ಆಸನಗಳು

ವಿಶ್ವ ಯೋಗ ದಿನಾಚರಣೆ: ಮಕ್ಕಳು ಈ ಆಸನ ಮಾಡುವುದು ಬೆಸ್ಟ್

Sat, 21 Jun 2025 10:38:00 +0530

Photo Credit: X

ಬೆಂಗಳೂರು: ಇಂದು ವಿಶ್ವ ಯೋಗ ದಿನವಾಗಿದ್ದು, ಮಕ್ಕಳಿಗೆ ಯಾವ ಯೋಗಾಸನ ಮಾಡುವುದು ಉತ್ತಮ ಎಂದು ತಿಳಿಯೋಣ. ಮಕ್ಕಳು ಎಳವೆಯಲ್ಲೇ ಯೋಗಾಸನ ಮಾಡುವುದರಿಂದ ಅವರ ಆರೋಗ್ಯ ವೃದ್ಧಿಯಾಗುತ್ತದೆ.

ಮಕ್ಕಳು ಮಾಡಬಹುದಾದ ಬೆಸ್ಟ್ ಯೋಗಾಸನವೆಂದರೆ ಬಾಲಾಸನ. ಇದನ್ನು ಮಾಡುವುದರಿಂದ ಮಕ್ಕಳಲ್ಲಿ ಕಾಡುವ ಮೈ ಕೈ ನೋವಿನ ಸಮಸ್ಯೆ, ಮಾನಸಿಕ ಒತ್ತಡ ದೂರವಾಗುತ್ತದೆ. ಜೊತೆಗೆ ಮಕ್ಕಳು ಸುಲಭವಾಗಿ ಮೈ ಕೈ ಬಗ್ಗಿಸಿ ದೇಹವನ್ನು ದಂಡಿಸಲು ಯೋಗ್ಯವಾದ ಆಸನ ಇದಾಗಿದೆ.

ಬಾಲಾಸನ ಮಾಡುವುದು ಹೇಗೆ?
-ಒಂದು ಸಮತಲವಾದ ನೆಲದ ಮೇಲೆ ಮೊಣಕಾಲಿನ ಮೇಲೆ ಕುಳಿತು ಸೊಂಟವನ್ನು ಮುಂದಕ್ಕೆ ಚಾಚಿ. ಈಗ ನಿಮ್ಮ ಹಣೆ ಮತ್ತು ತೋಳುಗಳು ನೆಲಕ್ಕೆ ತಾಕಿರಬೇಕು.

-ಮೊದಲು ಪಾದಗಳನ್ನು ಪೃಷ್ಠದ ಕೆಳಗಿರಿಸಿ ವಜ್ರಾಸನದಲ್ಲಿ ಕುಳಿತುಕೊಳ್ಳಬೇಕು.
- ಬಳಿಕ ಉಸಿರು ಎಳೆದುಕೊಂಡು ಕೈಗಳನ್ನು ಮೇಲೆತ್ತಬೇಕು.
-ಸೊಂಟವನ್ನು ಮುಂದೆ ಬಾಗಿಸಿ ಹಣೆಯನ್ನು ನೆಲಕ್ಕೆ ಮುಟ್ಟಿಸಿ.
-ಕೈಗಳನ್ನು ಮುಂದೆ ಚಾಚಿ ನೆಲಕ್ಕೆ ಮುಟ್ಟಿಸಿ
-ಇದೇ ಭಂಗಿಯಲ್ಲಿ ಕೆಲವು ನಿಮಿಷವಿದ್ದು ದೇಹವನ್ನು ಅದೇ ರೀತಿ ಹಿಂದಕ್ಕೆ ತಂದು ರಿಲ್ಯಾಕ್ಸ್ ಆಗಿ.

ಈ ಯೋಗಾಸನವನ್ನು ಯಾರು ಬೇಕಾದರೂ ಮಾಡಬಹುದು. ಅದರಲ್ಲೂ ವಿಶೇಷವಾಗಿ ಮಕ್ಕಳು ಸುಲಭವಾಗಿ ಮಾಡಬಹುದಾದ ಯೋಗಾಸನ ಇದಾಗಿದೆ.

ತಲೆನೋವು ಪರಿಹಾರಕ್ಕೆ ಈ ಯೋಗ ಸೂಕ್ತ

Mon, 09 Sep 2024 12:06:00 +0530

Photo Courtesy: Twitter

ಬೆಂಗಳೂರು: ಇತ್ತೀಚೆಗೆ ಜೀವನ ಶೈಲಿಯಿಂದಾಗಿ ಬಹಳಷ್ಟು ಜನರಲ್ಲಿ ತಲೆನೋವಿನ ಸಮಸ್ಯೆ ಬಹುತೇಕರನ್ನು ಕಾಡುತ್ತಿದೆ. ಇದಕ್ಕೆ ಯೋಗದಲ್ಲಿ ಪರಿಹಾರ ಕಂಡುಕೊಳ್ಳಬಹುದು. ಅದಕ್ಕೆ ಯಾವ ಯೋಗ ಸೂಕ್ತ ಎಂಬ ವಿವರ ಇಲ್ಲಿದೆ ನೋಡಿ.

ಯೋಗದಿಂದ ನಮ್ಮ ದೈಹಿಕ ಮತ್ತು ಮಾನಸಿಕ ಆರೋಗ್ಯ ಸುಧಾರಿಸುತ್ತದೆ. ಹೆಚ್ಚಾಗಿ ಇಂದಿನ ದಿನಗಳಿಂದ ಒತ್ತಡದ ಜೀವನದಿಂದಾಗಿ ತಲೆ ನೋವು, ಅಥವಾ ಮೈಗ್ರೇನ್ ನಂತಹ ಸಮಸ್ಯೆಯಿಂದ ಅನೇಕರು ಬಳಲುತ್ತಾರೆ. ಇದಕ್ಕೆ ನೋವು ನಿವಾರಕಗಳನ್ನು ನುಂಗಿದರೆ ತಾತ್ಕಾಲಿಕ ಪರಿಹಾರ ಸಿಗಬಹುದಷ್ಟೇ.

ಆದರೆ ತಲೆನೋವಿನಂತಹ ಸಮಸ್ಯೆ ಶಾಶ್ವತವಾಗಿ ಪರಿಹಾರವಾಗಬೇಕಾದರೆ ಶಾಂತ ಮನಸ್ಥಿತಿಯಲ್ಲಿ ಕುಳಿತು ಯೋಗ, ಧ್ಯಾನ ಮಾಡುವುದು ಮತ್ತು ಸೂಕ್ತ ವಿಶ್ರಾಂತಿ ಪಡೆಯುವುದು ಅಗತ್ಯವಾಗಿದೆ. ತಲೆನೋವು ನಿವಾರಣೆಗೆ ಪದೋತ್ತನಾಸನ ಮಾಡುವುದು ಸೂಕ್ತ. ಇದನ್ನು ಮಾಡುವುದು ಹೇಗೆ ಎಂಬ ವಿವರ ಇಲ್ಲಿದೆ ನೋಡಿ.

ಇದನ್ನು ಗೋಡೆಯ ಬಳಿ ಮಾಡಬೇಕಾಗುತ್ತದೆ. ಮೊದಲು ಬೆನ್ನು ಮಾತ್ರ ನೆಲಕ್ಕೆ ತಾಗುವಂತೆ ಮಲಗಿ, ಕಾಲುಗಳನ್ನು ಮೇಲೆತ್ತಿ ಗೋಡೆಗೆ ನೇರವಾಗಿ ಲಂಬಾಸನದಲ್ಲಿರಿಸಿ. ಸೊಂಟ ಕೂಡಾ ನೆಲಕ್ಕೆ ಸಮವಾಗಿರುವಂತೆ ನೋಡಿಕೊಳ್ಳಿ. ಈಗ ಕಣ್ಣುಗಳನ್ನು ಮುಚ್ಚಿ ಕೈಗಳನ್ನು ಎರಡೂ ಬದಿಗೆ ಅಗಲವಾಗಿ ತೆರೆದುಕೊಂಡು ಉಸಿರನ್ನು ನಿಧಾನವಾಗಿ ಎಳೆದುಕೊಂಡು ಬಿಡಿ. ಈ ಭಂಗಿಯಲ್ಲಿ ಸುಮಾರು 30 ಸೆಕೆಂಡು ಇದ್ದರೆ ಸಾಕು. ಇದೇ ರೀತಿ ನಿಯಮಿತವಾಗಿ ಮಾಡುತ್ತಿದ್ದರೆ ತಲೆನೋವಿನ ಸಮಸ್ಯೆ ಕ್ರಮೇಣ ನಿವಾರಣೆಯಾಗುವುದು.

ಪುರುಷರು ಸಿಕ್ಸ್ ಪ್ಯಾಕ್ ಬೇಕೆಂದರೆ ಈ ಯೋಗ ಮಾಡಬಹುದು

Thu, 15 Aug 2024 10:34:00 +0530

Photo Courtesy: Twitter

ಬೆಂಗಳೂರು: ಪುರುಷರು ಸದಾ ಸುಂದರವಾಗಿರಲು ದೇಹದಾರ್ಢ್ಯ ಬೆಳೆಸಿಕೊಳ್ಳಲು ಯತ್ನಿಸುತ್ತಾರೆ. ಅದರಲ್ಲೂ ಸಿಕ್ಸ್ ಪ್ಯಾಕ್ ಬರಿಸಲು ಏನೆಲ್ಲವೋ ಕಸರತ್ತು ಮಾಡುತ್ತಾರೆ. ಆದರೆ ಸಿಕ್ಸ್ ಪ್ಯಾಕ್ ಗೆ ಈ ಒಂದು ಯೋಗ ಮಾಡಿದರೆ ಸಾಕು. ಅದು ಯಾವುದು ನೋಡಿ.

ಯೋಗದಲ್ಲಿ ಯಾವ ಸಮಸ್ಯೆಗಳಿಗೆ ಪರಿಹಾರವಿಲ್ಲ ಹೇಳಿ? ಜಿಮ್ ಗೆ ಹೋಗಿ ಗಂಟೆಗಟ್ಟಲೆ ಕಸರತ್ತು ಮಾಡುವ ಬದಲು ಮನೆಯಲ್ಲಿಯೇ ಯೋಗ ಮಾಡಿ ದೇಹ ದಂಡಿಸುವ ಮೂಲಕ ದೇಹದಾರ್ಡ್ಯ ಪಡೆಯಬಹುದು. ಪುರುಷರು ಸಿಕ್ಸ್ ಪ್ಯಾಕ್ ದೇಹ ಬೇಕೆಂದರೆ ನವಾಸನ ಯೋಗ ಭಂಗಿ ಮಾಡಬಹುದು. ಅದನ್ನು ಮಾಡುವುದು ಹೇಗೆ ಇಲ್ಲಿದೆ ವಿವರ.

ನವಾಸನ ಮಾಡುವುದು ಹೇಗೆ
ನೆಲದ ಮೇಲೆ ನಿಮ್ಮ ಆಸನದ ಜಾಗ ಬ್ಯಾಲೆನ್ಸ್ ಆಗಿರುವಂತೆ ಕೂತುಕೊಳ್ಳಿ
ಎದೆಯನ್ನು ಉಬ್ಬಿಸಿ, ಎರಡೂ ಕಾಲುಗಳನ್ನು ಕುಳಿತ ಭಂಗಿಯಲ್ಲೇ ಮೇಲಕ್ಕೆತ್ತಿ.
ಎರಡೂ ಕೈಗಳನ್ನು ಮುಂದಕ್ಕೆ ಚಾಚಿ ಮೇಲಕ್ಕೆತ್ತಿ ಕಾಲಿನ ಪಾದ ಮತ್ತು ಮಣಿಗಂಟಿನ ಸಮಾನವಾಗಿರುವಂತೆ ನೋಡಕೊಳ್ಳಿ
ಈ ಭಂಗಿಯಲ್ಲಿರುವಾಗ ಬೆನ್ನು ಬಾಗದಂತೆ ಎಚ್ಚರಿಕೆ ವಹಿಸಿ.

ಈ ಭಂಗಿಯನ್ನು ನೋಡುವಾಗ ಥೇಟ್ ಬೋಟ್ ನ ಶೇಪ್ ನಲ್ಲಿರುತ್ತದೆ. ಇದನ್ನು ನಿಯಮಿತವಾಗಿ ಮಾಡುವುದರಿಂದ ನಿಮ್ಮ ಎದೆಯ ಮಾಂಸಖಂಡಗಳು ಬಲಗೊಳ್ಳುತ್ತವೆ.

ಬೇಗನೇ ಪಿರಿಯಡ್ಸ್ ಬರಲು ಯಾವ ಯೋಗಾಸನ ಸೂಕ್ತ

Mon, 05 Aug 2024 12:05:00 +0530

Photo Courtesy: Twitter

ಬೆಂಗಳೂರು: ಕೆಲವೊಮ್ಮೆ ಹಾರ್ಮೋನ್ ನ ಸಮಸ್ಯೆಯಿಂದ ಅಥವಾ ಗರ್ಭಾಶಯದ ಸಮಸ್ಯೆಗಳಿಂದ ಮುಟ್ಟು ತಡವಾಗಿ ಆಗಬಹುದು. ಮುಟ್ಟು ಸಮಯಕ್ಕೆ ಸರಿಯಾಗಿ ಆಗಲು ಈ ಯೋಗಾಸನವನ್ನು ಟ್ರೈ ಮಾಡಬಹುದು.

ಮುಟ್ಟಿನ ದಿನ ಹತ್ತಿರ ಬಂದಾಗ ಮಹಿಳೆಯರು ಸಾಕಷ್ಟು ಲಕ್ಷಣಗಳನ್ನು ಅನುಭವಿಸುತ್ತಾರೆ. ಕಾಲು, ಕಿಬ್ಬೊಟ್ಟೆಗಳಲ್ಲಿ ನೋವು ಇತ್ಯಾದಿ. ಆದರೆ ಕೆಲವರಿಗೆ ಸಮಯಕ್ಕೆ ಸರಿಯಾಗಿ ಮುಟ್ಟು ಆಗದೇ ಮಾನಸಿಕವಾಗಿ ಖಿನ್ನತೆಗೊಳಗಾಗುತ್ತಾರೆ. ಸಮಯಕ್ಕೆ ಸರಿಯಾಗಿ ಮುಟ್ಟು ಆಗಲು ಧನುರಾಸನ ಮಾಡುವುದು ಸೂಕ್ತವಾಗಿದೆ.

ಧನುರಾಸನ ಮಾಡುವುದು ಹೇಗೆ?
ಹೊಟ್ಟೆಯ ಮೇಲೆ ಮಲಗಿ ಎರಡೂ ಕಾಲುಗಳನ್ನು ಮತ್ತು ತಲೆಯನ್ನು ಹಿಮ್ಮುಖವಾಗಿ ಮೇಲಕ್ಕೆತ್ತಿ. ನಿಮ್ಮ ಕೈಗಳನ್ನು ಹಿಂದೆ ಚಾಚಿ ಎರಡೂ ಪಾದಗಳನ್ನು ಹಿಡಿದುಕೊಳ್ಳಿ.

ಸಾಧ್ಯವಾದಷ್ಟು ಹೊತ್ತು ಇದೇ ಭಂಗಿಯಲ್ಲಿರಿ. ಬಳಿಕ ನಿಧಾನವಾಗಿ ಉಸಿರು ಬಿಡುತ್ತಾ ಮೊದಲಿನ ಭಂಗಿಗೆ ತಲುಪಿ. ಇದೇ ರೀತಿ ಮತ್ತೆ ಮಾಡಿ. ನಿಯಮಿತವಾಗಿ 5-6 ಬಾರಿ ಈ ರೀತಿ ಮಾಡಿದರೆ ಮುಟ್ಟಿನ ಸಮಸ್ಯೆ ಮಾತ್ರವಲ್ಲ, ಬೆನ್ನು, ತೊಡೆ ನೋವಿನ ಸಮಸ್ಯೆಗಳಿಗೂ ಪರಿಹಾರ ಸಿಗುತ್ತದೆ.

ದಪ್ಪಗಿರುವ ಸೊಂಟ ತೆಳ್ಳಗಾಗಿಸಲು ಈ ಯೋಗಾಸನ ಮಾಡಿ

Tue, 14 May 2024 17:07:00 +0530

Photo Courtesy: Twitter

ಬೆಂಗಳೂರು: ಪ್ರತಿಯೊಬ್ಬ ಹೆಣ್ಣು ಮಕ್ಕಳಿಗೂ ತೆಳ್ಳಗೆ ಬಳುಕುವ ಸೊಂಟ ತಮ್ಮದಾಗಬೇಕೆಂಬ ಆಸೆಯಿರುತ್ತದೆ. ಸೊಂಟದ ಭಾಗ ದಪ್ಪಗಿದ್ದರೆ ಸೌಂದರ್ಯಕ್ಕೆ ಧಕ್ಕೆಯಾಗುತ್ತದೆ ಎಂಬ ಚಿಂತೆಯಿರುತ್ತದೆ. ದಪ್ಪಗಿರುವ ಸೊಂಟ ತೆಳ್ಳಗಾಗಿಸಲು ಯಾವ ಯೋಗಾಸನ ಸೂಕ್ತ ನೋಡೋಣ.

ಯೋಗಾಸನದಲ್ಲಿ ಪ್ರತಿಯೊಂದಕ್ಕೂ ಪರಿಹಾರವಿದೆ. ಅದರಲ್ಲೂ ಶರೀರದ ಯಾವುದೇ ಭಾಗದ ಕೊಬ್ಬು ಕರಗಿಸಲು, ದೇಹ ಆರೋಗ್ಯವಂತವಾಗಿರಲು ಯೋಗಾಸನವೇ ಸೂಕ್ತ. ಬೆಲ್ಲಿ ಫ್ಯಾಟ್, ದಪ್ಪಗಿನ ಸೊಂಟ ತೆಳ್ಳಗಾಗಿಸಲು ಸೂಕ್ತ ಯೋಗಾಸನಗಳಿದ್ದು, ನಿಯಮಿತವಾಗಿ ಅವುಗಳನ್ನು ಮಾಡುತ್ತಿದ್ದರೆ ದೇಹದ ಭಾಗ ತೆಳ್ಳಗಾಗುತ್ತದೆ. ಇದಕ್ಕೆ ಪ್ರಮುಖವಾಗಿ ತ್ರಿಕೋನಾಸನ ಮಾಡಬೇಕು. ಅದನ್ನು ಮಾಡುವ ವಿಧಾನ ಇಲ್ಲಿದೆ.

ನಿಮ್ಮ ಎರಡೂ ಕಾಲಗಳ ನಡುವೆ 3 ಅಡಿ ಅಂತರವಿರುವಂತೆ ನೋಡಿಕೊಂಡು ನಿಂತುಕೊಳ್ಳಿ. ಮೊಣಕಾಲು ನೇರವಾಗಿರಬೇಕು.
ಎರಡೂ ಕಾಲುಗಳಿಗೆ ಸಮಾನ ರೀತಿಯಲ್ಲಿ ಭಾರ ನೀಡಬೇಕು
ಈಗ ಆಳವಾಗಿ ಉಸಿರಾಡುತ್ತಾ ದೇಹವನ್ನು ಬಲಭಾಗಕ್ಕೆ ಸೊಂಟದಿಂದ ಕೆಳಗೆ ಬಾಗಿಸಿ. ಈ ಸಂದರ್ಭದಲ್ಲಿ ನಿಮ್ಮ ಬಲಕೈ ಕೆಳಕ್ಕೆ ಮತ್ತು ಎಡಗೈ ಮೇಲಕ್ಕೆ ಎತ್ತಿರಬೇಕು.
ಸೊಂಟವನ್ನು ನೇರವಾಗಿರಿಸಿ
ಈಗ ನಿಮ್ಮ ಬಲಕೈಯನ್ನು ಪಾದದ ಮೇಲೆ ಇರಿಸಿ ಎಡಗೈಯನ್ನು ಮೇಲೆ ಎತ್ತಿ ನೇರವಾಗಿ ಹಿಡಿಯಿರಿ.
ದೇಹ ಹಿಗ್ಗಿಸಿ ಆಳವಾದ ಉಸಿರು ಎಳೆದುಕೊಳ್ಳಿ.
ಈ ಭಂಗಿಯನ್ನು 20-25 ಬಾರಿ ಮಾಡಿದ ಬಳಿಕ ದೇಹಕ್ಕೆ ವಿಶ್ರಾಂತಿ ನೀಡಿ.

ಇದೇ ಭಂಗಿಯನ್ನು ನಿಯಮಿತವಾಗಿ ಮಾಡುತ್ತಿದ್ದರೆ ಸೊಂಟದ ಭಾಗದ ಕೊಬ್ಬು ಕರಗುವುದಲ್ಲದೆ, ಆ ಭಾಗದ ಸ್ನಾಯುಗಳು ಬಲಗೊಳ್ಳುತ್ತವೆ. ಇದರಿಂದ ಸೊಂಟ ತೆಳ್ಳಗಾಗುವುದರ ಜೊತೆಗೆ ಆರೋಗ್ಯವಾಗಿರುತ್ತೀರಿ.

ಸನ್ ಬರ್ನ್ ತಡೆಯಲು ಈ ಯೋಗ ಪೋಸ್ ಟ್ರೈ ಮಾಡಿ

Thu, 02 May 2024 12:05:00 +0530

Photo Courtesy: Twitter

ಬೆಂಗಳೂರು: ಬೇಸಿಗೆಯ ಬೇಗೆಗೆ ಚರ್ಮದ ಅನೇಕ ಸಮಸ್ಯೆಗಳು ಕಂಡುಬರುತ್ತವೆ. ಅದರಲ್ಲೂ ಸನ್ ಬರ್ನ್ ಸಮಸ್ಯೆ ಅನೇಕರನ್ನು ಕಾಡುತ್ತದೆ. ಇದಕ್ಕೆ ಯೋಗಾಸನದಲ್ಲಿ ಬೆಸ್ಟ್ ಪರಿಹಾರವಿದೆ.

ಸನ್ ಬರ್ನ್ ಎನ್ನುವುದು ಚರ್ಮಕ್ಕೆ ಬರುವ ಸಮಸ್ಯೆ. ಇದಕ್ಕೆ ಯೋಗಾಸನದಲ್ಲೂ ಪರಿಹಾರವಿದೆ ಎಂದರೆ ಅಚ್ಚರಿಯಾಗಬಹುದು. ಆದರೆ ಯೋಗದಲ್ಲಿ ಎಲ್ಲಾ ರೋಗಗಳಿಗೂ ಪರಿಹಾರವಿದೆ ಎನ್ನುವುದಕ್ಕೆ ಇದುವೇ ಸಾಕ್ಷಿ. ಬಾಲಾಸನ ಮಾಡುವುದರಿಂದ ಸನ್ ಬರ್ನ್ ಸಮಸ್ಯೆಗೆ ಪರಿಹಾರ ಸಿಗುವುದು. ಇದನ್ನು ಮಾಡುವುದು ಹೇಗೆ ನೋಡೋಣ.

ಬಾಲಾಸನ ಮಾಡುವ ವಿಧಾನ
ಹೆಸರೇ ಹೇಳುವ ಹಾಗೆ ಇದು ಮಕ್ಕಳ ರೀತಿಯ ಪೋಸ್. ಕಾಲಿನ ಹೆಬ್ಬೆರಳು ನೆಲಕ್ಕೆ ತಾಕುವಂತೆ ಎರಡೂ ಮೊಣಕಾಲುಗಳು ಪ್ರತ್ಯೇಕ ಮಾಡಿ ಮ್ಯಾಟ್ ಮೇಲೆ ಮಲಗಿ. ಹಿಮ್ಮಡಿಗಳಲ್ಲಿ ಕುಳಿತುಕೊಂಡು ಹಣೆಯನ್ನು ನೆಲಕ್ಕೆ ಬಾಗಿಸಿ. ಎರಡೂ ಕೈಗಳನ್ನು ಸ್ವಲ್ಪ ಮುಂದಕ್ಕೆ ಇರಿಸಿಕೊಳ್ಳಿ. ಈ ಪೋಸ್ ಮೂಲಕ ಸೊಂಟ, ಬೆನ್ನು, ತೊಡೆಗಳಿಗೆ ಚಲನೆ ಸಿಗುತ್ತದೆ. ಈ ಪೋಸ್ ಸನ್ ಬರ್ನ್ ಸಮಸ್ಯೆಗೆ ಪರಿಹಾರ ನೀಡಬಲ್ಲದು. ನಿಯಮಿತವಾಗಿ ಮಾಡಿ ನೋಡಿ.

ಜೀರ್ಣಕ್ರಿಯೆ ಸುಧಾರಿಸಲು ಈ ಯೋಗ ಮಾಡಿ

Fri, 12 Apr 2024 11:46:00 +0530

Photo Courtesy: Twitter

ಬೆಂಗಳೂರು: ನಮ್ಮ ಜೀರ್ಣಾಂಗ ವ್ಯವಸ್ಥೆ ಸರಿಯಾಗಿಲ್ಲದೇ ಇದ್ದರೆ ನಮ್ಮ ದೇಹದ ಒಟ್ಟು ಆರೋಗ್ಯ ಅಸ್ತವ್ಯಸ್ತವಾಗಬಹುದು. ಜೀರ್ಣಾಂಗ ಪ್ರಕ್ರಿಯೆ ಸುಧಾರಣೆಯಾಗಬೇಕಾದರೆ ಯಾವ ಯೋಗಾಸನ ಮಾಡಬೇಕು ನೋಡಿ.

ಜೀರ್ಣ ಕ್ರಿಯೆ ಮತ್ತು ಕರುಳಿನ ಆರೋಗ್ಯ ಸುಧಾರಿಸಲು ಯೋಗ ಪ್ರಧಾನ ಪಾತ್ರ ವಹಿಸುತ್ತದೆ. ಜೀರ್ಣ ಕ್ರಿಯೆ ಸುಧಾರಿಸಲು ಅನೇಕ ಯೋಗಾಸನಗಳಿವೆ. ಅದರಲ್ಲಿ ನಿಮಗೆ ಸುಲಭವಾಗಿ ಮಾಡಬಹುದಾದ ಧನುಶಾಸನದ ಮಾಡುವುದು ಹೇಗೆ ಎಂದು ಇಂದು ತಿಳಿದುಕೊಳ್ಳೋಣ.

ಕೇವಲ ಜೀರ್ಣಕ್ರಿಯೆ ಮಾತ್ರವಲ್ಲ, ಮುಟ್ಟಿನ ನೋವು, ಮಲಬದ್ಧತೆ ಇತ್ಯಾದಿ ಸಮಸ್ಯೆಗಳಿಗೂ ಇದು ಪರಿಹಾರ ನೀಡುತ್ತದೆ. ಹೊಟ್ಟೆಯ ಮೇಲೆ ನೇರವಾಗಿ ಕಾಲು ಚಾಚಿಕೊಂಡು ಮಲಗಿ. ಎರಡೂ ಕೈಗಳನ್ನು ಬದಿಗೆ ಸರಿಸಿಟ್ಟುಕೊಳ್ಳಬೇಕು. ಈಗ ಮೊಣಕಾಲುಗಳನ್ನು ನಿಧಾನವಾಗಿ ಮಡಚಿ ಮತ್ತು ಕೈಗಳಿಂದ ಕಣಕಾಲುಗಳನ್ನು ನಿಮ್ಮ ತಲೆಯ ಕಡೆಗೆ ಎಳೆದುಕೊಳ್ಳಿ. ಬಾಗಿಸಿದ ಕಾಲುಗಳನ್ನು ಸೊಂಟಕ್ಕಿಂತ ಮೇಲೆ ಬಾರದಂತೆ ನೋಡಿಕೊಳ್ಳಿ. ಕಾಲುಗಳನ್ನು ಸೊಂಟದ ಕಡೆಗೆ ಬಾಗಿಸುವಾಗ ತೊಡೆ ನಿಧಾನವಾಗಿ ಮೇಲೆತ್ತಿ. ಈಗ ಮುಖ ಮತ್ತು ಎದೆಯ ಭಾಗವನ್ನು ಮೇಲೆತ್ತಿ ಕೆಲವು ಸೆಕೆಂಡು ಇದೇ ಭಂಗಿಯಲ್ಲಿರುವಂತೆ ನೋಡಿಕೊಳ್ಳಿ. ಈ ರೀತಿ ನಿಯಮಿತವಾಗಿ ಮಾಡುತ್ತಿದ್ದರೆ ನಿಮ್ಮ ಜೀರ್ಣಕ್ರಿಯೆಗೆ ಸಂಬಂಧಪಟ್ಟ ಸಮಸ್ಯೆಗಳು ನಿವಾರಣೆಯಾಗುತ್ತವೆ.

ಬೆನ್ನು ನೋವಿನ ಪರಿಹಾರಕ್ಕೆ ಈ ಯೋಗ ಸೂಕ್ತ

Mon, 01 Apr 2024 12:18:00 +0530

ಬೆಂಗಳೂರು: ಇತ್ತೀಚೆಗಿನ ದಿನಗಳಲ್ಲಿ ಚಿಕ್ಕ ವಯಸ್ಸಿನವರೂ ಬೆನ್ನು ನೋವಿನ ಸಮಸ್ಯೆಯಿಂದ ಬಳಲುತ್ತಿರುತ್ತಾರೆ. ಬೆನ್ನು ನೋವು ಬಂದರೆ ಅದಕ್ಕೆ ಯೋಗದಲ್ಲಿ ಪರಿಹಾರವಿದೆ. ಅದು ಯಾವುದು ಎಂದು ನೋಡೋಣ.

ಬೆನ್ನು ನೋವು ಬಂದರೆ ಬೇಗನೇ ಅದು ವಾಸಿಯಾಗುವುದಿಲ್ಲ. ಆಯುರ್ವೇದ ಪದ್ಧತಿಯಲ್ಲಿ ಇದಕ್ಕೆ ಚಿಕಿತ್ಸೆಗಳಿರಬಹುದು. ಆದರೆ ಮತ್ತೆ ನಮ್ಮ ಕೆಲಸ ಕಾರ್ಯಗಳು ಬೆನ್ನು ನೋವು ಪದೇ ಪದೇ ಕಾಣಿಸಿಕೊಳ್ಳುವಂತೆ ಮಾಢಬಹುದು. ಹೀಗಾಗಿ ಇದಕ್ಕೆ ಯೋಗದಲ್ಲಿ ಒಂದು ಪರಿಹಾರ ಕಂಡುಕೊಳ್ಳಬಹುದು.

ಇದಕ್ಕೆ ಗೋ ಭಂಗಿಯ ಯೋಗಾಸನ ಮಾಡಬಹುದು. ಇದನ್ನು ಮಾಡುವ ವಿಧಾನ ಇಲ್ಲಿದೆ.

ಮೊದಲು ದನದ ಭಂಗಿಯಲ್ಲಿ ಮೊಣಕಾಲನ್ನು ನೆಲಕ್ಕೆ ತಾಗಿಸಿ, ಕೈ ನೆಲಕ್ಕೆ ಊರಿ ಇಡಿ.
ನಿಮ್ಮ ಮೊಣಕಾಲು ಮತ್ತು ಕೈಗಳ ಮೇಲೆ ಸಮಾನ ಭಾರ ಬೀಳುವಂತೆ ನೋಡಿಕೊಳ್ಳಿ.
ಉಸಿರನ್ನು ತೆಗೆದುಕೊಳ್ಳುತ್ತಾ ಮುಖ ಮೇಲೆತ್ತಿ ಹೊಟ್ಟೆಯ ಭಾಗವನ್ನು ನೆಲದ ಕಡೆಗೆ ಬಾಗಿಸಿ
ಈಗ ಉಸಿರು ಹೊರಬಿಡುತ್ತಾ ನಿಮ್ಮ ಗಲ್ಲವನ್ನು ಎದೆಗೆ ತಾಕುವಂತೆ ಕೆಳಗೆ ಮಾಡಿ. ಸೊಂಟವನ್ನು ಹಿಂದಕ್ಕೆ ಮತ್ತು ಬೆನ್ನಿನ ಭಾಗವನ್ನು ಮೇಲ್ಭಾಗಕ್ಕೆ ಬಾಗಿಸಿ.
ಇದೇ ರೀತಿ ನಿಧಾನವಾಗಿ 10 ರಿಂದ 15 ಬಾರಿ ಮಾಡುತ್ತಿರಿ.
ಇದೇ ರೀತಿ ಮಾಡುತ್ತಿದ್ದರೆ ನಿಮ್ಮ ಬೆನ್ನು ನೋವಿನ ಸಮಸ್ಯೆಗೆ ತಕ್ಕಮಟ್ಟಿಗೆ ಪರಿಹಾರ ಸಿಗಬಹುದು.

ತೂಕ ಕಡಿಮೆಯಾಗಬೇಕಾದರೆ ಈ ಯೋಗ ಮಾಡಿ

Tue, 26 Mar 2024 10:28:00 +0530

Photo Courtesy: Twitter

ಬೆಂಗಳೂರು: ತೂಕ ಕಡಿಮೆ ಮಾಡಲು ನಾವು ಏನೇನೋ ಸರ್ಕಸ್ ಗಳನ್ನು ಮಾಡುತ್ತಿರುತ್ತೇವೆ. ಆದರೆ ಅದಕ್ಕೆ ಯೋಗದಲ್ಲಿ ಬೆಸ್ಟ್ ಪರಿಹಾರವಿದೆ ಎಂದು ನಿಮಗೆ ಗೊತ್ತಾ?

ಯೋಗ ಹಲವು ರೋಗ ಬಾಧೆ, ಸಮಸ್ಯೆಗಳಿಗೆ ಪರಿಹಾರ ನೀಡುತ್ತದೆ. ಯೋಗಾಸನಗಳಲ್ಲಿ ಕೆಲವೊಂದು ತೂಕ ಕಡಿಮೆ ಮಾಡಲು ಅತ್ಯುತ್ತಮವಾಗಿದೆ. ತೂಕ ಇಳಿಸಲು ಆರೋಗ್ಯದಲ್ಲಿ ನಿಯಂತ್ರಣ ಮಾಡುವಷ್ಟೇ ದೇಹಕ್ಕೆ ಚಟುವಟಿಕೆ ನೀಡುವುದೂ ಮುಖ್ಯ. ಇದಕ್ಕಾಗಿ ಪ್ರತಿನಿತ್ಯ ಸೂರ್ಯ ನಮಸ್ಕಾರದ ಜೊತೆಗೆ ನೌಕಾಸನ ಮಾಡಿ. ನೌಕಾಸನ ಮಾಡುವುದು ಹೇಗೆ ಎಂದು ಇಲ್ಲಿ ನೋಡಿ.

ಎರಡೂ ಕಾಲುಗಳ ಪಾದಗಳನ್ನು ಮುಂದಕ್ಕೆ ಚಾಚಿ ನೆಲದಲ್ಲಿ ಊರಿ ಇಡಿ. ನಿಮ್ಮ ಮೊಣಕಾಲುಗಳು ಎದೆಯ ಮಟ್ಟಕ್ಕಿರಲಿ. ಎರಡೂ ಕೈಗಳನ್ನು ಮುಂದಕ್ಕೆ ಚಾಚಿ ನೆಲಕ್ಕೆ ಸಮನಾಗಿರುವಂತೆ ನೋಡಿಕೊಳ್ಳಿ. ಬಳಿಕ ಎರಡೂ ಕಾಲುಗಳನ್ನು ಮೇಲಕ್ಕೆ ಎತ್ತಿ. ಹೀಗೆ ಮೇಲಕ್ಕೆತ್ತುವಾಗ ಕೈಗಳನ್ನು ಸಮಾನಂತರವಾಗಿ ಇಟ್ಟುಕೊಂಡು ಮೇಲೆತ್ತಿ.

ಈ ಭಂಗಿಯಲ್ಲಿ 30 ಸೆಕೆಂಡುಗಳ ಕಾಲ ಇದ್ದರೆ ಉತ್ತಮ. ಪ್ರತಿನಿತ್ಯ ಕನಿಷ್ಠ ಐದು ಬಾರಿ ಈ ರೀತಿ ಮಾಡುತ್ತಿದ್ದರೆ ಅನಗತ್ಯ ಬೊಜ್ಜು ಕರಗಿ ತೂಕ ಇಳಿಕೆಯಾಗುವುದಲ್ಲದೆ ಮಾನಸಿಕ ಒತ್ತಡದಂತಹ ಸಮಸ್ಯೆಗಳೂ ನಿವಾರಣೆಯಾಗುತ್ತದೆ.

ಮನಸ್ಸು ಶಾಂತವಾಗಿಡಲು ಯಾವ ಯೋಗ ಸೂಕ್ತ

Mon, 18 Mar 2024 11:03:00 +0530

Photo Courtesy: Twitter

ಬೆಂಗಳೂರು: ಯೋಗ ಮಾಡುವುದರಿಂದ ದೇಹಕ್ಕೆ ಕಸರತ್ತಿನ ಜೊತೆಗೆ ಮನಸ್ಸೂ ಶಾಂತವಾಗುತ್ತದೆ. ಹಾಗಿದ್ದರೆ ಇಂದು ಒತ್ತಡ ನಿವಾರಣೆಗೆ ಯಾವ ಯೋಗ ಸೂಕ್ತ ಎಂದು ನೋಡೋಣ.

ನಮ್ಮ ದೈನಂದಿನ ಜೀವನದ ಒತ್ತಡದಿಂದಾಗಿ ಅನೇಕರು ಇಂದು ಮಾನಸಿಕವಾಗಿ ಕುಗ್ಗಿ ಹೋಗುತ್ತಾರೆ. ಮಾನಸಿಕವಾಗಿ ಒತ್ತಡ, ಆತಂಕ ಇತ್ಯಾದಿ ಸಮಸ್ಯೆಗಳಿಂದ ಬಳಲುತ್ತಿರುತ್ತಾರೆ. ಕೆಲವರಿಗೆ ಇದು ನಿಯಂತ್ರಣ ಹಂತದಲ್ಲಿದ್ದರೆ ಇನ್ನು ಕೆಲವರಿಗೆ ವೈದ್ಯರ ಸಹಾಯ ಬೇಕಾಗುತ್ತದೆ.

ಮಾನಸಿಕ ಒತ್ತಡ ಮತ್ತು ಆತಂಕ ನಿವಾರಿಸಲು ಯೋಗ ಸಹಾಯಕವಾಗುತ್ತದೆ. ಇದಕ್ಕೆ ಹಲವು ಯೋಗಾಸನಗಳಿದ್ದು, ಅವುಗಳಲ್ಲಿ ಒಂದು ಸೇತುಬಂಧಾಸನ. ಸೇತು ಬಂಧಾಸನದಿಂದ ಅನೇಕ ಉಪಯೋಗಗಳಿವೆ. ಅದರಲ್ಲಿ ಪ್ರಮುಖವಾದುದು ಒತ್ತಡ ಮತ್ತು ಆತಂಕ ನಿವಾರಣೆ. ಈ ಯೋಗ ಮಾಡುವ ವಿಧಾನ ಇಲ್ಲಿದೆ.

ಸಮತಟ್ಟಾದ ನೆಲದ ಮೇಲೆ ಬೆನ್ನು ತಾಗಿಸಿ ಮಲಗಿ. ಬಳಿಕ ಮೊಣಕಾಲುಗಳನ್ನು ಎತ್ತಿ ಪಾದಗಳು ನೆಲಕ್ಕೆ ತಾಗುವಂತೆ ಸೊಂಟವನ್ನು ಕೊಂಚ ಮೇಲೆತ್ತಿ. ನಿಮ್ಮ ಎರಡೂ ಕೈಗಳನ್ನು ನೆಲದ ಮೇಲಿಡಿ. ಉಸಿರನ್ನು ಒಳಗೆ ತೆಗೆದುಕೊಳ್ಳುತ್ತಾ ಸೊಂಟವನ್ನು ಮೇಲೆತ್ತಿ. ಮೊಣಕಾಲುಗಳನ್ನು ಕೊಂಚ ಮುಂದಕ್ಕೆ ಬಾಗಿಸಿ. ಕೈಗಳನ್ನು ನೆಲಕ್ಕೆ ಒತ್ತಿ ಎದೆಯ ಭಾಗವನ್ನು ಮೇಲೆತ್ತಿ. ಇದೇ ರೀತಿ 4-8 ಬಾರಿ ಉಸಿರು ತೆಗೆದುಕೊಳ್ಳುತ್ತಾ ಪ್ರತಿನಿತ್ಯ ಮಾಡುತ್ತಿದ್ದರೆ ನಿಮ್ಮ ಮನಸ್ಸಿನ ಒತ್ತಡ, ಆತಂಕ ಇತ್ಯಾದಿ ಮಾನಸಿಕ ಸಮಸ್ಯೆಗಳು ದೂರವಾಗುತ್ತದೆ.

ಯೋಗ ಮಾಡುವ ಮೊದಲು ನೀರು, ಆಹಾರ ಸೇವಿಸಬಹುದೇ

Thu, 14 Mar 2024 12:03:00 +0530

ಬೆಂಗಳೂರು: ಯೋಗಾಸನ ಮಾಡುವ ಮೊದಲು ನಾವು ಯಾವ ಆಹಾರ ಕ್ರಮ ಅನುಸರಿಸಬೇಕು ಎಂಬ ಅನುಮಾನ ಅನೇಕರಿಗಿರುತ್ತದೆ. ನೀರು ಸೇವಿಸಬಹುದೇ? ಆಹಾರ ಸೇವಿಸಬಹುದೇ ಎಂಬಿತ್ಯಾದಿ ಗೊಂದಲಗಳಿಗೆ ಇಲ್ಲಿದೆ ಪರಿಹಾರ.

ಯೋಗಾಸನ ಮಾಡುವುದು ಎಂದರೆ ದೇಹಕ್ಕೆ ಚಟುವಟಿಕೆ ನೀಡಲೇಬೇಕಾಗುತ್ತದೆ. ಮೈ ಬಗ್ಗಿಸಿ ಯೋಗ ಮಾಡುವಾಗ ಹೊಟ್ಟೆ ತುಂಬಾ ಆಹಾರ ಅಥವಾ ನೀರು ಕುಡಿಯಲು ಸಾಧ‍್ಯವಾಗದು. ಹೀಗೆ ಮಾಡಿದರೆ ಸರಿಯಾದ ರೀತಿಯಲ್ಲಿ ಯೋಗಾಸನ ಮಾಡಲು ಸಮಸ್ಯೆಯಾಗಬಹುದು. ಹಾಗಾಗಿ ಯೋಗಾಸನ ಮಾಡುವ ಮೊದಲು ಕೆಲವೊಂದು ನಿಯಮಗಳನ್ನು ಪಾಲಿಸಲೇಬೇಕಾಗುತ್ತದೆ.

ಯೋಗಾಸನ ಮಾಡುವ ಮೊದಲು ನೀರು ಕುಡಿಯಬಹುದೇ ಎಂಬ ಅನುಮಾನ ಅನೇಕರಿಗಿರುತ್ತದೆ. ಆದರೆ ಒಂದು ವಿಚಾರ ನೆನಪಿರಲಿ, ನೀರು ಕುಡಿಯಲೇ ಬೇಕೆಂದಿದ್ದರೆ ಯೋಗಾಸನ ಮಾಡುವ 10 ರಿಂದ 15 ನಿಮಿಷ ಮೊದಲು ಕುಡಿಯಿರಿ. ಬಳಿಕ ಖಾಲಿ ಹೊಟ್ಟೆಯಲ್ಲಿರುವುದು ಸೂಕ್ತ.

ಅದೇ ರೀತಿ ಅಹಾರ ತೆಗೆದುಕೊ‍ಳ್ಳುವ ವಿಚಾರದಲ್ಲೂ ಕಟ್ಟುನಿಟ್ಟಿರಲಿ. ಯೋಗಾಸನ ಮಾಡುವ ಮೊದಲು ಖಡಾಖಂಡಿತವಾಗಿ ಹೊಟ್ಟೆ ತುಂಬಾ ಆಹಾರ ಸೇವಿಸಿರಬಾರದು. ಅರ್ಧ ಗಂಟೆ ಮೊದಲು ಲೈಟ್ ಫುಡ್ ತೆಗೆದುಕೊಳ್ಳಬಹುದು. ಅದೂ ಹಾಳು-ಮೂಳು ತಿನ್ನುವುದಲ್ಲ. ದೇಹಕ್ಕೆ ಶಕ್ತಿ ಕೊಡುವಂತಹ ಆರೋಗ್ಯಕರ ಆಹಾರ ಮಾತ್ರ ಸೇವಿಸಬಹುದು. ಇಲ್ಲದೇ ಹೋದರೆ ಯೋಗ ಮಾಡಲು ಕಷ್ಟವಾಗಬಹುದು.

ರೋಗ ನಿರೋಧಕ ಶಕ್ತಿ ಹೆಚ್ಚಿಸಲು ಈ ಯೋಗ ಸಹಾಯಕ

Tue, 12 Mar 2024 11:30:00 +0530

ಬೆಂಗಳೂರು: ಯೋಗದ ಮೂಲಕ ನಾವು ಅನೇಕ ರೋಗಗಳನ್ನು ತಡೆಗಟ್ಟಬಹುದು. ಅದೇ ರೀತಿ ಶರೀರಕ್ಕೆ ಯಾವುದೇ ರೋಗ

Photo Courtesy: Twitter

ಬಾರದಂತೆ ರೋಗ ನಿರೋಧಕ ಶಕ್ತಿಯನ್ನೂ ವೃದ್ಧಿಸಿಕೊಳ್ಳಬಹುದು. ಹಾಗಿದ್ದರೆ ರೋಗ ನಿರೋಧಕ ಶಕ್ತಿ ಹೆಚ್ಚಿಸುವಂತಹ ಯೋಗ ಯಾವುದು ನೋಡೋಣ.

ವಾತಾವರಣದಲ್ಲಿನ ಬದಲಾವಣೆ, ಆಹಾರ ಬದಲಾವಣೆಯಿಂದ ನಾವು ಪಕ್ಕನೇ ರೋಗಕ್ಕೆ ತುತ್ತಾಗುತ್ತೇವೆ. ಅದರಲ್ಲೂ ಕೊರೋನಾ ಬಂದ ಮೇಲಂತೂ ನಮ್ಮ ದೇಹದಲ್ಲಿ ರೋಗ ನಿರೋಧಕ ಶಕ್ತಿಯೇ ಕುಂಠಿತವಾಗಿದೆ. ಇದರಿಂದಾಗಿ ಬೇಗನೇ ರೋಗಕ್ಕೆ ತುತ್ತಾಗುತ್ತಿದ್ದೇವೆ.

ಬೇಗನೇ ರೋಗಕ್ಕೆ ತುತ್ತಾಗದಂತೆ ಅಥವಾ ರೋಗ ಬಂದರೆ ಬೇಗನೇ ಅದು ವಾಸಿಯಾಗಲು ನಮ್ಮ ದೇಹದಲ್ಲಿ ರೋಗ ನಿರೋಧಕ ಶಕ್ತಿ ವೃದ್ಧಿಯಾಗಬೇಕು. ಇದಕ್ಕೆ ಯೋಗಾಸನಗಳ ಪೈಕಿ ಮಂಡೂಕಾಸನ ಸಹಾಯ ಮಾಡಬಲ್ಲದು. ಅದನ್ನು ಮಾಡುವುದು ಹೇಗೆ ಇಲ್ಲಿ ನೋಡಿ.

ವಜ್ರಾಸನ ಭಂಗಿಯಲ್ಲಿ ಕುಳಿತುಕೊಳ್ಳಿ.
ಹೆಬ್ಬೆರಳನ್ನು ಮಡಚಿ ಅಂಗೈಯೊಳಗಿಡಿ
ಈಗ ಎರಡೂ ಅಂಗೈ ಮುಷ್ಠಿಯನ್ನು ಹೊಕ್ಕುಳದ ಬಳಿ ತನ್ನಿ
ಉಸಿರು ಹೊರಬಿಡುತ್ತಾ ಸೊಂಟದ ಭಾಗದಿಂದ ಮುಂದಕ್ಕೆ ಬಗ್ಗಿ
ನಿಮ್ಮ ಎರಡೂ ಮುಷ್ಠಿಗಳು ಹೊಕ್ಕುಳದ ಭಾಗವನ್ನು ಒತ್ತಿ ಇರಬೇಕು
ಭಾಗಿದ ಸ್ಥಿತಿಯಲ್ಲೇ ಉಸಿರು ಒಳಗೆ ತೆಗೆದುಕೊಂಡು ಮುಖವನ್ನು ನೇರ ಮುಂಭಾಗಕ್ಕೆ ನೋಡುವಂತೆ ಮಾಡಿ

ಇದೇ ರೀತಿ ನಿಯಮಿತವಾಗಿ ಮಾಡುತ್ತಿದ್ದರೆ ನಿಮ್ಮ ರೋಗ ನಿರೋಧಕ ವ್ಯವಸ್ಥೆ ಬಲವಾಗುತ್ತದೆ

ಮಂಡಿ ನೋವಿರುವವರು ಈ ಯೋಗ ಮಾಡಿ ನೋಡಿ

Mon, 04 Mar 2024 13:38:00 +0530

Photo Courtesy: Twitter

ಬೆಂಗಳೂರು: ಎಲ್ಲಾ ರೋಗಗಳಿಗೂ ಯೋಗದಲ್ಲಿ ಪರಿಹಾರವಿದೆ. ಇಂದು ನಾವು ಮಂಡಿ ನೋವಿಗೆ ಯಾವ ಯೋಗ ಮಾಡಿದರೆ ಪರಿಹಾರ ಸಿಗುತ್ತದೆ ಎಂದು ನೋಡೋಣ. ಮಂಡಿ ನೋವಿಗೆ ಹಲವು ಆಸನಗಳಿವೆ. ಅದರಲ್ಲಿ ಇಂದು ಸೇತುಬಂಧಾಸನ ಹೇಗೆ ಮಾಡುವುದು ನೋಡೋಣ.

ಇತ್ತೀಚೆಗಿನ ದಿನಗಳಲ್ಲಿ ವಯಸ್ಕರಿಗೆ ಮಾತ್ರವಲ್ಲ, ಚಿಕ್ಕ ವಯಸ್ಸಿನವರಿಗೂ ಮಂಡಿ ನೋವಿನ ಸಮಸ್ಯೆ ಕಂಡುಬರುತ್ತಿದೆ. ಅದಕ್ಕೆ ನಮ್ಮ ಜೀವನ ಶೈಲಿ, ನಾವು ಮಾಡುವ ಕೆಲಸ ಕಾರಣವಾಗಿರಬಹುದು. ಜೊತೆಗೆ ಸಾಕಷ್ಟು ಪೋಷಕಾಂಶಗಳ ಕೊರತೆಯಿಂದಲೂ ಮಂಡಿ ನೋವು ಬರಬಹುದು.

ಮಂಡಿ ನೋವಿಗೆ ಆಯುರ್ವೇದದಲ್ಲಿ ಅನೇಕ ಚಿಕಿತ್ಸೆಗಳಿವೆ. ಆದರೆ ಯೋಗದ ಮೂಲಕ ನಾವು ಮನೆಯಲ್ಲಿಯೇ ಸಿಂಪಲ್ ಟೆಕ್ನಿಕ್ ಬಳಸಿ ಮಂಡಿ ನೋವಿಗೆ ತಕ್ಕಮಟ್ಟಿಗೆ ಪರಿಹಾರ ಕಂಡುಕೊಳ್ಳಬಹುದಾಗಿದೆ. ಮಂಡಿ ನೋವಿಗೆ ಮುಖ್ಯವಾಗಿ ಸೇತುಬಂಧಾಸನ ಉತ್ತಮ ಪರಿಹಾರ ನೀಡಬಹುದು.

ಎರಡೂ ಕೈಗಳನ್ನು ಪಕ್ಕಕ್ಕಿರಿಸಿ ನೆಲದ ಮೇಲೆ ಮೊದಲು ಅಂಗಾತ ಮಲಗಿ.
ಉಸಿರು ಒಳಗೆ ತೆಗೆದುಕೊಳ್ಳುತ್ತಾ, ನಿಮ್ಮ ಸೊಂಟ ಮತ್ತು ಮೊಣಕಾಲಿನ ಭಾಗವನ್ನು ನಿಧಾನವಾಗಿ ಮೇಲೆತ್ತಿ. ಕೈ ಮತ್ತು ಭುಜಕ್ಕೆ ಶಕ್ತಿ ಕೊಟ್ಟು ಈ ಭಂಗಿಯಲ್ಲಿರಿ.
ಈ ಭಂಗಿ ಮಾಡುವಾಗ ನಿಮ್ಮ ಮೊಣಕಾಲು ಮತ್ತು ಭುಜದ ಮೇಲೆ ಭಾರ ಬೀಳುವುದರ ಅನುಭವ ನಿಮಗಾಗುತ್ತದೆ.
ಕೆಲವು ಸೆಕೆಂಡುಗಳ ನಂತರ ಉಸಿರನ್ನು ಹೊರಗೆ ಬಿಡುತ್ತಾ ನಿಧಾನವಾಗಿ ಸೊಂಟ ಮತ್ತು ಮೊಣಕಾಲಿನ ಭಾಗವನ್ನು ಮತ್ತೆ ಮೊದಲಿನಂತೆ ನೆಲದ ಕಡೆಗೆ ತನ್ನಿ.

ಈ ಯೋಗವನ್ನು ನಿಯಮಿತವಾಗಿ ಮಾಡುತ್ತಿದ್ದರೆ ನಿಮ್ಮ ಮೊಣಕಾಲಿನ ನೋವಿಗೆ ತಕ್ಕಮಟ್ಟಿಗೆ ಪರಿಹಾರ ಕಂಡುಕೊಳ್ಳಬಹುದು.

ಹೊಟ್ಟೆಯ ಬೊಜ್ಜು ಕರಗಿಸಲು ಈ ಯೋಗಾಸನ ಬೆಸ್ಟ್

Sat, 24 Feb 2024 12:28:00 +0530

ಬೆಂಗಳೂರು: ಒಂದು ವಯಸ್ಸು ದಾಟಿದ ಮೇಲೆ ವಿಶೇಷವಾಗಿ ಮಹಿಳೆಯರಿಗೆ ಹೊಟ್ಟೆಯ ಬೊಜ್ಜು ಅಥವಾ ಬೆಲ್ಲಿ ಫ್ಯಾಟ್ ಚಿಂತೆಗೆ ಕಾರಣವಾಗುತ್ತದೆ.

ಹೊಟ್ಟೆಯಲ್ಲಿ ಬೊಜ್ಜು ಶೇಖರೆಣೆಯಾಗುವುದರಿಂದ ಅಂದಗೆಡುತ್ತದೆ ಎಂಬ ಚಿಂತೆಯಿರುತ್ತದೆ. ಹೊಟ್ಟೆಯಲ್ಲಿ ಬೊಜ್ಜು ಬೆಳೆಯಲು ನಾವು ಸೇವಿಸುವ ಆಹಾರ ಮತ್ತು ಜೀವನ ಶೈಲಿಯೂ ಕಾರಣ. ಆರೋಗ್ಯಕರವಲ್ಲದ, ಜಿಡ್ಡುಯುಕ್ತ, ಫಾಸ್ಟ್ ಫುಡ್ ಗಳನ್ನು ಸೇವಿಸುವುದನ್ನು ಕಡಿಮೆ ಮಾಡಬೇಕು. ಅದೇ ರೀತಿ ದೇಹಕ್ಕೆ ವ್ಯಾಯಾಮ ನೀಡಬೇಕು. ಬೆಲ್ಲಿ ಫ್ಯಾಟ್ ಕರಗಲು ನಾವು ಪ್ರತಿನಿತ್ಯ ಒಂದು ಸಿಂಪಲ್ ಯೋಗಾಸನ ಮಾಡಬಹುದು. ಅದು ಉಸ್ಟ್ರಾಸನವಾಗಬಹುದು. ಉಸ್ಟ್ರಾಸನ ಹೊಟ್ಟೆಗೆ ಹೆಚ್ಚು ಚಟವಟಿಕೆ ನೀಡುತ್ತದೆ. ಇದರಿಂದ ಹೊಟ್ಟೆಯ ಭಾಗದಲ್ಲಿ ಶೇಖರೆಯಾಗುವ ಬೊಜ್ಜು ಕರಗಿ ಸ್ಲಿಮ್ ಆಗಿ ಕಾಣಿಸುತ್ತೀರಿ.

ಉಸ್ಟ್ರಾಸನ
ಮೊಣಕಾಲಿಗೆ ಬಲ ಹಾಕಿ ಮ್ಯಾಟ್ ನ ಮೇಲೆ ಕಾಲು ಹಿಂದಕ್ಕೆ ಹಾಕಿ ಕುಳಿತುಕೊಳ್ಳಿ. ನಿಮ್ಮ ಎರಡೂ ಕೈಗಳು ಸೊಂಟದ ಮೇಲಿರಲಿ. ಬಳಿಕೆ ಮೆಲ್ಲನೆ ಹಿಂದಕ್ಕೆ ಬಾಗಿ. ಈಗ ನಿಮ್ಮ ಕೈಗಳು ಹಿಂಗಾಲನ್ನು ಟಚ್ ಮಾಡುವಂತಿರಲಿ. ನಿಮ್ಮ ಅಂಗಾಲಿಗೆ ನೇರವಾಗುವಷ್ಟು ತಲೆ ಮತ್ತು ಬೆನ್ನು ಬಾಗಿಸಿ. ಕೆಲವು ಕಾಲ ಹೀಗೇ ಉಸಿರು ಬಿಗಿ ಹಿಡಿದು ನಿಲ್ಲಿ. ಬಳಿಕ ನಿಧಾನಕ್ಕೆ ಉಸಿರು ತೆಗೆದು ಮೊದಲಿನ ಹಂತಕ್ಕೆ ಬನ್ನಿ. ಮತ್ತೆ ನಿಮ್ಮ ಎರಡೂ ಕೈಗಳನ್ನು ಸೊಂಟದ ಮೇಲಿಡಿ. ಇದೇ ರೀತಿ ನಾಲ್ಕೈದು ಬಾರಿ ಪ್ರತಿನಿತ್ಯ ಮಾಡಿದರೆ ಬೆಲ್ಲಿ ಫ್ಯಾಟ್ ಸಮಸ್ಯೆಗೆ ಪರಿಹಾರ ಸಿಗುತ್ತದೆ.

ಗ್ಯಾಸ್ಟ್ರಿಕ್ ಸಮಸ್ಯೆಯೇ ಹಾಗಿದ್ದರೆ ಈ ಯೋಗ ಮಾಡಿ

Mon, 19 Feb 2024 12:05:00 +0530

Photo Courtesy: Twitter

ಬೆಂಗಳೂರು: ಇತ್ತೀಚೆಗಿನ ದಿನಗಳಲ್ಲಿ ನಮ್ಮ ಆಹಾರ ಶೈಲಿಯಿಂದಾಗಿ ಗ್ಯಾಸ್ಟ್ರಿಕ್ ಅಥವಾ ಅಸಿಡಿಟಿ ಸಮಸ್ಯೆಗಳು ಸಾಮಾನ್ಯವಾಗಿಬಿಟ್ಟಿದೆ.

ಮಸಾಲ, ಖಾರದ ವಸ್ತು ತಿನ್ನುವ ಹಾಗಿಲ್ಲ, ಖಾಲಿ ಹೊಟ್ಟೆ ಬಿಡುವಂತಿಲ್ಲ. ಎದೆ ಉರಿ, ಹೊಟ್ಟೆ ಉಬ್ಬರ, ಗಂಟಲು ಉರಿ, ಹೊಟ್ಟೆ ಉರಿ ಇತ್ಯಾದಿ ಗ್ಯಾಸ್ಟ್ರಿಕ್ ಗೆ ಸಂಬಂಧಿಸಿದ ಸಮಸ್ಯೆಗಳಿಂದ ಬಳಲುತ್ತಿರುತ್ತೇವೆ. ಗ್ಯಾಸ್ಟ್ರಿಕ್ ಸಮಸ್ಯೆಗಳಿಗೆ ಅನೇಕ ಔಷಧಿ, ಮನೆ ಮದ್ದುಗಳನ್ನು ಮಾಡಿ ಬೇಸತ್ತಿದ್ದೀರಾ? ಹಾಗಿದ್ದರೆ ಯೋಗಾಸನ ಟ್ರೈ ಮಾಡಿ ನೋಡಬಹುದು. ಯೋಗಾಸನದಿಂದ ಗ್ಯಾಸ್ಟ್ರಿಕ್ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಬಹುದು. ಅದಕ್ಕಾಗಿ ನೀವು ಪ್ರತಿನಿತ್ಯ ಪವನ ಮುಕ್ತಾಸನ ಮಾಡಿದರೆ ಸಾಕು.

ಪವನ ಮುಕ್ತಾಸನ ಮಾಡುವುದು ಹೇಗೆ?
ಈ ಆಸನದಿಂದ ನಿಮ್ಮ ಕೆಳಹೊಟ್ಟೆ, ಸೊಂಟ, ತೊಡೆ ಮತ್ತು ಪೃಷ್ಟಕ್ಕೂ ರಿಲೀಫ್ ಸಿಗುತ್ತದೆ.

ಸಮತಟ್ಟಾದ ನೆಲದ ಮೇಲೆ ಅಂಗಾತ ಮಲಗಿ ಕಾಲುಗಳನ್ನು ಮಾತ್ರ 90 ಡಿಗ್ರಿ ನೇರಕ್ಕೆ ಬಾಗಿಸಿ
ಈಗ ಎರಡೂ ಮೊಣಕಾಲನ್ನು ಬಾಗಿಸಿ ತೊಡೆಯನ್ನು ಸೊಂಟದ ಭಾಗಕ್ಕೆ ತನ್ನಿ.
ಮೊಣಕಾಲು ಮತ್ತು ಪಾದವನ್ನು ಸೇರಿಸಿ ಇರಿಸಿ.
ಕೈಗಳನ್ನು ಕಾಲುಗಳ ಸುತ್ತ ಹಾಕಿ
ಕೈ ಬೆರಳುಗಳನ್ನು ಬೆಸೆದುಕೊಂಡು ಕಾಲುಗಳನ್ನು ಹಿಡಿದಿಟ್ಟುಕೊಳ್ಳಿ.
ಕುತ್ತಿಗೆಯನ್ನು ಕೊಂಚ ಎತ್ತಿ ಎದೆಯ ಭಾಗಕ್ಕೆ ಗಲ್ಲ ತಾಕಿಸಿ.

ಇದೇ ರೀತಿ 20 ಸೆಕೆಂಡುಗಳ ಕಾಲ ಹಿಡಿದಿಟ್ಟುಕೊಂಡು ಮತ್ತು ಬಿಟ್ಟುಕೊಂಡು ಸುಮಾರು 1 ನಿಮಿಷಗಳ ಕಾಲ ಕಸರತ್ತು ಮಾಡಿದರೆ ಸಾಕು.

ಮಲಬದ್ಧತೆ ನಿವಾರಣೆಗೆ ಸರಳ ಯೋಗ

Thu, 15 Feb 2024 14:20:00 +0530

ಬೆಂಗಳೂರು: ಇಂದಿನ ಆಹಾರ ಶೈಲಿ ಮತ್ತು ಜೀವನ ಶೈಲಿಯಿಂದಾಗಿ ಅನೇಕರು ಮಲಬದ್ಧತೆ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಹಾಗಿದ್ದರೆ ಮಲಬದ್ಧತೆ ಸಮಸ್ಯೆಗೆ ಪರಿಹಾರವೇನು?

ಮಲಬದ್ಧತೆ ಪರಿಹಾರವಾಗಬೇಕಾದರೆ ದೇಹಕ್ಕೆ ಸಾಕಷ್ಟು ಫೈಬರ್ ಅಂಶ ಮತ್ತು ನೀರಿನಂಶವಿರುವ ಆಹಾರಗಳನ್ನು ಸೇವಿಸುವುದು ಅಗತ್ಯವಾಗಿದೆ. ಅದರ ಜೊತೆಗೆ ಯೋಗವೂ ಮಲಬದ್ಧತೆ ನಿವಾರಣೆ ಮಾಡಲು ಸಹಕರಿಸುತ್ತದೆ. ಮಲಬದ್ಧತೆ ನಿವಾರಿಸಲು ಸಿಂಪಲ್ ಯೋಗ ಟ್ರಿಕ್ಸ್ ಇಲ್ಲಿದೆ ನೋಡಿ.

ಕಾಲುಗಳನ್ನು ಮುಂದಕ್ಕೆ ಚಾಚಿ ಕುಳಿತಕೊಳ್ಳಿ
ಬಲಗಾಲನ್ನು ಬಾಗಿಸಿ ಬಲ ಪಾದವನ್ನು ನೆಲಕ್ಕೆ ಊರಿ ಕುಳಿತುಕೊಳ್ಳಿ. ಪಾದ ಮಡಚಿರುವ ಎಡಕಾಲಿನ ಮೊಣಕಾಲಿನ ಹೊರಭಾಗದಲ್ಲಿರುವಂತೆ ನೋಡಿಕೊಳ್ಳಿ.
ಈಗ ಎಡ ಕಾಲನ್ನು ಬಾಗಿಸಿ ಪೃಷ್ಟದ ಕೆಳಗೆ ಅಥವಾ ಸಮೀಪದಲ್ಲಿರುವಂತೆ ನೋಡಿಕೊಳ್ಳಿ.
ಎಡಕೈಯನ್ನು ಅಥವಾ ಮಣಿಗಂಟನ್ನು ಬಲ ಮೊಣಕಾಲಿನ ಬಳಿಯಿರುವಂತೆ ಇರಿಸಿ ಮತ್ತು ಮುಖವನ್ನು ಬಲ ಭುಜದ ಸಮೀಪ ತಂದು ಬಾಗಿಸಿ.
ಈ ಭಂಗಿಯಲ್ಲಿ ಕೆಲವು ಸಮಯ ಕುಳಿತುಕೊಳ್ಳಿ ಮತ್ತು ನಂತರ ಇನ್ನೊಂದು ಬದಿಯಲ್ಲೂ ಇದೇ ರೀತಿ ವಿಧಾನದಿಂದ ಕಾಲು ಮತ್ತು ಕೈಗಳನ್ನು ಬಾಗಿಸಿ ವ್ಯಾಯಾಮ ಮಾಡಿ. ಇದು ಮಲಬದ್ಧತೆ ನಿವಾರಣೆಗೆ ಉತ್ತಮ ಯೋಗ ವಿಧಾನವಾಗಿದೆ.

ಯೋಗ ಮಾಡಿ: ನಿಮ್ಮ ದೇಹ ಮತ್ತು ಮನಸ್ಸನ್ನು ಕೂಲ್ ಆಗಿರಿಸಿ

Tue, 21 Jun 2016 16:09:00 +0530

ಯೋಗ- ಪ್ರಾಚೀನ ಭಾರತಿಯ ಪದ್ಧತಿ. ಅನಾದಿ ಕಾಲದಿಂದಲೂ ಪ್ರಚಲಿತದಲ್ಲಿರುವ ಯೋಗದಲ್ಲಿ ಚಿಕಿತ್ಸಕ ಅಂಶಗಳಿದ್ದು ನಿಧಾನವಾಗಿ ವಿಶ್ವದಾದ್ಯಂತ ಜೀವನಶೈಲಿಯಾಗಿ ಪರಿವರ್ತಿತವಾಗುತ್ತಿದೆ.

ಔಷಧದಿಂದ ಸಾಧ್ಯವಿಲ್ಲದ್ದು ಯೋಗದಿಂದ ಹೇಗೆ ಸಾಧ್ಯ? ಇದು ರೋಗದಿಂದ ಮುಕ್ತಿ ಕೊಡುವುದಷ್ಟೇ ಅಲ್ಲ. ಮಾನಸಿಕ ಶಾಂತಿಯನ್ನು ಸಹ ನೀಡಬಲ್ಲದು.

ಇದು ಹಲವಾರು ಆಸನಗಳನ್ನು ಒಳಗೊಂಡಿರುವ ಆಧ್ಯಾತ್ಮಿಕ ಅಭ್ಯಾಸವಾಗಿದ್ದು ಮಾನಸಿಕ, ದೈಹಿಕ ಮತ್ತು ಭಾವನಾತ್ಮಕ ಚೈತನ್ಯವನ್ನು ನೀಡುತ್ತದೆ.

ವೇದಕಾಲಕ್ಕೂ ಪೂರ್ವದಲ್ಲಿಯೇ ಯೋಗದ ಆಚರಣೆ ಇತ್ತು ಎಂದು ಋಗ್ವೇದದಲ್ಲಿ ಹೇಳಲಾಗಿದೆ.

2015ರಲ್ಲಿ ವಿಶ್ವಸಂಸ್ಥೆ ಅಂತರಾಷ್ಟ್ರೀಯ ಯೋಗದಿನವನ್ನು ಆಚರಣೆಗೆ ತಂದಿತ್ತು. ಪ್ರತಿವರ್ಷ ಜೂನ್ 21 ರಂದು ಈ ದಿನವನ್ನು ವಿಶ್ವದಾದ್ಯಂತ ಆಚರಿಸಲಾಗುತ್ತಿದೆ.

ಯೋಗದಲ್ಲಿ ಅತ್ಯಂತ ಪ್ರಸಿದ್ಧವಾದ ಒಂದು ಆಸನವೆಂದರೆ ಸೂರ್ಯ ನಮಸ್ಕಾರ. ಇದು 12 ಆಸನಗಳನ್ನೊಳಗೊಂಡ ವೈಜ್ಞಾನಿಕ ತಂತ್ರವಾಗಿದೆ. ಇದು ಆರೋಗ್ಯಕ್ಕೆ ಅಸಂಖ್ಯಾತ ಅನುಕೂಲಗಳನ್ನುಂಟು ಮಾಡುತ್ತದೆ.

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.

ಪಶ್ಚಿಮೋತ್ಥಾನಾಸನ

Thu, 03 Jun 2010 17:44:53 +0530

ಈ ಆಸನದ ವೇಳೆಗೆ ಬೆನ್ನೆಲುಬನ್ನು ನೇರವಾಗಿ ಚಾಚಲಾಗುತ್ತದೆ.

ವಿಧಾನ
ಚಾಪೆ ಅಥವಾ ನೆಲಹಾಸಿನ ಮೇಲೆ ಕುಳಿತು ಕಾಲುಗಳನ್ನು ಮುಂದಕ್ಕೆ ಚಾಚಿ. ಬೆನ್ನೆಲುಬು ನೆಟ್ಟಗಿರಿಸಲು ಪ್ರಯತ್ನಿಸಿ. ಪಾದಗಳು ಜತೆಗಿರಬೇಕು ಮತ್ತು ಮೊಣಕಾಲುಗಳು ಬಾಗಬಾರದು.

ಕೈಗಳನ್ನು ಮುಂದಕ್ಕೆ ಚಾಚಿ ಮತ್ತು ಉಸಿರು ಒಳಗೆಳೆದುಕೊಳ್ಳುವ ವೇಳೆ ಭುಜಕ್ಕಿಂತ ಮೇಲೆತ್ತಿ. ಬೆನ್ನು ನೀಳವಾಗಿಸಿ, ಉಸಿರು ಬಿಡುತ್ತಾ ಸೊಂಟದಿಂದಲೇ ಮುಂದಕ್ಕೆ ಬಾಗಿ. ಕಾಲ್ಬೆರಳು, ಹಿಮ್ಮಡಿ ಅಥವಾ ಪಾದ ಎಲ್ಲಿಗೆ ನಿಮ್ಮ ಕೈ ತಲುಪುತ್ತದೆಯೋ ಅದನ್ನು ಹಿಡಿದುಕೊಳ್ಳಿ. ನಿಮ್ಮ ಕೈಗಳು ಕಾಲ್ಬೆರಳುಗಳನ್ನು ತಲುಪದಿದ್ದಲ್ಲಿ, ನೀವು ಮೇಲ್ಚಾಚಿರುವ ನಡು ಪಾದಗಳನ್ನು ಹಿಡಿದುಕೊಳ್ಳಬಹುದು. ಪಾದಗಳನ್ನು ಹಿಡಿದುಕೊಳ್ಳುವ ವೇಳೆ ಮೊಣಕೈಗಳನ್ನು ನೇರವಾಗಿಸಿ, ಲಘುವಾಗಿ ಬಾಗಿಸಿ.

ಉಸಿರು ಒಳಗೆಳೆದುಕೊಳ್ಳುವ ವೇಳೆ ಬೆನ್ನು ಮೂಳೆಯನ್ನು ವಿಸ್ತರಿಸಿ. ಉಸಿರು ಬಿಡುವ ವೇಳೆ ಎದೆಯನ್ನು ಒಳಗೆಳೆದುಕೊಳ್ಳಿ. ಸುಮಾರು ಆರರಿಂದ ಎಂಟು ಬಾರಿ ಉಸಿರಾಡುವ ತನಕ ಈ ಭಂಗಿಯಲ್ಲಿರಿ. ಈ ಆಸನದಿಂದ ಹೊರಬರಲು, ಉಸಿರು ಬಿಡುತ್ತಾ ಕೈಗಳನ್ನು ಹೊರಚಾಚಿ. ಬೆನ್ನನ್ನು ನೆಟ್ಟಗಾಗಿಸಿ. ಉಸಿರು ಬಿಡುತ್ತಾ ಕೈಗಳನ್ನು ಮುಕ್ತವಾಗಿಸಿ.

ಎಚ್ಚರಿಕೆ
ಹೀಗಾಗಿ ಬೆನ್ನುಮೂಳೆ ಗಾಯಗಳೇನಾದರೂ ಇದ್ದಲ್ಲಿ ಎಚ್ಚರಿಕೆ ವಹಿಸಿ. ಗರ್ಭಿಣಿಯರು ಈ ಆಸನವನ್ನು ಆಭ್ಯಾಸ ಮಾಡುವುದಾದರೆ ಕಾಲುಗಳನ್ನು ಅಗಲಕ್ಕಿರಿಸಿ. ಸ್ಲಿಪ್ ಡಿಸ್ಕ್, ಬೇಧಿ ಅಥವಾ ಸೊಂಟ ನೋವು ಇದ್ದಲ್ಲಿ ಈ ಭಂಗಿ ಬೇಡ.

ಅನುಕೂಲಗಳು
ಬೆನ್ನು ಹುರಿಗೆ ಉತ್ತಮವಾದ ವ್ಯಾಯಾಮ ಒದಗುತ್ತದೆ. ಅಂತೆಯೇ ಕಿಬ್ಬೊಟ್ಟೆಯೊಳಗಿನ ಅಂಗಾಂಗಗಳಿಗೂ ವ್ಯಾಯಾಮ ಲಭಿಸಿ ಬೊಜ್ಜು ಕರಗಿಸಲು ಸಹಕಾರಿಯಾಗುತ್ತದೆ.

ಸೂರ್ಯ ನಮಸ್ಕಾರ

Thu, 03 Jun 2010 14:42:21 +0530

ಯೋಗಾಸನಗಳ ಸರಣಿಯಲ್ಲಿ ಸೂರ್ಯ ನಮಸ್ಕಾರ ಪ್ರಮುಖ. ಇದು ಎಲ್ಲ ವಯಸ್ಸಿನವರಿಗೂ ಯೋಗ್ಯ. ದೈಹಿಕ ಹಾಗೂ ಮಾನಸಿಕ ಆರೋಗ್ಯಕ್ಕೆ ನೆರವಾಗುತ್ತದೆ. ಸೂರ್ಯ ನಮಸ್ಕಾರದಲ್ಲಿ 12 ಆಸನಗಳು ಇರುತ್ತವೆ.

ಮಾಡುವ ಕ್ರಮ
ಕಾಲುಗಳನ್ನು ಹತ್ತಿರ ತಂದು ನೇರವಾಗಿ ನಿಲ್ಲಿ. ನಿಮ್ಮ ಕೈಗಳನ್ನು ನೇರವಾಗಿ ಮೇಲೆತ್ತಿ ಹಾಗೇ ಮುಂದುವರಿದು ನೇರವಾಗಿ ನಿಮ್ಮ ಮುಖಕ್ಕೆ ಎದುರಾಗುವಂತೆ ಮಾಡಿ. ಕೈಗಳನ್ನು ನಮಸ್ಕಾರ ಮಾಡುವ ರೀತಿಯಲ್ಲಿ ಜೋಡಿಸಿ.

ಶ್ವಾಸ ಒಳಗೆ ಎಳೆದುಕೊಳ್ಳುವುದರೊಂದಿಗೆ ನಿಮ್ಮ ಕಿವಿಗಳಿಗೆ ತಗಲುವಂತೆ ಕೈಗಳನ್ನು ಮೇಲಕ್ಕೆತ್ತಿ. ನಂತರ ನಿಧಾನವಾಗಿ ಬಾಗಿ ನಿಮ್ಮ ತೋಳುಗಳನ್ನು ತಲೆಯಿಂದ ಹಿಂದಕ್ಕೆ ತೆಗೆದುಕೊಳ್ಳಿ.

ಶ್ವಾಸವನ್ನು ಹೊರಗೆ ಬಿಡುತ್ತಾ ಮುಂದಕ್ಕೆ ಬಾಗಿ ಎರಡು ಕೈಗಳಿಂದ ನಿಮ್ಮ ಪಾದದ ಬೆರಳುಗಳನ್ನು ಮುಟ್ಟಿ ಹಾಗೇ ಕೆಲ ನಿಮಿಷಗಳ ಕಾಲ ಅದೇ ಸ್ಥಿತಿಯಲ್ಲಿರಲು ಪ್ರಯತ್ನಿಸಿ. ಇದು ಪಾದ ಪಶ್ಚಿಮೋತ್ಥಾನಾಸನ.

ಶ್ವಾಸ ಒಳಗೆಳೆದುಕೊಳ್ಳುತ್ತಾ ಬಲಗಾಲು ಹಿಂದೆ ಇಟ್ಟು ಕಾಲು ಮತ್ತು ಕೈಗಳನ್ನು ಭೂಮಿಯ ಮೇಲೆ ಊರಲು ಪ್ರಯತ್ನಿಸಿ. ಇದೇ ಸ್ಥಿತಿಯಲ್ಲಿ ಕೆಲ ಸೆಕೆಂಡು ಕಳೆಯಿರಿ.

ಶ್ವಾಸ ಹೊರಗೆ ಬಿಡುತ್ತಾ ಕಾಲುಗಳನ್ನು ನೇರವಾಗಿರಿಸಿ ಕೈಗಳನ್ನು ನೇರವಾಗಿಡಲು ಪ್ರಯತ್ನಿಸಿ. ಹಿಂಗಾಲನ್ನು ಎತ್ತಿ ಅದರ ಜೊತೆಗೆ ನೇರವಾಗಿ ಕೈಗಳನ್ನು ತಲೆಯ ಹಿಂಭಾಗಕ್ಕೆ ತನ್ನಿ.

ನೆಲದ ಮೇಲೆ ಬೋರಲಾಗಿ ಮಲಗಿ ಶ್ವಾಸವನ್ನು ಒಳಗೆ ಎಳೆದುಕೊಳ್ಳುತ್ತಾ ಪಾದ, ಮೊಣಕಾಲು ಎದೆ ಮತ್ತು ಹಣೆ ನೆಲಕ್ಕೆ ನಿಧಾನವಾಗಿ ತಾಗುವಂತೆ ಮಾಡಿ ಹಿಂಗಾಲನ್ನು ನೆಲಕ್ಕಿಂತ ಸ್ವಲ್ಪ ಮೇಲಕ್ಕೆತ್ತಿ ಶ್ವಾಸ ಹೊರಗೆ ಬಿಡಿ.

ಶ್ವಾಸ ಹೊರಗೆಳೆದುಕೊಳ್ಳುತ್ತಾ ನಿಧಾನವಾಗಿ ದೇಹವನ್ನು ಆದಷ್ಟು ಹಿಂದಕ್ಕೆ ಬಾಗಿಸಿ. ಇದು ಭುಜಂಗಾಸಾನ.

ಶ್ವಾಸ ನಿಧಾನವಾಗಿ ಹೊರಗೆ ಬಿಡುತ್ತಾ ಕೈಗಳನ್ನು ನೇರವಾಗಿಟ್ಟು ಸೊಂಟವನ್ನು ಮೇಲಕ್ಕೆತ್ತಿ ತಲೆಯನ್ನು ಮೇಲ್ಮುಖ ಮಾಡುತ್ತಾ ಕೈಗಳನ್ನು ಹಿಂದಕ್ಕೆ ತೆಗೆಯಲು ಪ್ರಯತ್ನಿಸಿ.

ನಿಧಾನವಾಗಿ ಶ್ವಾಸ ಒಳಗೆಳೆದುಕೊಳ್ಳುತ್ತಾ ಬಲಗಾಲಿನ ಮೊಣಕಾಲನ್ನು ಮುಂದಕ್ಕೆ ಇಡುತ್ತಾ ತಲೆಯನ್ನು ಆದಷ್ಟು ಮೇಲೆತ್ತಲು ಪ್ರಯತ್ನಿಸಿ.

ನಿಧಾನವಾಗಿ ಶ್ವಾಸ ಹೊರಗೆ ಬಿಡುತ್ತಾ ಕಾಲುಗಳು ನೇರ, ಕೈಗಳು ಪಾದದ ಬೆರಳುಗಳನ್ನು ಮುಟ್ಟುತ್ತಿದ್ದು ತಲೆ ಮೊಣಕಾಲಿಗೆ ತಗುಲಿರಬೇಕು.

ನಿಧಾನವಾಗಿ ಶ್ವಾಸ ಒಳಗೆಳೆದುಕೊಳ್ಳುತ್ತಾ ಕೈಗಳನ್ನು ಮೇಲಕ್ಕೆತ್ತಿ ನಿಧಾನವಾಗಿ ಹಿಂದಕ್ಕೆ ಬಾಗಿ ಕೈಗಳನ್ನು ತಲೆಯ ಹಿಂಭಾಗಕ್ಕೆ ತನ್ನಿ. ನಮಸ್ಕಾರದ ಸ್ಥಿತಿಗೆ ಬನ್ನಿ.

ಈಗ ಸಾಮಾನ್ಯ ಸ್ಥಿತಿಗೆ ಬನ್ನಿ. ಇದರಿಂದ ಒಂದು ಸುತ್ತಿನ ಸೂರ್ಯ ನಮಸ್ಕಾರ ಮಾಡಿದಂತಾಯಿತು. ಈಗ ಎಡಗಾಲಿನಿಂದ ಈ ಹಂತಗಳನ್ನು ಪುನರಾವರ್ತಿಸಿ.

ಮುನ್ನೆಚ್ಚರಿಕೆ

ಬೆನ್ನು ನೋವಿನಿಂದ ಬಳಲುತ್ತಿರುವವರು ಸೂರ್ಯ ನಮಸ್ಕಾರ ಮಾಡುವ ಬಗ್ಗೆ ಯೋಗ ಶಿಕ್ಷಕರ ಸಲಹೆ ಪಡೆದುಕೊಳ್ಳಿ.

ಪ್ರಯೋಜನಗಳು

ಪಚನ ಕ್ರಿಯೆ ಉತ್ತಮವಾಗುತ್ತದೆ, ಮೈಕಾಂತಿ ತಾಜಾ ಆಗುತ್ತದೆ, ಚರ್ಮ ಕಾಯಿಲೆ ದೂರವಾಗುತ್ತದೆ, ಬೆನ್ನುಮೂಳೆ ಹಾಗೂ ನಡುಪಟ್ಟಿ ವಿಕಸನವಾಗುತ್ತದೆ. ಮಲಬದ್ಧತೆ ದೂರವಾಗುತ್ತದೆ.

ಪೂರ್ಣ ಧನುರಾಸನ

Wed, 02 Jun 2010 18:58:08 +0530

ಸಂಸ್ಕೃತದಲ್ಲಿ ಧನುಸ್ಸು ಅಂದರೆ ಬಿಲ್ಲು. ಈ ಆಸನವನ್ನು ಮಾಡು ವೇಳೆಗೆ ನಿಮ್ಮ ದೇಹವು ಬಿಗಿಯಾಗಿ ಬಾಗಿಸಿದ ಬಿಲ್ಲಿನ ಆಕಾರಕ್ಕೆ ಬಾಗುವ ಕಾರಣ ಇದಕ್ಕೆ ಧನುರಾಸನ ಎಂಬ ಹೆಸರು. ನಿಮ್ಮ ನಡು ಮತ್ತು ತೊಡೆಗಳು ಬಾಗಿದ್ದರೆ, ಕಾಲಿನ ಕೆಳಭಾಗ ಮತ್ತು ಕೈಗಳು ನೆಟ್ಟಗಿನ ಬಿಲ್ಲುಹುರಿಯಂದಕ್ಕೆ ತಿರುಗುತ್ತದೆ.

ವಿಧಾನ
ಅರ್ಧ ಧನುರಾಸನ ಭಂಗಿಯ ಬಳಿಕ ಈ ಕೆಳಗಿನ ವಿಧಾನವನ್ನು ಅನುಸರಿಸಿ.

ಏಕಕಾಲಿಕ್ಕೆ ನಿಮ್ಮ ತಲೆ, ಕತ್ತು, ಗಲ್ಲ, ಎದೆ, ತೊಡೆ, ಮತ್ತು ಮೊಣಕಾಲುಗಳನ್ನು ಹಿಂದಕ್ಕೆ ಎತ್ತಿ

ಗಲ್ಲವನ್ನು ನೆಲದಿಂದ ಮೇಲಕ್ಕೆತ್ತಿ.

ಅದೇ ಸಮಯದಲ್ಲಿ ನಿಮ್ಮ ಜಠರ ಕುಹರದ ಕೆಳಭಾಗ ಹಾಗು ತಲೆ, ಕತ್ತು, ಗಲ್ಲ, ಭುಜ, ಎದೆ ಮತ್ತು ಪೃಷ್ಠ, ತೊಡೆ ಮತ್ತು ಮೊಣಕಾಲುಗಳನ್ನು ನಿಧಾನವಾಗಿ ಮೇಲಕ್ಕೆತ್ತಿ.

ಮೊಣಕಾಲು ಮತ್ತು ಪಾದಗಳನ್ನು ಜತೆಯಾಗಿಸಿ.

ಮೇಲಕ್ಕೆ ನೋಡಿ

ನಿಮ್ಮ ತಲೆಯನ್ನು ಅದಷ್ಟು ಮೇಲೆ ಎತ್ತಿ ಮತ್ತು ಸಾಧ್ಯವಾದಷ್ಟು ಹಿಂದಕ್ಕೆ ಬಾಗಿಸಿ

ಹಿಮ್ಮಡಿಗಳನ್ನು ಬಲವಾಗಿ ಎಳೆಯಿರಿ.

ಎದುರಿಗೆ ನೇರವಾಗಿ ದೃಷ್ಟಿ ಹರಿಸಿ.

ನಿಮ್ಮ ದೇಹವನ್ನು ನಾಭಿ ಭಾಗದ ಬಳಿ ಸಮತೋಲನ ಸ್ಥಿತಿಗೆ ತರಲು ಪ್ರಯತ್ನಿಸಿ.

ಬೆನ್ನನ್ನು ಗರಿಷ್ಠ ಮಿತಿಯವರೆಗೆ ಬಾಗಿಸಿ.

ಈ ಸ್ಥಿತಿಯನ್ನು ಕಾಯ್ದುಕೊಳ್ಳಿ ಮತ್ತು ಉಸಿರನ್ನು ಹಿಡಿತದಲ್ಲಿರಿಸಿ.

ನಾಭಿಯ ಮೇಲೆ ದೇಹದ ಸಮತೋಲನ ಸಾಧಿಸಿ

ನಿಮ್ಮ ತೊಡೆ, ಜಠರ ಕುಹರ ಮತ್ತು ಎದೆಯನ್ನು ನೆಲಕ್ಕೆ ಆಧರಿಸಬೇಡಿ.

ಈ ಸ್ಥಿತಿಯಲ್ಲಿ ಅತ್ಯುತ್ತಮ ಹಿಡಿತ ಸಾಧಿಸಲು ಪ್ರಯತ್ನಿಸಿ.

ಕೊನೆಯ ಹಂತ ತಲುಪಿದಾಗ ಸಹಜವಾಗಿಯೇ ಈ ಭಂಗಿಗೆ ಆಧಾರ ನೀಡಿರುವ ಕಾಲುಗಳು ಹಾಗು ತೋಳುಗಳಲ್ಲಿ ನೋವು ಅಥವಾ ಎಳೆತ ಕಾಣಿಸಿಕೊಳ್ಶುತ್ತದೆ.

ನಿಮ್ಮ ತೋಳುಗಳನ್ನು ಪೂರ್ಣವಾಗಿ ಚಾಚಿ ಇರಿಸಿ.

ನಿಮ್ಮ ಕಾಲುಗಳನ್ನು ಕೆಳಬದಿಗೆ ಜಾರಲು ಬಿಡಬೇಡಿ.

ಈ ಸ್ಥಿತಿಯಲ್ಲಿ ಸ್ಥಿರತೆ ಕಾಯ್ದುಕೊಳ್ಳಿ.

ಹಂತಹಂತವಾಗಿ, ನೀವು ಧನುರಾಸನ ಸ್ಥಿತಿಯಲ್ಲಿರುವ ಸಮಯವನ್ನು ಹೆಚ್ಚಿಸಿಕೊಳ್ಳಿ.

ಈ ಸ್ಥಿತಿಯನ್ನು ಕನಿಷ್ಠ ಐದು ಕ್ಷಣದವರೆಗೆ ಅಥವಾ ನಿಮಗೆ ನೋವಿನ ಅನುಭವವಾಗುವವರೆಗೆ ಕಾಯ್ದುಕೊಳ್ಳಿ ಮತ್ತು ಉಸಿರು ಹೊರಬಿಡುವ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿ.

ನಿಧಾನವಾಗಿ ಉಸಿರನ್ನು ಒಳಗೆಳೆದುಕೊಳ್ಳುತ್ತಾ ಕ್ರಮೇಣವಾಗಿ ಮೊದಲಿನ ಸ್ಥಿತಿಗೆ ಮರಳಿ.

ಅನುಕೂಲಗಳು
ಅರ್ಧ ಬಾಗುವಿಕೆ ದೇಹವನ್ನು ಬಲಪಡಿಸುತ್ತದೆ ಮತ್ತು ಶಕ್ತಿಯುತವಾಗಿಸುತ್ತದೆ. ಇದು ಮೂತ್ರಪಿಂಡ, ಆಡ್ರಿನಲ್ ಗ್ರಂಥಿಗಳು ಮತ್ತು ಸಂತಾನೋತ್ಪತ್ತಿ ಶಕ್ತಿಯನ್ನು ವೃದ್ಧಿಸುತ್ತದೆ.

ಮುನ್ನೆಚ್ಚೆರಿಕೆಗಳು
ನೀವು ಈ ಕೆಳಗಿನ ವ್ಯಾಧಿಗಳಿಂದ ಬಳಲಿತ್ತಿದ್ದಲ್ಲಿ ಈ ಆಸನವನ್ನು ಪ್ರಯತ್ನಿಸಬೇಡಿ: ಸ್ಲಿಪ್ ಡಿಸ್ಕ್, ಹರ್ನಿಯಾ, ಅಲ್ಸರ್, ಹೃದಯದ ಸಮಸ್ಯೆಗಳು, ಮತ್ತು ಆಧಿಕ ರಕ್ತದ ಒತ್ತಡ!

ನೀವು ಇತ್ತಿಚೆಗೆ ಕಿಬ್ಬೊಟ್ಟೆಯ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದಲ್ಲಿ ಈ ಆಸನವನ್ನು ಪ್ರಯತ್ನಿಸಲೇಬಾರದು. ಪೂರ್ಣ ಗುಣಮುಖರಾಗುವವರೆಗೆ ಕಾಯಿರಿ!

ಶೀರ್ಷಾಸನ

Wed, 02 Jun 2010 18:46:43 +0530

ತಲೆಯ ಮೇಲೆ ಪೂರ್ತಿ ಭಾರ ಹಾಕಿ ನಿಲ್ಲುವ ಭಂಗಿಗೆ ಸಂಸ್ಕೃತದಲ್ಲಿ ಶೀರ್ಷಾ ಎಂದು ಕರೆಯುತ್ತಾರೆ. ಹೀಗಾಗಿ ಈ ಆಸನಕ್ಕೆ ಶೀರ್ಷಾಸನ ಎಂಬ ಹೆಸರು ಬಂದಿದೆ.

ವಿಧಾನ

ಮೊದಲಿಗೆ ಮಂಡಿಯೂರಿ ಕುಳಿತುಕೊಳ್ಳಿ. ನಂತರ ಮುಂದಕ್ಕೆ ಬಾಗಿ, ಮೊಣಕೈಯನ್ನು ನೆಲದಲ್ಲಿರಿಸಿ. ತಲೆಯನ್ನು ನೆಲದಲ್ಲಿರಿಸಿ, ಕೈಬೆರಳುಗಳನ್ನು ಒಂದಕ್ಕೊಂದು ಜೋಡಿಸಿ, ಇದನ್ನು ತಲೆಯ ಹಿಂಭಾಗದಲ್ಲಿರಿಸಿ.

ನಂತರ, ಮೊಣಕಾಲುಗಳನ್ನು ನೇರವಾಗಿಸಿ, ಪೃಷ್ಠದ ಭಾಗವನ್ನು ಮೇಲಕ್ಕೆತ್ತಿ. ಇದು ಇಂಗ್ಲೀಷಿನ ವಿ ಆಕೃತಿಯಲ್ಲಿರುತ್ತದೆ. ನಂತರ ಕಾಲುಗಳನ್ನು ನಿಧಾನವಾಗಿ ಬಾಗಿಸುತ್ತಾ ಸಂಪೂರ್ಣ ತಲೆಯ ಮೇಲೆ ಭಾರ ಹಾಕಿ ನಿಲ್ಲಿ.

ಇದೇ ಭಂಗಿಯಲ್ಲಿ ಕೆಲವು ಸೆಕೆಂಡುಗಳ ಕಾಲ ನಿಂತು, ನಂತರ ಮೊಣಕಾಲುಗಳನ್ನು ಬಾಗಿಸಿ, ವಜ್ರಾಸನವನ್ನು ಮಾಡಿ. ನಂತರ, ಪ್ರಾರಂಭಿಕ ಭಂಗಿಗೆ ಮರಳಿ.

ಮುನ್ನೆಚ್ಚರಿಕೆಗಳು
ನೀವು ಹೊಸದಾಗಿ ಯೋಗಾಭ್ಯಾಸವನ್ನು ಮಾಡುತ್ತಿದ್ದಲ್ಲಿ, ಈ ಆಸನವನ್ನು ಗೋಡೆಯನ್ನು ಆಸರೆಯಾಗಿಸಿ ಮಾಡಿ. ಅಥವಾ ಉತ್ತಮ ಯೋಗ ಗುರುಗಳ ಸಲಹೆಯಂತೆಯೇ ಮಾಡಿ. ಸೆಳೆತದೊಂದಿಗೆ ಕಾಲನ್ನು ಮೇಲಕ್ಕೆತ್ತಬೇಡಿ.

ಪ್ರಾರಂಭಿಕ ಭಂಗಿಗೆ ಮರಳುವಾಗ, ಸೆಳೆತದೊಂದಿಗೆ, ನಿಮ್ಮ ಕಾಲುಗಳನ್ನು ನೆಲದಲ್ಲಿಡಬೇಡಿ. ಸ್ವಲ್ಪ ಹೊತ್ತು, ಒಂದಕ್ಕೊಂದು ಕೂಡಿಸಿದ ಕೈಬೆರಳುಗಳನ್ನು ತಲೆಯ ಹಿಂಭಾಗದಲ್ಲಿರಿಸಿ, ನಂತರ ವಜ್ರಾಸನ ಭಂಗಿಗೆ ಮರಳಿ.

ಉದರ ಅಥವಾ, ಬೆನ್ನುಮೂಳೆ ಸಂಬಂಧಿ ರೋಗಗಳಿಂದ ಬಳಲುತ್ತಿರುವವರು ಈ ಆಸನವನ್ನು ಅಭ್ಯಸಿಸುವುದು ಸೂಕ್ತವಲ್ಲ.

ಪ್ರಯೋಜನ
ಅಜೀರ್ಣವ್ಯಾಧಿಗೆ ಈ ಆಸನವು ತುಂಬಾ ಉಪಯುಕ್ತವಾಗಿದೆ. ರಸಗ್ರಂಥಿ ಹಾಗೂ ಹೃದಯ ಸ್ನಾಯುಗಳ ಕಾರ್ಯನಿರ್ವಹಣೆಯನ್ನು ಇದು ಚುರುಕುಗೊಳಿಸುತ್ತದೆ. ಈ ಆಸನದಲ್ಲಿ ರಕ್ತದ ಪ್ರವಾಹವು ಮೆದುಳಿನ ಕಡೆಗಿರಿಸುವುದರಿಂದ, ಮೆದುಳಿನ ನೆನಪಿನ ಮತ್ತು ಗ್ರಹಣ ಶಕ್ತಿಯ ಪ್ರಕ್ರಿಯೆಯನ್ನು ವೃದ್ಧಿಗೊಳಿಸಿ, ದೇಹದಲ್ಲಿ ಆತ್ಮವಿಶ್ವಾಸ ಮತ್ತು ಚೈತನ್ಯವನ್ನು ಹೆಚ್ಚಿಸುತ್ತದೆ.

ಪದ್ಮಾಸನ

Sat, 08 May 2010 11:04:45 +0530

ಪದ್ಮ ಎಂದರೆ ತಾವರೆ, ಕಮಲ ಎಂದರ್ಥ. ಇದು ಸಂಸ್ಕೃತ ಜನ್ಯ ನಾಮ. ಪದ್ಮ ಆಕಾರದ ಭಂಗಿಯನ್ನೇ ಪದ್ಮಾಸನ ಎನ್ನಲಾಗುತ್ತದೆ.

ವಿಧಾನ :

• ಕಾಲುಗಳನ್ನು ಉದ್ದಕ್ಕೆ ಚಾಚಿ ನೆಲದ ಮೇಲೆ ಕುಳಿತುಕೊಳ್ಳಿ.

• ಬಲ ಮೊಣಕಾಲನ್ನು ಬಾಗಿಸಿ ಮತ್ತು ಬಲ ಪಾದವನ್ನು ಎರಡೂ ಕೈಗಳಿಂದ ಹಿಡಿದು ಎಳೆಯುತ್ತಾ ಎಡ ತೊಡೆಯ ಮೇಲೆ ಇರಿಸಿ. ಬಲ ಪಾದದ ಹಿಮ್ಮಡಿ ನಾಭಿಗೆ ಆದಷ್ಟೂ ಸಮೀಪವಿರಲಿ.

• ಎಡ ಮೊಣಕಾಲನ್ನು ಬಾಗಿಸಿ ಮತ್ತು ಎಡ ಪಾದವನ್ನು ಎರಡೂ ಕೈಗಳಿಂದ ಹಿಡಿದು, ಅದನ್ನು ಬಲ ತೊಡೆಯ ಮೇಲಿರಿಸಿ. ಅದೇ ರೀತಿ ಎಡ ಪಾದದ ಹಿಮ್ಮಡಿಯು ನಾಭಿ ಭಾಗಕ್ಕೆ ಎಷ್ಟು ಸಾಧ್ಯವೇ ಅಷ್ಟು ಹತ್ತಿರ ಬರಲಿ.

• ಎರಡೂ ಮೊಣಕಾಲುಗಳು ನೆಲವನ್ನು ತಾಗಿರಬೇಕು ಮತ್ತು ಎರಡೂ ಅಂಗಾಲುಗಳು ಮೇಲ್ಮುಖವಾಗಿರಬೇಕು. ಬೆನ್ನುಮೂಳೆ ಸಡಿಲವಾಗಿ ನೇರವಾಗಿರಲಿ ಆದರೆ ಬಿಗಿಗೊಳಿಸಬೇಡಿ.

• ಈ ಭಂಗಿ ಅಹಿತಕಾರಿ ಅನ್ನಿಸಿದರೆ, ನೀವು ಒಂದಿಷ್ಟು ಸಮಯದ ಬಳಿಕ ಕಾಲುಗಳ ಸ್ಥಿತಿಯನ್ನು ಬದಲಿಸಿಕೊಳ್ಳಬಹುದು.

• ಬೆನ್ನು ನೇರವಾಗಿರಲಿ. ಕೈಗಳು ನಮಸ್ತೆ ಭಂಗಿಯಲ್ಲಿರಲಿ ಅಥವಾ ಅದನ್ನು ಮೊಣಗಂಟಿನ ಮೇಲಿರಿಸಿ. ಅಥವಾ ಅಂಗೈಗಳು ಕೆಳಮುಖವಾಗಿರುವಂತೆ ಎರಡೂ ಕೈಗಳನ್ನು ಎರಡು ಮೊಣಗಂಟಿನ ಮೇಲಿರಿಸಿ. ಇಲ್ಲವೇ, ಎರಡೂ ಅಂಗೈಗಳನ್ನು ಮೇಲ್ಮುಖವಾಗಿರಿಸಿ ತೋರು ಬೆರಳಿನ ತುದಿಯಿಂದ ಹೆಬ್ಬೆರಳ ತುದಿಯನ್ನು ಮುಟ್ಟುವಂತೆ (ಜ್ಞಾನಮುದ್ರೆ) ಇರಿಸಿ. ಉಳಿದ ಬೆರಳುಗಳು ನೇರವಾಗಿರಬೇಕು.

ಪದ್ಮಾಸನದ ಲಾಭ:

• ಮೆದುಳನ್ನು ಶಾಂತಗೊಳಿಸುತ್ತದೆ.
• ಇಡೀ ಶರೀರಕ್ಕೆ ವಿಶ್ರಾಂತಿ ನೀಡುತ್ತದೆ.
• ಮಣಿಗಂಟುಗಳು ಮತ್ತು ಮೊಣಕಾಲುಗಳನ್ನು ಸಡಿಲಿಸುತ್ತದೆ.
• ಜಠರ, ಬೆನ್ನುಮೂಳೆ, ಉದರ ಮತ್ತು ಬ್ಲಾಡರ್ ಭಾಗಗಳಿಗೆ ಚೈತನ್ಯ ನೀಡುತ್ತದೆ.

ಕೆಳಗಿನವುಗಳ ಬಗ್ಗೆ ಎಚ್ಚರಿಕೆ ವಹಿಸಿ:

•ಮಣಿಗಂಟಿಗೆ ನೋವು
•ಮೊಣಕಾಲು ನೋವು

ವಜ್ರಾಸನ ಹಾಕೋದು ಹೇಗೆ?

Sat, 08 May 2010 11:03:46 +0530

ಕಳೆದ ವಾರ ಪದ್ಮಾಸನದ ಬಗ್ಗೆ ತಿಳಿದುಕೊಂಡಿದ್ದೆವು. ಪದ್ಮಾಸನವನ್ನು ನೀವೀಗ ಪಳಗಿಸಿಕೊಂಡಿದ್ದೀರಿ. ಬನ್ನಿ ಈ ವಾರ ವಜ್ರಾಸನವನ್ನು ತಿಳಿದುಕೊಳ್ಳೋಣ.

ವಜ್ರಾಸನದ ನಿಯಮಿತ ಅಭ್ಯಾಸವು ದೇಹವನ್ನು ವಜ್ರದಂತೆ ಸ್ಥಿರ ಹಾಗೂ ಸುದೃಢವಾಗಿರಿಸುತ್ತದೆ. ಸಂಸ್ಕೃತದಲ್ಲಿ 'ವಜ್ರ' ಅಂದರೆ 'ಕಠಿಣ' ಎಂದರ್ಥ. ಈ ಭಂಗಿಯ ಯೋಗಾಭ್ಯಾಸ ನಿರತ ವ್ಯಕ್ತಿಯು ವಜ್ರದಂತೆ ಕಂಡುಬರುವ ಕಾರಣಕ್ಕೆ ಇದಕ್ಕೆ ವಜ್ರಾಸನ ಎಂದು ಹೆಸರು.

ವಿಧಾನ
* ಸುಖಾಸನ ಸ್ಥಿತಿಗೆ ಬನ್ನಿ
* ನೇರವಾಗಿ ಕುಳಿತುಕೊಳ್ಳಿ
* ಕಾಲುಗಳನ್ನು ಮುಂದಕ್ಕೆ ಚಾಚಿ
* ಒಂದಾದ ಬಳಿಕ ಒಂದರಂತೆ ಕಾಲುಗಳನ್ನು ಭಾಗಿಸಿ
* ಕಾಲುಗಳನ್ನು ನಿತಂಬದ ಬದಿಗಳಲ್ಲಿರಿಸಿ
* ಅಂಗಾಲುಗಳು ಮೇಲ್ಮುಖವಾಗಿರಲಿ
* ನಿತಂಬವನ್ನು ದೃಢವಾಗಿ ನೆಲದ ಮೇಲೆ ಊರಿ
* ನಿತಂಬವನ್ನು ಮೇಲ್ಮುಖವಾಗಿರುವ ಅಂಗಾಲುಗಳ ಮಧ್ಯದಲ್ಲಿರಿಸಿ

* ನಿತಂಬದ ಹಿಂದಿರುವ ಹೆಬ್ಬೆರಳುಗಳು ಪರಸ್ಪರ ಅಭಿಮುಖವಾಗಿರಬೇಕು
* ಮೊಣಕಾಲುಗಳು ಹತ್ತಿರತ್ತಿರವಾಗಿರಬೇಕು
* ನಿಮ್ಮ ಅಂಗೈಗಳನ್ನು ತೊಡೆಗಳ ಮೇಲಿರಿಸಿ
* ನೇರವಾಗಿ ಮುಂದಕ್ಕೆ ನೋಡಿ
* ವಜ್ರಾಸನ ಹಾಕುವ ವೇಳೆಗೆ ದೇಹವು ದೃಢವಾಗಿ ನಿಮಿರಿರಬೇಕು

ವಜ್ರಾಸನದ ಪರ್ಯಾಯ ವಿಧಾನ
* ಮೇಲ್ಮುಖವಾದ ಅಂಗಾಲುಗಳನ್ನು ನಿತಂಬದ ಬದಿಯಲ್ಲಿರಿಸುವ ಬದಲಿಗೆ ಕೆಳಭಾಗದಲ್ಲಿಯೂ ಇರಿಸಬಹುದು.
* ಈ ವಿಧಾನದಲ್ಲಿ ಹೆಬ್ಬೆಟ್ಟುಗಳು ಪರಸ್ಪರ ಕತ್ತರಿಯಾಗುವ ಕಾರಣ ನೀವು ಹಿಮ್ಮಡಿಗಳ ಮೇಲೆ ಕುಳಿತುಕೊಳ್ಳಬಹುದು.
* ಮೇಲ್ಮುಖವಾಗಿರುವ ಅಂಗಾಲುಗಳ ಒಳಭಾಗದಲ್ಲಿ ನಿತಂಬವನ್ನಿರಿಸಬಹುದು
* ಹಾಗಾಗಿ ಮೇಲೆ ಹೇಳಿದಂತೆ ನಿತಂಬವು ನೆಲದ ಬದಲಿಗೆ ಅಂಗಾಲುಗಳ ಮಧ್ಯದಲ್ಲಿರುತ್ತದೆ
* ಉಸಿರಾಟವು ಹಾಗೆಯೇ ಇರಲಿ

ಅನುಕೂಲಗಳು
* ತೊಡೆಯಲ್ಲಿನ ಕೊಬ್ಬು ಕಡಿಮೆಯಾಗುತ್ತದೆ
* ಬೆನ್ನು ಮೂಳೆಗೆ ವ್ಯಾಯಾಮ ದೊರೆಯುತ್ತದೆ
* ಕಿಬ್ಬೊಟ್ಟೆಯ ಅಂಗಾಂಗಳು ಅವುಗಳ ಯಥಾಸ್ಥಾನಗಳಲ್ಲಿರುತ್ತವೆ
* ಕಶೇರುಕಗಳ ಮಾಂಸಖಂಡಗಳು ದೃಢಗೊಳ್ಳುತ್ತವೆ ಮತ್ತು ಶಕ್ತಿಯುತವಾಗುತ್ತವೆ
* ಜಠರ ಪ್ರದೇಶವೂ ಸುದೃಢವಾಗುತ್ತದೆ
* ಹೆಬ್ಬೆರಳು, ಪಾದದ ಮೇಲ್ಮೈ, ಹಿಮ್ಮಡಿಗಳು, ಮೊಣಕಾಲುಗಳು, ತೊಡೆ ಹಾಗೂ ಪೃಷ್ಠಗಳ ಪೆಡಸಾದ ಅಸ್ಥಿರಜ್ಜುಗಳು ಸಡಿಲಗೊಳ್ಳುತ್ತವೆ.

ಎಚ್ಚರಿಕೆ
ಮೊಣಕಾಲುಗಳಲ್ಲಿ ಯಾವುದಾದರೂ ನೋವು ಅಥವಾ ಗಾಯಗಳಿದ್ದರೆ ಈ ಆಸನದಿಂದ ದೂರವಿರಿ.

ಸುಪ್ತ ವಜ್ರಾಸನ

Sat, 08 May 2010 11:01:30 +0530

ಮಾಡುವುದು ಹೇಗೆ?
ಮೊದಲು ವಜ್ರಾಸನ ಹಾಕಿ ಕುಳಿತುಕೊಳ್ಳಿ.

1. ನಿಧಾನವಾಗಿ ಬಲಕೈ, ನಂತರ ಎಡಕೈ ಮಣಿಗಂಟಿನ ಸಹಾಯದಿಂದ, ಅವುಗಳನ್ನು ಹಿಂಭಾಗದಲ್ಲಿ ನೆಲದ ಮೇಲಿರಿಸಿ.

2. ನಿಧಾನವಾಗಿ ಕೈಗಳನ್ನು ನೇರವಾಗಿರಿಸಿ ಮತ್ತು ಪೂರ್ಣವಾಗಿ ಬೆನ್ನಿನ ಮೇಲೆ ಪವಡಿಸಿ.

3. ಭುಜಗಳು ನೆಲಕ್ಕೆ ತಾಗುವಂತಿರಬೇಕು. ಮೊದಲ ಬಾರಿ ಮಾಡುತ್ತಿರುವವರು ತಮ್ಮ ಕೈಗಳನ್ನು ಆಯಾ ತೊಡೆಗಳ ಮೇಲಿರಿಸಬಹುದು. ಮೊಣಕಾಲುಗಳು ಜತೆಯಾಗಿರಬೇಕು.

4. ಈ ಸ್ಥಿತಿಯನ್ನು ಅಭ್ಯಾಸ ಮಾಡಿದ ಬಳಿಕ, ಎರಡೂ ಕೈಗಳನ್ನು ಕತ್ತರಿಯಾಕಾರದಲ್ಲಿ ಭುಜಗಳ ಕೆಳಕ್ಕೆ ತನ್ನಿ. ಅಂದರೆ ಬಲಕೈಯು ಎಡಭುಜದ ಕೆಳಗೆ ಹಾಗೂ ಎಡಕೈಯು ಬಲಭುಜದ ಕೆಳಗೆ ಇರುತ್ತದೆ ಮತ್ತು ತಲೆಯು ಅವುಗಳ ಮಧ್ಯಭಾಗದಲ್ಲಿರುತ್ತದೆ.

5. ಮೂಲಸ್ಥಿತಿಗೆ ಮರಳುವ ಸಂದರ್ಭ, ಮೊದಲು ನಿಮ್ಮ ಕೈಗಳನ್ನು ತೆಗೆಯಿರಿ ಮತ್ತು ಅವುಗಳನ್ನು ದೇಹದ ಪಕ್ಕದಲ್ಲಿ ಚಾಚಿರಿ.

6. ಈಗ ಮಣಿಗಂಟಿನ ಸಹಾಯದಿಂದ, ಹಿಂದಿನ ಸ್ಥಿತಿಗೆ ಮರಳಿ.

ನೆನಪಿಡಿ:

1. ಬೆನ್ನಿನ ಮೇಲೆ ಮಲಗುವಾಗ, ನಿಮ್ಮ ದೇಹಭಾರದ ಮೇಲೆ ನಿಯಂತ್ರಣವಿರಲಿ. ಅವಸರವಾಗಿ ಇದನ್ನು ಮುಂದುವರಿಸಿದಲ್ಲಿ, ಸ್ನಾಯು ಸೆಳೆತ ಅಥವಾ ಬೇರೇನಾದರೂ ತೊಂದರೆಯಾದೀತು.

2. ವಜ್ರಾಸನ ಮಾಡುವಾಗಲೇ ಸಮಸ್ಯೆ ಕಂಡುಬಂದರೆ, ಅಂಥವರು ಈ ಆಸನ ಮಾಡಬಾರದು.

3. ಪ್ರಾರಂಭ ಮಾಡುವವರು ತಮ್ಮ ಮೊಣಕಾಲುಗಳನ್ನು ಜೋಡಿಸುವುದು ಕಷ್ಟವೆಂದಾದರೆ, ಅವುಗಳನ್ನು ದೂರ ದೂರವಿರಿಸಿಕೊಳ್ಳಬಹುದು.

ಸುಪ್ತ ವಜ್ರಾಸನದ ಲಾಭ ಮತ್ತು ಮಿತಿ:

1. ಇದು ಉದರಭಾಗದ ಸ್ನಾಯುಗಳನ್ನು ಬಲಪಡಿಸುತ್ತದೆ.

2. ಅಧಿಕ ರಕ್ತದೊತ್ತಡ ಮತ್ತು ಸಯಾಟಿಕಾ ಸಮಸ್ಯೆಯಿದ್ದವರಿಗೆ ಇದು ಪ್ರಯೋಜನಕಾರಿ.

3. ಮಲಬದ್ಧತೆಗೂ ಅತ್ಯುತ್ತಮ ಪರಿಹಾರವಾಗಬಲ್ಲುದು.

ವಾಯು ತೊಂದರೆ ಮತ್ತು ಪೃಷ್ಠ ಭಾಗದಲ್ಲಿ ನೋವು ಇರುವವರು ಇದನ್ನು ಮಾಡಬಾರದು.

ಅರ್ಧಮತ್ಸ್ಯೇಂದ್ರಾಸನದ ವಿಧಾನಗಳು

Sat, 08 May 2010 10:59:07 +0530

ಕಟಿಭಾಗದ ಸ್ನಾಯುಗಳು, ಮೀನಖಂಡ, ತೋಳುಗಳಿಗೆ ಉತ್ತಮ ವ್ಯಾಯಾಮ ನೀಡುವ ಆಸನ ಅರ್ಧಮತ್ಸ್ಯೇಂದ್ರಾಸನ. ಈ ಆಸನ ಹಾಕುವ ವೇಳೆ ಬೆನ್ನು ಹುರಿಯು ಅರ್ಧಕ್ಕೆ ತಿರುವುತ್ತದೆ. ಹಠಯೋಗಿ ಮತ್ಸೇಂದ್ರನಾಥರಿಂದ ಈ ಆಸನಕ್ಕೆ ಅರ್ಧಮತ್ಸ್ಯೇಂದ್ರಾಸನ ಎಂಬ ಹೆಸರು ಬಂದಿದೆ.

ಅರ್ಧ ಎಂಬುದು ಸಂಸ್ಕೃತ ಪದ. ಅರ್ಧ ಮತ್ಸೇಂದ್ರಾಸನವು ಬಾಗುವಭಂಗಿಗಳ ಒಂದ ಶ್ರೇಷ್ಠ ಆಸನ. ತೋಳು ಮತ್ತು ಮೊಣಕಾಲುಗಳು ಮತ್ತು ಕಟಿಭಾಗವು ಇಲ್ಲಿ ಅತಿ ಹೆಚ್ಚು ಭಾಗುವ ಇಲ್ಲ ತಿರುಗುವ ಅಂಗಗಳಾಗಿರುತ್ತವೆ.

ಅರ್ಧ ಮತ್ಸೇಂದ್ರಾಸನ ಮಾಡುವ ವಿಧಾನ
WD

•ನೇರವಾಗಿ ಕುಳಿತುಕೊಳ್ಳಿ

•ಕಾಲುಗಳನ್ನು ಹೊರಕ್ಕೆ ಚಾಚಿ

•ಹಿಮ್ಮಡಿ ಗುದಭಾಗದ ಕೆಳಕ್ಕಿರಲಿ

•ಬಲತೊಡೆಯನ್ನು ನೆಟ್ಟಗೆ ಚಾಚಿ

•ಈಗ ನಿಮ್ಮ ಎಡಪಾದವನ್ನು ನೆಲದಮೇಲಿಡಿ

•ಬಡ ಮೊಣಕಾಲನ್ನು ಅಡ್ಡವಾಗಿಸಿ

•ನಿಮ್ಮ ಎಡ ಮೊಣಕಾಲು ಬಲಮೊಣಕಾಲಿನ ಸಮೀಪದಲ್ಲಿರಬೇಕು

•ನಿಮ್ಮ ಬಲತೋಳನ್ನು ಎಡ ಮೊಣಕಾಲಿನ ಮೇಲೆ ಹಾಯಿಸಿ.
•ಬಲ ತೋಳನ್ನು ಎಡ ಮೀನಖಂಡಕ್ಕೆ ನೇರವಾಗಿಸಿ

•ಎಡಗಾಲಿನ ಹೆಬ್ಬೆರಳನ್ನು ಬಲಗೈ ಹೆಬ್ಬೆರಳು, ತೋರುಬೆರಳು ಮತ್ತು ನಡುಬೆರಳುಗಳಿಂದ ಹಿಡಿಯಿರಿ.

•ನಿಮ್ಮ ಎಡಗೈಯನ್ನು ನಿತಂಬದ ಕೆಳಭಾಗಕ್ಕೆ ಜಾರಿಸಿ ಮತ್ತು ಎಡತೊಡೆಯನ್ನು ಬಿಗಿಗೊಳಿಸಿ

•ನಿಮ್ಮ ಭುಜ, ಕತ್ತು, ಮತ್ತು ತಲೆಯನ್ನು ಏಕಕಾಲಕ್ಕೆ ಎಡಕ್ಕೆ ತಿರುವಿ

•ಎಡ ಭುಜದ ನೇರಕ್ಕೆ ನಿಮ್ಮ ಗಲ್ಲವನ್ನು ತನ್ನಿ

•ಎಷ್ಟು ಸಾಧ್ಯವೋ ಅಷ್ಟು ಹಿಂದಕ್ಕೆ ದೃಷ್ಟಿ ಹಾಯಿಸಿ

•ನಿಮ್ಮ ತಲೆ ಮತ್ತು ಬೆನ್ನುಮೂಳೆಯನ್ನು ನಿಗುರಿಸಿ

•ಸಾಧ್ಯವಾದಷ್ಟು ಹೊತ್ತು ಈ ಭಂಗಿಯಲ್ಲಿರಿ

•ನಿಧಾನಕ್ಕೆ ಮೊದಲಿನ ಸ್ಥಿತಿಗೆ ಬನ್ನಿ

•ಈ ಆಸನವನ್ನು ಇನ್ನೊಂದು ಬದಿಗೆ ಪುರನಾವರ್ತಿಸಿ

ಅನುಕೂಲಗಳು
ಬೆನ್ನುಹುರಿ, ಅದರಲ್ಲೂ ವಿಶೇಷವಾಗಿ ಕಟಿಭಾಗವು ಮಣಿಯುತ್ತದೆ. ಈ ಆಸನವನ್ನು ನಿಯಮಿತವಾಗಿ ಮಾಡುವುದರಿಂದ ಸೊಂಟದಭಾಗದ ಬೊಜ್ಜು ಕರಗುತ್ತದೆ.
ಈ ಅಸನದಿದಂದ ಸೊಂಟದ ಎಲ್ಲಾ ಭಾಗಗಳಿಗೂ ವ್ಯಾಯಮ ದೊರೆಯುತ್ತದೆ

ಎಚ್ಚರಿಕೆ
ಬೆನ್ನುಹುರಿ ಇಲ್ಲವೇ ಹೊಟ್ಟೆಗೆ ಸಂಬಂಧಿಸಿದ ಯಾವುದಾದರೂ ರೋಗದಿಂದ ನೀವು ಬಳಲುತ್ತಿದ್ದರೆ ದಯವಿಟ್ಟು ಈ ಆಸನ ಮಾಡದಿರಿ.

ವಕ್ರಾಸನ

Sat, 08 May 2010 10:56:37 +0530

ಕುಳಿತುಕೊಂಡ ಭಂಗಿಯಲ್ಲೇ ಮಾಡಬಹುದಾದ ಆಸನ, ವಕ್ರಾಸನ.

ವಕ್ರಾಸನ ಹಾಕುವ ವಿಧಾನ
*ಕಾಲುಗಳನ್ನು ಮುಂಚಾಚಿ ದಂಡಾಸನದಲ್ಲಿ ಕುಳಿತುಕೊಳ್ಳಿ.

*ಬಲಕಾಲಿನ ಮೊಣಕಾಲನ್ನು ಬಗ್ಗಿಸಿ ಮತ್ತು ಆಂಗಾಲನ್ನು ಎಡ ಮೊಣಕಾಲಿನ ಬಳಿ ಇರಿಸಿ.

*ಉಸಿರನ್ನು ಬಿಟ್ಟು ದೇಹವನ್ನು ಬಲಕ್ಕೆ ತಿರುಗಿಸಿ ಮತ್ತು ನಿಮ್ಮ ಎಡಗೈಯನ್ನು ಬಗ್ಗಿಸಿದ ಬಲಗಾಲಿನ ಹೊರಗಡೆಯಿಂದ ತನ್ನಿ.

*ಆಧಾರಕ್ಕಾಗಿ ಬಲಗೈಯನ್ನು ಬೆನ್ನಹಿಂದಿಡಿ.

*ಬೆನ್ನು ಮೂಳೆಯನ್ನು ನೇರವಾಗಿಸಿ ಮತ್ತು ಬಲಗಾಲಿನ ಹೆಬ್ಬೆರಳನ್ನು ಎಡಗೈಯಿಂದ ಹಿಡಿಯಿರಿ.

*ಬೆರಳುಗಳು ಮೇಲ್ಮುಖವಾಗಿರುವಂತೆ ಎಡಗಾಲನ್ನು ಚಾಚಿ.

*ನಿಧಾನವಾಗಿ ಉಸಿರುಬಿಡಿ. ದೇಹವನ್ನು ಇನ್ನಷ್ಟು ಬಲಕ್ಕೆ ತಿರುಗಿಸಿ ಮತ್ತು ಕತ್ತನ್ನು ನಿಮ್ಮ ಹಿಂದಕ್ಕೆ ನೋಡುವಂತೆ ತಿರುಗಿಸಿ.

*ಸಾಧ್ಯವಿರುವಷ್ಟು ಹೊತ್ತು ಈ ಭಂಗಿಯಲ್ಲಿರಿ.

*ಉಸಿರನ್ನು ಒಳಗೆಳೆದುಕೊಳ್ಳಿ. ದೇಹ ಮತ್ತು ಕತ್ತನ್ನು ಮುಂದಕ್ಕೆ ತಿರುವಿ, ಕೈಯನ್ನು ಬಿಡಿ, ಕಾಲುಗಳನ್ನು ನೆಟ್ಟಗೆ ಮಾಡಿ.

*ದಂಡಾಸನದಲ್ಲಿ ಕುಳಿತುಕೊಳ್ಳಿ

ಈ ಆಸನ ನೀಡುವ ಲಾಭಗಳು

*ಬೆನ್ನು ಮೂಳೆಯನ್ನು ಶಕ್ತಿಯತವಾಗಿಸುತ್ತದೆ.

*ಬೆನ್ನಹಿಂದಿನ ಭಾಗದ ನಮ್ಯತೆಯನ್ನು ಹೆಚ್ಚಿಸುತ್ತದೆ.

*ಜೀರ್ಣ ಪ್ರಕ್ರಿಯೆಯನ್ನು ಚೆನ್ನಾಗಿಸುತ್ತದೆ. ಈ ಆಸನವು ಜೀರ್ಣಾಂಗ ವ್ಯವಸ್ಥೆಗೆ ಮಾಲೀಸು ನೀಡುತ್ತದೆ.

*ಭುಜಗಳನ್ನು ಶಕ್ತವಾಗಿಸುತ್ತದೆ.

*ಕತ್ತಿನ ಮಾಂಸಖಂಡಗಳಿಗೆ ವ್ಯಾಯಾಮ ದೊರೆಯುತ್ತದೆ.

ಎಚ್ಚರಿಕೆ
ಕತ್ತು ಅಥವಾ ಬೆನ್ನುನೋವು ಇದ್ದಲ್ಲಿ ಈ ಆಸನದ ಅಭ್ಯಾಸ ಮಾಡದಿರಿ.

ಸ್ಲಿಪ್ ಡಿಸ್ಕ್ ಅಥವಾ ಸ್ಪಾಂಡಿಲೈಟಿಸ್ ಇದ್ದರೂ ಈ ಆಸನ ನಿಮಗೆ ಬೇಡ.

ಉಷ್ಟ್ರಾಸನ

Sat, 08 May 2010 10:44:45 +0530

ಸಂಸ್ಕೃತದಲ್ಲಿ ಉಷ್ಟ್ರ ಅಂದರೆ 'ಒಂಟೆ' ಎಂಬರ್ಥ. ಹಾಗಾಗಿ ಈ ಆಸನದ ಭಂಗಿಯನ್ನು ಒಂಟೆ ಭಂಗಿ ಎಂದೂ ಹೇಳಲಾಗುತ್ತದೆ. ಇದು ಭಾಗಿದ(ಧನುರಾಸನ) ಮತ್ತು ಮೇಲ್ಮುಖ ಭಾಗಿರುವ (ಊರ್ಧ್ವ ಧನುರಾಸನ) ನಡುವಿನ ಸ್ಥಿತ್ಯಂತರ ಭಂಗಿ.

ಉಷ್ಟ್ರಾಸನ ಹಾಕುವ ವಿಧಾನ
*ಮೊಣಕಾಲುಗಳನ್ನು ಹಿಂದಕ್ಕೆ ಬಗ್ಗಿಸಿ ಆರುಇಂಚುಗಳ ಅಂತರ ಇರುವಂತೆ ಇರಿಸಿ. ಪಾದಗಳನ್ನು ನಿತಂಬದಡಿಯಲ್ಲಿರಿ. ಕಾಲ್ಬೆರಳುಗಳು ಮತ್ತು ಅಂಗಾಲಿನ ತಿರುವಿನಲ್ಲಿ ಕುಳಿತುಕೊಳ್ಳಿ. ಪಾದಗಳನ್ನು ಸಾಧ್ಯವಾದಷ್ಟೂ ನಿತಂಬದ ಕೆಳಗಿರಿಸಿ. ದೇಹ, ಬೆನ್ನು ಮತ್ತು ಕತ್ತನ್ನು ನೇರವಾಗಿಸಿ ಮತ್ತು ಅಂಗೈಗಳನ್ನು ಆಯಾ ಮೊಣಕಾಲುಗಳ ಮೇಲಿರಿಸಿ.

*ಮೊಣಕಾಲಿನ ಮೇಲೆ ಭಾಗುತ್ತಾ, ಹಿಂದಕ್ಕೆ ಚಾಚಿ ಮತ್ತು ಬಲ ಹಿಮ್ಮಡಿಯ ಗಂಟನ್ನು ಬಲಕೈಯಲ್ಲೂ, ಎಡಹಿಮ್ಮಡಿಯ ಗಂಟನ್ನು ಎಡಗೈಯಲ್ಲೂ ಹಿಡಿಯಿರಿ.

*ಉಸಿರನ್ನು ಒಳಗೆಳೆದುಕೊಳ್ಳಿ ಮತ್ತು ಸೊಂಟ ಮತ್ತು ತೊಡೆಗಳನ್ನು ನೇರವಾಗಿಸುತ್ತಾ ಹಿಮ್ಮಡಿ ಗಂಟುಗಳ ಭದ್ರ ಹಿಡಿತವನ್ನು ಮುಂದುವರಿಸಿ. ನಿತಂಬ ಹಾಗೂ ಸೊಂಟವನ್ನು ಕೊಂಚ ಮುಂಚಾಚುತ್ತಾ ಕತ್ತು ಮತ್ತು ತಲೆಯನ್ನು ಎಷ್ಟು ಸಾಧ್ಯವೋ ಅಷ್ಟು ಬಗ್ಗಿಸಿ. ಸಹಜ ಉಸಿರಾಟವನ್ನು ಮುಂದುವರಿಸಿ ಮತ್ತು ಇದೇ ಭಂಗಿಯಲ್ಲಿ 6-8 ಸೆಕುಂಡುಗಳ ಕಾಲ ಇರಿ.

*ಉಸಿರು ಬಿಡಿ ಮತ್ತು ಮಾಮೂಲಿ ಮಂಡಿಯೂರಿದ ಸ್ಥಿತಿಗೆ ಮರಳಿ ಬನ್ನಿ.

ಅನುಕೂಲಗಳು
ಹಿಮ್ಮಡಿಗಂಟು, ತೊಡೆ, ದೇಹ, ಎದೆ, ಗಂಟಲು, ನಿತಂಬ ಹಾಗೂ ಮಾಂಸಖಂಡಗಳನ್ನು ಬಿಗಿಗೊಳಿಸುತ್ತದೆ. ಕತ್ತು ಮತ್ತು ಕಿಬ್ಬೊಟ್ಟೆಯ ಅಂಗಾಶಗಳಿಗೆ ಉತ್ತೇಜನ ನೀಡುತ್ತದೆ.

ಈ ಆಸನ ಅಸ್ತಮಾ ನಿಗ್ರಹಿಸಬಲ್ಲದು ಮತ್ತು ತಡೆಯಬಹುದು. ಉಸಿರಾಟದ ಕಾರ್ಯಾಚರಣೆಯನ್ನು ಉತ್ತಮಗೊಳಿಸುತ್ತದೆ. ಶ್ವಾಸಕೋಶ, ನಾಸಿಕದ ಅಂಗಾಂಗಗಳು ಹಾಗೂ ನರಗಳ ಕಾರ್ಯಾಚರಣೆಯನ್ನೂ ಉತ್ತಮ ಗೊಳಿಸುತ್ತದೆ. ಇದು ತಲೆಶೂಲೆ, ಟಾನ್ಸಿಲ್ ಸಮಸ್ಯೆಯನ್ನು ಪರಿಹರಿಸುತ್ತದೆ ಮತ್ತು ತಡೆಗಟ್ಟುತ್ತದೆ. ಈ ಆಸನದ ನಿಯತ ಅಭ್ಯಾಸವು ಸ್ತ್ರೀಯತ ಋತು ಸಮಸ್ಯೆಗಳು, ಉದ್ವೇಗವನ್ನೂ ಕಡಿಮೆಗೊಳಿಸುತ್ತದೆ.

ಶವಾಸನ

Sat, 08 May 2010 10:42:12 +0530

ಸಂಸ್ಕೃತದಲ್ಲಿ ಶವ ಮತ್ತು ಆಸನ ಅಂದರೆ 'ಮೃತದೇಹ' ಮತ್ತು 'ವ್ಯಾಯಾಮ' ಎಂದರ್ಥ. ಹಾಗಾಗಿ ಶವಾಸನ ಮಾಡುವ ಯೋಗಿಯು ನೆಲದ ಮೇಲೆ ಶವದಂತೆ ಅಂಗಾತ ಮಲಗುವ ಅವಶ್ಯಕತೆ ಇದೆ. ಈ ಆಸನದ ಮೂಲಕ ಯೋಗಿಯೊಬ್ಬನಿಗೆ ನಿಜವಾದ ವಿಶ್ರಾಂತಿ ಅಂದರೇನು ಎಂಬುದರ ಅರಿವಾಗುತ್ತದೆ.

ವಿಧಾನ

ಸಮತಟ್ಟಾದ ಜಾಗದಲ್ಲಿ ನಿಮ್ಮ ದೇಹದುದ್ದದ ಚಾಪೆ ಅಥವಾ ಜಮುಖಾನ ಹಾಸಿ, ಉದ್ದಕ್ಕೆ ನಿರಾಳವಾಗಿ ಮಲಗಿ.

ಕಾಲುಗಳ ನಡುವೆ ಅಂತರವಿರಲಿ ಮತ್ತು ಮೊಣಕಾಲುಗಳು ಬಾಗಿರಲಿ.

ಕೈಗಳನ್ನು ಅಗಲಕ್ಕೆ ನಿಮ್ಮೆರಡೂ ತೊಡೆಗಳ ಪಕ್ಕ ಅಗಲಕ್ಕೆ ಮೇಲ್ಮುಖವಾಗಿ ಚಾಚಿ.

ಕೈಬೆರಳುಗಳನ್ನು ಮೇಲ್ಮುಖವಾಗಿ ಚಮಚೆಯಾಕಾರಕ್ಕೆ ಕೊಂಚ ಬಾಗಿಸಿ ಮೇಲ್ಮುಖವಾಗಿಸಿ.

ಬಾಯಿ ಬಿಟ್ಟಿರಲಿ. ಕೆಳ ಮತ್ತು ಮೇಲಿನ ಹಲ್ಲುಗಳ ನಡುವೆ ಒಂದಿಷ್ಟು ಅಂತರವಿರಲಿ.

ಕಣ್ಣುಗಳನ್ನು ಸಡಿಲವಾಗಿ ಮುಚ್ಚಿ.

ಕಣ್ಣುಗುಡ್ಡೆಗಳು ನಿಶ್ಚಲವಾಗಿರಬೇಕು.

ಮನಸ್ಸು ಶಾಂತವಾಗಿರಲಿ.

ಮೂಗಿನಿಂದ ನಿಧಾನವಾಗಿ ಉಸಿರಾಡುತ್ತಾ ವಿಶ್ರಾಂತಿ ಪಡೆಯಿರಿ.

ವಿಶ್ರಾಂತಿ ಪಡೆಯುವಾಗ ನೀವು ನಿಮ್ಮ ಮನಸ್ಸು ಮತ್ತು ದೇಹದಿಂದ ದೂರ ಸಾಗಿ.

ಯಾವುದೂ ನಿಮ್ಮ ಅರಿವಿಗೆ ಬರದಿರುವ ಕ್ಷಣವೇ ವಿಶ್ರಾಂತಿಯ ಪರಿಪೂರ್ಣ ಹಂತ

ಯಾವ ಅನುಭವ ಇಲ್ಲ, ಏನೂ ಕೇಳಿಸುತ್ತಿಲ್ಲ, ನಿಮ್ಮ ಮನಸ್ಸು ಯಾವುದನ್ನೂ ಗಮನಿಸುತ್ತಿಲ್ಲ ಮತ್ತು ನೀವು ಸಂಪೂರ್ಣ ಶೂನ್ಯ ಸ್ಥಿತಿಗೆ ತಲುಪುತ್ತೀರಿ ಎಂಬ ಭಾವನೆಯಿರಲಿ.

ಪ್ರಯೋಜನಗಳು

ಮನಸ್ಸು ಶಾಂತವಾಗುತ್ತದೆ

ಮಾನಸಿಕ ಗ್ರಹಿಕೆ ಸಾಮರ್ಥ್ಯ ಹೆಚ್ಚುತ್ತದೆ ಮತ್ತು ಶಾಂತವಾಗಿರುತ್ತೀರಿ

ನಿಮ್ಮ ಭಾವನೆಗಳ ಮೇಲೆ ಹತೋಟಿ ಸಾಧಿಸುತ್ತೀರಿ

ಮನಸ್ಸು ಮತ್ತು ದೇಹದ ಮೇಲೆ ಸ್ವಾಭಾವಿಕ ಹೊಂದಾಣಿಕೆಯುಂಟಾಗುತ್ತದೆ

ಒತ್ತಡವನ್ನು ನಿಯಂತ್ರಿಸುವ ನಿಮ್ಮ ಸಾಮರ್ಥ್ಯ ಹೆಚ್ಚುತ್ತದೆ

ಕೆಲಸ ಮತ್ತು ವಿಶ್ರಾಂತಿಯ ಮೇಲೆ ಸಮತೋಲನ ಸಾಧಿಸುತ್ತದೆ.

ವಿಶ್ರಾಂತಿ ರಹಿತ ಚಡಪಡಿಕೆಯನ್ನು ಹತ್ತಿಕ್ಕುತ್ತದೆ.

ಚಡಪಡಿಕೆ ಆತಂಕ, ಭಯ, ಉದ್ವೇಗವನ್ನು ಶವಾಸನ ತೊಡೆದು ಹಾಕುತ್ತದೆ

ಇಚ್ಛಾಶಕ್ತಿಯನ್ನು ಹೆಚ್ಚಿಸುತ್ತದೆ.

ದೇಹ ಮತ್ತು ಮನಸ್ಸಿಗೆ ಲವಲವಿಕೆ ನೀಡುತ್ತದೆ

ಯಾವುದೇ ಆಸನವನ್ನು ಮುಗಿಸುವ ವೇಳೆಗೆ ಶವಾಸನ ಹಾಕುವುದು ಅತ್ಯುತ್ತಮ.

ಗಮನಿಸಿ

ನಿಮ್ಮ ಉಸಿರಾಟ ನಿಧಾನವಾದಂತೆ, ನಿಮ್ಮ ಮನಸ್ಸೂ ಸ್ಥಿರಗೊಳ್ಳುತ್ತದೆ ಹಾಗೂ ಎಲ್ಲಾ ಮಾನಸಿಕ ಚಟುವಟಿಕೆಗಳು ನಿಲುಗಡೆಯಾಗುತ್ತದೆ.

ಮೃತದೇಹದಂತೆ ನಿಶ್ಚಲವಾಗಿ ಮಲಗಿ.

ಸಂಪೂರ್ಣ ದಣಿವಾರುವ ತನಕ ಇದೇ ಭಂಗಿಯಲ್ಲಿರಿ.

ಇದು ಕೆಲವು ನಿಮಿಷಗಳಿಂದ ಅರ್ಧಗಂಟೆ ಕಾಲವೂ ಮುಂದುವರಿಯಬಹುದು.

ಬ್ರಹ್ಮಮುದ್ರೆ

Sat, 08 May 2010 10:40:20 +0530

ಪದ್ಮಾಸನ, ಸುಖಾಸನ, ವಜ್ರಾಸನ ಮೊದಲಾದ ಯೋಗಕ್ಕೆ ಸಂಬಂಧಿಸಿದ ಯಾವುದೇ ಆಸನದಲ್ಲಿ ಕುಳಿತುಕೊಳ್ಳಿ. ಆರಾಮ ಸ್ಥಿತಿಯಲ್ಲಿ ಅಥವಾ ಕುರ್ಚಿಯಲ್ಲಿ ಕುಳಿತುಕೊಂಡೂ ಇದನ್ನು ಮಾಡಬಹುದು. ಅಂಗೈಗಳು ಕಟಿಭಾಗದಲ್ಲಿರಲಿ.

ವಿಧಾನ

ದೇಹ ಮತ್ತು ಭುಜ ಸ್ಥಿರವಾಗಿರಲಿ, ಕುತ್ತಿಗೆ ಮಾತ್ರವೇ ತಿರುಗಿಸುವ ಮೂಲಕ ಮುಖವನ್ನು ಬಲಕ್ಕೆ ತಿರುಗಿಸಿ. ಈ ಪ್ರಕ್ರಿಯೆಯಲ್ಲಿ ಗಲ್ಲವು ಬಲಭುಜಕ್ಕೆ ಸಾಧ್ಯವಿದ್ದಷ್ಟು ತಾಗುವಂತಿರಬೇಕು. ನಿಮ್ಮ ದೃಷ್ಟಿಯೂ ಬಲದಿಕ್ಕಿಗಿರಬೇಕು. ಮೂರರಿಂದ ಐದುಬಾರಿ ಉಸಿರಾಟ ಮಾಡುವಷ್ಟು ಕಾಲ ಈ ಸ್ಥಿತಿಯಲ್ಲಿದ್ದು, ಬಳಿಕ ಆರಂಭಿಕ ಸ್ಥಿತಿಗೆ ಮರಳಿ. ನಂತರ, ಇದೇ ರೀತಿಯಾಗಿ, ಮುಖವನ್ನು ಎಡಕ್ಕೆ ತಿರುಗಿಸಿ, ಎಡ ಭುಜದ ನೇರವಾಗಿರುವಂತೆ ನೋಡಿಕೊಳ್ಳಿ, ಎಡದಿಕ್ಕಿಗೇ ದೃಷ್ಟಿ ಇರಲಿ. ಮೂರರಿಂದ ಐದು ಬಾರಿ ಉಸಿರಾಟ ಮಾಡಿದ ಬಳಿಕ ನಿಧಾನವಾಗಿ ಪ್ರಾರಂಭದ ಸ್ಥಿತಿಗೆ ಬನ್ನಿ.

ಈಗ ಕುತ್ತಿಗೆಯ ಸ್ನಾಯುಗಳನ್ನು ಸಡಿಲಗೊಳಿಸಿ, ತಲೆಯನ್ನು ಹಿಂದಕ್ಕೆ ಚಾಚಿರಿ. ಸಾಧ್ಯವಿದ್ದಷ್ಟೂ ಕತ್ತನ್ನು ಕೆಳಗೆ ಬಾಗಿಸಿ. ದೃಷ್ಟಿಯನ್ನು ಹುಬ್ಬಿನತ್ತ ನೇರವಾಗಿಸಿ. ಮೂರರಿಂದ ಐದು ಉಸಿರಾಟದಷ್ಟು ಅವಧಿ ಇದೇ ಸ್ಥಿತಿಯಲ್ಲಿದ್ದು, ಬಳಿಕ ನಿಧಾನವಾಗಿ ಪ್ರಾರಂಭಿಕ ಸ್ಥಿತಿಗೆ ಬನ್ನಿ.

ಈ ಮುದ್ರೆಯನ್ನು, ಮೊದಲು ತಲೆಯನ್ನು ಹಿಂದಕ್ಕೆ ಬಾಗಿಸಿ, ನಂತರ ಮುಖವನ್ನು ಬಲಕ್ಕೆ ಹಾಗೂ ಎಡಕ್ಕೆ ತಿರುಗಿಸುವ ಮೂಲಕವೂ ಮಾಡಬಹುದು. ಎಲ್ಲಾ ನಾಲ್ಕು ಚಲನೆಗಳು ಒಟ್ಟಾಗಿ ಬ್ರಹ್ಮಮುದ್ರೆ ಎಂದು ಕರೆಸಿಕೊಳ್ಳುತ್ತವೆ.

ಉಸಿರಾಟ: ಬ್ರಹ್ಮ ಮುದ್ರೆಯ ಮೂರನೇ ಹಂತದಲ್ಲಿ ತಲೆಯನ್ನು ಹಿಂದಕ್ಕೆ ಬಾಗಿಸಿದಾಗ ಮತ್ತು ನಾಲ್ಕನೇ ಹಂತದಲ್ಲಿ ಗಲ್ಲವನ್ನು ಎದೆಭಾಗದತ್ತ ಕೆಳಗೆ ಮಾಡಿದಾಗ, ಉಸಿರಾಟ ಸ್ಥಗಿತವಾಗುವುದರಿಂದ, ಈ ಸ್ಥಿತಿಗಳಲ್ಲಿ ಎಚ್ಚರಿಕೆಯಿಂದ ಉಸಿರಾಡಿ.

ಕಣ್ಣು ಮತ್ತು ಚಿತ್ತ: ಮುದ್ರೆ ಮಾಡುವುದು ಮತ್ತು ಮುದ್ರೆಯಿಂದ ಹಿಂದಕ್ಕೆ ಬರುವ ಕ್ರಿಯೆಯಲ್ಲಿ ವಿವರಿಸಿದಂತೆ, ಮುಖ ಯಾವ ಭಾಗದತ್ತ ತಿರುಗುತ್ತದೆಯೋ, ಅದೇ ದಿಕ್ಕಿನಲ್ಲಿ ನಿಮ್ಮ ದೃಷ್ಟಿಯೂ ಇರಲಿ.

ಎಚ್ಚರಿಕೆ:

* ಬ್ರಹ್ಮಮುದ್ರೆಯನ್ನು ಸ್ವತಂತ್ರವಾಗಿ ಮಾಡಬೇಕು, ಮತ್ತು ಮುದ್ರೆಯ ಪ್ರತಿ ಹಂತದಲ್ಲೂ 3ರಿಂದ 5 ಉಸಿರಾಟಗಳಷ್ಟು ಅಂತರವಿರಬೇಕು ಹಾಗೂ 3ರಿಂದ 5 ಸುತ್ತಿನಲ್ಲಿ ಇದನ್ನು ಮಾಡಬೇಕು.

* ಗಂಟಲು ಸ್ನಾಯು ತುಂಬಾ ಗಟ್ಟಿಯಾಗಿದ್ದರೆ, ಕುತ್ತಿಗೆ ಮುಂದೆ ಚಾಚುವ ಹಂತವನ್ನು ಮಾಡದೆಯೇ ಮುದ್ರೆ ಮಾಡಿ.

ಬ್ರಹ್ಮಮುದ್ರೆಯ ಪ್ರಯೋಜನಗಳು:

* ಕುತ್ತಿಗೆಯ ಸ್ನಾಯುಗಳ ಸಂಕುಚನ ಮತ್ತು ವಿಕಸನದಿಂದ ಅದು ಬಲಿಷ್ಠವಾಗುತ್ತದೆ ಮತ್ತು ಬಾಗುವಿಕೆ ಸುಲಭವಾಗುತ್ತದೆ.

* ಕತ್ತು, ಗಂಟಲು ಭಾಗದಲ್ಲಿ ರಕ್ತದ ಚಲನೆ ನಿರಾಳವಾಗುತ್ತದೆ. ಮೆದುಳಿನಿಂದ ದೇಹದ ಸ್ಪರ್ಶೇಂದ್ರಿಯಗಳಿಗೆ (ಕಣ್ಣು, ಕಿವಿ, ಮೂಗು, ನಾಲಿಗೆ ಇತ್ಯಾದಿ) ಹೋಗುವ ಕ್ರೇನಿಯಲ್ ನರಗಳು ಚೈತನ್ಯ ಪಡೆಯುತ್ತವೆ.

* ಟಾನ್ಸಿಲ್ ಬಾವು, ಉರಿತ ಮತ್ತು ಅನಾರೋಗ್ಯಕರ ಬೆಳವಣಿಗೆಗೆ ಇದು ತಡೆಯೊಡ್ಡುತ್ತದೆ.

ವಿಪರೀತ ಕರಣಿ ಆಸನ

Sat, 08 May 2010 10:34:03 +0530

ಸಂಸ್ಕೃತದಲ್ಲಿ ವಿಪರೀತ ಅಂದರೆ ತಲೆಕೆಳಗೆ ಎಂದೂ, ಕರಣಿ ಎಂದರೆ ಕ್ರಿಯೆ ಎಂದೂ ಅರ್ಥ. ಈ ಆಸನ ಹಾಕುವ ವೇಳೆಗೆ ಶರೀರವು ತಲೆಕೆಳಗಾಗುವ ಸ್ಥಿತಿಗೆ ಬರುವುದರಿಂದ ಇದಕ್ಕೆ ವಿಪರೀತ ಕರಣಿ ಎಂದು ಹೆಸರು.

ಈ ಆಸನಕ್ಕೆ ಮೂರು ಹಂತಗಳಿವೆ. ಇವುಗಳನ್ನು ಒಂದರ ನಂತರ ಮತ್ತೊಂದಾಗಿ ಮಾಡಬೇಕಿದೆ. ಒಂದು ಹಂತದಿಂದ ಇನ್ನೊಂದು ಹಂತಕ್ಕೆ ಮುಂದುವರಿಯಬೇಕಿರುವುದು ಈ ಆಸನದ ವೈಜ್ಞಾನಿಕ ಕ್ರಮವಾಗಿದೆ.

ವಿಧಾನ
ವ್ಯಾಯಾಮದ ಚಾಪೆಯಲ್ಲಿ ಅಂಗಾತ ಮಲಗುವ ಮೂಲಕ ಈ ಆಸನದ ಆರಂಭ. ನಿಮ್ಮ ಕಾಲುಗಳನ್ನು ಜೋಡಿಸಿಡಿ. ಕೈಗಳು ದೇಹದ ಇಬ್ಬದಿಯಲ್ಲಿರಲಿ. ನಿಧಾನಕ್ಕೆ ಆಳವಾಗಿ ಉಸಿರಾಡಿ. ನೀವು ಉಸಿರಾಡುತ್ತಿರುವಾಗಲೆ ಕೆಳಗಿನ ಪ್ರಕ್ರಿಯೆಗಳನ್ನು ಮುಂದುವರಿಸಿ. ನಿಮ್ಮ ಅಂಗೈಗಳನ್ನು ನೆಲಕ್ಕೆ ಊರಿ. ನಿಮ್ಮ ಎರಡೂ ಕಾಲುಗಳನ್ನು ಒಟ್ಟಾಗಿ ಮೇಲಕ್ಕೆತ್ತಿ. ಕಾಲುಗಳು ನೆಲಕ್ಕೆ ಲಂಬಕೋನದಂತಿರಲಿ. ಪಾದಗಳು ನಿಮ್ಮ ತಲೆಗೆ ನೇರವಾಗಿರಬೇಕು. ಮೊಣಕಾಲುಗಳನ್ನು ಬಗ್ಗಿಸಬೇಡಿ ಅಥವಾ ಕೈಗಳನ್ನು ಮೇಲೆತ್ತಬೇಡಿ. ಉಸಿರಾಟವನ್ನು ಪೂರ್ಣಗೊಳಿಸಿ ಮತ್ತು ಉಸಿರನ್ನು ಐದು ಸೆಕುಂಡುಗಳ ಕಾಲ ತಡೆಯಿರಿ. ನಿಧಾನಕ್ಕೆ ಉಸಿರನ್ನು ಸಂಪೂರ್ಣವಾಗಿ ಹೊರಬಿಡಿ. ಮತ್ತು ಉಸಿರಾಟವನ್ನು ಐದು ಸೆಕುಂಡುಗಳ ಕಾಲ ತಡೆಯಿರಿ. ನಂತರ ಪುನ ಉಸಿರನ್ನು ನಿಧಾವಾಗಿ, ಆದರೆ ಆಳವಾಗಿ ಒಳಗೆಳೆದುಕೊಳ್ಳಿ. ಐದು ಸೆಕುಂಡುಗಳ ಕಾಲ ಉಸಿರು ತಡೆಹಿಡಿದು ಉಸಿರು ಹೊರಹಾಕುವ ಪ್ರಕ್ರಿಯೆ ಆರಂಭಿಸಿ.

ಎರಡನೆಯ ಹಂತ
ನೀವು ಉಸಿರಾಟ ನಡೆಸುತ್ತಿರುವಂತೆಯೇ, ಅದೇ ಸ್ಥಿತಿಯಿಂದ ಈ ಹಂತವನ್ನು ಮುಂದುವರಿಸಿ. ದೇಹದ ಇಕ್ಕೆಲಗಳಲ್ಲಿರುವ ಕೈಗಳನ್ನು ಬಾಗಿಸಿ ಅವುಗಳನ್ನು ಸನ್ನೆಗಳಂತೆ ಆಧರಿಸಿಕೊಂಡು ಸೊಂಟವನ್ನು ಮೇಲಕ್ಕೆತ್ತಿ. ಕಾಲುಗಳು ನೇರವಾಗಿ, ಭಾಗದೆ ನೆಟ್ಟಗಿರಲಿ. ಉಸಿರನ್ನು ಸಂಪೂರ್ಣ ಹೊರಹಾಕುವ ತನಕ ಇದೇ ಭಂಗಿಯಲ್ಲಿರಿ. ಆಳವಾಗಿ ಉಸಿರೆಳೆದು ನಿಧಾನಕ್ಕೆ ಹೊರಬಿಡಿ. ಸ್ವಲ್ಪ ಹೊತ್ತು ಸಹಜವಾಗಿ ಉಸಿರಾಡಿ.

ತೃತೀಯ ಹಂತ
ಅಂಗೈಯನ್ನು ಮತ್ತೆ ಊರಿ. ತಲೆ ಅಥವಾ ಮೊಣಕಾಲನ್ನು ಎತ್ತದೆಯೇ ನಿಮ್ಮ ಕಾಲುಗಳನ್ನು ತಲೆಯತ್ತ ಚಲಾಯಿಸಿ. ನಿಮ್ಮ ಪೃಷ್ಠ ಹಾಗೂ ಬೆನ್ನಿನ ಭಾಗವನ್ನು ಸ್ವಲ್ಪವೇ ಮೇಲೆತ್ತಿ. ನಿಮ್ಮ ಬೆನ್ನುಹುರಿಯ ಕೆಳಭಾಗವನ್ನು ಭಾಗಿಸಿ. ನಿಮ್ಮ ಕಾಲುಗಳನ್ನು ನೆಲಕ್ಕೆ ಸಮಾನಾಂತರವಾಗಿಸಿ. ಮೊಣಕೈಭಾಗದಲ್ಲಿ ಕೈಗಳನ್ನು ಭಾಗಿಸಿ. ಸೊಂಟಕ್ಕೆ ಅಂಗೈಯ ಆಧಾರ ಪಡೆದುಕೊಳ್ಳಿ. ಪೃಷ್ಠದ ಮೇಲ್ಭಾಗದಲ್ಲಿ ಎರಡೂ ಭಾಗಗಳನ್ನು ಅಂಗೈಯಿಂದ ಒತ್ತಿ ಹಿಡಿಯಿರಿ. ಈ ಭಂಗಿಯಲ್ಲಿ ಐದು ನಿಮಿಷಗಳ ಕಾಲ ಇರಿ. ನಿಧಾನವಾಗಿ ಆದರೆ ಆಳವಾಗಿ ಉಸಿರೆಳೆದುಕೊಂಡು ಕಾಲುಗಳನ್ನು ಲಂಬಸ್ಥಿತಿಗೆ ಮರಳಿಸಿ. ನಿಮ್ಮ ಮೊಣಕೈಗಳನ್ನು ಆಧಾರವಾಗಿಸಿ. ಸಹಜ ಉಸಿರಾಟ ಮುಂದುವರಿಸಿ. ನಿಮ್ಮ ಪಾದಗಳು ಮತ್ತು ಮೊಣಕಾಲುಗಳನ್ನು ನೇರವಾಗಿ ಮತ್ತು ಒಟ್ಟಾಗಿಸಿ. ದೃಷ್ಟಿಯು ಕಾಲಿನ ಹೆಬ್ಬೆರಳನ್ನು ದಿಟ್ಟಿಸುತ್ತಿರಲಿ. ಮೂರು ನಿಮಿಷ ಈ ಭಂಗಿಯಲ್ಲಿದ್ದು ಮೊದಲಿನ ಸ್ಥಿತಿಗೆ ಮರಳಿ

ಉಪಯೋಗಗಳು
ಈ ಆಸನವು ಪೆಲ್ವಿಕ್ ಸರ್ಕುಲೇಶನನ್ನು ನಿಯಂತ್ರಿಸುತ್ತದೆ. ಕತ್ತು, ಮೆದುಳು ಮತ್ತು ಜಠರಕ್ಕೆ ರಕ್ತ ಸರಬರಾಜು ಹೆಚ್ಚಿಸುತ್ತದೆ. ಅಡ್ರಿನಲ್, ಗೊನಾಡ್, ಪಿಟ್ಯುಟರಿ ಮತ್ತು ಥೈರಾಯಿಡ್ ಗ್ರಂಥಿಗಳ ಕಾರ್ಯಕ್ಷಮತೆಯನ್ನು ವೃದ್ಧಿಸುತ್ತದೆ.

ಎಚ್ಚರಿಕೆ
90 ಡಿಗ್ರಿ ಕೋನಕ್ಕೆ ತಲುಪಿದ ಬಳಿಕ ನಿಮ್ಮ ಕಾಲುಗಳನ್ನು ದೂಡಬೇಡಿ. ಅಂತೆಯೇ ಮೊಣಕಾಲನ್ನು ಬಗ್ಗಿಸುವುದೂ ಸಹ ಅಪಾಯಕಾರಿ.

ಸರ್ವಾಂಗಾಸನ

Sat, 08 May 2010 10:33:01 +0530

ಸರ್ವಾಂಗಾಸನ ಎಂಬುದು ಮೂರು ಪದಗಳ, ಪದಗುಚ್ಚ. ಅದು ಸರ್ವ, ಅಂಗ, ಆಸನ. 'ಸರ್ವ' ಎಂದರೆ ಎಲ್ಲಾ, 'ಅಂಗ' ಎಂದರೆ ಭಾಗ, ಆಸನ ಎಂದರೆ ಯೋಗ ಭಂಗಿ. ಹಾಗಾಗಿ ಇಡೀ ದೇಹಕ್ಕೆ ವ್ಯಾಯಾಮ ಲಭಿಸುವ ಈ ಆಸನಕ್ಕೆ ಸರ್ವಾಂಗಾಸನ ಎಂದು ಹೆಸರು.

ಸರ್ವಾಂಗಾಸನ ಮಾಡುವ ವಿಧಾನ
ನೆಲದ ಮೇಲೆ ರಗ್ ಅಥವಾ ಚಾಪೆ ಹಾಸಿ ಅಂಗಾತ ಮಲಗಿ. ದೇಹವನ್ನು ನೆಟ್ಟಗಾಗಿಸಿ. ಕಾಲುಗಳನ್ನು ನೇರವಾಗಿಸಿ, ಕೈಗಳನ್ನು ಅಂಗೈ ಕೆಳಮುಖವಾಗಿ ಹಗುರವಾಗಿರಿಸಿ. ನಿಧಾನವಾಗಿ ಉಸಿರಾಡಿ. ಮೊಣಕಾಲುಗಳನ್ನು ಎದೆಯ ಮಟ್ಟಕ್ಕೆ ಭಾಗಿಸಿ. ಅಂಗೈಗಳನ್ನು ನೆಲಕ್ಕೆ ಒತ್ತಿ ಸೊಂಟ ಮತ್ತು ಪೃಷ್ಠವನ್ನು ನೆಲದಿಂದ ಮೇಲಕ್ಕೆತ್ತಿ. ಕಟಿಭಾಗಕ್ಕೆ

ಅಂಗೈಯ ಆಧಾರ ನೀಡಿ ಮೊಣಕಾಲುಗಳನ್ನು ಹಣೆಯತ್ತ ಭಾಗಿಸಿ ಕಾಲುಗಳನ್ನು ನೇರವಾಗಿಸಿ. ನಿಧಾನಕ್ಕೆ ಉಸಿರು ಬಿಡಿ, ಬೆನ್ನು ಮತ್ತು ಕಾಲುಗಳನ್ನು ನೇರವಾಗಿಸಿ. ಕಾಲುಗಳನ್ನು ಮೇಲಕ್ಕೇರಿಸುತ್ತಾ ಮೊಣಕೈಗಳನ್ನು ಭುಜದ ನೇರಕ್ಕೆ ತನ್ನಿ. ಕಾಲಿನ ಹೆಬ್ಬೆರಳುಗಳು, ಕಾಲು ಮತ್ತು ದೇಹವನ್ನು ಸಡಿಲ ಬಿಡಿ. ನಿಮ್ಮ ಕಾಲಿನ ಹೆಬ್ಬೆರಳಿನ ಮೇಲೆ ದೃಷ್ಟಿ ನೆಡಿ. ಸಾಧ್ಯವಾದಷ್ಟು ಹೊತ್ತು ಈ ಭಂಗಿಯಲ್ಲಿದ್ದು ಸಹಜವಾಗಿ ಉಸಿರಾಡಿ.

ಈ ಭಂಗಿಯಿಂದ ಹಿಂತಿರುಗಲು, ನಿಧಾನಕ್ಕೆ ಉಸಿರು ಹೊರಬಿಟ್ಟು, ಮೊಣಕಾಲುಗಳನ್ನು ಎದೆಯ ನೇರಕ್ಕೆ ಭಾಗಿಸಿ, ಸೊಂಟ ಮತ್ತು ಪೃಷ್ಠವನ್ನು ನಿಧಾನಕ್ಕೆ ನೆಲದ ಮೇಲಿರಿಸಿ. ಕಾಲುಗಳನ್ನು ನೆಲದ ಮೇಲೆ ನೇರವಾಗಿ ಚಾಚಿ, ಕೈಗಳನ್ನು ಸಡಿಲ ಬಿಡಿ.

ಅನುಕೂಲಗಳು
ಥೈರಾಯಿಡ್ ಗ್ರಂಥಿಯನ್ನು ಉದ್ದೀಪಿಸುತ್ತದೆ. ನರವ್ಯೂಹವನ್ನು ಶಕ್ತಿಯುತವಾಗಿಸುತ್ತದೆ. ಕಿಬ್ಬೊಟ್ಟೆಯ ಭಾಗವನ್ನೂ ಉದ್ದೀಪಿಸುತ್ತದೆ.

ಎಚ್ಚರಿಕೆ
ನಿಮಗೆ ಅಧಿಕ ರಕ್ತದೊತ್ತಡವಿದ್ದರೆ ಈ ಆಸನವನ್ನು ಮಾಡಲೇ ಬೇಡಿ. ಕತ್ತು, ಭುಜ, ಸೊಂಟದ ಸಮಸ್ಯೆಗಳಿದ್ದರೂ ಈ ಆಸನ ಮಾಡುವುದು ಉಚಿತವಲ್ಲ.

ಸ್ತ್ರೀಯರು ಋತುಸ್ರಾವದ ವೇಳೆ ಸರ್ವಾಂಗಾಸನ ಮಾಡಬಾರದು.

ಹಲಾಸನ

Sat, 08 May 2010 10:31:38 +0530

ವಿಪರೀತ ಕರಣಿ ಮತ್ತು ಸರ್ವಾಂಗಸನದ ಮೇಲೆ ಪ್ರಭುತ್ವ ಸಾಧಿಸಿದ್ದರೆ ಮಾತ್ರ ನೀವು ಹಲಾಸನದ ಅಭ್ಯಾಸ ನಡೆಸಬೇಕು. ಹಲಾಸನವು ಪಶ್ಚಿಮೋತ್ತಾಸನಕ್ಕೆ ಪೂರಕವಾದುದು. ಚಕ್ರಾಸನ ಮತ್ತು ಮತ್ಸ್ಯಾಸನಗಳು ಹಲಾಸನದ ವಿರುದ್ಧ ಭಂಗಿಯ ಆಸನ.

ಸಂಸ್ಕೃತದ 'ಹಲ' ಮತ್ತು 'ಆಸನ' ಎಂಬೆರಡು ಶಬ್ದಗಳು ಸೇರಿ ಹಲಾಸನ ರೂಪುಗೊಂಡಿದೆ. ಹಲ ಎಂದರೆ ನೇಗಿಲು ಎಂದೂ, ಆಸನ ಎಂದರೆ ಯೋಗಭಂಗಿ ಎಂದೂ ಅರ್ಥ. ಹಾಗಾಗಿ ಹಲಾಸನದ ವೇಳೆ ಯೋಗಿಯ ದೇಹವು ಭಾರತೀಯ ಸಾಂಪ್ರದಾಯಿಕ ನೇಗಿಲಿನ ಆಕಾರದಂತಾಗುವ ಕಾರಣ ಇದಕ್ಕೆ ಹಲಾಸನ ಎಂಬ ಹೆಸರು.

ವಿಧಾನ
ಹಲಾಸನ ಅಭ್ಯಾಸ ಆರಂಭದ ಅತ್ಯುತ್ತಮ ವಿಧಾನವೆಂದರೆ, ಅರ್ಧ ಹಲಾಸನ ಭಂಗಿಯಿಂದ ಆರಂಭ. ಆದರೆ ನೀವು ನಿಮ್ಮ ಕೈಗಳ ಮೇಲೆ ಯಾವುದೇ ಒತ್ತಡ ಹಾಕಬೇಕಿಲ್ಲ. ನೀವು ನಿಮ್ಮ ಅಂಗೈಗಳನ್ನು ನೆಲಕ್ಕೆ ಊರುವ ವೇಳೆಯೂ ನಿಧಾನಕ್ಕೆ ಉಸಿರುಬಿಡಿ. ಏಕಕಾಲಕ್ಕೆ ನಿಮ್ಮ ಬೆನ್ನು, ಸೊಂಟ ಮತ್ತು ನಿತಂಬವನ್ನು ನೆಲದಿಂದ ಮೇಲಕ್ಕೆತ್ತಿ. ಅದೇ ವೇಳೆ ನಿಧಾನಕ್ಕೆ, ಆದರೆ ಒಂದೇ ನಡೆಯಲ್ಲಿ ನಿಮ್ಮ ಕಾಲುಗಳನ್ನು ಮೊಣಕಾಲುಗಳನ್ನು ಬಗ್ಗಿಸದೆ ನಿಮ್ಮ ತಲೆಯ ಮೇಲಕ್ಕೆ ತನ್ನಿ. ನೇರವಾದ, ಭಾಗದ ನಿಮ್ಮ ಕಾಲುಗಳನ್ನು ತಲೆಯಿಂದ ಆಚೆಗೆ ಕಾಲ್ಬೆರಳುಗಳು ನೆಲಕ್ಕೆ ಮುಟ್ಟುವಂತೆ ಭಾಗಿಸಿ. ಕಾಲ್ಬೆರಳುಗಳು ನಿಮ್ಮ ತಲೆಯಿಂದ ಆಚೆಗೆ ಹತ್ತಿರದ ಬಿಂದುವಿಗೆ ತಾಕುತ್ತಿರಬೇಕು. ಉಸಿರನ್ನು

ಒಳಗೆಳೆದುಕೊಂಡು ಸಹಜವಾಗಿ ಉಸಿರಾಡಿ. ನಿಧಾನಕ್ಕೆ ಕಾಲ್ಬೆಳುಗಳನ್ನು ಒಟ್ಟಿಗೆ ನೆಲದ ಮೇಲೆ ಇನ್ನು ಜಾರಿಸಿ. ಸಾಧ್ಯವಾದಷ್ಟು ಬೆನ್ನನ್ನು ಸುರುಳಿ ಮಾಡಿ. ನಿಮ್ಮ ಗಲ್ಲವನ್ನು ಎದೆಗೆ ಒತ್ತಿ. ಈಗ ನಿಮ್ಮ ಕೈಗಳನ್ನು ಮೇಲಕ್ಕೆತ್ತಿ ಮತ್ತು ಅವುಗಳನ್ನು ನಿಧಾನವಾಗಿ ನಿಮ್ಮ ತಲೆಗಳ ಎರಡೂ ಪಕ್ಕದಲ್ಲಿ ಇರಿಸಿ. ನಿಮ್ಮ ಕೈಬೆಳುಗಳನ್ನು ಪರಸ್ಪರ ಬಂಧಿಸಿ ನಿಮ್ಮ ತಲೆಯು ಅದರಿಂದ ಆವೃತವಾಗುವಂತೆ ಇರಿಸಿ. ಇಷ್ಟೂ ಹೊತ್ತು ನಿಮ್ಮ ಕಾಲುಗಳು ಜೋಡಿಸಿದಂತೆ ನೆಟ್ಟಗಿರಬೇಕು. ಸಹಜವಾಗಿ ಉಸಿರಾಡುತ್ತಿರಿ. ಆರಂಭದ ಹಂತದಲ್ಲಿ ಕನಿಷ್ಠ ಎರಡು ನಿಮಿಷಗಳ ಕಾಲ ಅಥವಾ ನಿಮಗೆ ಆಹಿತವೆನಿಸುವ ತನಕ ಈ ಭಂಗಿಯಲ್ಲಿರಿ.

ಆರಂಭದ ಭಂಗಿಗೆ ಮರಳುವಿಕೆ
ನಿಮ್ಮ ಕೈಗಳನ್ನು ನಿಧಾನಕ್ಕೆ ಬಿಡಿಸಿ ಅವುಗಳು ಮೊದಲಿದ್ದ ಜಾಗದಲ್ಲಿ ನಿಮ್ಮ ದೇಹದ ಇಕ್ಕೆಲಗಳಲ್ಲಿರಿಸಿ. ನಿಧಾನಕ್ಕೆ ಉಸಿರು ಒಳಗೆಳೆದುಕೊಳ್ಳಿ. ಏಕಕಾಲಕ್ಕೆ ಮೊಣಕಾಲುಗಳನ್ನು ಬಗ್ಗಿಸದೆಯೇ ನಿಮ್ಮ ಕಾಲುಗಳನ್ನು ಲಂಬಕೋನ ಸ್ಥಿತಿಗೆ ತನ್ನಿ. ಕಾಲುಗಳನ್ನು ನೆಲದಮೇಲಿನ ಪೂರ್ವಸ್ಥಿತಿಗೆ ಮರಳಿಸುವ ವೇಳೆ ನಿಮ್ಮ ಕಿಬ್ಬೊಟ್ಟೆಯ ಮಾಂಸ ಖಂಡಗಳ ಮೇಲೆ ಪ್ರಮುಖವಾಗಿ ಒತ್ತಡ ಬೀಳುತ್ತದೆ. ಈ ಲಂಭಕೋನ ಸ್ಥಿತಿಯಲ್ಲಿ ಎರಡು ಸೆಕುಂಡುಗಳ ಕಾಲವಿರಿ. ಉಸಿರನ್ನು ಹೊರಬಿಡುತ್ತಾ ನಿಮ್ಮ ಕಾಲುಗಳನ್ನು ನೆಲಕ್ಕೆ ಮರಳಿಸಿ, ನಿಮ್ಮ ಹಿಮ್ಮಡಿಗಳು ನೆಲಕ್ಕೆ ತಾಕುವವೇಳೆ ಉಸಿರಿನ ಹೊರಹಾಕುವಿಕೆ ಸಂಪೂರ್ಣಗೊಳ್ಳಲಿ. ಬಳಿಕ ಎರಡು ಸೆಕುಂಡುಗಳು ತಡೆದ ನಂತರ ಸಹಜ ಓಘದಲ್ಲಿ ಉಸಿರಾಟ ನಡೆಸಿ.

ಎಚ್ಚರಿಕೆ
ಗರ್ಭಾವಸ್ಥೆ ಮತ್ತು ಋತುಸ್ರಾವ ಸಮಯದಲ್ಲಿ ಈ ಆಸನದ ಅಭ್ಯಾಸ ಮಾಡಲೇ ಬಾರದು. ಕಿಬ್ಬೊಟ್ಟೆ ಭಾಗದಲ್ಲಿ ನೋವಿದ್ದರೆ, ಅಥವಾ ಅಭ್ಯಾಸ ಮಾಡುವ ವೇಳೆಗೆ ಗುಲ್ಮ ಮತ್ತು ಪಿತ್ತಕೋಶದಲ್ಲಿ ನೋವು ಸಂಭವಿಸಿದರೆ ಆಭ್ಯಾಸವನ್ನು ತಕ್ಷಣ ನಿಲ್ಲಿಸಿ. ಹೃದಯದ ತೊಂದರೆ, ತೀವ್ರ ರಕ್ತದೊತ್ತಡ ಮತ್ತು ಹರ್ನಿಯ ಸಮಸ್ಯೆಯವರಿಗೂ ಇದು ಸೂಕ್ತವಲ್ಲ. ಹಲಾಸನದ ಅಭ್ಯಾಸದ ವೇಳೆಗೆ ಉಸಿರಾಟದ ಲಯವನ್ನು ಅನುಸರಿಸಿ.

ಉಪಯೋಗಗಳು
ಹಲಾಸನವು ಲೈಂಗಿಕ ಗ್ರಂಥಿಗಳನ್ನು ಉತ್ತೇಜಿಸುತ್ತದೆ. ನಿಮ್ಮ ಪೆಲ್ವಿಕ್ ಮತ್ತು ಕಿಬ್ಬೊಟ್ಟೆಯ ಅಂಗಾಂಗಗಳ ಬಲವರ್ಧನೆಗೊಳ್ಳುತ್ತವೆ. ಮಿಗಿಲಾಗಿ ಅವುಗಳ ಪರಿಸ್ಥಿತಿಗಳನ್ನು ಸರಿಯಾಗಿಸುತ್ತದೆ. ಹಲಾಸನದ ನಿಯಮಿತ ಅಭ್ಯಾಸವು ದೇಹಮತ್ತು ಮನಸ್ಸಿಗೆ ಉಲ್ಲಾಸ ನೀಡುತ್ತದೆ. ಉದಾಸೀನ ಮತ್ತು ಜಡತ್ವನ್ನು ಹೋಗಲಾಡಿಸುತ್ತದೆ. ಬೊಜ್ಜು ಕರಗಿಸಿ ದೇಹಕ್ಕೆ ಉತ್ತಮ ಆಕಾರ ನೀಡುತ್ತದೆ. ಕಿಬ್ಬೊಟ್ಟೆ ಮತ್ತು ಸೊಂಟದ ಭಾಗಗಳು ತೆಳ್ಳಗಾಗುತ್ತವೆ. ಸೊಂಟ, ನಿತಂಬ, ತೊಡೆ ಹಾಗು ಕಿಬ್ಬೊಟ್ಟೆಯ ಹೆಚ್ಚುವರಿ ಕೊಬ್ಬನ್ನು ಕರಗಿಸುತ್ತದೆ. ಕಾಲು ಮತ್ತು ಪೆಲ್ವಿಕ್ ಭಾಗಗಳಿಗೆ ಉತ್ತಮ ವ್ಯಾಯಾಮ ದೊರೆಯುತ್ತದೆ. ಅಂತೆಯೇ ಗಂಟಲು ನಿರಾಳವಾಗುತ್ತದೆ. ಹಾಗಾಗಿ ಸಂಗೀತಗಾರರು ಮತ್ತು ಶಿಕ್ಷಕರು ಈ ಆಸನದ ನಿರಂತರ ಅಭ್ಯಾಸದಿಂದ ವಿಶೇಷ ಅನುಕೂಲ ಪಡೆಯಬಹುದಾಗಿದೆ.

ಹಲಾಸನದ ಅಭ್ಯಾಸದಿಂದ ಕತ್ತಿನ ಮಾಂಸಪೇಶಿಗಳಿಗೂ ಉತ್ತಮ ವ್ಯಾಯಾಮ ದೊರಕಿ ಅವುಗಳು ಸುದೃಢಗೊಳ್ಳುತ್ತವೆ. ಥೈರಾಯಿಡ್ ಮತ್ತು ಪ್ಯಾರಾಥೈರಾಯಿಡ್ ಗ್ರಂಥಿಗಳ ಕಾರ್ಯಕ್ಷಮತೆ ಹೆಚ್ಚುತ್ತದೆ. ನಿಮ್ಮ ಮುಖ ಹಾಗೂ ಮೆದುಳಿಗೆ ಉತ್ತಮ ರಕ್ತಸಂಚಾರವಾಗುತ್ತದೆ. ಲಿವರ್ ಮತ್ತು ಗುಲ್ಮದ ಹಿಗ್ಗುವಿಕೆ ಅಥವಾ ಕುಗ್ಗುವಿಕೆಯ ಸಮಸ್ಯೆ ಕಡಿಮೆಯಾಗುತ್ತದೆ. ಬೆನ್ನುಹುರಿಯ ಸಣ್ಣಪುಟ್ಟ ಸಮಸ್ಯೆಗಳು ಸರಿಯಾಗುತ್ತವೆ. ಹೃದಯದ ಮಾಂಸಖಂಡಗಳಮೇಲೆ ಬದಲೀ ಒತ್ತಡ ಬೀಳುವುದರಿಂದ ಹೃದಯವು ಸುದೃಢವಾಗುತ್ತದೆ. ದೇಹದ ರಕ್ತಪರಿಚಲನೆ ಹೆಚ್ಚುತ್ತದೆ. ಹಲಾಸನದ ವೇಳೆಗೆ ದೇಹದ ಹೆಚ್ಚಿನೆಲ್ಲ ಭಾಗಗಳಿಗೆ ವ್ಯಾಯಾಮ ದೊರೆದು ದೇಹವು ಸುದೃಢಗೊಂಡು ಮನಸು ಹಾಗೂ ದೇಹದ ಸೌಂದರ್ಯ ವೃದ್ಧಿಸುತ್ತದೆ.

ನೌಕಾಸನ

Sat, 08 May 2010 10:29:08 +0530

ನೌಕಾಸನ ಅಭ್ಯಾಸಿಸುವ ವೇಳೆ ದೇಹವು ದೋಣಿಯಾಕಾರಕ್ಕೆ ಪರಿವರ್ತನೆಯಾಗುವುದರಿಂದ ಇದಕ್ಕೆ ನೌಕಾಸನ ಎಂಬ ಹೆಸರು. 'ನೌಕಾ' ಎಂದರೆ ಸಂಸ್ಕೃತದಲ್ಲಿ ದೋಣಿ ಎಂಬರ್ಥ.

ಕೆಲವೇ ಬದಲಾವಣೆಗಳನ್ನು ಹೊರತು ಪಡಿಸಿದರೆ, ನೌಕಾಸನದ ತಂತ್ರಗಳು ಊರ್ಧ್ವ ಪಾದ ಹಸ್ತಾಸನದಂತೆಯೆ.

ವಿಧಾನ
ನೆಲದ ಮೇಲೆ ಅಂಗಾತ ಮಲಗಿ. ಊರ್ಧ್ವಪಾದ ಹಸ್ತಾಸನದಲ್ಲಿ ಇರಿಸುವಂತೆ ನೌಕಾಸನದಲ್ಲಿ ನೀವು ನಿಮ್ಮ ಕೈಗಳನ್ನು ತೊಡೆಗಳ ಮೇಲಿಡುವ ಅವಶ್ಯಕತೆ ಇಲ್ಲ. ಬದಲಿಗೆ

ಹಸ್ತಗಳನ್ನು ತಲೆಯ ಮೇಲಕ್ಕೆ ಚಾಚಿ. ನಿಮ್ಮ ತೋಳುಗಳು ಕಿವಿಯನ್ನು ಸವರುತ್ತಿರಬೇಕು. ನಿಧಾನಕ್ಕೆ ಉಸಿರನ್ನು ಒಳಗೆಳೆದುಕೊಳ್ಳುತ್ತಾ, ನಿಮ್ಮ ಕಾಲುಗಳು, ಭುಜ, ಮುಂಡ, ಕತ್ತು ಮತ್ತು ಕೈಗಳನ್ನು ನೆಲದಿಂದ 60 ಡಿಗ್ರಿ ಕೋನಕ್ಕೆ ಮೇಲಕ್ಕೆತ್ತಿ. ಕೈಗಳನ್ನು ನೇರವಾಗಿಸಿ. ನಿಮ್ಮ ಕೈಗಳು ನಿಮ್ಮ ಕಾಲ್ಬೆರಳುಗಳಿಗೆ ಸಮಾನಾಂತರವಾಗಿರಬೇಕು. ಕಾಲ್ಬೆರಳ ತುದಿಗಳು ಕೈ ಬೆರಳ ತುದಿಗಳಿಗೆ ಸಮನಾಂತರವಾಗಿರಬೇಕು. ದೃಷ್ಟಿಯನ್ನು ಕಾಲ್ಬೆರಳ ಮೇಲೆ ಕೇಂದ್ರೀಕರಿಸಿ. ದೇಹವು ನಿಮ್ಮ ಪಿರ್ರೆಗಳಿಗೆ ಸಮತೋಲಿತವಾಗಿರಬೇಕು. ಉಸಿರನ್ನು ತಡೆಹಿಡಿಯಿರಿ. ಈ ಭಂಗಿಯಲ್ಲಿ ಐದು ಸೆಕುಂಡುಗಳ ಕಾಲ ಇರಿ. ಈ ಭಂಗಿಯಲ್ಲಿ ದೇಹವು ದೋಣಿಯಾಕಾರಕ್ಕೆ ಬರುವುದು. ನಿಧಾನಕ್ಕೆ ಉಸಿರನ್ನು ಹೊರಕ್ಕೆ ಬಿಡುತ್ತಾ ಮೊದಲಿನ ಸ್ಥಿತಿಗೆ ಬನ್ನಿ.

ಅನುಕೂಲಗಳು
ಕಿಬ್ಬೊಟ್ಟೆ, ಬೆನ್ನು, ಕತ್ತು ಮತ್ತು ದೇಹದ ಕೆಳಗಿನ ಅಂಗಾಂಗಗಳನ್ನು ಬಲಗೊಳಿಸುತ್ತದೆ. ನಿಮ್ಮ ಶ್ವಾಸಕೋಶ ಮತ್ತು ಎದೆಯನ್ನು ವಿಸ್ತರಿಸುತ್ತದೆ ಮತ್ತು ಸುದೃಢವಾಗಿಸುತ್ತದೆ. ಅಂತೆಯೆ, ಪೆಲ್ವಿಕ್ ಪ್ರದೇಶ, ಪಾದಗಳು, ಮೊಣಕಾಲುಗಳು, ತೊಡೆ, ಕೈ ಮತ್ತು ನಿತಂಬಗಳಿಗೆ ಉತ್ತಮ ವ್ಯಾಯಾಮ ನೀಡುತ್ತದೆ.

ವಾಯು ಬಾಧೆ ಮುಕ್ತಿಗೆ ಪವನಮುಕ್ತಾಸನ

Sat, 08 May 2010 10:27:54 +0530

ಪವನಮುಕ್ತ ಅಂದರೆ ಸಂಸ್ಕೃತದಲ್ಲಿ 'ವಾಯು ಮುಕ್ತ' ಎಂಬರ್ಥ. ದೇಹದಲ್ಲಿರುವ ಬೇಡವಾದ ವಾಯುವನ್ನು ದೇಹದಿಂದ ಹೊರಹಾಕುವ ಆಸನಕ್ಕೆ ಪವನಮುಕ್ತಾಸನ ಎಂಬ ಹೆಸರು. ಈ ಆಸನವು ಯೋಗಿಯ ಜೀರ್ಣಾಂಗಗಳಿಗೆ ವ್ಯಾಯಾಮ ನೀಡುತ್ತದೆ.

ವಿಧಾನ
ನೆಲದ ಮೇಲೆ ಅಂಗಾತ ಮಲಗಿ. ನಿಮ್ಮೆರಡೂ ಬದಿಗೆ ಉದ್ದಕ್ಕೆ ತೋಳುಗಳನ್ನು ಚಾಚಿ. ಅಂಗೈ ಕೆಳಮುಖವಾಗಿರಬೇಕು. ಕಾಲುಗಳನ್ನು ಹಿಂದಕ್ಕೆ ಮಡಿಚಿ. ಅಂಗಾಲುಗಳು

ನೆಲದ ಮೇಲೂರಿರಲಿ. ನಿಧಾನಕ್ಕೆ ದೀರ್ಘವಾಗಿ ಉಸಿರಾಡಿ. ಉಸಿರನ್ನು ಹೊರಬಿಡುತ್ತಾ ಕೆಳಗಿನ ಚಲನವಲನಗಳನ್ನು ಮುಂದುವರಿಸಿ. ಪಾದಗಳನ್ನು ಒಳಮುಖವಾಗಿ ಎಳೆಯಿರಿ. ಚಿತ್ರದಲ್ಲಿರುವಂತೆ ಕಾಲುಗಳನ್ನು ಮಡಿಚಿ.

ಮಡಚಿರುವ ಮೊಣಕಾಲುಗಳನ್ನು ಎದೆಯತ್ತ ಎಳೆಯಿರಿ. ಅಂಗೈಗಳನ್ನು ನೆಲಕ್ಕೂರಿ ಭುಜಗಳು ಮತ್ತು ತಲೆಯನ್ನು ನೆಲದಿಂದ ಮೇಲಕ್ಕೆತ್ತಿ. ಮತ್ತೊಮ್ಮೆ ಅಂಗೈಗಳನ್ನು ನೆಲಕ್ಕೆ ಒತ್ತಿ ನಿಮ್ಮ ನಿತಂಬ ಮತ್ತು ನಡುವನ್ನು ಮೇಲಕ್ಕೆತ್ತಿ. ಮೊಣಕಾಲುಗಳು ಮತ್ತು ಪಾದಗಳನ್ನು ಜೋಡಿಸಿಡಬೇಕು. ಆದರೆ ತಲೆಯನ್ನು ಬಾಗಿಸಬೇಡಿ. ನಿಮ್ಮ ಕೈಗಳಿಂದ ಮಡಿಚಿದ ಕಾಲುಗಳನ್ನು ತಬ್ಬಿ. ನಿಧಾನಕ್ಕೆ ಉಸಿರನ್ನು ಹೊರಬಿಡುತ್ತಾ ಮೊಣಕಾಲುಗಳನ್ನು ಎದೆಯ ಎತ್ತರಕ್ಕೆ ತನ್ನಿ. ತಲೆಯನ್ನು ಕೆಳತರದೆಯೇ ಮೊಣಕಾಲು ಮತ್ತು ಪಾದಗಳನ್ನು ಜತೆಯಾಗಿಸಿ. ಉಸಿರನ್ನು ತಡೆಹಿಡಿದು ಈ ಭಂಗಿಯಲ್ಲಿ ಸುಮಾರು ಐದು ಸೆಕುಂಡುಗಳ ಕಾಲ ಇರಿ.

ಸಂಪೂರ್ಣವಾಗಿ ಉಸಿರು ಹೊರಬಿಡಿ. ಮತ್ತೊಮ್ಮೆ ಉಸಿರು ಒಳಗೆಳೆಯುತ್ತಾ, ನಿಧಾನಕ್ಕೆ ನಿಮ್ಮ ತಲೆಯನ್ನು ಹಿಂದಕ್ಕೆ ತಂದು ನೆಲದ ಮೇಲಿರಿಸಿ. ಅದೇಕಾಲಕ್ಕೆ ನಿಮ್ಮ ಕೈಗಳ ಒತ್ತಡವನ್ನು ಕಾಲುಗಳಮೇಲೆ ಹಾಕಿ. ನಿಮ್ಮ ತೋಳುಗಳು ಮೊಣಕಾಲಿನ ಕೆಳ ಭಾಗದಲ್ಲಿ ಕಾಲುಗಳನ್ನು ಮಡಿಚಿದ ಸ್ಥಿತಿಯಲ್ಲಿ ಇರಬೇಕು. ಬಳಿಕ ನಿಧಾನವಾಗಿ ನಿಮ್ಮ ಕಾಲು ಮತ್ತು ಕೈಗಳನ್ನು ನೆಲದ ಮೇಲೆ ಚಾಚಿರಿ. ಆಸನದ ಬಳಿಕ ವಿಶ್ರಾಂತಿ ಪಡೆಯಿರಿ.

ಅನುಕೂಲಗಳು
ಯಾವುದೇ ವಯೋಮಾನದವರು ಈ ಆಸನದ ಅನುಕೂಲವನ್ನು ಪಡೆಯಬಹುದಾಗಿದೆ. ಇಳಿವಯಸ್ಸಿನಲ್ಲೂ ಇದರ ಅಭ್ಯಾಸ ಮುಂದುವರಿಸಬಹುದಾಗಿದೆ. ವಾಯು ಸಂಬಂಧಿ ಸಮಸ್ಯೆಗಳು ಈ ಆಸನದ ಅಭ್ಯಾಸದಿಂದ ಶಮನಗೊಳ್ಳುತ್ತವೆ. ಈ ಆಸನದ ಪ್ರಮುಖ ಉದ್ದೇಶವೇ ವಾಯು ತನ್ನಿಂತಾನೆ ಮುಕ್ತವಾಗುವುದು. ಈ ಆಸನಾಭ್ಯಾಸವು ಯೋಗಿಯ ಕಿಬ್ಬೊಟ್ಟೆ ಮತ್ತು ದೊಡ್ಡಕರುಳಿನಲ್ಲಿ ಶೇಖರವಾಗಿರುವ ಗಾಳಿಯನ್ನು ಹೊರಹಾಕುತ್ತದೆ.

ಮೈಮನಗಳ ವಿಶ್ರಾಂತಿಗೆ ಮಕರಾಸನ

Sat, 08 May 2010 10:26:45 +0530

ಸಂಸ್ಕೃತದಲ್ಲಿ ಮಕರ ಅಂದರೆ ಮೊಸಳೆ. ಈ ಮಕರಾಸನದ ಅಭ್ಯಾಸವು ಮೈ ಮನಸುಗಳನ್ನು ಸಂಪೂರ್ಣ ಶಾಂತವಾಗಿ ಮತ್ತು ಸಡಿಲವಾಗಿಸಲು ಸಹಾಯ ಮಾಡುತ್ತದೆ.

ಮಕರಾಸನದ ವಿಧಾನಗಳು
ನೆಲದ ಮೇಲೆ ಹಾಸಿದ ಚಾಪೆ ಅಥವಾ ಬಟ್ಟೆಯ ಮೇಲೆ ಕವಚಿ ಮಲಗಿ. ನಿಮ್ಮ ಕಿಬ್ಬೊಟ್ಟೆ, ಎದೆ, ಮತ್ತು ಗಲ್ಲಗಳು ನಿಮ್ಮ ವ್ಯಾಯಾಮ ಚಾಪೆಯನ್ನು ತಾಕುತ್ತಿರಬೇಕು. ಕಾಲುಗಳನ್ನು ನೆಟ್ಟಗೆ ನೀಡಿ. ಕೈಗಳು ಎರಡೂ ಬದಿಗಳಲ್ಲಿರಲಿ. ಕಾಲುಗಳು ನೆಲದ ಮೇಲೆ ಸಂಪೂರ್ಣವಾಗಿ ವಿಶ್ರಾಂತವಾಗುವಂತೆ ಆರಾಮವಾಗಿ ಅಗಲಿಸಿಡಿ. ಕಾಲಿನ

ಹಿಮ್ಮಡಿಗಳು ಪರಸ್ಪರ ಅಭಿಮುಖವಾಗಿರಲಿ. ಪಾದದ ತುದಿಯು ನೆಲವನ್ನು ತಾಕುತ್ತಿದೆ ಎಂಬುದನ್ನು ಖಚಿತ ಪಡಿಸಿಕೊಳ್ಳಿ. ಕಾಲ್ಬೆರಳುಗಳು ಹೊರಚಾಚಿರಲಿ. ಈಗ ನಿಮ್ಮ ತಲೆ ಮತ್ತು ದೇಹವನ್ನು ನೆಲದಿಂದ ಮೇಲೆತ್ತಿ. ಚಿತ್ರದಲ್ಲಿರುವಂತೆ ಬಲಗೈಯನ್ನು ನಿಮ್ಮ ಎಡಭುಜದ ಕೆಳಗಡೆ ತನ್ನಿ. ನಿಮ್ಮ ಬಲಗೈಮೂಲಕ ಎಡಭುಜವನ್ನು ಹಗುರವಾಗಿ ಮುಷ್ಟಿಯಲ್ಲಿ ಹಿಡಿಯಿರಿ.

ಎಡಗೈಯನ್ನು ಬಲಭುಜದ ಮೇಲಿರಿಸಿ. ನಿಮ್ಮ ಎಡಗೈ ಮೂಲಕ ಬಲ ಭುಜವನ್ನು ಹಗುವಾಗಿ ಹಿಡಿಯಿರಿ. ಈ ಭಂಗಿಯಲ್ಲಿ ಮಡಚಿದ ಮೊಣಕೈಗಳ ಮೂಲಕ ಒಂದರ ಮೇಲೊಂದರಂತೆ ಎರಡು ತ್ರಿಕೋನಗಳು ಉಂಟಾಗುತ್ತವೆ. ನಿಮ್ಮ ಮುಂತೋಳು ಸಹ ಮೇಲ್ತೋಳುವಿನ ಅಡ್ಡವಾಗುತ್ತದೆ. ಈ ಎರಡು ತ್ರಿಕೋನಗಳ ಮೇಲೆ ನಿಮ್ಮ ಹಣೆಯನ್ನಿರಿಸಿ. ಕಣ್ಣುಗಳನ್ನು ಹಗುರವಾಗಿ ಮುಚ್ಚಿ ವಿಶ್ರಾಂತಿ ಪಡೆಯಿರಿ.

ಕಿಬ್ಬೊಟ್ಟೆಯಿಂದ ಉಸಿರಾಡಿ, ಅಥವಾ ಉಸಿರಾಡಲು ಪ್ರಯತ್ನಿಸಿ. ನಿಮಗೆ ಅನುಕೂಲವೆನಿಸುವಷ್ಟು ಹೊತ್ತು ಇದೇ ಭಂಗಿಯಲ್ಲಿರಿ. ನಿಧಾನಕ್ಕೆ ಮೊದಲಿನ ಸ್ಥಿತಿಗೆ ಮರಳಿ.

ಅನುಕೂಲಗಳು
ಈ ಆಸನದ ಅಭ್ಯಾಸವು ಕರುಳು ಮತ್ತು ಜಠರದಲ್ಲಿ ವಾಯು ತುಂಬುವಿಕೆಯನ್ನು ತಡೆಯುತ್ತದೆ. ಸಣ್ಣಕರುಳು ಹೆಚ್ಚು ಶಕ್ತವಾಗುತ್ತದೆ. ಇದು ಪಚನ ಕ್ರಿಯೆ ಪ್ರಕ್ರಿಯೆಯನ್ನೂ ಉತ್ತಮ ಪಡಿಸುತ್ತದೆ. ಹೈ ಬ್ಲಡ್ ಪ್ರೆಶರ್ ಇಳಿಕೆಗೂ ಸಹಕಾರಿ. ಮೂತ್ರಕೋಶ ಹಾಗೂ ಇನ್ನಿತರ ಸಮಸ್ಯೆಗಳು, ಉಸಿರಾಟದ ಸಮಸ್ಯೆಗಳೂ ಸಹ ಪರಿಹಾರವಾಗುತ್ತವೆ. ಯಾವುದಾದರೂ ಶ್ರಮದ ಕೆಲಸ ಮಾಡಿದ ಬಳಿಕ ಅಥವಾ ಶ್ರಮದ ಕಠಿಣ ಆಸನ ಹಾಕಿದ ಬಳಿಕ ಈ ಆಸನದ ಅಭ್ಯಾಸ ನಡೆಸುವುದು ಅತ್ಯುತ್ತಮ.

ಭುಜಂಗಾಸನ

Sat, 08 May 2010 10:22:32 +0530

ಸಂಸ್ಕೃತದಲ್ಲಿ ಭುಜಂಗ ಅಂದರೆ ಸರ್ಪ ಎಂದರ್ಥ ಮತ್ತು ಆಸನ ಎಂದರೆ ವ್ಯಾಯಾಮ. ಇದೇ ಶಬ್ದಗಳಿಂದ ಉತ್ಪತ್ತಿಯಾದದ್ದು ಭುಜಂಗಾಸನ.

• ಇದು ತೀರಾ ಸರಳ ವ್ಯಾಯಾಮ. ಆದರೆ ತಪ್ಪುಗಳನ್ನು ಮಾಡುವುದು ಕೂಡ ಸುಲಭ. ಆದುದರಿಂದ ಗರಿಷ್ಠ ಪ್ರಯೋಜನ ಪಡೆಯಬೇಕಿದ್ದರೆ ಪೂರ್ತಿ ವಿವರಗಳಿಗೆ ಲಕ್ಷ್ಯ ಕೊಡಬೇಕಾಗುತ್ತದೆ. (ವೀಡಿಯೋ ನೋಡಿ...) ಆರಾಮವಾಗಿ ಮತ್ತು ನಿಧಾನವಾಗಿ ಈ ಆಸನ ಮಾಡಬೇಕಾಗುತ್ತದೆ. ಬೆನ್ನಿನ ಸ್ನಾಯುಗಳಿಗೆ ತೊಂದರೆಯಾಗುವಂತೆ ಮತ್ತು ಅವಸರವಸರವಾಗಿ, ದಿಢೀರ್ ಅಂಗಚಲನೆಗಳ ಮೂಲಕ ಇದನ್ನು ಮಾಡಬಾರದು.

• ಭುಜಂಗಾಸನದ ನಂತರ ಶಲಭಾಸನ ಮತ್ತು ಧನುರಾಸನ ಮಾಡಿದರೆ ಪೂರ್ಣ ಪ್ರಯೋಜನ ದೊರಕುತ್ತದೆ. ಈ ಮೂರೂ ಆಸನಗಳು ಪರಸ್ಪರ ಪೂರಕವಾಗಿರುವುದರಿಂದ ಒಂದರ ನಂತರ ಒಂದು ಮಾಡಿದಲ್ಲಿ ಉತ್ತಮ.

• ಭುಜಂಗಾಸನವನ್ನು ಎರಡು ಹಂತಗಳಲ್ಲಿ ಮಾಡಲಾಗುತ್ತದೆ. ಸಾಮಾನ್ಯ ಮತ್ತು ಕ್ರಿಯಾಶೀಲ ಹಂತಗಳು

ಪ್ರಯೋಜನಗಳು:

• ಇದು ವಿಶೇಷವಾಗಿ ಅಸಮರ್ಪಕ ಋತುಚಕ್ರದಿಂದ ಬಳಲುತ್ತಿರುವ ಮಹಿಳೆಯರಿಗೆ ಪ್ರಯೋಜನಕರ.

• ಅಂಡಾಣುಗಳು ಮತ್ತು ಗರ್ಭಕೋಶದ ಕೆಲವು ಸಮಸ್ಯೆಗಳನ್ನು ಕೂಡ ಈ ಭುಜಂಗಾಸನ ಗುಣಪಡಿಸುತ್ತದೆ.

• ಭುಜಂಗಾಸನವು ಅಂಡಕೋಶ ಮತ್ತು ಗರ್ಭಾಶಯದ ಸುತ್ತುಮುತ್ತಲಿನ ಪ್ರದೇಶದ ಕ್ರಿಯೆಯನ್ನು ಸರಿಪಡಿಸುತ್ತದೆ. ಉದರ ಭಾಗಕ್ಕೆ ಒತ್ತಡ ಬೀಳುವುದರಿಂದ ಇದು ಸಾಧ್ಯವಾಗುತ್ತದೆ.

• ಡಯಾಬಿಟೀಸ್ ಉಳ್ಳವರಿಗೆ ಕೂಡ ಇದು ಧನಾತ್ಮಕ ಪರಿಣಾಮ ಬೀರುತ್ತದೆ. ಭುಜಂಗಾಸನವು ಮೇದೋಜೀರಕಾಂಗದ ಚಟುವಟಿಕೆಯನ್ನು ಉತ್ತೇಜಿಸುತ್ತದೆ.

• ಕಡಿಮೆ ರಕ್ತದೊತ್ತಡದಿಂದ ಬಳಲುತ್ತಿರುವವರಿಗೆ ಭುಜಂಗಾಸನ ಅತ್ಯಂತ ಸೂಕ್ತವಾದುದು.

• ಅಸಮರ್ಪಕ ಮಲ ವಿಸರ್ಜನೆ ಸಮಸ್ಯೆ ಇರುವವರಿಗೆ ಕೂಡ ಇದು ಅತ್ಯಂತ ಪ್ರಯೋಜನಕರ. ಭುಜಂಗಾಸನ ಮಾಡುವಾಗ ಉದರಭಾಗಕ್ಕೆ ಉಂಟಾಗುವ ಒತ್ತಡವು ಕರುಳಿನಿಂದ ಗುದ ಭಾಗಕ್ಕೆ ಮಲವನ್ನು ತಳ್ಳಲು ಪೂರಕವಾಗುತ್ತದೆ.

• ಜಠರ/ಕರುಳಿನ ವಾಯು ಶೂಲೆಗೆ ಭುಜಂಗಾಸನ ರಾಮಬಾಣ. ಈ ಆಸನವು ಕರುಳು ಮತ್ತು ಉದರದಿಂದ ವಾಯುವನ್ನು ಹೊರಹಾಕುತ್ತದೆ.

• ಭುಜಂಗಾಸನವು ಕತ್ತು ಮತ್ತು ಬೆನ್ನಿನ ಎಲ್ಲ ರೀತಿಯ ನೋವುಗಳಿಗೂ ಶಮನಕಾರಿ.

• ಬಿಳಿ ಕಾಲರ್ ಉದ್ಯೋಗದಲ್ಲಿರುವವರಿಗಂತೂ ಇದು ಅತ್ಯುತ್ತಮ.

• ಐಟಿ ಕ್ಷೇತ್ರದಲ್ಲಿರುವವರು ಕೂಡ ಭುಜಂಗಾಸನ ಮಾಡಿದರೆ ಒಳಿತು. ಯಾಕೆಂದರೆ ಇದು ದೇಹ ಮತ್ತು ಮನಸ್ಸಿಗೆ ಪರಿಪೂರ್ಣ ವ್ಯಾಯಾಮ ನೀಡುತ್ತದೆ.

ಶಲಭಾಸನ

Sat, 08 May 2010 10:20:55 +0530

ಶಲಭಾಸನವನ್ನು ಕಮಲದ ಭಂಗಿ ಎಂದೂ ಹೇಳಲಾಗುತ್ತದೆ. ಈ ಆಸನವು ಪಶ್ಚಿಮೋತ್ತಾಸನ ಮತ್ತು ಹಲಾಸನಗಳ ವಿರುದ್ಧ ಭಂಗಿಯಾಗಿದೆ.

ವಿಧಾನ
ಅರ್ಧ ಶಲಭಾಸನವನ್ನು ಆರಂಭಿಸುವ ಮೊದಲು ನಿಮ್ಮ ಕಿಬ್ಬೊಟ್ಟೆಯ ಮೇಲೆ ಕವಚಿ ಮಲಗಿ. ನಿಮ್ಮ ಎದೆ ಮತ್ತು ಗಲ್ಲವು ನೆಲಕ್ಕೆ ತಾಕಬೇಕು. ತೋಳುಗಳು ನೆಲದ ಮೇಲಿರಲಿ. ಕೈಬೆರಳುಗಳನ್ನು ಮುಷ್ಟಿಹಿಡಿದು ಮೇಲ್ಮುಖವಾಗಿರಿಸಿ.

ನಿಧಾನಕ್ಕೆ ಆಳವಾಗಿ ಉಸಿರಾಡಿ. 10 ಸೆಕುಂಡುಗಳಲ್ಲಿ ಉಸಿರಾಟವನ್ನು ಪೂರ್ಣಗೊಳಿಸಿ.

ಸಂಪೂರ್ಣವಾಗಿ ಉಸಿರನ್ನು ಒಳಗೆಳೆದುಕೊಳ್ಳಬೇಡಿ. ತುಂಬಿದ ಶ್ವಾಸಕೋಶವು ನೀವು ಕಾಲುಗಳನ್ನು ಮೇಲೆತ್ತಲು ಪ್ರಯತ್ನಿಸುವಾಗ ಅಡ್ಡಿಯಾಗಬಹುದು.

ಉಸಿರನ್ನು ನಿಧಾನಕ್ಕೆ ಹೊರಬಿಡಲು ಆರಂಭಿಸಿ. ನಿಮ್ಮ ಆಸನವು ಸಂಪೂರ್ಣವಾದಾಗ ಉಸಿರು ಹೊರಹಾಕುವಿಕೆ ಪೂರ್ಣಗೊಳ್ಳಬೇಕು.

ಅಂಗೈಗಳನ್ನು ನೆಲಕ್ಕೆ ಊರಿ ಎರಡೂ ಕಾಲುಗಳನ್ನು ಎಷ್ಟು ಸಾಧ್ಯವೋ ಅಷ್ಟು ಮೇಲೆತ್ತಿ. ಮೊಣಕಾಲುಗಳನ್ನು ಬಗ್ಗಿಸಬಾರದು.

ವಿಡಿಯೋದಲ್ಲಿರುವಂತೆ ಈ ಆಸನವನ್ನು ಅಭ್ಯಾಸ ಮಾಡಿ.

ಉಪಯೋಗಗಳು
ಗರ್ಭಕೋಶ ಮತ್ತು ಅಂಡಾಣುಗಳ ಕಾಯಿಲೆಗಳನ್ನು ನೀಗಿಸುತ್ತದೆ.

ಮಧುಮೇಹವನ್ನು ನಿಯಂತ್ರಣದಲ್ಲಿರಿಸುತ್ತದೆ.

ಅಜೀರ್ಣವ್ಯಾಧಿ ಮತ್ತು ಮಲಬದ್ಧತೆಯನ್ನು ಸಮಸ್ಯೆಯನ್ನು ನೀಗಿಸುತ್ತದೆ.

ಶಲಭಾಸನವು ಜೀರ್ಣಾಂಗ ವ್ಯವಸ್ಥೆಯನ್ನು ಸರಿದೂಗಿಸುತ್ತದೆ.

ಫಿಸ್ತುಲಾ, ಫೈಲ್ಸ್ ರೋಗವನ್ನೂ ಗುಣಪಡಿಸುತ್ತದೆ.

ಲಿವರ್ ಕಾರ್ಯಾಚರಣೆಯನ್ನು ಚುರುಕುಗೊಳಿಸುತ್ತದೆ.

ವಾಯು ಸಮಸ್ಯೆ ಹಾಗೂ ಉದರದ ಸಮಸ್ಯೆಗಳನ್ನು ಹೋಗಲಾಡಿಸುತ್ತದೆ.

ಸ್ಲಿಪ್‌ಡಿಸ್ಕ್ ಸಮಸ್ಯೆಯನ್ನೂ ಇದು ಪರಿಹರಿಸುತ್ತದೆ.

ಗಂಟು ನೋವು, ಸೊಂಟ ನೋವು ಸಮಸ್ಯೆಯನ್ನೂ ನೀಗಿಸುತ್ತದೆ.

ವಿಪರೀತ ನೌಕಾಸನ

Sat, 08 May 2010 10:19:30 +0530

ಯೋಗಿಯೊಬ್ಬ ಉದರದ ಮೇಲೆ ಮಲಗಿ ನೌಕಾಸನ ಮಾಡುತ್ತಾನೆ. ಆ ಸಂದರ್ಭದಲ್ಲಿ ಶರೀರವು ನೌಕೆಯನ್ನು ಹೋಲುತ್ತದೆ. ಇದಕ್ಕಾಗಿ ಈ ನೌಕಾಸನಕ್ಕೆ ವಿಪರೀತ ನೌಕಾಸನವೆಂಬ ಹೆಸರು.

ಮಾಡುವ ವಿಧಾನ:

• ಉದರ ಮತ್ತು ಎದೆಯ ಮೇಲೆ ಮಲಗಿ.
• ಹಣೆಯು ನೆಲದ ಮೇಲಿರಬೇಕು.
• ಆಯಾ ಪಾರ್ಶ್ವಗಳಲ್ಲಿ ಕೈಗಳು ಮತ್ತು ಪಾದಗಳನ್ನು ಜತೆಯಾಗಿ ಇರಿಸಿ.
• ಕೈಗಳನ್ನು ನೇರವಾಗಿ ಮುಂದಕ್ಕೆ ಚಾಚಿರಿ.

• ಕೈಗಳನ್ನು ಪರಸ್ಪರ ಸಮಾನಾಂತರದಲ್ಲಿರಿಸಿ.
• ಅಂಗೈಗಳು ಕೆಳಮುಖವಾಗಿರಬೇಕು.
• ಬೆರಳುಗಳು ಪರಸ್ಪರ ಸಮೀಪದಲ್ಲಿರಬೇಕು.
• ಮುಂಗೈಗಳ ನಡುವೆ ನೆಲದ ಮೇಲೆ ಹಣೆಯನ್ನಿರಿಸಿ.
• ಉಸಿರೆಳೆದುಕೊಳ್ಳುತ್ತಾ, ಕಾಲುಗಳು, ಉದರ, ಭುಜಗಳು, ಕತ್ತು, ತಲೆ ಮತ್ತು ಕೈಗಳನ್ನು ನಿಧಾನವಾಗಿ ಮೇಲೆತ್ತಿ.
• ಮಣಿಗಂಟು ಮತ್ತು ಮೊಣಕಾಲುಗಳನ್ನು ಬಾಗಿಸಬೇಡಿ.
• ದಿಢೀರ್ ಜರ್ಕ್ ಆಗದಂತೆ ನೋಡಿಕೊಳ್ಳಿ.
• ಕೈಯ ಮೇಲ್ಭಾಗಗಳು ಕಿವಿಗಳನ್ನು ಮುಟ್ಟುವಂತಿರಬೇಕು.
• ಪಾದಕಗಳು ಪರಸ್ಪರ ಸಮೀಪದಲ್ಲಿರಬೇಕು.
• ತಲೆಯನ್ನು ಎಷ್ಟು ಸಾಧ್ಯವೋ ಅಷ್ಟು ಮೇಲಕ್ಕೆತ್ತಿ.
• ಮೇಲಕ್ಕೆತ್ತಿದ ಕೈಗಳ ನಡುವೆ ತಲೆಯನ್ನಿರಿಸಿ.
• ಎಷ್ಟು ಸಾಧ್ಯವೋ ಅಷ್ಟು ಪ್ರಮಾಣಕ್ಕೆ ಹಿಂದಕ್ಕೆ ಬಗ್ಗಬೇಕು.
• ಬೆನ್ನು ಸರಿಯಾಗಿ ಬಿಲ್ಲಿನಂತೆ ಬಾಗಿರಬೇಕು.
• ಕಾಲ್ಬೆರಳಿಂದ ಕೈಬೆರಳ ತುದಿವರೆಗೂ ಇಡೀ ಶರೀರವು ಬಾಗಿರಬೇಕು.
• ನಿಮ್ಮ ಕೈಬೆರಳತುದಿಗಳು ಮತ್ತು ಕಾಲ್ಬೆರಳುಗಳು ಒಂದೇ ಮಟ್ಟದಲ್ಲಿರಬೇಕು.
• ಶರೀರದ ತೂಕವನ್ನು ಕೆಳ ಹೊಟ್ಟೆಯ ಮೇಲೆ ಕೇಂದ್ರೀಕರಿಸಿ.
• ಹೊಟ್ಟೆಯ ಕೆಳಭಾಗ ಮಾತ್ರವೇ ನೆಲವನ್ನು ಸ್ಪರ್ಶಿಸುವಂತಿರಬೇಕು.
• ಚಲನೆಯಿಲ್ಲದೆ ಈ ಸ್ಥಿತಿಯಲ್ಲಿಯೇ ಇರಿ.
• ಉಸಿರನ್ನು ಕನಿಷ್ಠ 10 ಸೆಕೆಂಡುಗಳ ಕಾಲ ಬಿಗಿಹಿಡಿಯಿರಿ.
• ನಿಧಾನವಾಗಿ ಉಸಿರು ಹೊರಬಿಡುತ್ತಾ, ಸಾಮಾನ್ಯ ಸ್ಥಿತಿಗೆ ಮರಳಿ.
• ತಿರುಗಿಕೊಳ್ಳಿ ಮತ್ತು ಶವಾಸನ ಮಾಡಿ, ವಿಶ್ರಮಿಸಿ.

ಪ್ರಯೋಜನಗಳು
• ವಿಪರೀತ ನೌಕಾಸನವು ಹೊಟ್ಟೆ, ಬೆನ್ನು, ಭುಜಗಳು, ಕತ್ತು ಮತ್ತು ಕೆಳ ಪಾದಗಳನ್ನು ಬಲಪಡಿಸುತ್ತದೆ.
• ಬೆನ್ನುಹುರಿಯ ಸಮಸ್ಯೆಗಳು ಸುಧಾರಣೆಯಾಗುತ್ತವೆ.
• ಎದೆಯನ್ನು ವಿಸ್ತರಿಸುತ್ತದೆ ಮತ್ತು ನಿಮ್ಮ ಶ್ವಾಸಕೋಶಗಳು ಕೂಡ ಶಕ್ತಿಯುತವಾಗುತ್ತವೆ.
• ಈ ಆಸನವು ಕುಹರ ಪ್ರದೇಶ, ಪಾದಗಳು, ಮೊಣಕಾಲು, ತೊಡೆಗಳು, ಹಸ್ತಗಳು ಮತ್ತು ಗುದ ಭಾಗವನ್ನು ಏಕಕಾಲದಲ್ಲಿ ಬಲಪಡಿಸುತ್ತದೆ ಮತ್ತು ಪೂರ್ಣ ವ್ಯಾಯಾಮ ಒದಗಿಸುತ್ತದೆ.

ಅರ್ಧಧನುರಾಸನ

Sat, 08 May 2010 10:17:44 +0530

ಸಂಸ್ಕೃತದಲ್ಲಿ 'ಧನುಸ್ಸು' ಎಂದು ಬಿಲ್ಲು ಎಂಬರ್ಥ. ಧನುರಾಸನವು ನಿಮ್ಮ ದೇಹವನ್ನು ಬಿಲ್ಲಿನಂತೆ ಭಾಗಿಸುತ್ತದೆ. ನಿಮ್ಮ ನಡು ಮತ್ತು ತೊಡೆಗಳು ಬಾಗಿದ್ದರೆ, ಕಾಲಿನ ಕೆಳಭಾಗ ಮತ್ತು ಕೈಗಳು ನೆಟ್ಟಗಿನ ಬಿಲ್ಲುಹುರಿಯಂದಕ್ಕೆ ತಿರುಗುತ್ತದೆ.

ಅರ್ಧಧನುರಾಸನದ ವಿಧಾನಗಳು
ಮುಖಕೆಳಗಿರಿಸಿ ಕಿಬ್ಬೊಟ್ಟೆಯ ಮೇಲೆ ಮಲಗಿ. ನಿಮ್ಮ ಗಲ್ಲವು ನೆಲಕ್ಕೆ ತಾಕಿರಬೇಕು. ದೇಹದ ಇಕ್ಕೆಡೆಗಳಲ್ಲಿ ತೋಳುಗಳನ್ನಿರಿಸಿ. ಕಾಲುಗಳ ಮಧ್ಯೆ ಅಂತರವಿರಲಿ. ಹಿಂಬದಿಯ ಸ್ನಾಯುಗಳು ಸೇರಿದಂತೆ ಎಲ್ಲಾ ಸ್ನಾಯುಗಳು ವಿಶ್ರಾಂತಿ ಪಡೆಯಲಿ. ಸಹಜವಾಗಿ ಉಸಿರಾಡಿ

ನಿಮ್ಮ ಕಾಲುಗಳನ್ನು ಹಿಂದಕ್ಕೆ ಭಾಗಿಸಿ. ಹಿಮ್ಮಡಿಯನ್ನು ಕೈಗಳಿಂದ ಹಿಡಿದುಕೊಂಡು ತಲೆ ಮತ್ತು ಕತ್ತನ್ನು ಹಿಂದಕ್ಕೆ ಭಾಗಿಸಿ. ನಿಧಾನಕ್ಕೆ ಆಳವಾಗಿ ಉಸಿರಾಡಿ. ಸುಮಾರು 10 ಸೆಕುಂಡುಗಳ ಕಾಲ ಸಂಪೂರ್ಣವಾಗಿ ಉಸಿರನ್ನು ಒಳಗೆಳೆದುಕೊಳ್ಳಿ.

ಮೂರು ಸೆಕುಂಡುಗಳ ಬಳಿಕ ಉಸಿರು ಹೊರಬಿಡಲಾರಂಭಿಸಿ. ನೀವು ಉಸಿರು ಹೊರಬಿಡುತ್ತಿರುವಂತೆಯೇ ಕೆಳಗಿನ ಚಲನವಲನಗಳನ್ನು ಮುಂದುವರಿಸಿ. ಇವೆರಡು ಕಾರ್ಯಗಳನ್ನು 15 ಸೆಕುಂಡುಗಳಲ್ಲಿ ಪೂರೈಸಿ.

ನಿಮ್ಮ ಕಾಲುಗಳನ್ನು ಹಿಂದಕ್ಕೆ ಎಳೆಯಿರಿ. ನಿಧಾನಕ್ಕೆ ನಿಮ್ಮ ಮೊಣಕಾಲುಗಳ ಒಳಭಾಗಗಳು, ಪಾದ ಮತ್ತು ಕಾಲ್ಬೆರಳುಗಳನ್ನು ನಿಧಾನಕ್ಕೆ ಪರಸ್ಪರ ಜೋಡಿಸಿ. ಅವುಗಳು ಒಂದೇ ಮಟ್ಟದಲ್ಲಿಲ್ಲದಿದ್ದರೆ, ನೀವು ಹಿಂದಕ್ಕೆ ಗರಿಷ್ಠ ಮಟ್ಟಕ್ಕೆ ಭಾಗಲಾರಿರಿ.

ಅನುಕೂಲಗಳು
ದೇಹವನ್ನು ಅರ್ಧಕ್ಕೆ ಬಾಗಿಸುವುದರಿಂದ, ಇಡೀದೇಹವು ಶಕ್ತಿಯುತವಾಗುತ್ತದೆ. ಅಲ್ಲದೆ ಇಡೀ ದೇಹದ ಶಕ್ತಿಯನ್ನು ಹೆಚ್ಚಿಸುತ್ತದೆ. ಇದರ ಅಭ್ಯಾಸವು ಕಿಡ್ನಿ ಮತ್ತು ಅಡ್ರಿನಲ್ ಗ್ರಂಥಿಗಳನ್ನು ಉತ್ತೇಜಿಸುತ್ತದೆ.

ಎಚ್ಚರಿಕೆ
ಸ್ಲಿಪ್ಡ್ ಡಿಸ್ಕ್, ಹರ್ನಿಯಾ, ಅಲ್ಸರ್, ಹೃದ್ರೋಗ ಸಮಸ್ಯೆಗಳು ಮತ್ತು ಅತೀವ ರಕ್ತದೊತ್ತಡ ಇದ್ದರೆ ಈ ಆಸನವನ್ನು ಪ್ರಯತ್ನಿಸದಿರಿ. ಯಾವುದಾದರೂ ಕಿಬ್ಬೊಟ್ಟೆ ಶಸ್ತ್ರಕ್ರಿಯೆಗೊಳಗಾಗಿದ್ದರೆ ಸಂಪೂರ್ಣ ಗುಣಮುಖವಾಗುವ ತನಕ ಈ ಆಸನದ ಪ್ರಯತ್ನ ಬೇಡ.

ಸಮಸ್ಥಿತಿಯ ತಾಡಾಸನ

Fri, 07 May 2010 12:50:08 +0530

ಸಂಸ್ಕೃತದಲ್ಲಿ ತಾಡಾ ಎಂದರೆ ಪರ್ವತ ಎಂದರ್ಥ. ಈ ಭಂಗಿಗೆ ಸಮಸ್ಥಿತಿ ಆಸನ ಅಂತಲೂ ಕರೆಯುತ್ತಾರೆ. ಸಮ ಅಂದರೆ, ಕದಲದ ಅಥವಾ ಸಂತುಲನ ಹಾಗೂ ಸ್ಥಿತಿ ಎಂದರೆ, ದೃಢವಾಗಿ, ನೇರವಾಗಿ ನಿಲ್ಲುವುದು ಎಂದರ್ಥ. ಒಟ್ಟಾಗಿ ಸಮಸ್ಥಿತಿ ಎಂದರೆ ಕದಲದೆ ದೃಢವಾಗಿ ನಿಲ್ಲುವುದು ಎಂದರ್ಥ.

ವಿಧಾನ

• ಹಿಮ್ಮಡಿ ಮತ್ತು ಹೆಬ್ಬೆರಳು ಒಂದಕ್ಕೊಂದು ತಾಗಿರುವಂತೆ ನಿಲ್ಲಿ, ಬೆನ್ನು ನೇರವಾಗಿರಲಿ ಮತ್ತು ಅಂಗೈಯನ್ನು ಒಳಮುಖವಾಗಿರಿಸಿ ನೇರವಾಗಿ ನಿಲ್ಲಿ.

• ಮೊಣಕಾಲು, ತೊಡೆ, ಹೊಟ್ಟೆ ಮತ್ತು ಪೃಷ್ಠದ ಸ್ನಾಯುಗಳು ಬಿಗಿಯಾಗಿರುವಂತೆ ದೃಢ ಭಂಗಿಯಲ್ಲಿರಿ. ಭಾರವನ್ನು ಎರಡೂ ಪಾದಗಳಲ್ಲಿ ಸಮತೋಲನದಲ್ಲಿರಿಸಿ.

• ಮೂಗಿನ ಹೊಳ್ಳೆಗಳಿಂದ ದೀರ್ಘ ಉಸಿರನ್ನು ತೆಗೆದುಕೊಂಡು, ಬೆನ್ನು ಬಾಗುವಂತೆ ಮತ್ತು ಹೊಟ್ಟೆಯು ಮುಂದಕ್ಕೆ ಬಾಗುವಂತೆ ಕಾಲುಗಳ ಮೂಲಕ ಪೃಷ್ಠವನ್ನು ಮೇಲಕ್ಕೆತ್ತಿ ಮತ್ತು ತಲೆಯನ್ನು ಸಾಧ್ಯವಾದಷ್ಟು ಹಿಂದಕ್ಕೆ ಭಾಗಿಸಿ.

ಪ್ರಯೋಜನಗಳು

• ನಮ್ಮ ದಿನನಿತ್ಯದ ಚಟುವಟಿಕೆಗಳಲ್ಲಿ ನಿರ್ಲ್ಯಕ್ಷಕ್ಕೆ ಒಳಪಡುವ ಸಮಸ್ಯೆಗಳನ್ನು ತಾಡಾಸನದಿಂದ ಸುಲಭವಾಗಿ ಗುರುತಿಸಬಹುದಾಗಿದೆ.

• ಉಸಿರು, ಮನಸ್ಸು ಮತ್ತು ದೇಹವನ್ನು ನಿಶ್ಚಲ ಭಂಗಿಯಲ್ಲಿರಿಸುವ ಈ ಆಸನದಿಂದ ಬೆನ್ನು ಹುರಿಗೆ ಸಂಬಂಧಿಸಿದ ಸಮಸ್ಯೆಗಳು ವ್ಯಕ್ತವಾಗುತ್ತದೆ ಮತ್ತು ಬಾಗಿದ ಭುಜ, ಕತ್ತು ಕೆಳ ಮತ್ತು ಮೇಲಿನ ಬೆನ್ನಿನ ಬಿಗಿತ ಮುಂತಾದ ಹಲವಾರು ದೈಹಿಕ ಸಮಸ್ಯೆಗಳ ಇರುವಿಕೆಯನ್ನು ಸೂಚಿಸುತ್ತದೆ. ಮತ್ತು ಇದು ಇನ್ನಷ್ಟು ಯೋಗಾಭ್ಯಾಸದ ಆವಶ್ಯಕತೆಯನ್ನು ಸೂಚಿಸುತ್ತದೆ.

• ಇತರ ಭಂಗಿಗಳೊಂದಿಗೆ ಏಕಾಗ್ರತೆಯಿಂದ ಪ್ರತಿದಿನ ಮಾಡುವ ತಾಡಾಸನವು ಅಸಮ ಭಂಗಿಯಿಂದ ಉಂಟಾಗುವ ದುಷ್ಪರಿಣಾಮಗಳನ್ನು ಹೋಗಲಾಡಿಸಲು ಸಹಕಾರಿಯಾಗುತ್ತದೆ.

• ತಾಡಾಸನವನ್ನು ಸರಿಯಾಗಿ ಮತ್ತು ಏಕಾಗ್ರತೆಯಿಂದ ಮಾಡಿದಲ್ಲಿ, ದೇಹವು ಭೂಮಿಯಲ್ಲಿ ದೃಢವಾಗಿ ನಿಂತಿರುವ ಅನುಭವವಾಗುತ್ತದೆ.

ಅರ್ಧಚಂದ್ರಾಸನ

Fri, 07 May 2010 12:47:30 +0530

ಈ ಆಸನವು ಅರ್ಧ ಚಂದ್ರದ ಆಕೃತಿಯಲ್ಲಿರುವುದರಿಂದ ಇದಕ್ಕೆ ಅರ್ಧಚಂದ್ರಾಸನ ಎಂದು ಕರೆಯಲಾಗುತ್ತದೆ.

ವಿಧಾನ:

• ಮೊದಲಿಗೆ ತಾಡಾಸನದ ಭಂಗಿಯಲ್ಲಿ ನಿಲ್ಲಿರಿ. (ಹಿಮ್ಮಡಿ ಮತ್ತು ಹೆಬ್ಬೆರಳು ಒಂದಕ್ಕೊಂದು ತಾಗಿರುವಂತೆ ನಿಲ್ಲಿ, ಬೆನ್ನು ನೇರವಾಗಿರಲಿ ಮತ್ತು ಅಂಗೈಯನ್ನು ಒಳಮುಖವಾಗಿರಿಸಿ ನೇರವಾಗಿ ನಿಲ್ಲಿ.)

• ಎರಡೂ ಕಾಲುಗಳನ್ನು ಪರಸ್ಪರ ದೂರ ಮಾಡಿ ವಿಶ್ರಾಮ ರೀತಿಯಲ್ಲಿ ನಿಲ್ಲಿ.

• ನಿಧಾನವಾಗಿ ಉಸಿರೆಳೆದುಕೊಳ್ಳುತ್ತಾ, ಎಡಗೈಯನ್ನು ನೇರವಾಗಿ ಮೇಲಕ್ಕೆ ಎತ್ತಿ. ಇಡೀ ಶರೀರವನ್ನು ನೇರವಾಗಿ ಬಲ ಪಾರ್ಶ್ವಕ್ಕೆ ಬಾಗಿಸಿ. ಬಲಗೈಯನ್ನು ಭೂಮಿಗೆ ಲಂಬವಾಗಿ ಕೆಳಮುಖವಾಗಿ ಮಣಿಗಂಟಿನ ಕೆಳಗೆ ಎಷ್ಟು ಸಾಧ್ಯವೋ ಅಷ್ಟು ಜಾರಿಸಿ. ಎಡಗೈ ಎಡಕಿವಿಯ ಮೇಲಿಂದ ಬಂದು ಭೂಮಿಗೆ ಸಮಾನಾಂತರವಾಗಿರಲಿ.

ದೇಹದ ಭಾರವು ಬಹುತೇಕ ಬಲಕಾಲಿನ ಮೇಲಿರುತ್ತದೆ. ಈ ಭಂಗಿಯು ಅರ್ಧ ಚಂದ್ರಾಕಾರವನ್ನು ಹೋಲುತ್ತದೆ.

• ನಿಧಾನವಾಗಿ ಎಡಗೈಯನ್ನು ಮರಳಿ ನೇರಸ್ಥಿತಿಗೆ ತರುತ್ತಾ, ದೇಹವನ್ನು ನೇರವಾಗಿಸುತ್ತಾ ನಿಧಾನವಾಗಿ ಸಮಸ್ಥಿತಿಗೆ ಬನ್ನಿ.

• ಇದೇ ವಿಧಾನವನ್ನು ಎಡಪಾರ್ಶ್ವಕ್ಕೆ ಬಾಗಿಸುವ ಮೂಲಕ ಮಾಡಿ. ಇಲ್ಲಿ ಎಡಗೈ ಭೂಮಿಗೆ ಲಂಬವಾಗಿರುತ್ತದೆ ಮತ್ತು ಬಲಗೈ ಭೂಮಿಗೆ ಸಮಾನಾಂತರವಾಗಿ ಬಲಕಿವಿಯ ಮೇಲಿರುತ್ತದೆ.

ಉಪಯೋಗ:

ಅರ್ಧಚಂದ್ರಾಸನವು ಪಕ್ಕೆಲುಬುಗಳ ಕೆಳಗಿನ ಸ್ನಾಯುಗಳಿಗೆ ಉತ್ತಮ ವ್ಯಾಯಾಮ ಒದಗಿಸುತ್ತದೆ. ಈ ಆಸನ ಮಾಡುವುದರಿಂದ ತೊಡೆಯ ಸ್ನಾಯುಗಳೂ ಬಲಗೊಳ್ಳುತ್ತವೆ.

ಪಾದಹಸ್ತಾಸನ

Fri, 07 May 2010 12:45:48 +0530

ಈ ಆಸನದಲ್ಲಿ ಕಾಲಬೆರಳು ಮತ್ತು ಕಾಲುಗಂಟುಗಳನ್ನು ಸ್ಪರ್ಷಿಸಲಾಗುತ್ತದೆ. ಈ ಆಸನದಲ್ಲಿ ಕೈಯನ್ನು ಕಾಲುಗಳ ಸಮೀಪಕ್ಕೆ ತರುವುದರಿಂದ ಇದಕ್ಕೆ ಪಾದಹಸ್ತಾಸನ ಎಂದು ಕರೆಯಲಾಗುತ್ತದೆ.

ವಿಧಾನ:

ಪ್ರಾರಂಭದಲ್ಲಿ, ಕಾಲನ್ನು ಹತ್ತಿರವಾಗಿಸಿ ನೇರವಾಗಿ ನಿಂತುಕೊಳ್ಳಿ. ಉಸಿರನ್ನು ಒಳತೆಗೆದುಕೊಂಡು, ಎರಡೂ ಕೈಗಳನ್ನು ಮೇಲಕ್ಕೆತ್ತಿ, ಕೈಗಳು ನೇರವಾಗಿದ್ದು, ಕಿವಿಗೆ ತಾಗುವಂತಿರಲಿ.

ಉಸಿರನ್ನು ಹೊರತೆಗೆದು, ಸೊಂಟದಿಂದ ಕೆಳಗೆ ಬಾಗಿ, ನಿಮ್ಮ ಕೈಗಳಿಂದ ಕಾಲನ್ನು ಮುಟ್ಟಿರಿ. ಈ ಭಂಗಿಯಲ್ಲಿ ಕಾಲನ್ನು ನೇರವಾಗಿರಿಸಿ. ತಲೆಯನ್ನು ಮೊಣಗಂಟಿಗೆ ಸಮೀಪದವರೆಗೆ ಬಾಗಿಸಿ.

ಇದೇ ಭಂಗಿಯಲ್ಲಿ ಸುಮಾರು 30-40 ಸೆಕೆಂಡುಗಳ ಕಾಲ ನಿಲ್ಲಿ. ಈ ಭಂಗಿ ಸೂರ್ಯ ನಮಸ್ಕಾರದ ಮೂರನೇ ಹಂತವೂ ಆಗಿದೆ.

ಈ ಭಂಗಿಯಿಂದ ಮರಳಲು, ಉಸಿರನ್ನು ಒಳತೆಗೆದುಕೊಂಡು ಕೈಗಳನ್ನು ಸಡಿಲಗೊಳಿಸಿ, ದೇಹವನ್ನು ಮೇಲಕ್ಕೆತ್ತಿ.

ಸೂಚನೆ:
ಬೆನ್ನುಹುರಿ ಸಮಸ್ಯೆ ಮತ್ತು ಉದರ ಸಂಬಂಧಿ ತೊಂದರೆಗಳನ್ನು ಹೊಂದಿದವರು ಈ ಆಸನವನ್ನು ಮಾಡುವುದು ಸೂಕ್ತವಲ್ಲ.

ಪ್ರಯೋಜನಗಳು:

ಮಲಬದ್ಧತೆ ಮುಂತಾದ ಸಮಸ್ಯೆಗಳನ್ನು ಇದು ನಿವಾರಿಸುತ್ತದೆ.

ನರವ್ಯೂಹವನ್ನು ಬಲಗೊಳಿಸುತ್ತದೆ.

ಉದರದ ಸ್ನಾಯುಗಳು ಮತ್ತು ತೊಡೆಯ ಸ್ನಾಯುಗಳನ್ನು ಶಕ್ತಿಯುತಗೊಳಿಸುತ್ತದೆ.

ಒಳಾಂಗಗಳನ್ನು ವಿಶೇಷವಾಗಿ ಜೀರ್ಣಕ್ರಿಯೆ ಸಂಬಂಧಿ ಅಂಗಗಳನ್ನು ಬಲಪಡಿಸುತ್ತದೆ.

ಸಯಾಟಿಕಾದಂತಹ ಸಮಸ್ಯೆಗಳ ನಿವಾರಣೆಗೆ ಇದು ಪ್ರಯೋಜನಕಾರಿ

ಕಟಿ ಚಕ್ರಾಸನ

Fri, 07 May 2010 12:44:17 +0530

ಕಟಿ ಎಂದರೆ ಸೊಂಟ. ಆದ್ದರಿಂದ ಕಟಿ ಚಕ್ರಾಸನ ಎಂದರೆ ಸೊಂಟವನ್ನು ಚಕ್ರಾಕೃತಿಯಲ್ಲಿ ತಿರುಗಿಸುವುದು ಎಂದರ್ಥ.

ವಿಧಾನ :

ನೇರವಾಗಿ ನಿಲ್ಲಿ, ಕೈಗಳು ನೇರವಾಗಿರಲಿ. ಜೊತೆಗೆ ಬೆನ್ನು ಮತ್ತು ಕುತ್ತಿಗೆ ಹಾಗೂ ದೃಷ್ಟಿಯೂ ನೇರವಾಗಿರಲಿ.

ಈಗ ಅರ್ಧ ಮೀಟರ್ ಅಂತರದಲ್ಲಿ ಪಾದಗಳನ್ನು ಇರಿಸಿ, ಮುಂಗೈ ನೆಲಮುಖವಾಗಿ ಕೈಗಳನ್ನು ದೇಹದಿಂದ ದೂರಕ್ಕೆ ಚಾಚಿರಿ.ಎಡಕೈಯನ್ನು ಬಲಭುಜಕ್ಕೆ ತಂದು, ಬಲಭಾಗದ ಚಿತ್ರದಲ್ಲಿರುವಂತೆ ಬಲಕೈಯನ್ನು ಹಿಂದಕ್ಕೆ ತಿರುಗಿಸಿ. ನಂತರ, ಬಲಕೈಯನ್ನು ಸೊಂಟದ ಎಡಭಾಗಕ್ಕೆ ತಂದು, ಬಲ ಭುಜದ ಮೇಲ್ಬಾಗದಿಂದ ಎಷ್ಟು ದೂರ ಸಾಧ್ಯವೋ ಅಷ್ಟು ದೂರ ದೃಷ್ಟಿ ಹಾಯಿಸಿ.

ಇದೇ ಭಂಗಿಯಲ್ಲಿ ಕೆಲವು ಸೆಕೆಂಡು ಇದ್ದು ನಂತರ ಪ್ರಾರಂಭದ ಭಂಗಿಗೆ ಮರಳಿ.ಈ ಆಸನದ ಒಂದು ಸುತ್ತನ್ನು ಪೂರ್ಣಗೊಳಿಸಲು ಇನ್ನೊಂದು ಭಾಗಕ್ಕೂ ಇದೇ ವಿಧಾನವನ್ನು ಅನುಸರಿಸಿ.

ಎಚ್ಚರಿಕೆ :

ಕತ್ತು ಮತ್ತು ಸೊಂಟ ನೋವು ಉಳ್ಳವರು ಈ ಆಸನವನ್ನು ಮಾಡುವುದು ಸೂಕ್ತವಲ್ಲ.

ಪ್ರಯೋಜನ :

ಈ ಆಸನವು ಸೊಂಟ, ಪೃಷ್ಠ, ತೊಡೆಗಳ ಕೊಬ್ಬನ್ನು ನಿವಾರಿಸಿ, ಈ ಭಾಗಗಳನ್ನು ಶಕ್ತಿಯುತವಾಗಿಸುತ್ತದೆ. ಅಲ್ಲದೆ, ದೈಹಿಕ ಆಯಾಸ ಮತ್ತು ಮಾನಸಿಕ ಒತ್ತಡವನ್ನು ನಿರ್ಮೂಲನ ಮಾಡುತ್ತದೆ.