ಭಾರತದ ಕೊಳೆಗೇರಿ ಹುಡುಗನೊಬ್ಬ ಮಿಲಿಯಾಧಿಪತಿಯಾದ ಕಥೆಯುಳ್ಳ ಆಸ್ಕರ್ ಅತ್ಯುತ್ತಮ ಚಿತ್ರ ಪ್ರಶಸ್ತಿ ವಿಜೇತ 'ಸ್ಲಂ ಡಾಗ್ ಮಿಲಿಯನೇರ್' 8 ಆಸ್ಕರ್ ಪ್ರಶಸ್ತಿಗಳನ್ನು ಬಾಚಿಕೊಂಡಿದ್ದು, ಈ ಚಿತ್ರದ ಕುರಿತು ಪ್ರಮುಖ ಐದು ಅಂಶಗಳು ಇಲ್ಲಿವೆ:
* ಫಾಕ್ಸ್ ಸರ್ಚ್ಲೈಟ್ ನಿರ್ಮಾಣ ಸಂಸ್ಥೆಯಿಂದ ನವೆಂಬರ್ ತಿಂಗಳಲ್ಲಿ ಬಿಡುಗಡೆಯಾಗಿದ್ದ ಈ ಚಿತ್ರವು, ಇದುವರೆಗೆ ಉತ್ತರ ಅಮೆರಿಕದ ಬಾಕ್ಸಾಫೀಸಿನಲ್ಲಿ 98 ದಶಲಕ್ಷ ಡಾಲರ್ ಸಂಗ್ರಹಿಸಿದೆ ಎನ್ನುತ್ತವೆ ಸ್ಟುಡಿಯೋ ಮೂಲಗಳು. ವಿಶ್ವಾದ್ಯಂತ ಅದು 150 ದಶಲಕ್ಷ ಡಾಲರ್ ಕಬಳಿಸಿಕೊಂಡಿದೆಯಂತೆ.
* ಈ ಚಿತ್ರವು 10 ಆಸ್ಕರ್ ಪುರಸ್ಕಾರಗಳಿಗೆ ನಾಮನಿರ್ದೇಶನಗೊಂಡಿತ್ತು. ಭಾನುವಾರ ಅದು 8 ಪ್ರಶಸ್ತಿಗಳನ್ನು ಬಾಚಿಕೊಳ್ಳುವ ಮೊದಲು, ಅದು ಗೋಲ್ಡನ್ ಗ್ಲೋಬ್, ಸ್ಕ್ರೀನ್ ಆಕ್ಟರ್ಸ್ ಗಿಲ್ಡ್ ಮತ್ತು ಬ್ರಿಟಿಷ್ ಬಾಫ್ಟಾ ಪ್ರಶಸ್ತಿಗಳನ್ನೂ ಬಾಚಿಕೊಂಡಿತ್ತು.
* ಈ ಚಿತ್ರವು ದಕ್ಷಿಣ ಆಫ್ರಿಕಾಕ್ಕೆ ಭಾರತದ ಉಪ ರಾಯಭಾರಿಯಾಗಿರುವ ವಿಕಾಸ್ ಸ್ವರೂಪ್ ಅವರು ಬರೆದಿದ್ದ "ಕ್ಯೂ&ಎ" ಕಾದಂಬರಿ ಆಧರಿತವಾಗಿದೆ. ಲಂಡನ್ನಲ್ಲಿ ರಾಜತಾಂತ್ರಿಕ ಕಾರ್ಯ ಮಾಡುತ್ತಿದ್ದ ಅವಧಿಯಲ್ಲಿ ಸ್ವರೂಪ್ ಅವರು ಈ ಕಾದಂಬರಿ ಬರೆದಿದ್ದರು.
* ಈ ಚಿತ್ರದಲ್ಲಿ ಕೊಳಚೆ ನಿವಾಸಿಗಳ ಪಾತ್ರವನ್ನು ಅದ್ಭುತವಾಗಿ ಬಿಂಬಿಸಿದ್ದ ಬಾಲ ನಟರನ್ನು ಸರಿಯಾಗಿ ನೋಡಿಕೊಂಡಿಲ್ಲ ಎಂಬ ಕಾರಣಕ್ಕೆ ಮಾಧ್ಯಮಗಳಿಂದ ಈ ಚಿತ್ರ ನಿರ್ಮಾಪಕರು ತೀವ್ರ ಟೀಕೆಗೆ ಗುರಿಯಾಗಿದ್ದರು. ಇದಕ್ಕೆ ಪ್ರತಿಯಾಗಿ, ಚಿತ್ರ ವಿತರಕರಾದ ಫಾಕ್ಸ್ ಸರ್ಚ್ಲೈಟ್, ಎಲ್ಲ ಬಾಲ ನಟರನ್ನು ಭಾನುವಾರದ ಹಾಲಿವುಡ್ನಲ್ಲಿ ಆಸ್ಕರ್ ಪ್ರಶಸ್ತಿ ಪ್ರದಾನ ಸಮಾರಂಭಕ್ಕೆ ಕರೆದೊಯ್ದಿತ್ತು.
* ಚಿತ್ರವು 2007ರಲ್ಲಿ ನಿರ್ಮಾಣಗೊಂಡಿದ್ದರೂ, ಹಣಕಾಸು ಪೂರೈಕೆದಾರ ವಾರ್ನರ್ ಇಂಡಿಪೆಂಡೆಂಟ್ ಪಿಕ್ಚರ್ಸ್ ಈ ಚಿತ್ರದ ಕೈಬಿಟ್ಟಿತ್ತು. ಆ ಬಳಿಕ ಫಾಕ್ಸ್ ಸರ್ಚ್ಲೈಟ್ ಸಂಸ್ಥೆಯು ಹೆಗಲು ನೀಡಿದ ಕಾರಣ ಅದು ತೆರೆ ಕಂಡಿತ್ತು. |
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ