ಭಾರತ ಮತ್ತು ಪಾಕ್ ನಡುವೆ ಯುದ್ಧ ನಡೆಯುವುದಿಲ್ಲ ಎಂಬ ಹೇಳಿಕೆ ನಡುವೆಯೂ, ಪಾಕ್ ಆಕ್ರಮಿತ ಕಾಶ್ಮೀರ ಹಾಗೂ ಅಂತಾರಾಷ್ಟ್ರೀಯ ಗಡಿಭಾಗದಲ್ಲಿ ಪಾಕ್ ಮತ್ತಷ್ಟು ಸೈನಿಕರನ್ನು ನಿಯೋಜಿಸಿದ್ದು, ಅಲ್ಲದೇ ಈ ಉದ್ವಿಗ್ನ ಸ್ಥಿತಿಯ ಪರಿಣಾಮವಾಗಿ ಸೈನಿಕರ ರಜೆಯನ್ನೂ ರದ್ದುಪಡಿಸಿರುವುದಾಗಿ ಮಾಧ್ಯಮಗಳ ವರದಿ ತಿಳಿಸಿದೆ.
ಪಾಕ್ ಆಕ್ರಮಿತ ಗಡಿರೇಖೆಯಲ್ಲಿ ಹಾಗೂ ಅಂತಾರಾಷ್ಟ್ರೀಯ ಗಡಿಯಲ್ಲಿ ಪಾಕಿಸ್ತಾನ ಹೆಚ್ಚಿನ ಸೈನಿಕರನ್ನು ನಿಯೋಜಿಸಿದೆ. ಯಾವುದೇ ಸಂದರ್ಭದಲ್ಲೂ ಸಮರ ನಡೆದರೂ ಕೂಡ ತಾವು ಅದಕ್ಕೆ ಸಿದ್ದ ಎಂಬ ನಿಟ್ಟಿನಲ್ಲಿ ಪಾಕ್ ಸೈನಿಕರ ರಜೆಯನ್ನೂ ರದ್ದುಪಡಿಸಿ, ಎಲ್ಲೆಡೆ ಕಟ್ಟೆಚ್ಚರ ವಹಿಸುವಂತೆ ಮಿಲಿಟರಿ ವರಿಷ್ಠಾಧಿಕಾರಿಗಳು ಸೂಚನೆ ನೀಡಿರುವುದಾಗಿ ಡಾನ್ ನ್ಯೂಸ್ ಚಾನೆಲ್ ವರದಿ ವಿವರಿಸಿದೆ.
ಆದರೆ ಗಡಿಭಾಗದಲ್ಲಿ ಹೆಚ್ಚಿನ ಸೈನಿಕರನ್ನು ನಿಯೋಜಿಸಿರುವ ಬಗ್ಗೆ ರಕ್ಷಣಾ ವಿಭಾಗ ಯಾವುದೇ ವಿವರನ್ನು ನೀಡಲು ನಿರಾಕರಿಸಿದೆ. ಆದರೆ ಲಾಹೋರ್ ಸೆಕ್ಟರ್ ಪ್ರದೇಶದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಸೇನಾಪಡೆಯನ್ನು ನಿಯೋಜಿಸಿರುವ ವರದಿಯನ್ನು ಅದನ್ನು ತಳ್ಳಿಹಾಕಿಲ್ಲ ಎಂದು ಡೈಲಿ ಟೈಮ್ಸ್ ವರದಿ ಹೇಳಿದೆ.
ಅದೇ ರೀತಿ ಆರ್ಮಿಯ 10 ಮತ್ತು 11ನೇ ತಂಡಗಳು ಕಾಶ್ಮೀರ ಭಾಗದ ರಾಜೌರಿ ಮತ್ತು ಪೂಂಜ್‌ಗಳಲ್ಲಿ ಕಟ್ಟೆಚ್ಚರದಲ್ಲಿ ಕಾವಲು ಕಾಯುತ್ತಿದೆ. ಹೆಚ್ಚಿನ ಸೈನಿಕ ಪಡೆಗಳೂ ಕೂಡ ಪಾಕ್ ಆಕ್ರಮಿತ ಗಡಿಭಾಗವನ್ನು ಸುತ್ತುವರಿದಿರುವುದಾಗಿಯೂ ವರದಿ ತಿಳಿಸಿದೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ