ಮಾತೃಧರ್ಮಕ್ಕೆ ಮರಳಲು ನ್ಯಾಯಾಲಯದ ಅನುಮತಿ ಕೌಲಾಲಂಪುರ: , ಗುರುವಾರ, 8 ಮೇ 2008( 15:51 IST )

ಮೈಲಿಗಲ್ಲಿನ ತೀರ್ಪೊಂದನ್ನು ನೀಡಿರುವ ಮಲೇಷ್ಯಾದ ಶರಿಯ ನ್ಯಾಯಾಲಯವು, ಮುಸ್ಲಿಂ ಧರ್ಮಕ್ಕೆ ಮತಾಂತರಗೊಂಡಿದ್ದ ಮಹಿಳೆಯೊಬ್ಬಾಕೆಗೆ, ಆಕೆಯ ಮಾತೃಧರ್ಮವಾಗಿರುವ ಬೌದ್ಧ ಧರ್ಮಕ್ಕೆ ಮರಳಲು ಅನಮತಿ ನೀಡಿದೆ. ಮುಸ್ಲಿಂ ಜನಾಂಗದ ವೈಯಕ್ತಿಕ ಮತ್ತು ಧಾರ್ಮಿಕ ನೀತಿನಿಯಮಗಳ ಉಸ್ತುವಾರಿಯ ಪೆನಾಂಗ್ ಶರಿಯ ನ್ಯಾಯಾಲಯವು ಈ ಮಹತ್ವದ ತೀರ್ಪು ನೀಡಿದೆ. ಸಿತಿ ಪಾತಿಮ ತಾನ್ ಅಬ್ದುಲ್ಲ ಎಂಬ ಮಹಿಳೆಯು, ಇರಾನ್ ವ್ಯಕ್ತಿಯೊಂದಿಗಿನ ತನ್ನ ವಿವಾಹವು ಮುರಿದುಬಿದ್ದ ಬಳಿಕ ಮುಸ್ಲಿಮೇತರಳೆಂದು ಘೋಷಿಸಲು ನ್ಯಾಯಾಲಯದ ಮೊರೆ ಹೋಗಿದ್ದಳು. ಚೀನ ಮೂಲದವಳಾದ ತಾನ್ ಯಾಮ್ ಯುವಾಂಗ್ ಎಂಬ ಹೆಸರಿನವಳಾಗಲಿರುವ ಸಿತಿ, ಈ ಅರ್ಜಿಯನ್ನು ಕಳೆದ ವರ್ಷ ಮೇ ತಿಂಗಳಲ್ಲಿ ಸಲ್ಲಿಸಿದ್ದಳು. ಇರಾನಿನ ಫೆರುದೌನ್ ಅಶಾನಿಯನ್ ಎಂಬ ವ್ಯಕ್ತಿಯನ್ನು ವಿವಾಹವಾಗ ಬಯಸಿದ್ದ ಸಿತಿಯು 1998ರಲ್ಲಿ ಇಸ್ಲಾಂ ಧರ್ಮಕ್ಕೆ ಮತಾಂತರ ಹೊಂದಿದ್ದಳಾದರೂ, ತಾನು ಆ ಧರ್ಮದ ರೀತಿ ರಿವಾಜುಗಳನ್ನು ಎಂದಿಗೂ ಅನುಸರಿಸಲಿಲ್ಲ ಎಂದು ಹೇಳಿದ್ದಾಳೆ. ಸಿತಿಯ ಪತಿ ಹಾಗೂ ಇಸ್ಲಾಮ್ ಪ್ರಾಧಿಕಾರಗಳು ಆಕೆಗೆ ಸೂಕ್ತ ಧಾರ್ಮಿಕ ಸಲಹೆಗಳನ್ನು ನೀಡಲು ವಿಫಲವಾಗಿರುವ ಹಿನ್ನೆಲೆಯಲ್ಲಿ ಆಕೆಯ ಮೇಲೆ ಗೂಬೆ ಕೂರಿಸುವಂತಿಲ್ಲ ಎಂದು ನ್ಯಾಯಾಲಯ ತೀರ್ಪು ನೀಡಿರುವ ವೇಳೆಗೆ ಹೇಳಿದೆ.