ಇಸ್ರೇಲ್ ಸೇನೆ ಗಾಜಾ ವಿರುದ್ಧ ಕಾರ್ಯಾಚರಣೆಯಲ್ಲಿ ಯುದ್ಧಾಪರಾಧಗಳನ್ನು ಮತ್ತು ದುಸ್ಸಾಹಸದ ದಾಳಿಗಳನ್ನು, ವಿನಾಶಕಾರಿ ಕೃತ್ಯಗಳನ್ನು ಎಸಗಿರುವುದಾಗಿ ಸ್ವತಂತ್ರ ಮಾನವಹಕ್ಕು ರಕ್ಷಣೆ ಸಂಸ್ಥೆ ಅಮ್ನೆಸ್ಟಿ ಇಂಟರ್ನ್ಯಾಷನಲ್ ವರದಿ ತಿಳಿಸಿದೆ. ಅತ್ಯಂತ ನಿಖರತೆಯ ಶಸ್ತ್ರಾಸ್ತ್ರಗಳನ್ನು ಬಳಸಿಕೊಂಡು ನೂರಾರು ಪ್ಯಾಲೆಸ್ಟೀನ್ ನಾಗರಿಕರನ್ನು ಕೊಂದಿದ್ದಾರೆ ಮತ್ತು ಕೆಲವರನ್ನು ತೀರಾ ಸಮೀಪದಲ್ಲೇ ಗುಂಡು ಹಾರಿಸಿ ಕೊಂದಿದ್ದಾರೆಂದು ಅಮ್ನೆಸ್ಟಿ ಇಂಟರ್ನ್ಯಾಷನಲ್ ಆರೋಪಿಸಿದೆ.
ಪ್ಯಾಲೆಸ್ಟೀನಿ ಉಗ್ರಗಾಮಿಗಳು ಹಾರಿಸಿದ ರಾಕೆಟ್ ದಾಳಿಯನ್ನು ಕೂಡ ವರದಿಯಲ್ಲಿ ಖಂಡಿಸಿದ್ದು, ನಾಗರಿಕರ ಜೀವಕ್ಕೆ ಅಪಾಯವುಂಟು ಮಾಡಿದ್ದಾಗಿ ಹೇಳಿದ್ದಾರೆ. ಕೆಲವು ವೃತ್ತಿಪರ ದೋಷಗಳಿಂದಾಗಿ ನಾಗರಿಕರು ಸತ್ತಿದ್ದಾರೆಂದು ಇಸ್ರೇಲ್ ಈ ಆರೋಪಕ್ಕೆ ಸಮಜಾಯಿಷಿ ನೀಡಿದೆ. 2008ರ ಡಿಸೆಂಬರ್ 27ರಿಂದ 2009ರ ಜ.17ರವರೆಗೆ 22 ದಿನಗಳ ಇಸ್ರೇಲ್ ಕಾರ್ಯಾಚರಣೆಯಲ್ಲಿ 1400 ಪ್ಯಾಲೆಸ್ತೀನಿಯರು ಹತರಾಗಿದ್ದಾರೆಂದು ಅಮ್ನೆಸ್ಟಿ ತಿಳಿಸಿದ್ದು,ಸತ್ತವರನ್ನು ಕುರಿತ ಪ್ಯಾಲೆಸ್ಟೀನ್ ಅಂಕಿಅಂಶಗಳನ್ನು ಒಪ್ಪಿದೆ.
ಅವರಲ್ಲಿ 900ಕ್ಕಿಂತ ಹೆಚ್ಚು ಜನರು ನಾಗರಿಕರಾಗಿದ್ದು, 300 ಮಕ್ಕಳು ಮತ್ತು 115 ಮಹಿಳೆಯರು ಸೇರಿದ್ದಾರೆಂದು ಅದು ಹೇಳಿದೆ. ಮನೆಗಳು, ವಾಣಿಜ್ಯ ಕಟ್ಟಡಗಳು ಮತ್ತು ಸಾರ್ವಜನಿಕ ಕಟ್ಟಡಗಳ ಧ್ವಂಸವು ಉದ್ದೇಶಪೂರ್ವಕವಾಗಿದ್ದು, ಮಿಲಿಟರಿ ಅಗತ್ಯದ ನೆಲೆಯಲ್ಲಿ ಅದನ್ನು ಸಮರ್ಥಿಸಿಕೊಳ್ಳಲು ಸಾಧ್ಯವಿಲ್ಲ ಎಂದು ಅವರು ನುಡಿದರು. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ