ಸೈನಾ ನೆಹ್ವಾಲ್ ಮತ್ತು ಅನೂಪ್ ಶ್ರೀಧರ್ ಸಿಂಗಾಪುರ ಓಪನ್ ಸೂಪರ್ ಸಿರೀಸ್ ಆರಂಭಿಕ ಸುತ್ತಿನಲ್ಲಿ ಜಯ ದಾಖಲಿಸಿ ಎರಡನೇ ಸುತ್ತಿಗೆ ಪ್ರವೇಶಿಸಿದ್ದರೆ ಚೇತನ್ ಆನಂದ್, ಅರವಿಂದ್ ಭಟ್, ಜ್ವಾಲಾ ಗುತ್ತಾ, ವಿ. ದಿಜು, ಅದಿತಿ ಮುತಾತ್ಕರ್, ಅಶ್ವಿನಿ ಪೊನ್ನಪ್ಪ ಸೋಲನುಭವಿಸಿದ್ದಾರೆ.
ಆರನೇ ಶ್ರೇಯಾಂಕಿತೆ ಸೈನಾ ನೆಹ್ವಾಲ್ ತನ್ನ ಎದುರಾಳಿ ಕ್ವಾಲಿಫೈಯರ್ ಸ್ಲೋವೇನಿಯಾದ ಮಾಜಾ ತ್ವೆರ್ಡಿಯವರನ್ನು 18-21, 21-11, 21-16ರಿಂದ 50 ನಿಮಿಷಗಳ ಕಾಲ ನಡೆದ ಹೋರಾಟದಲ್ಲಿ ಸೋಲಿಸುವ ಮೂಲಕ ಎರಡನೇ ಸುತ್ತಿಗೆ ಪ್ರವೇಶಿಸಿದ್ದಾರೆ.
ಮುಂದಿನ ಸುತ್ತಿನಲ್ಲಿ ನೆಹ್ವಾಲ್ರವರು ಇಂಡೋನೇಷಿಯಾದ ಶ್ರೇಯಾಂಕರಹಿತ ಆಟಗಾರ್ತಿ ಅದ್ರಿಯಾಂತಿ ಫ್ರಿರ್ದಾಸರಿಯವರನ್ನು ಮುಖಾಮುಖಿಯಾಗಲಿದ್ದಾರೆ. ಅವರು ಮೊದಲ ಸುತ್ತಿನಲ್ಲಿ ಕೊರಿಯಾದ ಮೂನ್ ಹೀ ಕಿಮ್ರನ್ನು 23-21, 21-15ರಿಂದ ಮಣಿಸಿದ್ದರು.
ಅದೇ ಹೊತ್ತಿಗೆ ಮಹಿಳೆಯರ ವಿಭಾಗದಲ್ಲಿದ್ದ ಮತ್ತೊಬ್ಬ ಭಾರತೀಯ ಆಟಗಾರ್ತಿ ಅದಿತಿ ಮುತಾತ್ಕರ್ ಮೊದಲ ಸುತ್ತಿನಲ್ಲಿಯೇ ನಿರಾಸೆ ಅನುಭವಿಸಿದ್ದಾರೆ. ನೆದರ್ಲೆಂಡ್ನ ಜೂಡಿತ್ ಮೆಲೆಂಡಿಜಿಕ್ಸ್ರೆದುರು ಮುತಾತ್ಕರ್ 21-14, 21-19ರ ಅಂತರದಿಂದ ಸುಮಾರು 30 ನಿಮಿಷಗಳ ಕಾಲ ನಡೆದ ಹೋರಾಟದಲ್ಲಿ ಸೋಲುಂಡರು.
ಮಿಶ್ರ ಡಬಲ್ಸ್ ಜೋಡಿ ಜ್ವಾಲಾ ಗುತ್ತಾ ಮತ್ತು ವಿ. ದಿಜು ಆರನೇ ಶ್ರೇಯಾಂಕಿತ ಚೈನೀಸ್ ಜೋಡಿ ಜೂಂಗ್ಬೋ ಕ್ಸಿಯೇ - ಯಾವೆನ್ ಜಾಂಗ್ರೆದುರು 21-13, 21-14ರಿಂದ 23 ನಿಮಿಷಗಳಲ್ಲಿ ಕುಸಿದರು.
ಮಹಿಳೆಯರ ಡಬಲ್ಸ್ ವಿಭಾಗದಲ್ಲಿ ಜ್ವಾಲಾ ಗುತ್ತಾ - ಅಶ್ವಿನಿ ಪೊನ್ನಪ್ಪ ಜತೆಗಾತಿಯರು ತಮ್ಮ ಎದುರಾಳಿಗಳಾದ ಸ್ಕಾಟ್ಲೆಂಡ್ನ ಇಮೋಜನ್ ಬಾಂಕೈರ್ - ಇಂಗ್ಲೆಂಡ್ನ ಡೋನಾ ಕೆಲ್ಲೋಗ್ ವಿರುದ್ಧ 22-20, 10-21, 12-21ರಿಂದ 39 ನಿಮಿಷಗಳ ಹೋರಾಟದಲ್ಲಿ ಸೋಲೊಪ್ಪಿಕೊಂಡಿದ್ದಾರೆ.
ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಚೇತನ್ ಆನಂದ್ ಮತ್ತು ಅರವಿಂದ್ ಭಟ್ ಕೂಡ ಸೋಲನುಭವಿಸಿದ್ದಾರೆ. ಚೇತನ್ರವರು ಮಲೇಷಿಯಾದ ಚೂಂಗ್ ಹಾನ್ ವಾಂಗ್ರೆದುರು 21-18, 21-11ರ ಅಂತರದಿಂದ 32 ನಿಮಿಷಗಳಲ್ಲಿ ಹಾಗೂ ಭಟ್ ಇಂಡೋನೇಷಿಯಾದ ಮೂರನೇ ಶ್ರೇಯಾಂಕಿತ ಸೋನಿ ದ್ವಿ ಕುನ್ಕೋರ್ಡ್ರೆದುರು 21-12, 15-21, 21-9ರಿಂದ 43 ನಿಮಿಷಗಳಲ್ಲಿ ಸೋಲು ಕಂಡರು.
ಒಟ್ಟಾರೆ ಸಿಂಗಾಪುರ ಓಪನ್ ಸೂಪರ್ ಸಿರೀಸ್ನಲ್ಲಿ ಭಾರತೀಯರಾಗಿ ಇದೀಗ ಸೈನಾ ನೆಹ್ವಾಲ್ ಮತ್ತು ಅನೂಪ್ ಶ್ರೀಧರ್ ಮಾತ್ರ ಉಳಿದುಕೊಂಡಂತಾಗಿದೆ.
| 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ