ರೈಲಿನಲ್ಲಿ ಮುಸ್ಸಂಜೆ ಮಾತು ಬೆಂಗಳೂರು, ಗುರುವಾರ, 8 ಮೇ 2008( 15:22 IST )

ಕಿಚ್ಚ ಸುದೀಪ್ ಹಾಗೂ ರಮ್ಯಾ ಮತ್ತೊಮ್ಮೆ ಜೊತೆಯಾಗಿ ನಟಿಸಿರುವ ಮುಸ್ಸಂಜೆ ಮಾತು ಚಿತ್ರ ಬಿಡುಗಡೆಗೆ ಸಿದ್ಧವಾಗಿದೆ. ಚಿತ್ರವನ್ನು ಮಹೇಶ್ ನಿರ್ದೇಶಿಸುತ್ತಿದ್ದಾರೆ. ಇತ್ತೀಚೆಗೆ ಈ ಚಿತ್ರಕ್ಕೆ ಹಾಡಿನ ದೃಶ್ಯವೊಂದನ್ನು ರೈಲಿನಲ್ಲಿ ಚಿತ್ರೀಕರಿಸಲಾಯಿತು. ಆ ಒಂದು ಹಾಡಿಗೆ ಖರ್ಚಾದ ದುಡ್ಡೆಷ್ಟು ಗೊತ್ತೆ? ಬರೀ 25 ಲಕ್ಷ. ಮೈಸೂರು-ಕೆ.ಆರ್.ನಗರಕ್ಕೆ ಓಡುವ ರೈಲಿನಲ್ಲಿ ಸಂಗೀತ ನಿರ್ದೇಶಕ ಶ್ರೀಧರ್ ಬರೆದಿರುವ ಏನಾಗಲಿ ಮುಂದೆ ಸಾಗಲಿ ಬಯಸಿದ್ದು ಸಿಗಲಿ ಬಾಳಲಿ ಹಾಡನ್ನು ರೈಲಿನಲ್ಲಿ ಚಿತ್ರೀಕರಿಸಲಾಯಿತ್ತಂತೆ. ನಿಜಕ್ಕೂ ಇದೊಂದು ಚಾಲೆಂಜಿಂಗ್ ಕೆಲಸ ಅನ್ನುತ್ತಾರೆ ನಿರ್ದೇಶಕ ಮಹೇಶ್. ರಂಗ ಎಸ್ಎಸ್ಎಲ್‌ಸಿ ನಂತರ ಈ ಚಿತ್ರದ ಮೂಲಕ ರಮ್ಯಾ-ಸುದೀಪ್ ಜೋಡಿ ಮತ್ತೆ ಜೊತೆಯಾಗಿ ನಟಿಸುತ್ತಿದ್ದಾರೆ. ಈ ಚಿತ್ರವನ್ನು ಸ್ವತ: ಸುದೀಪ್ ಇಷ್ಟಪಟ್ಟು ಒಪ್ಪಿಕೊಂಡ ನಂತರ ರಮ್ಯಾಗೆ ಫೋನ್ ಮಾಡಿ ಚಿತ್ರವನ್ನು ಒಪ್ಪಿಕೊಳ್ಳಿ ಎಂದು ಹೇಳಿದರಂತೆ. ಸುದೀಪ್ ಸಾಧಾರಣವಾಗಿ ಯಾರಿಗೂ ಚಿತ್ರವನ್ನು ಒಪ್ಪಿಕೋ ಎಂದು ಹೇಳುವುದಿಲ್ಲ. ಆದರೆ ಈ ಚಿತ್ರವನ್ನು ಅವರಾಗಿ ಇಷ್ಟಪಟ್ಟು ಹೇಳಿದ್ದರಿಂದ ಒಪ್ಪಿಕೊಂಡೆ ಎಂದರು ರಮ್ಯಾ. ಭಾವನಾತ್ಮಕ ದೃಶ್ಯಗಳಲ್ಲಿ ಅಭಿನಯಿಸುವುದರಲ್ಲಿ ಸುದೀಪ್ ನಿಸ್ಸಿಮ ಎಂದು ಅವರ ಗುಣಗಾನ ಮಾಡಿದರು ರಮ್ಯಾ. ಈ ಚಿತ್ರದ ಪಾತ್ರವನ್ನು ಇಷ್ಟಪಟ್ಟು ಸ್ವತ: ರಮ್ಯಾನೇ ಇದಕ್ಕೆ ಡಬ್ಬಿಂಗ್ ಮಾಡಿದ್ದಾರೆ. ಚಿತ್ರದ ಮುಖ್ಯ ಪಾತ್ರದಲ್ಲಿ ಅನುಫ್ರಭಾಕರ್ ನಟಿಸಿದ್ದಾರೆ.