ಬಂದರು ನಗರವಾದ ಕರಾಚಿಯ ಖಾಸಗಿ ಬ್ಯಾಂಕೊಂದಕ್ಕೆ ನುಗ್ಗಿದ ಆರು ಮಂದಿ ದರೋಡೆಕೋರರು ಕೇವಲ 5 ನಿಮಿಷದಲ್ಲಿ 46 ಲಕ್ಷ ರೂ. ದೋಚಿರುವ ಘಟನೆ ನಡೆದಿರುವುದಾಗಿ ಡೈಲಿ ಟೈಮ್ಸ್ ದೈನಿಕ ವರದಿ ಮಾಡಿದೆ.
ಶುಕ್ರವಾರ ಬೆಳಿಗ್ಗೆ 9.10ಕ್ಕೆ ಬ್ಯಾಂಕಿನೊಳಗೆ ನುಗ್ಗಿದ ದರೋಡೆಕೋರರು ಸಿಸಿ ಟಿವಿ ಕ್ಯಾಮರಾಗಳನ್ನು ಒಡೆದು ಹಾಕಿ ಬ್ಯಾಂಕ್ ಸಿಬ್ಬಂದಿಗಳನ್ನು ಒತ್ತೆಯಾಳುಗಳನ್ನಾಗಿಸಿಕೊಂಡು ಕೇವಲ ಐದೇ ನಿಮಿಷದಲ್ಲಿ 46 ಲಕ್ಷ ರೂ. ದೋಚಿ ಪರಾರಿಯಾಗಿದ್ದಾರೆ. ಕರಾಚಿಯ ಸೌದಾಬಾದ್ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲೇ ಈ ದರೋಡೆ ನಡೆದಿರುವುದು ಗಮನಾರ್ಹ.
ಐದು ಮಂದಿ ದರೋಡೆಕೋರರು ಬ್ಯಾಂಕಿನೊಳಗೆ ಬಂದಿದ್ದರು, ಒಬ್ಬ ದರೋಡೆಕೋರ ಹೊರಗಿನಿಂದಲೇ ಎಲ್ಲ ಸಹಕಾರ ನೀಡುತ್ತಿದ್ದ. ದರೋಡೆಕೋರರು 46 ಲಕ್ಷ ರೂ. ದೋಚುವುದರೊಂದಿಗೆ ಬ್ಯಾಂಕಿನ ಏಳು ಮಂದಿ ಸಿಬ್ಬಂದಿಯ ಮೊಬೈಲ್ ಫೋನ್ಗಳನ್ನು ಕದ್ದೊಯ್ದಿದ್ದಾರೆ. ಈ ಕುರಿತು ತನಿಖೆ ನಡೆಸಲು ವಿಶೇಷ ತನಿಖಾ ತಂಡ ರಚಿಸುವುದಾಗಿ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.