ರಫ್ತು ಸುಂಕ ಹಿಂತೆಗೆತಕ್ಕೆ ಆಗ್ರಹ ನವದೆಹಲಿ, ಮಂಗಳವಾರ, 13 ಮೇ 2008( 19:00 IST )

ಉಕ್ಕು ತಯಾರಕರು, ಹಣದುಬ್ಬರದ ನಿಯಂತ್ರಣಕ್ಕಾಗಿ ಉಕ್ಕು ಬೆಲೆಯನ್ನು ಕಡಿಮೆ ಮಾಡಿದ ನಂತರವೂ, ಸರ್ಕಾರ ರಫ್ತು ಸುಂಕ ವಿಧಿಸಿರುವುದಕ್ಕೆ ಉಕ್ಕು ಉದ್ಯಮಿಗಳು ಅಸಮಾಧಾನ ಗೊಂಡಿದ್ದು, ಸುಂಕವನ್ನು ತೊಡೆದುಹಾಕಬೇಕು ಎಂದು ಸರಕಾವನ್ನು ವಿನಂತಿಸಿಕೊಂಡಿದ್ದಾರೆ. ಉದ್ಯಮಿಗಳ ಮನವಿಯ ಕುರಿತು ಸರಕಾರ ಶೀಘ್ರದಲ್ಲಿಯೇ ನಿರ್ಧಾರ ಕೈಗೊಳ್ಳಲಿದೆ ಎಂದು ವರದಿಗಳು ತಿಳಿಸಿವೆ. "ರಫ್ತು ಸುಂಕ ಹಿಂತೆಗೆತಕ್ಕಾಗಿ ಉಕ್ಕು ಉದ್ಯಮಿಗಳು ಸಲ್ಲಿಸಿರುವ ಬೇಡಿಕೆಯ ಕುರಿತು , ಸರ್ಕಾರದ ಪರಿಶೀಲನೆ ನಡೆಸುತ್ತಿದ್ದು, ಅದರ ನಿರ್ಧಾರವು ಅತಿಶೀಘ್ರದಲ್ಲಿಯೇ ಹೊರಬೀಳಲಿದೆ" ಎಂದು ಉಕ್ಕು ಕಾರ್ಯದರ್ಶಿ ರಾಘವ್ ಶರಣ್ ತಿಳಿಸಿದರು. ಈ ಕುರಿತಂತೆ ಸಚಿವಾಲಯದಲ್ಲಿ ಆಂತರಿಕ ಸಮಾಲೋಚನೆ ನಡೆಯುತ್ತಿದ್ದು, ನಿರ್ಧಾರವು ಅತಿ ಶೀಘ್ರದಲ್ಲಿಯೇ ಹೊರಬೀಳಲಿದೆ. ಕಳೆದ ವಾರ ಪ್ರಧಾನ ಮಂತ್ರಿ ಮನಮೋಹನ್ ಸಿಂಗ್‌ ಅವರನ್ನು ಭೇಟಿ ಮಾಡಿದ ಬಳಿಕ ಉಕ್ಕುಉದ್ಯಮಿಗಳು ಕಚ್ಚಾ ಉಕ್ಕಿನ ಬೆಲೆಯಲ್ಲಿ ಟನ್‌ ಒಂದರ 4000 ರೂ. ಹಾಗೂ ಸಿದ್ದ ವಸ್ತುಗಳ ಮೇಲೆ ಟನ್ ಒಂದರ 2,000 ಕಡಿಮೆ ಮಾಡಲು ನಿರ್ಧರಿಸಿದ್ದು, ಮುಂಬರುವ ಎರಡ್ಮೂರು ತಿಂಗಳ ಕಾಲ ಇದೇ ಬೆಲೆಯನ್ನು ಕಾಯ್ದುಕೊಳ್ಳುವುದಾಗಿ ಹೇಳಿದ್ದರು. ಕಬ್ಬಿಣ ಮತ್ತು ಉಕ್ಕಿನ ದರಗಳಲ್ಲಿ ಶೇ.0.1ರಷ್ಟು ಇಳಿಕೆ ಕಂಡು ಬಂದಿದೆ ಎಂದು ಕಳೆದ ವಾರ ಬಿಡುಗಡೆಗೊಂಡ ಹಣದುಬ್ಬರ ಮಾಹಿತಿ ವಿವರ ಅಧಿಕೃತವಾಗಿ ತಿಳಿಸಿದ್ದು, ಇದು ಸರ್ಕಾರಕ್ಕೆ ಒಂದಿಷ್ಟು ಸಮಾಧಾನವನ್ನು ತಂದಿದೆ.