1857ರ ಮೊದಲ ಸ್ವಾತಂತ್ರ್ಯ ಸಂಗ್ರಾಮದ 150ನೇ ವರ್ಷಾಚರಣೆ ಸಂದರ್ಭದಲ್ಲಿ ದೇಶವು 58ನೇ ಗಣರಾಜ್ಯೋತ್ಸವದ ಸಡಗರದಲ್ಲಿದೆ. ಹಿಂದಿನದನ್ನು ನೆನಪಿಸಿಕೊಳ್ಳುತ್ತಾ, ಹಿರಿಯರನ್ನು ಸ್ಮರಿಸುತ್ತಾ, ಭವಿತವ್ಯದ ಬಗ್ಗೆ ಯೋಜನೆ ರೂಪಿಸುವ, ಘೋಷಿಸುವ ಕಾರ್ಯಕ್ರಮ ಸ್ವಾತಂತ್ರ್ಯ ದಿನಾಚರಣೆ ಆದರೆ, ಪ್ರಜಾಪ್ರಭುತ್ವ ದಿನಾಚರಣೆಯಲ್ಲಿ ಭಾಷಣದ ಅಬ್ಬರವಿಲ್ಲ. ಭವಿಷ್ಯದ ಯೋಜನೆಗಳನ್ನು, ಕನಸುಗಳನ್ನು ನನಸಾಗಿಸುವ, ದೃಶ್ಯರೂಪಕ್ಕಿಳಿಸುವ ಕಾಯಕಕ್ಕೆ ಸೀಮಿತವಾದ ಈ ಸಡಗರದಲ್ಲಿ ಮಾತಿಗಿಲ್ಲ ಮಣೆ, ಕಾಯಕಕ್ಕಷ್ಟೇ ಮನ್ನಣೆ. 1950ರ ಜನವರಿ 26ಕ್ಕೆ ದೇಶದಲ್ಲಿ ವಿಶಿಷ್ಟ ಸ್ಥಾನ. ಯಾಕೆಂದರೆ ಬ್ರಿಟಿಷರ ದಾಸ್ಯದ ಕೊಂಡಿ ಕಳಚಿದ ಬಳಿಕ ನಮ್ಮವರೇ ರೂಪಿಸಿದ ಸಂವಿಧಾನವನ್ನು ಅಧಿಕೃತವಾಗಿ ಜಾರಿಗೊಳಿಸಿದ, 'ನಮ್ಮದು ಸಾರ್ವಭೌಮ ರಾಷ್ಟ್ರ' ಎಂದು...