ನಮ್ಮೆಜಮಾನ್ರಿಗೆ ಇನ್ನಷ್ಟು ಸೇರ್ಪಡೆ

ನಮ್ಮೆಜಮಾನ್ರು ಜೊತೆ ಮತ್ತಷ್ಟು ಜನ ಸೇರಿಕೊಂಡಿದ್ದಾರೆ. ಈ ಹಿಂದೆ ನಮ್ಮೆಜಮಾನ್ರು ಚಿತ್ರತಂಡದಲ್ಲಿ ವಿಷ್ಣುವರ್ಧನ್, ವಿಜಯ್ ರಾಘವೇಂದ್ರ ಹಾಗೂ ಅನಂತ್ನಾಗ್ ಹೆಸರುಗಳಷ್ಟೇ ಕೇಳಿಬಂದಿದ್ದವು. ಆದರೆ ಈಗ ಮತ್ತಷ್ಟು ಜನರ ಹೆಸರುಗಳು ಕೇಳಿ ಬರುತ್ತಿದೆ. ರಮೇಶ್ ಅರವಿಂದ್ ಹೆಸರೂ ಕೂಡಾ ಈ ಚಿತ್ರದಲ್ಲಿ ಕೇಳಿಬರುತ್ತಿದೆ. ಗಜ ಚಿತ್ರದ ಮೂಲಕ ಕನ್ನಡಿಗರ ಮನಕ್ಕೆ ಲಗ್ಗೆ ಇಟ್ಟ ಲಲನೆ ನವ್ಯಾ ನಾಯರ್ ಕೂಡಾ ಈ ಚಿತ್ರಕ್ಕೆ ಆಯ್ಕೆಯಾಗಿದ್ದಾರೆ. ಗಜ ಚಿತ್ರದ ನಂತರ ಈಕೆಗಿದು ಎರಡನೆ ಚಿತ್ರ. ನಿರ್ದೇಶಕ ಟಿ.ಎಸ್.ನಾಗಾಭರಣ ಅವರು ಚಿತ್ರವನ್ನು ಮತ್ತಷ್ಟು ವಿಶಿಷ್ಟವಾಗಿ ನಿರ್ದೇಶಿಸಲು ತೀರ್ಮಾನಿಸಿದ್ದಂತಿದೆ. ಅದಕ್ಕಾಗಿ ಚಿತ್ರರಂಗದಲ್ಲಿ ಖ್ಯಾತಿ ಗಳಿಸಿದ ಘಟಾನುಘಟಿಗಳನ್ನು ತಮ್ಮ ಚಿತ್ರಕ್ಕೆ ಆಯ್ಕೆ ಮಾಡಿದ್ದಾರೆ. ಈ ಹಿಂದೆ ಪಾರ್ಥ, ಶಂಭು ಚಿತ್ರಗಳನ್ನು ನಿರ್ಮಿಸಿದ್ದ ರಾಜಶೇಖರ್ ಈ ಚಿತ್ರಕ್ಕೆ ಹಣ ಹಾಕಿದ್ದಾರೆ. ಚಿತ್ರಕತೆ, ಸಂಭಾಷಣೆಯನ್ನು ಕೂಡಾ ನಾಗಾಭರಣ ಮಾಡುತ್ತಿದ್ದಾರೆ. ಹಂಸಲೇಖಾ ಚಿತ್ರಕ್ಕೆ ಸಂಗೀತ ನೀಡಲಿದ್ದಾರೆ.