿಷ್ಠಿತ ಕಾಲೇಜೊಂದರಲ್ಲಿನ ಹಿಂದೂ ವಿದ್ಯಾರ್ಥಿಯೊಬ್ಬ ಮುಸ್ಲಿಮ್ ಯುವತಿಯನ್ನು ಪ್ರೀತಿಸುತ್ತಾನೆ. ಅದು ಕೊನೆಗೆ ಮದುವೆ ಹಂತಕ್ಕೆ ತಲುಪಿದಾಗ ಉದ್ಭವಿಸಿದ್ದೇ ವಿವಾದ. ಹುಡುಗಿ ಮನೆಯಲ್ಲಿ ತೀವ್ರ ವಿರೋಧ ವ್ಯಕ್ತವಾಗತೊಡಗಿ ಇಡೀ ಸಮುದಾಯವೇ ತಿರುಗಿ ಬಿದ್ದಿತ್ತು. ಬಳಿಕ ಹುಡುಗನನ್ನು ಅಪಹರಿಸಲಾಯಿತು. ಈ ಘಟನೆಯಲ್ಲಿ ಇಡೀ ಊರಿಗೆ ಊರೇ ಒಗ್ಗಟ್ಟಾಗಿತ್ತು, ಅಲ್ಲಿ ಹಿಂಸಾಚಾರ ನಡೆಯುವ ಮೂಲಕ ಪ್ರಥಮ ಬಾರಿಗೆ ಪ್ರೇಮ ಪ್ರಕರಣದಿಂದ ಕುಂದಾಪುರ ತಾಲೂಕು ಕರ್ಫ್ಯೂ ಹೇರಿಕೆ ಕಂಡಿತ್ತು. ಎಲ್ಲಾ ವಿರೋಧ-ಅಡೆ ತಡೆಗಳ ನಡುವೆಯೂ ಇಬ್ಬರ ವಿವಾಹವನ್ನು ನೆರವೇರಿಸಲಾಗಿತ್ತು. ಈ ರೋಚಕ ಪ್ರಸಂಗ ಪತ್ರಿಕೆಗಳಲ್ಲಿ ಭಾರೀ ಪ್ರಚಾರ ಪಡೆದಿತ್ತು.

ಘಟನೆ-2: ವೃತ್ತಿಯಿಂದ ನಿವೃತ್ತಿಯಾಗಲು ಕೆಲವೇ ವರ್ಷ ಬಾಕಿ ಇತ್ತು. ಕಾಲೇಜಿನಲ್ಲಿ ಅವರಿಗೆ ಒಳ್ಳೇ ಹೆಸರಿತ್ತು. ಆದರೆ ಮಾಡುವುದೇನು...ಬೆಳೆದು ನಿಂತ ಮಗ ಹಾಗೂ ಹೆಂಡತಿ ಹೇಗಾದರು ಮಾಡಿ 'ನಮ್ಮ ಮನೆಯವರಿಗೆ ಬುದ್ಧಿ ಹೇಳಿ' ಎಂದು ಗೋಗರೆಯುತ್ತಿದ್ದರು. ಕಾಲೇಜಿನ ಉಪನ್ಯಾಸಕರಾಗಿದ್ದ ಪ್ರೊಫೆಸರ್ ತನ್ನದೇ ವಿದ್ಯಾರ್ಥಿನಿಯೊಬ್ಬಳ ಪ್ರೇಮಪಾಶಕ್ಕೆ ಬಿದ್ದಿದ್ದರು! ಈ ವಿಚಾರದಲ್ಲಿ ಅವರು ಯಾರ ಮಾತನ್ನು ಕೇಳಲು ಸಿದ್ಧರಿರಲಿಲ್ಲವಾಗಿತ್ತು. ಅರವತ್ತಕ್ಕೆ ಅರಳು-ಮರಳು ಎನ್ನುತ್ತಾರೆ ಬಹುಶಃ ಇಂತಹ ಘಟನೆಯನ್ನು ನೋಡಿಯೇ ಹೇಳಿರಬೇಕು ಎಂದು ಹಂಗಿಸಿದವರೇ ಹೆಚ್ಚು. ಪ್ರಕರಣ ಕೆಲವು ವರ್ಷಗಳ ನಂತರ ಸುಖಾಂತ್ಯ ಕಂಡಿತ್ತು.

ಘಟನೆ-3: ಅವರದ್ದು ಸರಾಸರಿ ಹತ್ತು ವರ್ಷಗಳ ಪ್ರೇಮ. ಅಲ್ಲಿ ಯಾವುದಕ್ಕೂ ಕೊರತೆ ಇರಲಿಲ್ಲವಾಗಿತ್ತು. ಜಾತಿ-ಮತ-ಭೇದಕ್ಕೆ ಅವಕಾಶ... ಊಹೂಂ ಕೇಳಲೇಬಾರದು. ಆದರ್ಶದ ಕನಸು ಹೊತ್ತು ಪ್ರೇಮದ ಯಾತ್ರೆಯಲ್ಲಿ ಪಯಣಿಸಿದ್ದರು. ಆದರೆ ಎಲ್ಲದಕ್ಕೂ ಒಂದು ಮಿತಿ ಇರುತ್ತದೆಯಲ್ಲ, ಅದು ದಾಟಲು ಆರಂಭವಾದಾಗ ಹುಡುಗಿ ಕೇಳುತ್ತಿದ್ದದ್ದು ಒಂದೇ ಮಾತು. ಯಾವಾಗ ಮದುವೆ ಮಾಡಿಕೊಳ್ಳುತ್ತಿ ಅಂತ? ಆತನಲ್ಲಿ ಸ್ಪಷ್ಟ ಉತ್ತರ ಇರುತ್ತಿರಲಿಲ್ಲ, ಕಾದು....ಕಾದು ಸುಸ್ತಾದ ಆಕೆ ಕೊನೆಗೊಂದು ನಿರ್ಧಾರಕ್ಕೆ ಬಂದಿದ್ದಳು... ಹತ್ತು ವರ್ಷಗಳ ಸುದೀರ್ಘ ಪ್ರೇಮ ಸಂಬಂಧ (!) ತೊರೆದು ನೋವು, ನಿರಾಸೆಯ ಜತೆಗೆ ಹಸೆಮಣೆ ಏರಿದ್ದಳು.

ಪ್ರೇಮದ ಬಗ್ಗೆ ರಜನೀಶ್ ಮಾತನಾಡಿದಷ್ಟು ಯಾರು ಮಾತನಾಡಿರಲಿಕ್ಕಿಲ್ಲ. ಉಳಿದಂತೆ ಎಲ್ಲ ಮತ-ಧರ್ಮದ ಪಂಡಿತ, ಪುರೋಹಿತ, ಮುಲ್ಲಾ, ಪಾದ್ರಿಗಳು ಪ್ರೇಮದ ವಿರೋಧಿಗಳೇ ! ಯಾರು ಮೊದಲು ತನ್ನನ್ನು ತಾನು ಪ್ರೀತಿಸಿಕೊಳ್ಳಲಾರನೋ ಆತ ಮತ್ತೊಬ್ಬರಿಗೂ ಪ್ರೇಮವನ್ನೀಯಲಾರ. 'ಸ್ವಪ್ರೇಮ' ಎಂಬುದನ್ನು ತಿಳಿಯುವವರೆಗೆ ಪ್ರೇಮ ಎಂದರೇನು ಎಂಬುದರ ಅರ್ಥ ಆಗುವುದು ಕಷ್ಟ.

ಪ್ರೇಮವನ್ನು ಹುಟ್ಟು ಹಾಕಲು ಏನೊಂದೂ ಪ್ರಯತ್ನ ಮಾಡಬೇಕಾಗಿಲ್ಲ. ಅದು ಹೂವಿನಂತೆ ಸಹಜವಾಗಿ ಅರಳುವುದು. ಈ ಪ್ರೇಮದ ಪುಷ್ಪ ಅರಳಲು ಒಂದು ವಿಶಿಷ್ಟವಾದ ಪರಿವೇಶ ಬೇಕಾಗುವುದು. ನಿಜಕ್ಕೂ ನಾವು ನಮ್ಮ ಅಜ್ಞಾನದಲ್ಲಿ ಯಾವುದನ್ನು ಪ್ರೇಮವೆಂದು ತಿಳಿವೆವೋ ಅದು ಕೇವಲ ಒಂದು ಸಂಬಂಧ-ಒಂದು ನಂಟು. ನಾವು ನಮ್ಮ ಜಾಗೃತಿಯ ಚೈತನ್ಯಾವಸ್ಥೆಯಲ್ಲಿ ಯಾವುದನ್ನು ತಿಳಿಯುವೆವೋ ಅದು ಯಾವುದೊಂದು ಸಂಬಂಧವಾಗಿ, ನಂಟಾಗಿ ಉಳಿಯದು. ಅದರ ಗುಣವಂತಿಕೆಯೇ ಬದಲಾಗುವುದು. ಆಗ ನಾನು ನಿಮ್ಮನ್ನು ಪ್ರೇಮಿಸುತ್ತೇನೆ ಎಂಬುದು ಇರದು....ನಾನೇ ಪ್ರೇಮಿ ಎಂದೆನ್ನಬೇಕಾಗುತ್ತದೆ! ಪ್ರೇಮ ಸಂಕೀರ್ಣವಾದದ್ದು, ಅದು ಕಾಲ-ದೇಶವನ್ನು ಮೀರಿರುವುದು. ಅದಕ್ಕೆ ದಿನ...ಗಂಟೆ...ವರ್ಷದ ಪರಿಧಿ ಬೇಕಾಗಿಲ್ಲ....

ಮನವ ಮುಟ್ಟಿದವನಿಗೆ...

Mon, 09 Feb 2009 15:04:40 +0530

ಸಪ್ನಾ

ನನ್ನ ಡಿಯರ್,

ಹೇಗಿದ್ದೀಯ ಎಂದು ಕೇಳುವುದಿಲ್ಲ. ಯಾಕಂದ್ರೆ ನಿನ್ನನ್ನು ಪ್ರತಿಕ್ಷಣ ನೋಡಲಾಗದಿದ್ದರೂ ಪ್ರತಿ ದಿನ ನೋಡುತ್ತೇನಲ್ಲ ಹಾಗಾಗಿ. ನಿನ್ನೊಂದಿಗೆ ಸಿಕ್ಕಿದರೆ ಮಾತೂ ಆಡುತ್ತೇನೆ. ನಿನ್ನ ಆ ಕಣ್ಣರಳಿಸಿ ನಗುವ ಶೈಲಿಯನ್ನು ಶುಭೋದಯವಾಗಿ ನಾನು ಪ್ರತಿ ದಿನ ಕಾಣದಿದ್ದರೆ ಆ ನಗುವಿನ ಕಾಣುವಿಕೆಗಾಗಿ ಪ್ರಯತ್ನಿಸುತ್ತೇನೆ, ಸೋತರೆ ಪರಿತಪಿಸುತ್ತೇನೆ, ಆನಂತರದ ಗಳಿಗೆ ಎಲ್ಲವೂ ಶೂನ್ಯ ನನಗೆ. ನೀನು ಕೆಲವೊಮ್ಮೆ ನಾಟಕೀಯವಾಗಿ ನಮಸ್ಕಾರ ಮಾಡುವ ರೀತಿ ನನಗೆ ತುಂಬಾ ಇಷ್ಟ.

ನೀನು ಯಾಕೆ ಎಲ್ಲಾ ಹುಡುಗರಂತೆ ಇಲ್ಲ - ಸ್ವಲ್ಪ ಸ್ಪೆಶಲ್ ಆಗಿದ್ದೀಯ? ಅಥವಾ ನನಗೆ ಅನ್ನಿಸುವುದು ಹಾಗೆಯಾ? ನೀನು ಏನು ಮಾಡಿದರೂ ಇಷ್ಟವಾಗ್ತೀಯ, ನನ್ನ ಮನ ಗೆಲ್ತೀಯ, ಮನ ಮುಟ್ತೀಯ. ನನ್ನಲ್ಲಿರುವ ಈ ಭಾವನೆಗೆ ನಾನೇ ಒಂದು ಹೆಸರು ನೀಡಲಿಲ್ಲ. ಇನ್ನು ನಿನ್ನ ಕೇಳಿ ಪ್ರಯೋಜನವೇನು ಅಲ್ವಾ ಡಿಯರ್? ಈ ಭಾವನೆಗಳನ್ನು ನಿನ್ನಲ್ಲಿ ಹೇಳಿಕೊಳ್ಳಲಾಗದೆ ಒದ್ದಾಡುತ್ತಿದ್ದೇನೆ. ಆದರೂ ಕೆಲವೊಮ್ಮೆ ನನ್ನ ಗೆಳತಿಯರು ಹೇಳುವಂತೆ ಇದು ಪ್ರೀತಿ ಇರಬಹುದೇನೋ.

ಹೌದು ನನಗೂ ಇತ್ತೀಚೆಗೆ ಗೊತ್ತಾಗಿದೆ ಪ್ರೀತಿಯ ಸ್ಪರ್ಶಗಳೇ ಇವು ಎಂದು. ಇದನ್ನು ನೀನೇ ನನ್ನಲ್ಲಿ ಮೂಡಿಸಿದ್ದು. ಇಂತಹ ಭಾವನೆಗಳಿಲ್ಲದ ನನ್ನದೇ ಪ್ರಪಂಚದಲ್ಲಿ ನಾನಿದ್ದೆ. ಆದರೆ ಆ ದಿನಗಳಲ್ಲಿ ನೀನು ಏನೇನೋ ಮೋಡಿ ಮಾಡಿ ನನ್ನನ್ನು ನಿನ್ನೆಡೆ ಸೆಳೆಯಲು ಪ್ರಯತ್ನಿಸಿದೆ. ನಾನೋ ಬಲುಬೇಗ ಸಿಲುಕಿದೆ ನಿನ್ನ ಪ್ರೀತಿಯ ಬಲೆಯಲ್ಲಿ. ಆದರೆ ಈಗ ಯಾಕೆ ಏನಾಗಿದೆ? ನಿನ್ನ ಆ ಸರ್ಕಸ್ ಈಗ ಎಲ್ಲಿ ಹೋಗಿದೆ? ನನ್ನ ಗಮನವನ್ನು ನಿನ್ನೆಡೆ ಸೆಳೆಯಲು ಮಾಡಿದ ಆ ಹಾವಭಾವಗಳು ಈಗ ಕೆಲಸ ಮಾಡುವುದಿಲ್ವಾ? ಈಗ ನಾನು ನಿನ್ನೊಡನೆ ಮಾತನಾಡ್ಬೇಕು, ನನ್ನ ಭಾವನೆಗಳನ್ನು ಹಂಚಿಕೊಳ್ಳಬೇಕು ಎಂದು ಎಷ್ಟು ಸಲ ಪ್ರಯತ್ನಿಸಿದರೂ ನೀನು ಮಾತ್ರ ಏನೂ ಆಗಿಲ್ಲವೇನೋ, ನನಗೂ ನಿನಗೂ ಏನೂ ಸಂಬಂಧವಿಲ್ಲವೇನೋ ಎಂಬಂತೆ ಆಡುತ್ತಿರುತ್ತೀಯಲ್ಲ ಯಾಕೆ?

ನಿನ್ನ ಬಗ್ಗೆ ಕನಸು ಕಟ್ಟಿ, ನಿನ್ನ ಬಗ್ಗೆಯೇ ಚಿಂತಿಸಿ ನಿದ್ದೆ ಮಾಡದೆ ರಾತ್ರಿ ಕಳೆಯುವ ಹಾಗೆ ಆಗಿದೆಯಲ್ಲ. ಇದೆಲ್ಲ ನಿನಗೆ ಅರ್ಥ ಆಗೋದಿಲ್ವಾ? ಮನಸ್ಸಿಗೆ ತುಂಬಾ ಬೇಸರವಾಗುತ್ತದೆ. ಯಾಕೆ ಗೊತ್ತಾ? ನೀನು ಇತರ ಹುಡುಗಿಯರೊಂದಿಗೆ ಓವರ್ ಆಗಿ ಬೆರೀತೀಯಂತೆ, ನೀನು ಸರಿ ಇಲ್ವಂತೆ ಎಂದೆಲ್ಲ ನಿನ್ನ ಬಗ್ಗೆ ಕೆಲವರು ಇಲ್ಲ ಸಲ್ಲದ ಅಪವಾದ ಹೊರಿಸುತ್ತಾರೆ. ಹೇಳು ಡಿಯರ್ ಹೌದಾ? ಈ ನನ್ನ ಪುಟ್ಟ ಹೃದಯಕ್ಕೆ ಅದನ್ನು ಅರಗಿಸಿಕೊಳ್ಳೋ ಶಕ್ತಿ ಇಲ್ಲ. ಹಾಗೇನೂ ಇಲ್ಲ, ನೀನು ತುಂಬಾ ಒಳ್ಳೆಯ ಹುಡುಗ ಅಲ್ವಾ?

ನಿನ್ನೊಂದಿಗೆ ಮಾತನಾಡುತ್ತೇನೆ. ಆದರೆ ಎಂದೂ ಈ ನನ್ನ ಭಾವನೆಗಳನ್ನು ಹೇಳಿಕೊಂಡಿಲ್ಲ. ಕಾರಣ ಗೊತ್ತಾ? ಒಂದು ವೇಳೆ ನೀನು ನನ್ನ ಪ್ರೀತಿಯನ್ನು ನಿರಾಕರಿಸಿದರೆ ಎಂಬ ಭಯ. ನೀನು ನಿರಾಕರಿಸಿದ ನಂತರ ನನಗೇನೂ ಉಳಿಯುವುದಿಲ್ಲ, ಈ ಜಗತ್ತಿನಲ್ಲಿ ಎಲ್ಲವೂ ಶೂನ್ಯವಾಗುತ್ತದೆ. ಪ್ರೀತಿಯನ್ನು ಹೇಳಿಕೊಳ್ಳಲು ವ್ಯಾಲೆಂಟೈನ್ಸ್ ದಿನವೇ ಆಗಬೇಕಾಗಿಲ್ಲ. ಬೇರೆ ದಿನಗಳಲ್ಲೂ ಹೇಳಬಬಹುದು ಅಲ್ವಾ ಡಿಯರ್? ಯಾಕಂದ್ರೆ ಹೇಳಿಕೊಳ್ಳಬೇಕೆಂಬ ದಿನ ಹತ್ತಿರ ಬಂದ ಹಾಗೆ ನನಗೆ ಭಯ ಪ್ರಾರಂಭವಾಗುತ್ತದೆ. ಹಾಗಾಗಿ ಆ ದಿನವನ್ನು ಮುಂದೂಡುತ್ತಾ ಬರಬಹುದಲ್ವ!!ಯಾವತ್ತಾದ್ರೂ ನೀನು ನನ್ನನ್ನು ಸ್ವೀಕರಿಸುತ್ತೀಯ ಎಂಬ ಆ ಒಂದು ಕಲ್ಪನೆಯೇ ಸಾಕು ನನಗೆ ನೆಮ್ಮದಿಯಾಗಿರಲು, ಕನಸು ಕಾಣಲು...

ನೀನು ನನ್ನಿಂದ ತುಂಬ ತುಂಬಾ ದೂರ ಹೋಗುತ್ತಿದ್ದೀಯ ಎಂದು ನನಗೂ ತಿಳಿದಿರುವ ವಾಸ್ತವ. ಆದರೆ ಏನು ಮಾಡಲಿ ನಿನ್ನ ಈ ಮೋಸವನ್ನು ನನ್ನ ಮನಸ್ಸು ಒಪ್ಪುವುದೇ ಇಲ್ಲ. ಯಾವಾಗಲೂ ನಿನಗೇ ಸಪೋರ್ಟ್ ನೀಡುತ್ತದೆ! ಬಹುಶಃ ಅದಕ್ಕೇ ಇರಬೇಕು ನಿಜವಾದ ಪ್ರೀತಿ ಎನ್ನುವುದು. ಏನೇ ಆಗಲಿ ಡಿಯರ್, ನಾನು ಎಂದೆಂದಿಗೂ ನಿನ್ನವಳೇ. ಯಾವತ್ತು ಬಂದರೂ ನಿನಗಾಗಿ ಕಾಯುತ್ತಿರುತ್ತೇನೆ....

ಆದರೆ 'ಕಾಲ' ಯಾರನ್ನು ಬದಲಾಯಿಸುತ್ತದೆ ಎಂಬುದು ತಿಳಿದಿಲ್ಲ......
ಇಂತೀ ನಿನ್ನ
ಎಂದೆಂದಿಗೂ ಮರೆಯದವಳು

ನನ್ನವಳಿಗೆ ಎಸ್ಎಂಎಸ್ ಕಳುಹಿಸಿದಾಗ...!

Mon, 09 Feb 2009 15:04:21 +0530

ನಿಶಿತ್

ಸಂಗಾತಿಯ ಆಯ್ಕೆಯು ಜೀವನದಲ್ಲಿ ಮಹತ್ವಪೂರ್ಣವಾದ ಸಂಗತಿ. ನಾನು ಆ ಘಟ್ಟದಲ್ಲಿದ್ದ ಸಮಯ. ನಾನು ಮತ್ತು ನನ್ನವಳು ಮತ್ತು ಎರಡೂ ಮನೆಯವರು ಮುಖತಃ ಭೇಟಿಯಾಗಿರಲಿಲ್ಲ. ಸಂಬಂಧಿಕರ ಮುಖಾಂತರ ಹಿರಿಯರ ನಡುವೆ ಮಾತುಕತೆಯಷ್ಟೇ ನಡೆದಿತ್ತು. ಹುಡುಗ ಹುಡುಗಿ ಮಾತನಾಡಿ ಒಪ್ಪಿದ ಮೇಲೆಯೇ ಮುಂದಿನ ಕ್ರಮ ಕೈಗೊಳ್ಳೋಣ ಎಂದು ಅವರು ನಿರ್ಧರಿಸಿದ್ದರು. ನನ್ನವಳು ಸೌಮ್ಯ ಸ್ವಭಾವದವಳು ಮತ್ತು ಬೆಂಗಳೂರಿನಲ್ಲಿದ್ದರೂ ಹೈಟೆಕ್ ಸಂಸ್ಕೃತಿಯನ್ನು ಇಷ್ಟಪಡದಳು ಎಂದು ಮೂರನೇ ವ್ಯಕ್ತಿಯ ಮುಖಾಂತರ ತನಿಖೆಯನ್ನೂ ಮಾಡಿದ್ದೆ.!!

ಈ ಸಂದರ್ಭದಲ್ಲೇ ಸಮೀಪಿಸಿತ್ತು ವ್ಯಾಲೆಂಟೈನ್ಸ್ ಡೇ. ಈ ಪಾಶ್ಚಿಮಾತ್ಯ ಆಚರಣೆಯು ಭಾರತದಲ್ಲಿ ಇಷ್ಟು ಬೃಹದಾಕಾರವಾಗಿ ಬೆಳೆದು ಬಂದಿದ್ದೇ ಆಶ್ಚರ್ಯಕರವಾಗಿ ತೋರುತ್ತದೆ. ಮೊದಲಿನಿಂದಲೂ ಇಂತಹ ಆಚರಣೆಗಳನ್ನು ವಿರೋಧಿಸಿಕೊಂಡು ಬಂದಿದ್ದವನು ನಾನು. ಪ್ರೇಮಿಗಳು ತಮ್ಮ ಪ್ರೇಮ ನಿವೇದಿಸಿಕೊಳ್ಳಲು ವಿಶೇಷವಾದ ದಿನವಾದರೂ ಏತಕ್ಕೆ ಎಂಬುದು ನನ್ನ ಪ್ರಶ್ನೆಯಾಗಿದ್ದಿತ್ತು. ಆದರೂ ಆ ದಿನಕ್ಕಾಗಿ ನೀಡುವ ಪ್ರಚಾರ, ಯುವ ಮನಸ್ಸುಗಳನ್ನು ಸೆಳೆಯುವ ಅಬ್ಬರದ ಜಾಹೀರಾತುಗಳು, ಗ್ರೀಟಿಂಗ್ಸ್‌ಗಳು, ಯಾಕೋ ನನ್ನ ಮನಸ್ಸಿನಲ್ಲೂ ತಳಮಳವನ್ನುಂಟು ಮಾಡಿತ್ತು. ಆದ್ದರಿಂದ ನನ್ನವಳಾಗುವವಳಿಗೆ (ಎಂದು ಭಾವಿಸಿದ್ದೆ) ಪ್ರೇಮಿಗಳ ದಿನದಂದು ಶುಭಾಶಯ ಕೋರುವ ಭಾವನೆ ನನ್ನಲ್ಲಿಯೂ ಮೂಡಿತ್ತು. ಇಬ್ಬರ ನಡುವಿನ ಮಾತುಕತೆಗಳು ಇನ್ನೂ ಪೂರ್ಣಗೊಂಡಿರಲಿಲ್ಲವಾದ್ದರಿಂದ, ಇಷ್ಟು ಬೇಗ ಪ್ರೀತಿ ಪ್ರೇಮದ ನನ್ನ ಅರಿಕೆಯು ಸಂಬಂಧವನ್ನು ಮುರಿದು ಬಿಡಬಹುದು ಎಂದು ಹಿಂಜರಿದಿದ್ದೆ. ಮೊದಲೇ ತಾನು, ತನ್ನ ಓದು, ತನ್ನ ಕೆಲಸ ಎಂದು ಅಷ್ಟಕ್ಕೇ ಸೀಮಿತವಾಗಿದ್ದ ನನ್ನ 'ಭಾವಿ' ಪತ್ನಿಗೆ ನನ್ನ ಇಂತಹ ನಡವಳಿಕೆ ಇಷ್ಟವಾಗಲಾರದೇನೋ ಎಂದು ಭಾವಿಸಿದ್ದೆ.

ಅಂದು ಮಧ್ಯಾಹ್ನದವರೆಗೂ ಬೇಕು ಬೇಡಗಳ ಗೊಂದಲದಲ್ಲಿದ್ದ ನಾನು ಹೇಗಾದರೂ ಮಾಡಿ ಪ್ರೇಮಿಗಳ ದಿನದ ಶುಭಾಶಯ ಹೇಳಲೇಬೇಕೆಂದು ನಿರ್ಧರಿಸಿಬಿಟ್ಟೆ. ಮಾತನಾಡಲು ಭಯ. ಉಳಿದಿರುವ ದಾರಿ ಎಸ್‌ಎಂಎಸ್ ಆಗಿತ್ತು. ಈ ಮೊದಲೇ ನನ್ನವಳ ಮೊಬೈಲ್ ನಂಬರ್ ಅನ್ನು ನಾನು ನನ್ನ ಸಂಬಂಧಿಕರಿಂದ ಕೇಳಿ ತಿಳಿದುಕೊಂಡಿದ್ದೆ. ಆದರೆ ಕರೆ ಹಾಗೂ ಎಸ್‌ಎಂಎಸ್ ಅನ್ನು ಮಾಡಿರಲಿಲ್ಲ. ಲವ್ ಯು ಎಂಬಂತಹ ಪ್ರೇಮದ ಅರಿಕೆಯ ಸಂದೇಶ ಕಳುಹಿಸಲು ಹೆದರಿಕೆಯಾಯಿತು, ಅಂತೂ ಕೇವಲ ಹ್ಯಾಪಿ ವ್ಯಾಲೆಂಟೈನ್ಸ್ ಡೇ ಎಂದು ಬೆರಳಚ್ಚಿಸಿ ಎಸ್‌ಎಂಎಸ್ ಕಳುಹಿಸಿದೆ. ಎದೆ ಢವಗುಡುತ್ತಿತ್ತು. ಅವಳ ತಕ್ಷಣದ ಪ್ರತಿಕ್ರಿಯೆಗೆ ಕಾಯುತ್ತಿದ್ದೆ.

ಆದರೆ ಅವಳಿಂದ ಪ್ರತಿಕ್ರಿಯೆ ಬರಲಿಲ್ಲ. ಮದುವೆಯೇ ಬೇಡವೆಂದು ಹಟ ಹಿಡಿದಂತಹ ಹುಡುಗಿ ಅವಳು ಎಂದು ಸಂಬಂಧಿಗಳಿಂದ ಕೇಳಲ್ಪಟ್ಟಿದ್ದೆ. ಮದುವೆ, ಮಾತುಕತೆಗೆ ಮೊದಲೇ ನನ್ನ ಇಂತಹ ನಡವಳಿಕೆಯು ಅವಳಲ್ಲಿ ನನ್ನ ಬಗ್ಗೆ ಋಣಾತ್ಮಕ ಭಾವನೆಯನ್ನು ಉಂಟುಮಾಡಿತೇನೋ ಎಂದು ಬೆದರಿದೆ. ನನ್ನ ಚಿಕ್ಕಪ್ಪನವರು ಈ ಸಂಬಂಧವನ್ನು ತೋರಿಸಿಕೊಟ್ಟಿದ್ದರಿಂದ ನನ್ನ ಬಗ್ಗೆ ಇವಳು ಅವರ ಬಳಿ ದೂರು ನೀಡಿದ್ದಾಳೇನೋ ಎಂದು ಎರಡು ಗಂಟೆಯ ಬಳಿಕ ಅವರಿಗೆ ಕರೆ ಮಾಡಿ ಖಚಿತಪಡಿಸಿಕೊಂಡೆ. ದೂರು ಬಂದಿರಲಿಲ್ಲವೆಂದು ಖಚಿತವಾಯಿತು. ಆ ಸಂಜೆ ಅವಳಿಂದ ಕೇವಲ ಮಿಸ್ ಕಾಲ್ ಬಂದಾಗಲೇ ನನಗೆ ಸಮಾಧಾನವಾಗಿದ್ದು. ಅವಳು ಬೇರೇನೂ ಪ್ರತಿಕ್ರಿಯಿಸಿರಲಿಲ್ಲ.

ನನ್ನ ಎಸ್‌ಎಂಎಸ್ ಅನ್ನು ಅವಳ ಸ್ನೇಹಿತರಿಗೆ ತೋರಿಸಿ ತನಗಾದ ಸಂತೋಷವನ್ನು ಅವಳು ಅಂದು ಹಂಚಿಕೊಂಡಿದ್ದು ನಂತರ ಗೊತ್ತಾಯಿತು. ವ್ಯಾಲೆಂಟೈನ್ಸ್ ಡೇ ಎಂಬ ಪ್ರೇಮಿಗಳ ಮಹೋತ್ಸವ ಈ ಹುಚ್ಚು ಧೈರ್ಯದ ಮೂಲಕ ಕೊನೆಗೊಂಡಿತ್ತು. ಪಾಶ್ಚಿಮಾತ್ಯ ಆಚರಣೆಯ ಬಗ್ಗೆ ಇಂದಿಗೂ ಮೂಗು ಮುರಿಯುವ ನನ್ನ ಪತ್ನಿ ಅಂದು ನನ್ನ ಸಂದೇಶವನ್ನು ನೋಡಿ ನನ್ನನ್ನು ತಿರಸ್ಕರಿಸಿದ್ದರೆ ಎಂಬ ಯಕ್ಷಪ್ರಶ್ನೆ ಇಂದಿಗೂ ನನಗೆ ಒಮ್ಮೊಮ್ಮೆ ಕಾಡುತ್ತದೆ. ಇಬ್ಬರೂ ಸೇರಿ ಹೇಳಿಕೊಂಡು ನಕ್ಕಿದ್ದೂ ಇದೆ.

ಪ್ರೇಮಿಗಳ ದಿನ ಹಲವು ಯುವ ಪ್ರೇಮಿಗಳನ್ನು ಒಂದಾಗಿಸಿರಬಹುದು, ಹಲವು ಭಗ್ನ ಹೃದಯಗಳನ್ನು ಸೃಷ್ಟಿಸಿರಬಹುದು. ಆದರೆ ಇದು ನನ್ನ ಜೀವನದಲ್ಲಿ, ಅದೂ ಪ್ರಮುಖ ಘಟ್ಟವೊಂದರಲ್ಲಿ ನನಗೆ ವಿಚಿತ್ರ ರೀತಿಯಲ್ಲಿ ಕಾಡಿಸಿದ್ದು ಮಾತ್ರ ಇಂದಿಗೂ ಮರೆಯದೇ ಉಳಿದಿದೆ.

ಇದು ನನ್ನ 'ಪ್ರೊಫೆಶನಲ್' ಪ್ರೀತಿ...

Mon, 09 Feb 2009 15:01:18 +0530

ದೀಪಕ್ ಮಧ್ಯಸ್ಥ, ಅರೆಹೊಳೆ
WD
ಹಿಂದೆ ಲವ್ ಮಾಡಿಲ್ಲ, ಮುಂದೆನೂ ಮಾಡಲ್ಲವೆಂದು ಭೀಷ್ಮ ಪ್ರತಿಜ್ಞೆ ಮಾಡಿ ಕಾಲೇಜು ಮೆಟ್ಟಿಲು ಹತ್ತಿದ್ದವ ನಾನು. ಕಳೆದ ವರ್ಷ ಇದೇ ಸಮಯದಲ್ಲಿ ನಾನು ಫೈನಲ್ ಇಯರ್ ಡಿಗ್ರಿಯಲ್ಲಿದ್ದೆ, ಕೆಲವು ಗಂಡು ಹುಡುಗರು, ಹೆಣ್ಣು ಹುಡುಗಿಯರು ಅದೇನೋ ಲವ್ ಅಂತ ಮಾಡುತ್ತಿದ್ದರು. ಅವರ ಲವ್ ಅಂದರೆ ಒಂದೆರಡು ದಿನ ಹುಡುಗಿಯೊಂದಿಗೆ ಸುತ್ತಾಡಿ, ಜಾಲಾಡಿ, ಅದರೊಂದಿಗೆ ಮತ್ತೊಬ್ಬರಿಗೆ ಎಸ್ಎಂಎಸ್ ಕಳುಹಿಸುತ್ತಾ ಕಾಲ ಕಳೆಯುತ್ತಿದ್ದರು.

ಒಟ್ಟಿನಲ್ಲಿ ಆಗಾಗ್ಗೆ ಚೇಂಜ್ ಮಾಡಿಕೊಳ್ಳುತ್ತಾ ಆಡುತ್ತಿದ್ದ ಲವ್ ಆಟವಾಗಿತ್ತದು. ಅವಳೇನಾದರೂ ಫ್ರೀ ಇದ್ದರೆ ಅವಳೊಂದಿಗೆ ಸುತ್ತಾಡುವುದು, ಆವಾಗಲೂ ಸಹ ಸೇಫ್ಟಿಗಾಗಿ ಇನ್ನೊಬ್ಬಳಿಗೆ ಗಾಳ ಹಾಕುವುದು ಮುಂದುವರಿದೇ ಇತ್ತು. ಇದು ಅವರ ರೂಟೀನ್ ಜಾಬ್.

ಇವರು ವ್ಯಾಲೆಂಟೈನ್ಸ್ ಡೇ ಅನ್ನು ಬಹಳ ಅದ್ದೂರಿಯಿಂದ ಆಚರಿಸುವ ಕೆಟಗರಿ. ವರ್ಷದ ಪ್ರತಿ ದಿನವೂ ಪ್ರೇಮಿಗಳ ದಿನ ಆದರೆ ಒಳ್ಳೆಯದಿತ್ತು ಎಂಬುದು ಇವರ ಯೋಚನೆ. ಇದು ಸ್ವಘೋಷಿತ ಪ್ರೊಫೆಶನಲ್ ಲವರ್‌ಗಳ ಪ್ರೊಫೈಲ್. ಆದರೀಗ ಹುಡುಗಿಯರಲ್ಲಿಯೂ ಇಂಥದ್ದೊಂದು ಬ್ರಾಂಚ್ ಇದೆ ಎನ್ನುವುದು ಸಂತಸಕರ. ಏಕೆಂದರೆ ಅವರಿಗೆ ಕೊಟ್ಟ ಸ್ವಾತಂತ್ರ್ಯವನ್ನು ಅವರು ಪೂರ್ಣವಾಗಿ ಉಪಯೋಗಿಸುತ್ತಿರುವುದು ಸಂತಸವಲ್ಲದೆ, ಮತ್ತೇನು...? ಒಟ್ಟಿನಲ್ಲಿ ಅವರು ಇವರಿಗೆ ಇವರು ಅವರಿಗೆ ಇ-ಗ್ರೀಂಟಿಂಗ್ಸ್ ಸರಬರಾಜು ಮಾಡುತ್ತಲೇ ಇರುತ್ತಿದ್ದರು.

ಇನ್ನೂ ಕೆಲವು ಕೆಟಗರಿಗಳಿವೆ ಅವುಗಳು ಇಲ್ಲಿ ಮುಖ್ಯವಲ್ಲ ಬಿಡಿ. ಒಂದರಲ್ಲಿ, ಓದುವುದು ಬಿಟ್ಟು ಬೇರೇನೂ ತಿಳಿಯದವರು, ಇನ್ನೊಂದರಲ್ಲಿ, ಓದೂ ಇಲ್ಲ, ಲವ್ವೂ ಇಲ್ಲದ ಕೈಯಲ್ಲಿ ಬಾಲ್, ಬ್ಯಾಟ್ ಹಿಡಿದು 24 ತಾಸು ಸ್ಪೋರ್ಟ್ಸ್‌ಮೆನ್, ಯಾವಾಗ ನೋಡಿದ್ರೂ ಆನ್‌ಲೈನ್ ಗೇಮ್‌ನಲ್ಲೇ ನಿರತವಾಗಿರುವವರು ಇತ್ಯಾದಿ ಇತ್ಯಾದಿ.

ಇದರಲ್ಲಿ ನನ್ನದು ಯಾವ ಬ್ರಾಂಚ್‌? ನನ್ನದು ಪ್ರೊಫೆಷನಲ್ ಕೆಟಗರಿ, ಗ್ರಂಥಾಲಯದ ಹುಳು, ಕಂಪ್ಯೂಟರ್ ವೈರಸ್ ಅಂತಲೇ ಪ್ರಖ್ಯಾತಿ ಹೊಂದಿದ್ದೆ. ಕೆಲವೊಮ್ಮೆ ಅದು ಕುಖ್ಯಾತಿಯೂ ಆಗುತಿತ್ತು. ನನ್ನ ಗೆಳೆಯರು ಮತ್ತು ಗೆಳತಿಯರನ್ನು ನಾನು ಕೂಡ ಪ್ರೀತಿಸುತ್ತಿದ್ದೆ.ಅವರೊಂದಿಗೆ ಸುತ್ತಾಡುವುದು ನನ್ನಿಷ್ಟದ ಸಂಗತಿಯೂ ಹೌದು. ಅವರು ಸುತ್ತಾಡಿಸಿದಲ್ಲಿಗೆ ನಾನೂ ಹೋಗುತ್ತಾ, ಹೊಸ ತಾಣಗಳು, ಹೊಸ ಟೂಲ್‌ಗಳು, ಹೊಸ ಹೊಸ ತಂತ್ರಜ್ಞಾನಗಳೊಂದಿಗೆ ನನ್ನ ಜ್ಞಾನ ಸಂಪಾದನೆಯೂ ಆಗುತ್ತಿತ್ತು.

ನಾನು ಈ ವ್ಯಾಲೆಂಟೈನ್ಸ್ ಡೇಗೆ ಸಂಬಂಧಪಟ್ಟ ಪ್ರೀತಿಯನ್ನು ಎಂದಿಗೂ ಯಾರೊಂದಿಗೂ ಮಾಡಿಲ್ಲ ಎಂದುಕೊಂಡಿದ್ದೆ. ಆದರೆ ಈಗ ತಿಳಿಯುತ್ತಿದೆ. ದ್ಯಾಟ್ ಟೈಮ್ ಐ ವಾಸ್ ಇನ್ ಲವ್ ಅಂಥ. ಲವ್ ಗಿವ್ ಅಂಥ ಕೆಲವು ಗೆಳತಿಯರಲ್ಲಿ ಹುಚ್ಚಾಟ ಮಾಡುತ್ತಿದ್ದೆ. ಅವರಿಗೂ ಅದು ತಿಳಿದಿದ್ದುದರಿಂದ ಅದು ಹುಚ್ಚಾಟಕ್ಕೆ ಮಾತ್ರ ಸೀಮಿತವಾಗಿತ್ತು.

ಒಮ್ಮೆ ಅವರೆಲ್ಲರಿಗಿಂತಲೂ ಹೆಚ್ಚು ಆಕರ್ಷಕವಾದ, ಬುದ್ಧಿವಂತೆಯಾದ, ಬ್ಲಾಕ್ ಬ್ಯೂಟಿಯೊಬ್ಬಳು ನನ್ನ ಅಪ್ಪನಿಂದ ಪರಿಚಿತವಾದಾಗ, ನಕಲಿ ಸಾಫ್ಟ್‌ವೇರ್ ಬಳಸುತ್ತಿದ್ದವನಿಗೆ ಅಸಲಿ ಸಾಫ್ಟ್‌ವೇರ್ ಸಿಕ್ಕಿದಂತಾಯಿತು. ಅವಳನ್ನು ಬಿಟ್ಟಿರಲಾಗುತ್ತಿರಲಿಲ್ಲ, ಸಮಯ ಸಿಕ್ಕಾಗಲೆಲ್ಲಾ ಅವಳನ್ನು ಮಾತನಾಡಿಸುವುದೇ ನನ್ನ ಕೆಲಸವಾಗಿತ್ತು. ಅವಳನ್ನು ನಾನು ಮಾತಾಡಿಸುವ ಸಮಯದಲ್ಲಿ ಬೇರೆ ಯಾರಾದರೂ ಅಡ್ಡ ಬಂದರೆ ಕೆಟ್ಟ ಕೋಪ ಬರುತ್ತಿತ್ತು. ಇದೂ ಎಕ್ಸ್‌ಟರ್ನಲ್ ಅಫೇರ್ ಆಗಿದ್ದರಿಂದ ಕಾಲೇಜಿಗೂ ಇದಕ್ಕೂ ಸಂಬಂಧವಿರಲಿಲ್ಲ. ನನ್ನ ಪರೀಕ್ಷೆಗಳೆಲ್ಲ ಮುಗಿದ ಮೇಲೆ ಸಮಯ ಸಿಕ್ಕಾಗಲೆಲ್ಲ ಅವಳ ಮುಂದೆ ಕೂತು ಮಾತನಾಡುತ್ತಿದ್ದೆ, ಹರಟುತ್ತಿದ್ದೆ, ಅವಳನ್ನು ನನ್ನಿಷ್ಟದ ಪ್ರಕಾರ ಬಳಸುತ್ತಿದ್ದೆ, ಒಟ್ಟಿನಲ್ಲಿ ನಾನು ಮತ್ತು ಅವಳು ಲವ್‌ನಲ್ಲಿ ಬಿದ್ದಿದ್ದೆವು!

ಹೀಗೆ ಕಾಲ ಕಳೆಯುತ್ತಿರುವಾಗ ಕ್ಯಾಂಪಸ್ ಸೆಲೆಕ್ಷನ್‌ನಲ್ಲಿ ನೌಕರಿಗೆ ಆಯ್ಕೆಯಾದ ವಿಷಯ ತಿಳಿಯಿತು, ಇಂಟರ್‌ವ್ಯೂಗೆ ಬರುವಂತೆ ಕೂಡ ಇ-ಮೇಲ್ ಸಿಕ್ಕಿತು. ಅದನ್ನೂ ನನ್ನ ಕೈಗಿತ್ತವಳು ಇವಳೇ. ಈ ಹಿಂದೆ ಒಂದು ಬಿಪಿಒ ಕಂಪೆನಿಗೂ ಆಯ್ಕೆಯಾಗಿದ್ದೆ. ಆದ್ದರಿಂದ ನನ್ನಲ್ಲಿ ಎರಡು ಆಯ್ಕೆಗಳಿದ್ದವು. ಆದರೂ ಮನಸ್ಸಿನಲ್ಲೊಂದು ಕಡೆ, ಇವಳನ್ನು ಬಿಟ್ಟಿರಬೇಕಲ್ಲಾ ಎಂಬ ತಳಮಳ.

ಏನೇ ಆಗಲಿ, ಮುಂದೆ ಸಾಗುವೆ ಎಂದು ಇಂಟರ್‌ವ್ಯೂಗೆ ಬಂದೆ. ಆಗ ಆಯಿತು ಕಹಾನಿ ಮೇ ಟ್ವಿಸ್ಟ್... ಇಂಟರ್ವ್ಯೂ ತಾಣಕ್ಕೆ ಬಂದಾಗ ಅಲ್ಲೊಬ್ಬಳು ನನ್ನವಳಿಗಿಂತಲೂ ಜಾಣೆಯಾಗಿದ್ದಳು. ಸ್ಲಿಮ್, ಅಟ್ರ್ಯಾಕ್ಟಿವ್, ಸ್ಮಾರ್ಟ್, ಬ್ಲ್ಯಾಕ್ ಬ್ಯೂಟಿ, ಮಾತ್ರವಲ್ಲ ಪ್ರೊಫೆಶನಲ್ ಬೇರೆ!. ಇವಳಿಂದ ಆಕರ್ಷಿತನಾದೆ. ಇದರಿಂದಾಗಿ ಎರಡು ಆಯ್ಕೆಗಳಲ್ಲಿ ಇದೇ ಬೆಟರ್ ಅನ್ನಿಸಿತು. ಈ ಕಂಪನಿಗೆ ಸೇರುವುದು ಪಕ್ಕಾ ಆಯಿತು. ಯಶಸ್ವಿಯಾಗಿ ಇಂಟರ್‌ವ್ಯೂ ಮುಗಿಸಿ ಮನೆಗೆ ವಾಪಸಾದೆ. ಅಲ್ಲಿ ಅವಳು ನನಗಾಗಿ ಕಾಯುತ್ತಿದ್ದಳು. ಒಂದೆರಡು ದಿನಗಳಲ್ಲಿ ಆ ಕಂಪನಿಯಿಂದ ಮೆಸೇಜ್ ಸಿಕ್ತು ನೀವು ಆಯ್ಕೆಯಾಗಿದ್ದೀರಿ ಅಂತ. ಆಗಲೂ ಇನ್‌ಬಾಕ್ಸ್‌ನಲ್ಲಿದ್ದ ಈ ಸಂದೇಶವನ್ನು ನನ್ನ ಕೈಗಿತ್ತವಳು ಇವಳೇ. ಆಗ ನನಗಾದ ವಿರಹ ವೇದನೆ ಅಷ್ಟಿಷ್ಟಲ್ಲ. ಹೇಗೋ ಬಿಟ್ಟು ಬಂದೆ.

ಹೊಸ ತಾಣ. ಕೆಲವೇ ದಿನಗಳಲ್ಲಿ ಇಲ್ಲಿನವಳೇ ನನಗೆ ಆಪ್ತಳಾದಳು. ನಂತರ ಸ್ನೇಹ, ಪ್ರೀತಿ ಸಿಕ್ಕಾಪಟ್ಟೆ ಫಾಸ್ಟ್ ಆಗಿಯೇ ಆಗಿ ಹೋಯ್ತು. ಹೀಗೆ ದಿನ ಕಳೆಯುತ್ತಿರುವಾಗ ನಾನೊಮ್ಮೆ ರಜೆ ತೆಗೆದುಕೊಂಡು ಊರಿಗೆ ಹೋದೆ. ನಾನೆಣಿಸಿದ್ದೆ ಅವಳು ನನಗಾಗಿ ಕಾಯುತ್ತಿರಬಹುದೆಂದು, ಆದರೆ ಹಾಗಾಗಲಿಲ್ಲ. ಅವಳು ಬೇರೊಬ್ಬರಿಗೆ ಹೊಂದಿಕೊಂಡಿದ್ದಳು. ನಾನು ಅವಳನ್ನು ಮಾತನಾಡಿಸಿದೆ. ಆದರೆ ಅಷ್ಟು ಸಲಿಗೆ ಇರಲಿಲ್ಲ. ಆಗ ನಾನು ಸ್ವಘೋಷಿತ ಪ್ರೊಫೆಶನಲ್ ಲವರ್ ಹಾಗೆಯೇ ಮನಸ್ಸಿನಲ್ಲಿಯೇ "ಚಿಂತಿಸಬೇಡ ಮ್ಯಾನ್. ನಿನಗೆ ನಿನ್ನ ನೌಕರಿಯ ತಾಣದಲ್ಲಿ ಮತ್ತೊಂದು ಆಯ್ಕೆ ಇದೆಯಲ್ಲ" ಅಂತ!

ಈಗ ನನ್ನ ಲವ್‌ಗೆ ವೈರಸ್ ದಾಳಿ ಮಾಡದಂತೆ ಪಕ್ಕಾ ಆಂಟಿವೈರಸ್ ಇಲ್ಲಿದೆ. ನನ್ನ ಸೆಕೆಂಡ್ ಡೀಪೆಸ್ಟ್ ಲವ್ ಮುಂದುವರಿಯುತ್ತಿದೆ... ಅಡ್ಡಿ ಪಡಿಸಬೇಡಿ...

ಇತೀ,
ಮುಂದಿನ ಪ್ರೇಯಸಿ Windows-7 ಗಾಗಿ ಕಾಯುತ್ತಿರುವ...
ಪ್ರೊಫೆಶನಲ್ ಎಕ್ಸ್‌ಪಿ ಕಂಪ್ಯೂಟರ್ ಪ್ರೇಮಿ

ಪ್ರೀತಿಯಲ್ಲಿ ಇರೋ ಸುಖ ಗೊತ್ತೇ ಇರಲಿಲ್ಲ..!

Sat, 07 Feb 2009 15:16:03 +0530

ನಿಜಕ್ಕೂ ಅವಳಲ್ಲಿ ಅಂತಹಾ ಸೌಂದರ್ಯವಿರಲಿಲ್ಲ... ಆದರೂ ಅವಳಂದ್ರೆ ನನಗಿಷ್ಟ. ಯಾಕೆ..? ಊಹುಂ.. ಇಂತಹ ಪ್ರಶ್ನೆಗಳಿಗೆ ಉತ್ತರ ಸಿಗುವುದೋ ಎಂದು ಮಧ್ಯರಾತ್ರಿಗಳಲ್ಲೂ ಎದ್ದು ಮನಸ್ಸಿನ ಬುಡ್ಡಿಗೆ ಕನಸಿನ ಎಣ್ಣೆ ಹೊಯ್ದು ತಡಕಾಡಿದ್ದಿದೆ. ಬೀರುವಿನಲ್ಲಿಟ್ಟದ್ದನ್ನು ಹುಡುಕುವವನಂತೆ. ನನ್ನಲ್ಲೇ ಕೇಳಿಕೊಂಡು ಸುಸ್ತಾಗಿ ಅವಳ ಮಡಿಲಲ್ಲೇ ನಿದ್ದೆ ಮಾಡುವವನಂತೆ ಬಿದ್ದುಕೊಂಡ ದಿನಗಳೆಷ್ಟೋ.. ಉತ್ತರ ಮಾತ್ರ ನನ್ನಿಂದ ದೂರ... ಬಹುದೂರ.. ಇನ್ನೂ ಸಿಕ್ಕಿಲ್ಲ..!

ನಾನಂದ್ರೆ ಅವಳಿಗೂ ಇಷ್ಟ..! ಯಾಕೆ..? ಅವಳಿಗೂ ಗೊತ್ತಿಲ್ಲ.. ಉತ್ತರ ಸಿಕ್ಕಿಲ್ಲವೆಂದಲ್ಲ. ಹುಡುಕ ಹೋದವಳು ಇನ್ನೂ ಬಂದಿಲ್ಲ. ಬಹುಶಃ ಬರುವುದಿಲ್ಲ.. ಹೊತ್ತು ನೆತ್ತಿಗೆ ಬಂದರೂ ಇನ್ನೂ ಎರಡು ಜಡೆಯ ಹುಡುಗಿಯ ಕನಸು ಕಾಣುತ್ತಿರುವ ನನಗಿದು ಅರ್ಥವಾಗದು ಎಂದವಳಂದುಕೊಂಡಿರಬಹುದೇ?

ಬರುತ್ತಾಳೆನ್ನುವುದು ನನ್ನ ಪ್ರೀತಿಯ ನಂಬಿಕೆ; ಬರುವುದು ನನ್ನ ಪ್ರೀತಿಯ ಸಾಮರ್ಥ್ಯ. ಬರಬಹುದು, ಬರದಿದ್ದರೆ... ಬರುತ್ತಾಳೆ.. ಬರಲೇಬೇಕು. ಗೊಂದಲಗಳು ಕುಣಿಯುತ್ತಿವೆ.. ಮತ್ತೆ ಮತ್ತೆ ಕಾಡುತ್ತಿವೆ. ಬರಲಿಕ್ಕಿಲ್ಲ.. ಬಂದರೂ ಹಾಳು ಪ್ರೀತಿ ದೂರವಿರಲಿ. ಮರೆಯುವ ಕಾರಣಗಳೇ ದೂರಾಗುತ್ತಿವೆ. ಯಾಕೆ ಈ ಪರಿಯಾಗಿ ಕಾಡುತ್ತಿದ್ದಾಳೆ.. ನೋವು ಕೊಟ್ಟವಳು ಎಂದು ನಾನು ಹೇಳಲಾರೆ. ಈಗ ನೇರಾನೇರ ಕೇಳುತ್ತಿದ್ದೇನೆ - ನನ್ನ ಸಾಮ್ರಾಜ್ಯಕ್ಕೆ ಬರ್ತೀಯಾ?

IFM

ಸಿಗರೇಟು ಸುಟ್ಟಾಗ ನಿನ್ನ ನೆನಪುಗಳು ಮಾಸಬಹುದೇನೋ ಅಂದು ಕೊಂಡೆ. ನೀನು ಸುಡುವಷ್ಟು ನೋವನ್ನು ನನಗೆ ಕೊಟ್ಟವಳಲ್ಲ ಎಂದು ತಿಳಿದ ಮೇಲೆ ನಿನ್ನ ಜತೆ ಆ ಚಟವೂ ಸೇರಿಕೊಂಡಿದೆ ಹುಡುಗಿ. ನೀನು ಅದಕ್ಕೆ ಮದ್ದಾಗುತ್ತೀಯೆಂಬ ನಂಬಿಕೆ ನನ್ನಲ್ಲಿ ಉಳಿದಿಲ್ಲ. ಆದರೂ ಯಾಕೋ ನೀನು ಬೇಕೆನಿಸುತ್ತಿದ್ದಿ.

ನಿನ್ನ ಕನಸುಗಳಿಗೆ ಬಣ್ಣ ಮೆತ್ತುವಷ್ಟು ಮೆರುಗು ನನ್ನಲ್ಲಿದೆ ಅಂದುಕೊಂಡವನಲ್ಲ. ನಾನೋ ಬರಿ ಮೈಯವ ಅಂದುಕೊಂಡು ಇನ್ನೂ ಮನಸ್ಸಿನಲ್ಲೇ ಗೂಡು ಕಟ್ಟಿ ತಿರುಗುವ ಅಬ್ಬೇಪಾರಿ. ಸಂಸಾರದ ಚಿಂತೆ ಇನ್ನೂ ತುಂಬಾ ದೂರವಿದೆ ಎಂಬ ಆಲಸ್ಯ. ನಿಧಾನವಾಗಿ ಕೂತು ಯೋಚಿಸಿದಾಗ ನೆನಪಾಗುತ್ತದೆ ಇಪ್ಪತ್ತರ ಮೇಲಿನ ಮತ್ತೇಳು ಮುಗಿಯಿತೆಂದು..! ಬದುಕಿನ ಬಗ್ಗೆ ಬೆಟ್ಟದ ಕಲ್ಪನೆಗಳು ನನಗಿಲ್ಲ. ಹುಳುಕು ತೊಳೆದು ಸ್ವಚ್ಛವಾಗಿ ನಿನ್ನ ಜತೆಗಿರಬಲ್ಲೆನೆಂಬ ಭರವಸೆ ನಾಲಗೆಯ ತುದಿಯಲ್ಲಿದೆ. ಆದರೂ ಏಕೋ..

ಯಾಕೋ ನಿನ್ನಷ್ಟು ಆಪ್ತರು ಇತ್ತೀಚೆಗೆ ಯಾರು ಸಿಗುತ್ತಿಲ್ಲ. ಆದರೂ ನನ್ನ ಎಡಗಾಲು ಬೇಡ ಅನ್ನುತ್ತಿದೆ ಹುಡುಗಿ. ಏನ್ಮಾಡಲಿ.. ಬಿಸಿ ನೀರಿನ ಸ್ನಾನದ ಕೋಣೆಯಲ್ಲಿಯೂ ಸಣ್ಣಗೆ ನಡುಗುವ ನನಗೀಗ ನೀನೇ ನೆನಪಾಗುತ್ತಿ. ಬಹುಶಃ ಮತ್ತೆ ಪ್ರೀತಿಯ ಗಾಳಿ ನನ್ನ ಕಡೆ ಬೀಸುತ್ತಿದೆ ಎಂದುಕೊಂಡಿದ್ದೇನೆ... ನೀರವತೆ ಕಡಿಮೆಯಾಗುತ್ತಿದೆ. ನೋವುಗಳು ಮಾಯವಾಗುತ್ತಿವೆ. ಕಲಿಸಿದ್ದು ನೀನೇ ತಾನೆ..

ಪ್ರೀತಿಯ ಮಾತುಗಳು ಮತ್ತೆ ನನ್ನ ಬಾಯಿಯಿಂದ ಬರುತ್ತಿದೆ. ನಿನ್ನಿಷ್ಟದ ಫಲವತ್ತಾದ ಹಳೆ ಮಾತುಗಳಿಗೆ ಮತ್ತೆ ಮೊರೆ ಹೋಗುತ್ತಿದ್ದೇನೆ.. ಅವುಗಳಿಗೆ ಕಿವಿಯಾಗುತ್ತಿದ್ದೇನೆ. ಪಕ್ಕನೆ ಮುಖ ನೋಡಿದವರೆಲ್ಲ ಪ್ರೀತಿಗಿಲ್ಲಿ ಜಾಗವಿರಲಿಕ್ಕಿಲ್ಲವೆಂದುಕೊಂಡವರೇ. ಮೋಸ ಮಾಡಿದವನು ಎಂಬ ಹಣೆ ಪಟ್ಟಿ ಬೇರೆ ಥಳುಕು ಹಾಕಿಕೊಂಡಿದೆ. ಅದನ್ನೆಲ್ಲ ತಿಳಿಯುವ ಅವರಿಗೆಲ್ಲಿಯ ತಾಳ್ಮೆ ಬಿಡು. ನಿನ್ನಷ್ಟು ನನ್ನನ್ನು ಹಚ್ಚಿಕೊಂಡಿರಲಿಕ್ಕಿಲ್ಲ ಎಂದು ಆಗೆಲ್ಲ ಅಂದುಕೊಳ್ಳುತ್ತೇನೆ. ಮತ್ತೆ ನಿಜ ಮಾಡ್ತೀಯಾ ಚಿನ್ನಾ..?

PTI

ನಮ್ಮ ಉತ್ತುಂಗದ ದಿನಗಳು ದೂರವಿಲ್ಲ ಎಂಬಂತೆ ಬಯಲುದಾರಿಗಳು ಕಾಣಿಸುತ್ತಿವೆ. ತೇಲುಗಣ್ಣಿನ ಪರದೆಯಲ್ಲಿ ಹಚ್ಚ ಹಸುರ ದಿನಗಳು ತೇಲಿ ಬರುತ್ತಿವೆ. ಆ ದಿನಗಳು ಮರೆಯಲಾಗದ್ದು ಎಂಬುದು ನಮಗಿಂತ ಹೆಚ್ಚು ಬೇರೆ ಯಾರಿಗೂ ತಿಳಿದಿರಲು ಸಾಧ್ಯವಿಲ್ಲ ಬಿಡು. ಪ್ರೀತಿಯಲ್ಲಿ ಅಷ್ಟೆಲ್ಲ ಸುಖಗಳಿರುತ್ತವೆ ಎಂದು ತಿಳಿಸಿ ಹೇಳಿದವಳು ನೀನೇ ತಾನೇ? ಅದು ನಿಜಕ್ಕೂ ಪ್ರೀತಿಯಾಗಿತ್ತಾ ಅಥವಾ ವ್ಯಾಮೋಹವೇ ಎಂದು ನಂತರದ ದಿನಗಳಲ್ಲಿ ಬಿಟ್ಟೂ ಬಿಡದೆ ಕಾಡಿದ್ದಿದೆ. ಮೋಹವಿಲ್ಲದ ಪ್ರೀತಿಯಾದರೂ ಎಂತಹುದು ಎಂದು ನಾನು ಅದನ್ನು ಪ್ರೀತಿಯೆಂದೇ ನಂಬಿಕೊಂಡಿದ್ದೇನೆ.

ನಿಜಕ್ಕೂ ನಾನು ನಿನಗೆ ಇಷ್ಟವಾಗಿದ್ದೆನಾ? ಇದು ನನಗೆ ಆಗಾಗ ಕಾಡುವ ಪ್ರಶ್ನೆ. ಉತ್ತರಿಸಲು ನನ್ನ ಬಳಿ ಯಾರಿದ್ದಾರೆ? ಅದಷ್ಟೂ ವರ್ಷಗಳಿಂದ ಕೆರೆಸಿಕೊಂಡ ಗಡ್ಡವೂ ಒರಟೊರಟಾಗತೊಡಗಿದೆ. ಎಷ್ಟಾದರೂ ನೀನು ನೇವರಿಸಿದ್ದಲ್ಲವೇ ಎಂಬುದಕ್ಕೆ ಈಗಲೂ ಕೈಯಾಡಿಸುತ್ತಿರುತ್ತೇನೆ. ಆಗಲೂ ಯೋಚನೆ ಅದೇ.. ಮತ್ತೆ ಬರುತ್ತೀಯಾ..?

- ಭುವನ್ ಪುದುವೆಟ್ಟು

ಪ್ರೀತಿಯಲ್ಲಿ 'ಬಿದ್ದ' ಮಾನಸಿಕ ರೋಗಿಗಳ ಬಗ್ಗೆ...

Sat, 07 Feb 2009 15:06:16 +0530

ಪ್ರಭು
ನಮ್ಮದು ನೈಜ ಪ್ರೇಮ. ನಾನು ಅವಳನ್ನು ಒಂಬತ್ತು ವರ್ಷಗಳಿಂದ ಪ್ರೀತಿಸುತ್ತಿದ್ದೇನೆ. ಇದುವರೆಗೂ ಅವಳ ಮೈ ಮುಟ್ಟಿದವನಲ್ಲ. ಅವಳ ಸೌಂದರ್ಯಕ್ಕೆ ಮಾರು ಹೋಗಿ ನಾನು ಆಕೆಯನ್ನು ಪ್ರೀತಿಸಿದ್ದಲ್ಲ. ಅವಳ ವಿಶಾಲ ಹೃದಯಕ್ಕೆ ನಾನು ಸೋತು ಹೋಗಿದ್ದೇನೆ. ಆಕೆಯ ಮುಗ್ಧ ಮಾತುಗಳು ನನ್ನನ್ನು ಕಟ್ಟಿ ಹಾಕಿವೆ. ಅವಳ ಕಣ್ಣುಗಳು ನನ್ನನ್ನು ಸೆಳೆದಿವೆ. ಅವಳಿಲ್ಲದೆ ನನ್ನ ಬದುಕಿಲ್ಲ. ಅವಳೇ ಎಲ್ಲ... ಹೀಗೆ ಎಂಟು ಕ್ಯಾರೆಟ್‌ ಪ್ರೇಮಿಯೊಬ್ಬ ತನ್ನ ರೋಗದ ಲಕ್ಷಣಗಳನ್ನು ಹೇಳುತ್ತಾ ಹೋಗುತ್ತಾನೆ.

ನೀನು ಎಷ್ಟು ಸೌಂದರ್ಯವತಿ ಎಂದು ನನಗೆ ತಿಳಿದಿಲ್ಲ ಪ್ರಿಯೆ. ಯಾಕೆಂದರೆ ನೀನು ಸಿಕ್ಕಾಗಲೆಲ್ಲಾ ನಿನ್ನ ಕಣ್ಣು ನೋಡುವುದರಲ್ಲೇ ಕಾಲ ಕಳೆದುಹೋಗುತ್ತದೆ. ಅದೆಷ್ಟು ಸುಂದರವಾಗಿದೆ. ಆ ವಿಶಾಲ ಕಣ್ಣುಗಳೇ ಎಲ್ಲವನ್ನೂ ಹೇಳುತ್ತಿವೆ. ನೀನು ಕೊಡುವ ಮಿಸ್ ಕಾಲ್‌ನಿಂದಲೇ ನನ್ನ ಮುಂಜಾನೆ ಆರಂಭ. ನೀನಿಲ್ಲದ ಬಾಳು ಅದು ಬಾಳೇ ಅಲ್ಲ. ನಿಜಕ್ಕೂ ನಾನೆಷ್ಟು ಅದೃಷ್ಟವಂತ. ನಾನು ನಿಜಕ್ಕೂ ಇದುವರೆಗೆ ನಿನ್ನನ್ನು ಕಾಮದ ದೃಷ್ಟಿಯಿಂದ ನೋಡಿದವನೇ ಅಲ್ಲ. ನಿನ್ನನ್ನು ನೋಡಿದಾಗ ಆ ಭಾವನೆಯೇ ಬರುತ್ತಿಲ್ಲ. ಯಾಕೋ ನಿನ್ನನ್ನು ಬಿಟ್ಟಿರಲು ನನ್ನಿಂದಾಗದು. ನನ್ನ ಕನಸುಗಳಿಗೆ ಬಣ್ಣ ಹಚ್ಚುವ ತಾಕತ್ತಿದ್ದರೆ ಈ ಜಗತ್ತಿನಲ್ಲಿ ಅದು ನಿನಗೊಬ್ಬಳಿಗೆ ಮಾತ್ರ ಸಾಧ್ಯ.... ಇದು ಮತ್ತೊಬ್ಬ ಪೀಡಿತನ ಅಳಲು.

IFM

ಅವನ ಬಾಯಿಯಿಂದ ಇದುವರೆಗೂ ಒಂದೇ ಒಂದು ಮಾತು ತಪ್ಪಿ ಬಂದಿಲ್ಲ. ಅಷ್ಟೊಂದು ಸಚ್ಚಾರಿತ್ರ್ಯವಂತ ನನ್ನವನು. ಅವನನ್ನು ಅವನೇ ಸ್ವತಃ ಪ್ರೀತಿಸುವುದಕ್ಕಿಂತಲೂ ಹೆಚ್ಚಾಗಿ ನನ್ನನ್ನು ಅವನು ಪ್ರೀತಿಸುವಂತಹಾ ಕಾಳಜಿ. ಈ ಬಗ್ಗೆ ನನಗೆ ಬಗ್ಗೆ. ಅಮ್ಮನಿಗೆ ಹುಷಾರಿಲ್ಲವೆಂದಾಗ ಮನೆಯ ಕೆಲಸಕಾರ್ಯ ಬಿಟ್ಟು ಸುಳ್ಳು ಹೇಳಿ ಬಂದವನು. ಅವನನ್ನು ಬಿಟ್ಟಿರಲು ನನ್ನಿಂದ ಸಾಧ್ಯವಾಗದು. ಮದುವೆ ಎಂದಾದರೆ ಅವನನ್ನೇ. ಇಲ್ಲವೆಂದಾದರೆ ನಾವಿಬ್ಬರೂ ಆತ್ಮಹತ್ಯೆ ಮಾಡಿಕೊಳ್ಳಲೂ ಹಿಂದೇಟು ಹಾಕುವವರಲ್ಲ...

ಇಂತವರನ್ನು ಮಾನಸಿಕ ಅಸ್ವಸ್ಥರು ಎನ್ನದೆ ಬೇರೆ ಪದಗಳು ಶಬ್ದಕೋಶದಲ್ಲಿ ಸಿಗುತ್ತಿಲ್ಲ. ನಿಜಕ್ಕೂ ಆ ಜೋಡಿ ಒಬ್ಬರನ್ನೊಬ್ಬರು ಪ್ರೀತಿಸಿರುತ್ತಾರಾ? ನಂಬಿಕೆಯಿಲ್ಲ. ಅವರಿಗೆ ಅದೇನೋ ಕಳೆದುಕೊಳ್ಳುವ ಭಯ ಮತ್ತು ಉಳಿಸಿಕೊಳ್ಳಲು ಹೆಣಗಾಡುವ ಪರಿಯನ್ನೇ ಪ್ರೀತಿ ಎಂದುಕೊಂಡು ಮರುಗುತ್ತಾರೆ. ಲೋಕ ಮರೆತು, ಲೋಕದಲ್ಲೇನು ನಡೆಯುತ್ತಿದೆ ಎಂಬುದರ ಪರಿವೆಯೇ ಇಲ್ಲದೆ, ಪ್ರೀತಿಯೇ ಲೋಕ ಎಂದುಕೊಳ್ಳುತ್ತಾರೆ. ಇಲ್ಲಿ ಪ್ರೀತಿಯ ಹೊರತು, ಉಳಿದೆಲ್ಲ ಹಕ್ಕುಗಳು, ಕರ್ತವ್ಯಗಳು ಗೌಣವಾಗುತ್ತವೆ.

ಸೌಂದರ್ಯದ ಬಗ್ಗೆ ಆಸ್ವಾದನೆ ಹೊಂದಿರದ ಆಕೆ/ಆತ ಪ್ರೀತಿಸುವುದು ಏನನ್ನು? ಮನಸ್ಸಿನ ವಿಚಾರ ಬಿಟ್ಹಾಕಿ.. ಮ‌ೂರು ದಿನಕ್ಕೆ ಶುದ್ಧವಾಗಿ ಮೈಲಿಗೆ ಮಾಡಿಕೊಳ್ಳುವಂತ ದೇಹಕ್ಕಿಂತಲೂ ಶುದ್ಧ ಅವಿವೇಕತನದ್ದು. ಹುಡುಗಿ ಅಥವಾ ಹುಡುಗ ಆಕರ್ಷಿತರಾಗುವುದು ಭಿನ್ನ ಲಿಂಗಿಗಳ ಕಡೆಗೇ ಯಾಕೆಂದು ಯೋಚಿಸುವಷ್ಟು ಮುಗ್ಧರಲ್ಲ ಯಾರು ಕೂಡ. ಆದರೂ ಯೋಚಿಸಿದವರಲ್ಲ. ಅಕ್ಕ ಪಕ್ಕ ಕೂರಲೂ ಹೆದರಿ, ಮಾರು ದೂರದಿಂದಲೇ ಪ್ರೀತಿಸುವ, ಇದುವೇ ನಿಜ ಪ್ರೀತಿ ಎಂದುಕೊಂಡು ಭಾವನಾ ಲೋಕದಲ್ಲಿಯೇ 'ಹಾಗಾಗುತ್ತದೆ, ಹೀಗಾಗುತ್ತದೆ, ಹೀಗಾಗಬಹುದು, ಹಾಗಾಗಬಹುದು' ಎನ್ನುತ್ತಾ ಮಂಡಿಗೆ ಮೆಲ್ಲುತ್ತಾ, ಮನಸ್ಸು ಕೆಡಿಸಿಕೊಳ್ಳುವ ಇವರದ್ದೂ ಪ್ರೀತಿಯೆನ್ನುವವರಿಗೆ ನನ್ನ ವಿರೋಧವಿದೆ.

ಹಾಗಂತ ಮೈ ಥಳುಕು ಹಾಕಿಕೊಂಡು ಸುತ್ತಾಡಬೇಕೆಂಬುದನ್ನು ನಾನು ಸಮರ್ಥಿಸುತ್ತಿದ್ದೇನೆ ಎಂದರ್ಥೈಸಿಕೊಳ್ಳಬೇಕಾಗಿಲ್ಲ. ಭಾರತೀಯ ಸಂಸ್ಕೃತಿಯನ್ನು ಗೌರವಿಸುವುದು ನಮ್ಮ ಧರ್ಮ. ಮಾನವನು ಸಂಸ್ಕೃತಿಯನ್ನು ಬಿಟ್ಟು ಯಂತ್ರಗಳಂತಿರಬೇಕು ಎನ್ನುವ ಪಾಲಿಸಿಗೂ ನಾನು ಬದ್ಧನಲ್ಲ. ನೇರಾನೇರ ನೆಟ್ಟಗೆ ಮಾತಾಡದೆ, ಮೌನರಾಗವನ್ನೇ ಪ್ರೀತಿಯ ರಾಗವದು ಎಂದು ಮನದೊಳಗಿನ ಅಳುಕಿನ ನಡುವೆಯೇ ಖಡಾಖಂಡಿತವಾಗಿ "ಭಾವಿಸುತ್ತಾ" ದಿನಾ ಜೀವಂತ ಸಾಯುತ್ತಿರುವವರನ್ನು ಕಂಡಾಗ ಕರುಣೆಯುಕ್ಕುತ್ತದೆ.

ಮೈಮೇಲೆ ಬಿದ್ದೆದ್ದವರ ಪ್ರೀತಿಯನ್ನೂ ಕಂಡಿದ್ದೇವೆ. ಅವರದ್ದು ಹೊಲಸು ಪ್ರೀತಿಯೆಂದು ನಾನು ಹೇಳಲಾರೆ. ಹಾಗಾದರೆ ಸೊಗಸು? ಬಹುಶಃ ಮೊದಲು ಮಾತ್ರ ಅದು ಸೊಗಸು. ಅದರ ಹಂತಗಳಾದ 'ಸೆಳೆ', 'ಕಲೆ', 'ಬಲೆ'ಗಳಲ್ಲಿ ಬೀಳದವರ‌್ಯಾರು? ಋಷಿ-ಮುನಿಗಳು ಎಂದಾದರೂ ಬ್ರಹ್ಮಚಾರಿಗಳು ಎಂದು ಘೋಷಿಸಿದ್ದುಂಟೇ?

ಹಾಗಾದರೆ ನಿಷ್ಕಾಮ, ನಿಸ್ವಾರ್ಥ, ಪರಿಶುದ್ಧ ಪ್ರೀತಿ ಈಗ ಎಲ್ಲೂ ಕಾಣಲು ಸಿಗುತ್ತಿಲ್ಲ ಅಂತೀರಾ?

ಪ್ರೇಮಾಭಿವ್ಯಕ್ತಿಯಿಂದ ಸಂಸ್ಕೃತಿ ನಾಶವೇ?

Thu, 05 Feb 2009 13:59:10 +0530

'ಅಭಿ'ಮನ್ಯು
WD
ವ್ಯಾಲೆಂಟೈನ್ಸ್ ಡೇ!.... ಇತ್ತೀಚೆಗಿನ ದಿನಗಳಲ್ಲಿ ಬಹಳ ಚರ್ಚೆಯಾಗುತ್ತಿರುವ ವಿಷಯ. ಕೆಲವೇ ಕೆಲವು ವರ್ಷಗಳ ಹಿಂದೆ ಇಂಥದ್ದೊಂದು ಆಚರಣೆ ಇದೆ ಎಂಬುದೇ ಹೆಚ್ಚಿನವರಿಗೆ ಗೊತ್ತಿರಲಿಲ್ಲ. ಕರ್ನಾಟಕದ ಮಟ್ಟಿಗೆ ಮಾತ್ರ ಹೇಳಬಹುದಾಗಿದ್ದರೆ, ಬೆಂಗಳೂರು ಯಾವಾಗ ಸಾಫ್ಟ್‌ವೇರ್ ಕೇಂದ್ರವಾಗಿ, ದೇಶ-ವಿದೇಶಗಳ ದೊಡ್ಡ ದೊಡ್ಡ ಐಟಿ-ಬಿಟಿ ಕಂಪನಿಗಳು ಇಲ್ಲಿ ಠಿಕಾಣಿ ಹೂಡಿದವೋ, ಈ ಜಾಗತೀಕರಣದೊಂದಿಗೇ ಪಾಶ್ಚಾತ್ಯ ಸಂಸ್ಕೃತಿಗಳೂ ನಮ್ಮ ನಾಡಿಗೆ ಬಂದುಬಿಟ್ಟವು, ನಮ್ಮೊಳಗೊಂದಾಗಿಹೋದವು.

ಪಬ್ ಸಂಸ್ಕೃತಿಗೆ ಮತ್ತಷ್ಟು ಒತ್ತು ದೊರೆಯಿತು, ಪಾಶ್ಚಾತ್ಯರು ದಿನಕ್ಕೊಂದರಂತೆ ಆಚರಿಸುವ ಫಾದರ‌್ಸ್ ಡೇ, ಮದರ‌್ಸ್ ಡೇ, ಎಲ್ಡರ‌್ಸ್ ಡೇ, ಫ್ರೆಂಡ್‌ಶಿಪ್ ಡೇ, ಲವ್ ಡೇ, ಆ ಡೇ, ಈ ಡೇ ಮುಂತಾದವುಗಳು ಸಾಲು ಸಾಲಾಗಿ ನಮ್ಮಲ್ಲೂ ಕಾಣಿಸಿಕೊಳ್ಳತೊಡಗಿದವು. ಅದಾಗಲೇ ಪಾಶ್ಚಾತ್ಯ ಜೀವನಶೈಲಿಗೆ ಮಾರುಹೋಗಿರುವ ಭಾರತೀಯರು ಅವುಗಳೆಲ್ಲವನ್ನೂ ತಮ್ಮದಾಗಿಸಿಕೊಳ್ಳತೊಡಗಿದರು. ಅವುಗಳಲ್ಲಿರುವ ಕಾಳಿನ ಜೊತೆ ಜೊಳ್ಳೂ ಸೇರಿಕೊಂಡಿತು. ಸಂಭ್ರಮ ಪಡುವುದಕ್ಕೇನು ಕಾರಣ ಬೇಕೇ? ಇಡೀ ವರ್ಷ ಊರಿನಿಂದ ದೂರವಾಗಿದ್ದುಕೊಂಡವರು, ತಮ್ಮ ತಂದೆ-ತಾಯಿಯನ್ನು ನೆನಪಿಸಿಕೊಳ್ಳಲು ಫಾದರ್ಸ್ ಡೇ, ಮದರ್ಸ್ ಡೇಯನ್ನು ನೆಪವಾಗಿಸಿಕೊಂಡರು. ಅಜ್ಜ-ಅಜ್ಜಿಯರನ್ನು ನೆನಪಿಸಿಕೊಳ್ಳುವವರು ಎಲ್ಡರ್ಸ್ ಡೇಗೆ ಮೊರೆ ಹೋದರು. ಕಾಲೇಜು ಮೆಟ್ಟಿಲಿಳಿದು ನೌಕರಿಗೆ ಸೇರಿಕೊಂಡು ದೂರವಾದವರು ತಮ್ಮ ಗೆಳೆಯರನ್ನು ನೆನಪಿಸಿಕೊಳ್ಳಲು ಫ್ರೆಂಡ್‌ಶಿಪ್ ಡೇಯನ್ನು ಒಪ್ಪಿಕೊಂಡರು, ಅಪ್ಪಿಕೊಂಡರು.

ಆದರೆ ಲವರ‌್ಸ್ ಡೇ ಎಂದು ಕರೆಯಲಾಗುವ ವ್ಯಾಲೆಂಟೈನ್ಸ್ ಡೇ?

ಪ್ರೇಮವೆಂಬುದು ನಿತ್ಯ ನೂತನ ಎಂಬುದು ನಿರ್ವಿವಾದ. ಅದನ್ನು ವ್ಯಕ್ತಪಡಿಸಲು ವ್ಯಾಲೆಂಟೈನ್ಸ್ ದಿನವೇ ಏಕೆ ಬೇಕು? ಲವ್ ಅನ್ನೋ ಭಾವನಾಲೋಕದಲ್ಲಿ ಯಾರು ತೇಲಾಡುತ್ತಿರುತ್ತಾರೋ ಅವರು ಯಾವಾಗ ಬೇಕಾದ್ರೂ ಐ ಲವ್ ಯು ಅಂತ ಅನ್ನಬಹುದಲ್ವಾ ಅನ್ನೋ ಎವರ್‌ಗ್ರೀನ್ ಸತ್ಯದಿಂದ ಹಿಡಿದು, ಐ ಲವ್ ಯು ಎಂಬ ಮೂರು ಆಪ್ಯಾಯಮಾನ ಶಬ್ದಗಳನ್ನು ಉಸುರಲು ಆ ದಿನಕ್ಕೇ ಯಾಕೆ ತಡಕಾಡಬೇಕು, ಹೋಗಲಿ, ಪ್ರೀತಿ ಮಾಡುತ್ತಲೇ ಇರಲಿ, ಅದನ್ನು ಇಡೀ ಜಗತ್ತೇ ಅರಿಯಬೇಕು ಎಂಬ ಹಠಮಾರಿತನದ ಧೋರಣೆಯ 'ಆಚರಣೆ' ಏಕೆ ಬೇಕು, ಪ್ರೀತಿಸುತ್ತಿರುವುದು ಪರಸ್ಪರರಿಗೆ ಗೊತ್ತಾದರೆ ಸಾಕು, ಇಡೀ ಜಗತ್ತಿಗೇ ಅದು ತಿಳಿಯಲಿ ಅಂದುಕೊಳ್ಳುವುದು ಸರಿಯಲ್ಲ ಎನ್ನುವಲ್ಲಿವರೆಗೆ ವಾದ-ವಿವಾದಗಳು ನಡೆಯುತ್ತಲೇ ಇವೆ.

ಮಂಗಳೂರಿನಲ್ಲಿ ಪ್ರಾಯಕ್ಕೆ ಬಂದ ಹುಡುಗಿಯರು ಅರೆಬರೆ ಬಟ್ಟೆ ತೊಟ್ಟು ಪಬ್‌ನಲ್ಲಿ ಕುಡಿಯುತ್ತಾರೆ, ಕುಣಿಯುತ್ತಾರೆ, ಭಾರತೀಯ ಸಂಸ್ಕೃತಿ ನಾಶವಾಗುತ್ತಿದೆ ಅಂತೆಲ್ಲಾ ಕೂಗಾಡಿ, ಅವರ ಮೇಲೆ ದಾಳಿ ಮಾಡಿರುವ ಶ್ರೀರಾಮ ಸೇನೆ, ಇದೀಗ ವ್ಯಾಲೆಂಟೈನ್ಸ್ ದಿನದ ಮೇಲೆ ತನ್ನ ಕಾಕದೃಷ್ಟಿ ಬೀರಿದೆ. ಅದಕ್ಕೆ ಅದು ನೀಡುವ ಕಾರಣ 'ಭಾರತೀಯ ಸಂಸ್ಕೃತಿಯ ರಕ್ಷಣೆ'. ವ್ಯಾಲೆಂಟೈನ್ಸ್ ದಿನವನ್ನು ಆಚರಿಸಲು ಬಿಡುವುದಿಲ್ಲ, ಯಾರಾದ್ರೂ ಯುವ ಜೋಡಿಗಳು ಡೇಟಿಂಗ್ ಮಾಡುತ್ತಿರೋದು ಕಂಡು ಬಂದರೆ, ತಕ್ಷಣವೇ ಅವರಿಗೆ ಮದುವೆ ಮಾಡಿಸಿಬಿಡ್ತೀವಿ, ಕ್ಯಾಮರಾ ಮತ್ತು ಅರಶಿಣಕುಂಕುಮ ಹೊತ್ತ ಐದು ತಂಡಗಳನ್ನು ಈಗಾಗಲೇ ಬೆಂಗಳೂರಿನಲ್ಲಿ ಛೂ ಬಿಡಲಾಗಿದೆ ಎಂದಿದೆ ಶ್ರೀರಾಮ ಸೇನೆ. ಒಟ್ಟಿನಲ್ಲಿ ಇದು ವಿದೇಶೀ ಸಂಸ್ಕೃತಿ, ಅದು ಭಾರತೀಯರನ್ನು ಆವರಿಸುವುದನ್ನು ತಡೆಯಬೇಕು ಎಂಬುದು ಶ್ರೀರಾಮ ಸೇನೆ ಹೇಳಿಕೆ.

ಪ್ರೀತಿ ಪ್ರೇಮದ ಬಗ್ಗೆ ತನ್ನ ವಿರೋಧ ಅಲ್ಲ ಎಂಬುದನ್ನು ಈಗಾಗಲೇ ರಾಮಸೇನೆ ಮುಖ್ಯಸ್ಥ ಪ್ರಮೋದ್ ಮುತಾಲಿಕ್ ಸ್ಪಷ್ಟಪಡಿಸಿದ್ದಾರೆ. ಪ್ರೀತಿ ಮಾಡಲು ಒಂದು ದಿನ ಬೇಕಾಗಿಲ್ಲ. ಇವತ್ತು ಮಾಡಿ, ನಾಳೆ ಮಾಡಿ, ಯಾವಾಗ ಬೇಕಾದ್ರೂ ಮಾಡಿ. ಆದ್ರೆ ಅದರ 'ಆಚರಣೆ'ಯ ವಿದೇಶೀ ವಿಧಾನ ನಮಗೆ ಬೇಡ ಎಂದಿದ್ದಾರವರು ಐಬಿಎನ್ ಚಾನೆಲ್‌ಗೆ ನೀಡಿದ ಸಂದರ್ಶನದಲ್ಲಿ.

ಹಾಗಿದ್ದರೆ ಸಂಸ್ಕೃತಿಯ ರಕ್ಷಣೆಗೆ ಇವರಿಗೆ ಗುತ್ತಿಗೆ ಕೊಟ್ಟವರು ಯಾರು ಎಂಬ ಪ್ರಶ್ನೆ ಏಳದೇ ಬಿಡುವುದಿಲ್ಲ. ಇದು ಫ್ಯಾಸಿಸ್ಟ್ ಸಮಾಜವಲ್ಲ. ಇದು ಪ್ರಜಾಸತ್ತಾತ್ಮಕ ಸಮಾಜ. ಇಲ್ಲಿ ತಮಗೆ ಬೇಕಾದುದನ್ನು ಆಯ್ದುಕೊಳ್ಳುವ ಸ್ವಾತಂತ್ರ್ಯ ಎಲ್ಲರಿಗೂ ಇದೆ. ಅದರ ಬೆನ್ನಹಿಂದೆಯೇ ಬರುತ್ತದೆ - ಪ್ರಜಾಪ್ರಭುತ್ವ ಎಂದಾದರೆ, ಮನಬಂದಂತೆ ಏನು ಬೇಕಾದರೂ ಮಾಡಬಹುದೇ, ಇಲ್ಲಿ ಸ್ವೇಚ್ಛಾಚಾರಕ್ಕೆ ಅವಕಾಶವಿದೆಯೇ? ಎಂಬ ಮಗದೊಂದು ಪ್ರಶ್ನೆ.

ಅದೆಲ್ಲ ಬದಿಗಿಟ್ಟು, ಭಾರತೀಯ ಸಂಸ್ಕೃತಿ ಎಂಬುದೊಂದು ಇದೆ. ಇಲ್ಲಿ ಸಭ್ಯತೆ, ನೈತಿಕತೆ ಎಂಬುದು ಹಾಸು ಹೊಕ್ಕಾಗಿದೆ ಎಂಬ ಬಹುಕಾಲದಿಂದಲೂ ಅಸ್ತಿತ್ವದಲ್ಲಿರುವ ವಿವಾದಾತೀತ ವಾದವನ್ನು ಗಮನಿಸಿದರೆ, ಇಲ್ಲೂ ಕೂಡ ಯಾವುದು ಸಭ್ಯತೆ, ಯಾವುದು ಅಸಭ್ಯತೆ, ಅನೈತಿಕತೆ ಎಂಬ ಪ್ರಶ್ನೆ ಉದ್ಭವಿಸುತ್ತದೆ. ಸಭ್ಯತೆಯಿಂದ ಅಸಭ್ಯತೆಯೆಡೆಗೆ ಹೋಗುವ ಹಾದಿಯಲ್ಲಿ ಅವುಗಳನ್ನು ಬೇರ್ಪಡಿಸುವ 'ಗಡಿ' ನಿಯಂತ್ರಣ ರೇಖೆ ಯಾವುದು ಎಂಬುದು ಮಾತ್ರ ಅವರವರ ವಿವೇಚನೆಗೆ ಬಿಟ್ಟ ವಿಚಾರ. ಆದರೆ ವಿವೇಚನೆ? ಅದು ಕೂಡ ಸಂಕೀರ್ಣವಾದದ್ದೇ. ನಮಗೆ ಸರಿ ಅನ್ನಿಸಿದ್ದು, ಮತ್ತೊಬ್ಬರಿಗೆ ತಪ್ಪು ಅಂತ ಕಂಡುಬರಬಹುದು. ಅದಕ್ಕಿಂತಲೂ ಹೆಚ್ಚಾಗಿ, ಬೇರೆಯವರಿಗೆ ತಪ್ಪು ಅಂತ ಕಂಡಿದ್ದು, ನಮಗೆ ಸರಿ ಅನ್ನಿಸಬಹುದು!

ಜಗತ್ತು ಖಂಡಿತವಾಗಿಯೂ ಹಿಂದಿನಂತಿಲ್ಲ. ಬದಲಾವಣೆಯೇ ಜಗದ ನಿಯಮ. ಶಿಲಾಯುಗ, ಮಧ್ಯಯುಗ ಕಳೆದು ತಂತ್ರಜ್ಞಾನ ಯುಗದಲ್ಲಿದ್ದೇವೆ ನಾವು. ಕಾಲಕ್ಕೆ ತಕ್ಕಂತೆ ಕೋಲವೂ ಬದಲಾಗುತ್ತಿದೆ. ಆದರದು ಹಾಲಾಹಲವಾಗದಂತೆ ನೋಡಿಕೊಳ್ಳುವ ಜಾಣ್ಮೆ, ವಿವೇಕ ನಮ್ಮಲ್ಲಿರಬೇಕಷ್ಟೆ. ಸಾರ್ವಜನಿಕವಾಗಿ ಅಶ್ಲೀಲವಾಗಿ ವರ್ತಿಸದಂತೆ, ನಮ್ಮ ಸಮಾಜದ ನೈತಿಕತೆಗೆ ಧಕ್ಕೆಯಾಗದಂತೆ ನೋಡಿಕೊಳ್ಳುವ ಹೊಣೆಗಾರಿಕೆ ನಮ್ಮದೇ. ಸಮಾಜವೂ ನಿಂತ ನೀರಾಗಿಲ್ಲ. ಸದಾ ಪ್ರವಹಿಸುತ್ತಿರಬೇಕು. ಹಾಗಿದ್ದರೆ ಮಾತ್ರ ಪ್ರಗತಿ, ಏಳಿಗೆ ಸಾಧ್ಯ. ಯಾಕೆಂದರೆ, ಕಳೆದ ವರ್ಷದ ವ್ಯಾಲೆಂಟೈನ್ಸ್ ದಿನದಂದು ಮುಂಬಯಿಯಲ್ಲಿ 7 ಹಾಗೂ ದೆಹಲಿಯಲ್ಲಿ 17 ಅತ್ಯಾಚಾರ ಪ್ರಕರಣಗಳು ದಾಖಲಾಗಿದ್ದವು. ಇದು ಕೂಡ ಯೋಚಿಸಬೇಕಾದ ಸಂಗತಿ.

ಆಚರಣೆ, ನಡೆ-ನುಡಿಯಲ್ಲಿ ಸಭ್ಯತೆಯಿರಲಿ, ನೈಜ ಪ್ರೇಮ-ಪ್ರೀತಿಗೆ ಯಾವುದೇ ಅಡ್ಡಿ ಬಾರದಿರಲಿ, ನಿಸ್ವಾರ್ಥ ಪ್ರೇಮದ ಬಾವುಟ ನಿತ್ಯ ನಿರಂತರ ಪಟಪಟಿಸುತ್ತಿರಲಿ, ಪ್ರೇಮಿಗಳಿಗೆ ಶುಭವಾಗಲಿ.

ಹುಡುಗಿಯರನ್ನು ಒಲಿಸಿಕೊಳ್ಳಲು ರಿಸ್ಕ್‌ಗೆ ಸಿದ್ಧ

Wed, 04 Feb 2009 12:34:49 +0530

ತಮ್ಮ ಧೈರ್ಯ, ಸಾಹಸ, ಕೆಚ್ಚೆದೆ, ಆತ್ಮವಿಶ್ವಾಸ ಮತ್ತು ಮಹತ್ವಾಕಾಂಕ್ಷೆ ಪ್ರದರ್ಶಿಸಲು ಪುರುಷರು ಯಾವ ಮಟ್ಟಕ್ಕೂ ಇಳಿಯಲು ಅಥವಾ ಏರಲು ಸಿದ್ಧರಾಗಿರುತ್ತಾರೆ ಎಂಬುದು ಹೆಚ್ಚಿನ ಮಹಿಳೆಯರಿಗೆ ಗೊತ್ತಿರುವ ವಿಷಯವೇ. ಇದನ್ನು ಫ್ಲೋರಿಡಾ ವಿಶ್ವವಿದ್ಯಾನಿಲಯದ ವಿಜ್ಞಾನಿಗಳು ತಮ್ಮ ಸಂಶೋಧನೆಯ ಮೂಲಕ ದೃಢಪಡಿಸಿದ್ದಾರೆ.

ಬಹುಶಃ ಇದೇ ಕಾರಣಕ್ಕೆ ವಿಶ್ವದ ಸ್ಕೈಡೈವರ್‌ಗಳಲ್ಲಿ ಐದನೇ ನಾಲ್ಕಂಶವೂ ಪುರುಷರೇ ಹಾಗೂ ರಾಕ್ ಕ್ಲೈಂಬರ್‌ಗಳಲ್ಲಿ ಮೂರನೇ ಎರಡಂಶವೂ ಪುರುಷರೇ ಇರುವುದು.

ಸಂಗಾತಿಯ ಆಯ್ಕೆಯಲ್ಲಿ ಪುರುಷರಿಗಿಂತಲೂ ಮಹಿಳೆಯರು ಹೆಚ್ಚು 'ಚೂಸಿ' ಆಗಿರುತ್ತಾರೆ ಎಂಬುದು ಸಾಮಾನ್ಯ ನಂಬಿಕೆ. ಹಾಗಂತ, ಹುಡುಗರ ಜೀವನವನ್ನು ಹುಡುಗಿಯರು ಮತ್ತಷ್ಟು ಕಠಿಣಗೊಳಿಸುತ್ತಾರೆ ಎಂಬುದು ಇದರರ್ಥವಿರಲಾರದು. ಇದಕ್ಕೆ ಪ್ರಮುಖ ಕಾರಣವೆಂದರೆ (ಇದಕ್ಕೆ ಇತಿಹಾಸಗಳ ಪುರಾವೆಯೂ ಇದೆ), ತಮ್ಮನ್ನು, ತಮ್ಮ ಮಕ್ಕಳನ್ನು ಚೆನ್ನಾಗಿ ಸಾಕುವಂತಹ ಪುರುಷರು ತನಗೆ ಬೇಕೆಂದು ಪ್ರತಿಯೊಬ್ಬ ಹೆಣ್ಣೂ ಬಯಸುತ್ತಾಳೆ. ಈ ಒತ್ತಡವಿದೆಯಲ್ಲ, ಅದುವೇ ಪುರುಷರನ್ನು ಕಠಿಣ ಪರಿಶ್ರಮ ವಹಿಸುವಂತೆ ಮಾಡುತ್ತದೆ ಮತ್ತು ತಮ್ಮ ಸಾಮರ್ಥ್ಯ ಸಾಬೀತುಪಡಿಸುವಲ್ಲಿನ ತುಡಿತ ಹೆಚ್ಚಾಗಿಸುವಂತೆ ಮಾಡುತ್ತದೆ.

ಹೀಗಾಗಿ, ಫ್ಲೋರಿಡಾ ವಿವಿಯ ಸಾಮಾಜಿಕ ಮನಃಶಾಸ್ತ್ರಜ್ಞರು ಒಂದು ಪ್ರಶ್ನೆಗೆ ಉತ್ತರ ಕಂಡುಹುಡುಕಲು ನಿರ್ಧರಿಸಿದರು. ಅದೆಂದರೆ: ತಮ್ಮ ಭಾವೀ ಲವ್ವರ್‌ಗಳ ಗಮನ ಸೆಳೆಯುವ ನಿಟ್ಟಿನಲ್ಲಿ, ಧೈರ್ಯ, ಸಾಹಸದೊಂದಿಗೆ ತಮ್ಮ ಸಾಮರ್ಥ್ಯ ಪ್ರದರ್ಶಿಸಲು ಪುರುಷರು ಆಡುವ ಆಟಗಳಲ್ಲಿ ಅಪಾಯ ತಂದೊಡ್ಡಿಕೊಳ್ಳುವುದೂ ಒಂದಾಗಿದೆಯೇ?

ಇದಕ್ಕಾಗಿ 134 ಸೈಕಾಲಜಿ ವಿದ್ಯಾರ್ಥಿ-ವಿದ್ಯಾರ್ಥಿನಿಯರನ್ನು ಅವರು ತಮ್ಮ ಸಂಶೋಧನೆಗೆ ಆಯ್ದುಕೊಂಡರು. ತಾವು 'ಒಳ್ಳೆಯ ಮೂಡ್'ನಲ್ಲಿ ಇದ್ದರೆ ಮತ್ತು ಆಕರ್ಷಿಸಲು ತಮ್ಮ ಸುತ್ತಮುತ್ತ ಸುಂದರ ತರುಣಿಯರಿದ್ದಾರೆ ಎಂಬುದು ಮನವರಿಕೆಯಾದರೆ ಪುರುಷರು ಹೆಚ್ಚು ರಿಸ್ಕ್ ತೆಗೆದುಕೊಳ್ಳುತ್ತಾರೆಯೇ ಎಂಬುದನ್ನು ಕಂಡುಹುಡುಕುವುದು ವಿಜ್ಞಾನಿಗಳ ಉದ್ದೇಶವಾಗಿತ್ತು.

ಪ್ರ.ಯೋಗದ ಸಂದರ್ಭದಲ್ಲಿ ತಜ್ಞರು ಹುಡುಗರಿಗೆ 10 ಅತ್ಯಾಕರ್ಷಕ ಮತ್ತು 10 ಮಂದಿ ಆಕರ್ಷಕವಲ್ಲದಿರುವ ಹುಡುಗ-ಹುಡುಗಿಯರ ಫೋಟೋಗಳನ್ನು ತೋರಿಸಿದರು. ಅಂದರೆ ಹುಡುಗಿಯರಿಗೆ ಹುಡುಗರ ಫೋಟೋ, ಹುಡುಗರಿಗೆ ಹುಡುಗಿಯರ ಫೋಟೋ. ಈ ರೀತಿ ರಿಸ್ಕ್ ತೆಗೆದುಕೊಳ್ಳುವ ಆಟವೊಂದನ್ನು ಇದಕ್ಕೆ ಮಿಳಿತಗೊಳಿಸಿ, ಸಂಶೋಧಕರು ಪತ್ತೆ ಹಚ್ಚಿದ್ದೇನೆಂದರೆ, ಹುಡುಗರು ಹುಡುಗಿಯರನ್ನು ಒಲಿಸಿಕೊಳ್ಳಲು ರಿಸ್ಕ್ ತೆಗೆದುಕೊಳ್ಳಲು ರೆಡಿ ಇರುತ್ತಾರೆ ಅಂತ. ಅದರ ಪ್ರಕಾರ, ಪುರುಷರು ಲೈಂಗಿಕವಾಗಿ ಪ್ರಚೋದನೆಗೊಂಡಿದ್ದರೆ ಮತ್ತು ಆಕರ್ಷಕ ಸುಂದರ ಯುವತಿಯರು ಎದುರಿಗಿದ್ದರೆ ಹೆಚ್ಚು ರಿಸ್ಕ್ ತೆಗೆದುಕೊಳ್ಳುವ ಸಾಹಸಮಯ ಹೆಜ್ಜೆಗೆ ಮುಂದಾಗುತ್ತಿದ್ದರು ಎಂಬುದನ್ನು ಪತ್ತೆ ಹಚ್ಚಲಾಯಿತು.

ಆದರೆ, ಮಹಿಳಾ ವಿದ್ಯಾರ್ಥಿಗಳಲ್ಲಿ ಇದು ತದ್ವಿರುದ್ಧ ಫಲಿತಾಂಶ ನೀಡಿತು. ಅಂದರೆ, ವಿದ್ಯಾರ್ಥಿನಿಯರು ತಾವು ಭಾವಿಸಿದ, ಯೋಚಿಸಿದ ಅಥವಾ ನೆನಪಿಸಿಕೊಂಡ ವಿಷಯಗಳಿಂದ ಯಾವುದೇ ರೀತಿಯಲ್ಲಿಯೂ ಪ್ರಭಾವಿತರಾಗಿರಲಿಲ್ಲ. ಒಟ್ಟಿನಲ್ಲಿ, ತಮ್ಮ ಆತ್ಮವಿಶ್ವಾಸ ಮತ್ತು ಮಹತ್ವಾಕಾಂಕ್ಷೆಯನ್ನು ತೋರಿಸಲು ಪುರುಷರು ರಿಸ್ಕ್ ತೆಗೆದುಕೊಳ್ಳಲು ಸಿದ್ಧರಿದ್ದಾರೆ ಎಂಬುದು ಶ್ರುತಪಟ್ಟಿತು.

'ವ್ಯಾಲೆಂಟೈನ್ಸ್ ಡೇ ಆಚರಿಸಿ, ನರಕಕ್ಕೆ ಹೋಗಿ'!

Wed, 04 Feb 2009 12:32:30 +0530

ಲಕ್ಷಾಂತರ ಮಂದಿ ಬ್ರಿಟಿಷರು ಈ ಶನಿವಾರ ವ್ಯಾಲೆಂಟೈನ್ಸ್ ದಿನವನ್ನು ಸಂಭ್ರಮ, ಸಡಗರಗಳಿಂದ ಆಚರಿಸಿಕೊಳ್ಳಲು ಸಿದ್ಧವಾಗುತ್ತಿರುವಂತೆಯೇ, ವಿವಾದಾತ್ಮಕ ಮುಸ್ಲಿಂ ಪಂಡಿತರಾದ ಅಂಜಮ್ ಚೌಧುರಿಯವರು ಒಂದು ಎಚ್ಚರಿಕೆ ನೀಡಿದ್ದಾರೆ. ಅದೆಂದರೆ "ವ್ಯಾಲೆಂಟೈನ್ಸ್ ಡೇ ಆಚರಿಸಿ, ನರಕಕ್ಕೆ ಹೋಗಿ"!

ಶುಭಾಶಯ ಪತ್ರಗಳ ವಿನಿಮಯ, ಗುಲಾಬಿ ಹೂ ಕಳುಹಿಸುವುದು ಮತ್ತು ರೋಮ್ಯಾಂಟಿಕ್ ಆಗಿ ಕ್ಯಾಂಡಲ್ ಲೈಟ್ ಡಿನ್ನರ್ ಸವಿಯುವುದು ಮುಂತಾದ ಬ್ರಿಟನ್‌ನ ಅಚ್ಚುಮೆಚ್ಚಿನ ಹವ್ಯಾಸಗಳಿಂದೊಡಗೂಡಿದ ಈ ಆಚರಣೆಯನ್ನು 'ಕೆಲಸಕ್ಕೆ ಬಾರದ ಮತ್ತು ಕೆಡುಕಿನ ಹಬ್ಬ'ವಾಗಿದ್ದು, ಸ್ವೇಚ್ಛಾಚಾರ, ಸ್ವಚ್ಛಂದ ಸಂಭೋಗ, ಲೈಂಗಿಕ ಅಶ್ಲೀಲ ಮಾತುಕತೆ ಮಾತ್ರವಲ್ಲ, ವ್ಯಭಿಚಾರವನ್ನು ಸಮರ್ಥಿಸಲು ಈ ರೀತಿ ಮಾಡಲಾಗುತ್ತಿದೆ ಎಂದು ಹೇಳಿರುವುದಾಗಿ ದಿ ಡೈಲಿ ಸ್ಟಾರ್ ವರದಿ ಮಾಡಿದೆ.

ಲಂಡನ್ ಸಂಜಾತ ವಕೀಲರಾಗಿರುವ ಚೌಧುರಿ, ತಮ್ಮ ದಿ ಇಸ್ಲಾಮಿಸ್ಟ್ ಎಂಬ ಪಾಶ್ಚಾತ್ಯ-ವಿರೋಧೀ ವೆಬ್‌ಸೈಟಿನಲ್ಲಿ ಇವುಗಳನ್ನು ಪ್ರಕಟಿಸಿದ್ದಾರೆ. ಈ ಲೇಖನದ ತಲೆಬರಹವೂ 'ವ್ಯಭಿಚಾರದ ವ್ಯಾಲೆಂಟೈನ್ಸ್ ಡೇ' ಎಂದೇ ಇದೆ.

ನಿಷೇಧಿತ ಸಂಘಟನೆ ಅಲ್-ಮುಹಾಜಿರೂಂ ಎಂಬುದರ ಮಾಜಿ ನಾಯಕನಾಗಿರುವ ಅವರು, ಈ ಆಚರಣೆಯನ್ನು 'ಅನಾಗರಿಕ ಹಬ್ಬ' ಎಂದು ಕರೆದಿದ್ದಾರಲ್ಲದೆ, ಅಲ್ಲಾಹ್‌ನ ಆರಾಧನೆಯಿಂದ ಜನರ ಮನಸ್ಸನ್ನು ಬೇರೆಡೆ ಸೆಳೆಯುವ ತಂತ್ರವಿದು ಎಂದಿದ್ದಾರೆ.

'ಹೆಚ್ಚಿನವರು ಇದನ್ನು ನಿರಪಾಯಕಾರಿ ಮಜಾ ದಿನ, ಶುಭಾಶಯಪತ್ರ ವಿನಿಮಯ, ಹೂ ಕೊಡುವುದು ಮತ್ತು ಕ್ಯಾಂಡಲ್ ಲೈಟ್ ಡಿನ್ನರ್ ಮೂಲಕ ತನ್ನ ಪ್ರಿಯಕರ, ಪ್ರೇಯಸಿ, ಜೀವನ ಸಂಗಾತಿಗೆ ಪ್ರೀತಿಯನ್ನು ತಿಳಿಸುವ ದಿನ ಎಂದು ಈ ದಿನವನ್ನು ಭಾವಿಸುತ್ತಾರೆ. ಈ ಆಚರಣೆ ಮೂಲ ಮತ್ತು ಇದು ಇಸ್ಲಾಂ ಬೋಧನೆಗೆ ವಿರುದ್ಧವಾದದ್ದು ಎಂಬುದು ಅವರ್ಯಾರಿಗೂ ತಿಳಿದಿಲ್ಲ' ಎಂದು ಚೌಧುರಿ ಬರೆದಿದ್ದಾರೆ.

ವ್ಯಾಲೆಂಟೈನ್ಸ್ ಡೇಗೆ ಮಾನ್ಯತೆ ನೀಡಿರುವುದು ತಮ್ಮ ವರ್ತನೆ ಹಾಳು ಮಾಡಿಕೊಳ್ಳಲು ದೆವ್ವಗಳಿಗೆ ಬಾಗಿಲು ತೆರೆದಂತೆ. ತಮ್ಮ ಇಸ್ಲಾಮಿಕ್ ತತ್ವಗಳನ್ನು ತೊರೆಯಲು ಪ್ರೇರೇಪಿಸುವ, ಕಾಮಾಕಾಂಕ್ಷೆಯನ್ನು ಪೂರೈಸಿಕೊಳ್ಳುವ ಮತ್ತು ವಿವಾಹಪೂರ್ವ ಸಂಬಂಧಗಳನ್ನು ಬೆಳೆಸುವುದೇ ಮುಂತಾದ ಅನಾಗರಿಕ ಪದ್ಧತಿಗಳಿಗೆ ಇದು ಪ್ರೇರಣೆ ನೀಡುತ್ತದೆ ಎಂದು ಆತ ಹೇಳಿದ್ದಾರೆ.