ಅಕ್ಕ ತಂಗಿಗೆ ಹಿನ್ನೆಲೆ ಸಂಗೀತ

ಶೃತಿ ಮತ್ತು ರಶ್ಮಿ ಅಭಿನಯದ ಅಕ್ಕ ತಂಗಿ ಚಿತ್ರಕ್ಕೆ ಪ್ರಸಾದ್ ಸ್ಟುಡಿಯೋದಲ್ಲಿ ಇತ್ತೀಚೆಗಷ್ಟೇ ಹಿನ್ನೆಲೆ ಸಂಗೀತ ಲೇಪನದ ಕಾರ್ಯ ಮುಕ್ತಾಯಗೊಂಡಿದೆ. ರಮೇಶ್ ಯಾದವ್ ನಿರ್ಮಾಣದ ಈ ಚಿತ್ರವನ್ನು ಶೃತಿಯವರ ಪತಿ ಮಹೇಂದರ್ ನಿರ್ದೇಶಿಸಿದ್ದಾರೆ. ಈ ಚಿತ್ರ ಚುನಾವಣೆಗೆ ಮುಂಚಿತವಾಗಿಯೇ ಬಿಡುಗಡೆಯಾಗುವುದೋ ಅಥವಾ ವಿಳಂಬವಾಗುವುದೋ ಎಂಬುದನ್ನು ಕಾದುನೋಡಬೇಕಿದೆ. ಏಕೆಂದರೆ ಮಹೇಂದರ್ ಈಗಾಗಲೇ ಬಿಜೆಪಿ ಸೇರಿದ್ದು ಚಾಮರಾಜನಗರ ಅಥವಾ ಮೈಸೂರು ಜಿಲ್ಲೆಯ ವಿಧಾನಸಭಾ ಕ್ಷೇತ್ರವೊಂದರಿಂದ ಸ್ಪರ್ಧಿಸಲಿದ್ದಾರೆ. ಸಹೋದರಿಯರ ನಡುವಿನ ಭಾವನಾತ್ಮಕ ಸಂಬಂಧಗಳ ಸನ್ನಿವೇಶವನ್ನೊಳಗೊಂಡಿರುವ ಈ ಚಿತ್ರದ ಕಥೆ ಶೃತಿಯವರದೇ ಅಭಿನಯವಿರುವ ಕರ್ಪೂರದ ಗೊಂಬೆ ಚಿತ್ರದ ಕಥೆಯಂತಿರಬಹುದೇ ಎಂಬ ನೀರೀಕ್ಷೆ ಕೆಲವರದು. ಏಕೆಂದರೆ ಆ ಚಿತ್ರದಲ್ಲೂ ಅಕ್ಕ ತಂಗಿಯರ ಪ್ರೀತಿ-ತ್ಯಾಗದ ಕಥೆಯ ಟ್ರಾಕ್ ಬರುತ್ತದೆ. ಚಿತ್ರದ ಇತರ ತಾರಾಗಣದಲ್ಲಿ ಮೋಹನ್, ಶರಣ್, ಬಿರಾದಾರ್, ಕಿಶೋರ್, ಎಂ.ಎನ್.ಲಕ್ಷ್ಮೀದೇವಿ, ಕಿಶೋರಿ ಬಲ್ಲಾಳ್ ಮೊದಲಾದವರಿದ್ದಾರೆ. ವಿ.ಮನೋಹರ್ ಅವರ ಸಂಗೀತವಿದೆ.