ಆಹಾರ ಬಿಕ್ಕಟ್ಟು: ಜಿ8 ನಾಯಕರಿಂದ ಕಾರ್ಯಪಡೆ   ಟೋಕಿಯೋ, ಸೋಮವಾರ, 30 ಜೂನ್ 2008( 16:45 IST )

ವಿಶ್ವ ಆಹಾರ ಬಿಕ್ಕಟ್ಟನ್ನು ಶಮನಗೊಳಿಸುವ ನಿಟ್ಟಿನಲ್ಲಿ ಮುಂದಿನ ತಿಂಗಳು ನಡೆಯುವ ಎಂಟು ಕೈಗಾರಿಕಾ ರಾಷ್ಟ್ರಗಳ ಜಿ8 ಸಮೂಹದ ನಾಯಕರು ಕಾರ್ಯಪಡೆಯನ್ನು ರೂಪಿಸಲು ಸೋಮವಾರ ಒಪ್ಪಿಗೆ ಸೂಚಿಸಿದ್ದಾರೆ. ಬಡರಾಷ್ಟ್ರಗಳಲ್ಲಿನ ಆಹಾರ ಕೊರತೆ ನಿವಾರಣೆ ಮತ್ತು ದೀರ್ಘಾವಧಿ ಸವಾಲುಗಳಾದ ಆಹಾರ ಉತ್ಪಾದನೆ ಹೆಚ್ಚಳ ಮುಂತಾದವುಗಳನ್ನು ಎದುರಿಸುವ ಗುರಿಯನ್ನು ಇದು ಹೊಂದಿದೆ ಎಂದು ಸರಕಾರಿ ಮೂಲಗಳು ತಿಳಿಸಿವೆ. ರಫ್ತು ನಿರ್ಬಂಧ ತೆರವು ಹಾಗೂ ಅಗತ್ಯವಿರುವ ರಾಷ್ಟ್ರಗಳಿಗೆ ಆಹಾರ ಪೂರೈಕೆ ಮುಂತಾದ ವಿಚಾರಗಳ ಬಗ್ಗೆಯೂ ಈ ಸಭೆಯು ಚರ್ಚೆ ನಡೆಸುವ ಸಾಧ್ಯತೆ ಇದೆ ಎಂದು ಪತ್ರಿಕೆಗಳು ತಿಳಿಸಿವೆ. ಜಗತ್ತಿನ ಆಹಾರ ಬಿಕ್ಕಟ್ಟು ಹಾಗೂ ಹವಾಮಾನ ಬದಲಾವಣೆಯನ್ನು ನಿಭಾಯಿಸುವ ನಿಟ್ಟಿನಲ್ಲಿ ಜುಲೈ ತಿಂಗಳಲ್ಲಿ ನಡೆಯುವ ಜಿ8 ರಾಷ್ಟ್ರಗಳ ಶೃಂಗಸಭೆಯಲ್ಲಿ ಜಿ8 ನಾಯಕರ ಮೇಲೆ ಒತ್ತಡ ಹೇರುವುದಾಗಿ ವಿಶ್ವಸಂಸ್ಥೆ ಪ್ರಧಾನ ಕಾರ್ಯದರ್ಶಿ ಬಾನ್ ಕಿ ಮೂನ್ ಹೇಳಿರುವ ಬೆನ್ನಲ್ಲೇ ಈ ವರದಿಗಳು ಬಂದಿವೆ.