ನೌಕರರ ಸಂಖ್ಯೆಯನ್ನು ವೃದ್ಧಿಸಲಿರುವ ಯಾಹೂ ಇಂಡಿಯಾ   ಸಿಂಗಾಪುರ್, ಸೋಮವಾರ, 23 ಜೂನ್ 2008( 17:18 IST )

ಇಂಟರ್ನೆಟ್ ದೈತ್ಯ ಯಾಹೂ ಇಂಕ್ ತನ್ನ ನೌಕರರ ಸಂಖ್ಯೆಯನ್ನು ದ್ವಿಗುಣಗೊಳಿಸಲಿದ್ದು, 2008ರ ಅಂತ್ಯದ ವೇಳೆಗೆ ಯಾಹೂ ಇಂಡಿಯಾದಲ್ಲಿ ಕಾರ್ಯನಿರ್ವಹಿಸಲಿರುವ ನೌಕರರ ಸಂಖ್ಯೆಯು 2,700ಕ್ಕೆ ತಲುಪುವ ನಿರೀಕ್ಷೆಯಿದೆ. ಪ್ರಸಕ್ತ ವರ್ಷದ ಮೊದಲ ಆರು ತಿಂಗಳಲ್ಲಿ ಯಾಹೂ 1,000ಕ್ಕೂ ಹೆಚ್ಚು ನೌಕರರನ್ನು ಸೇರ್ಪಡೆಗೊಳಿಸಿದ್ದು, ಈ ವರ್ಷದ ಅಂತ್ಯದೊಳಗೆ 500 ಹೆಚ್ಚುವರಿ ನೌಕರರನ್ನು ನೇಮಕ ಮಾಡಲಿದೆ ಎಂದು ಯಾಹೂ ಇಂಡಿಯಾ ವಕ್ತಾರರು ತಿಳಿಸಿದ್ದಾರೆ. ಪ್ರಸಕ್ತ ವರ್ಷದ ಪ್ರಾರಂಭದಲ್ಲಿ ಯಾಹೂ ಇಂಡಿಯಾದಲ್ಲಿ ಸುಮಾರು 1,200 ನೌಕರರು ಕಾರ್ಯನಿರ್ವಹಿಸುತ್ತಿದ್ದು, ಈ ಪ್ರಮಾಣವು ಈಗ 2,200ಕ್ಕೆ ಏರಿದೆ. ಸರಾಸರಿಯಾಗಿ ಕಂಪನಿಯು ಪ್ರತಿ ತಿಂಗಳು 60-80 ನೌಕರರನ್ನು ನೇಮಿಸಿಕೊಳ್ಳಲಿದ್ದು, ಇದನ್ನು ಈ ವರ್ಷದ ಅಂತ್ಯದವರೆಗೂ ಮುಂದುವರಿಸಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.