ರಿಲಾಯನ್ಸ್-ಎಂಟಿಎನ್: ಮಾತುಕತೆ ಮುಂದುವರಿಕೆ ಸಾಧ್ಯತೆ   ನವದೆಹಲಿ, ಗುರುವಾರ, 3 ಜುಲೈ 2008( 13:36 IST )

ಅನಿಲ್ ಅಂಬಾನಿ ನೇತೃತ್ವದ ರಿಲಾಯನ್ಸ್ ಕಮ್ಯುನಿಕೇಶನ್ಸ್ ಮತ್ತು ದಕ್ಷಿಣ ಆಫ್ರಿಕಾದ ಎಂಟಿಎನ್ ನಡುವಿನ ಒಪ್ಪಂದವು ಅಂಬಾನಿ ಸಹೋದರರ ನಡುವಿನ ಕಲಹದಿಂದಾಗಿ ಅಸ್ಥಿರತೆಯಿಂದ ಕೂಡಿರುವುದರೊಂದಿಗೆ, ಒಪ್ಪಂದದ ಕುರಿತಾಗಿ ಪ್ರಾರಂಭಗೊಂಡ 45 ದಿನಗಳ ಮಾತುಕತೆಯನ್ನು ಇನ್ನೂ ಕೆಲವು ವಾರಗಳವರೆಗೆ ಮುಂದುವರಿಸುವ ಸಾಧ್ಯತೆಯಿದೆ ಎಂಬುದಾಗಿ ತಿಳಿದುಬಂದಿದೆ. ಮುಖೇಶ್ ಅಂಬಾನಿ ನೇತೃತ್ವದ ರಿಲಾಯನ್ಸ್ ಇಂಡಸ್ಟ್ರೀಸ್ ಧ್ವನಿ ಎತ್ತಿರುವ ಕಾನೂನು ವಿವಾದದ ಕುರಿತಾಗಿ ಎರಡೂ ಕಂಪನಿಗಳ ಹೂಡಿಕೆದಾರರು ಆತಂಕದಲ್ಲಿದ್ದು, ಎರಡೂ ಕಂಪನಿಗಳ ನಿರಂತರ ಶೇರು ಮೌಲ್ಯ ಕುಸಿತವು ಕೂಡಾ ಇದನ್ನೇ ಪ್ರತಿಬಿಂಬಿಸುತ್ತಿದೆ ಎಂದು ಮೂಲಗಳು ತಿಳಿಸಿವೆ. ಆಫ್ರಿಕನ್ ಟೆಲಿಕಾಂ ದೈತ್ಯ ಎಂಟಿಎನ್ ಶೇರುಗಳು ಕಳೆದ ಮೂರು ತಿಂಗಳಲ್ಲೇ ಅಧಿಕ ಮಟ್ಟದಲ್ಲಿ ಇಳಿಕೆಗೊಂಡಿದ್ದು, ರಿಲಾಯನ್ಸ್ ಕಮ್ಯುನಿಕೇಶನ್ಸ್ ಶೇರುಗಳು ಕೂಡಾ ಕುಸಿತಗೊಂಡಿವೆ. ಇಂದಿನ ಶೇರುಪೇಟೆಯ ವಹಿವಾಟಿನಲ್ಲಿ ರಿಲಾಯನ್ಸ್ ಕಮ್ಯುನಿಕೇಶನ್ಸ್ ಶೇರುಗಳು ಶೇ.4.72 ಇಳಿಕೆಗೊಂಡಿದ್ದು, 398.65ಕ್ಕೆ ವಹಿವಾಟು ನಡೆಸುತ್ತಿದೆ. ಮೇ 26ರಂದು 45 ದಿನಗಳ ಮಾತುಕತೆಯನ್ನು ಎರಡೂ ಕಂಪನಿಗಳು ಪ್ರಾರಂಭಿಸಿದ್ದು, ಈ ಮಾತುಕತೆಯು ಜುಲೈ ಎಂಟರಂದು ಮುಕ್ತಾಯಗೊಳ್ಳಲಿದೆ ಎಂಬುದಾಗಿ ರಿಲಾಯನ್ಸ್ ಕಮ್ಯುನಿಕೇಶನ್ಸ್ ಮತ್ತು ಎಂಟಿಎನ್ ಘೋಷಿಸಿತ್ತು. ಏನೇ ಆದರೂ, ಮಾತುಕತೆಯಲ್ಲಿ ಈ ವರೆಗಿನ ಬೆಳವಣಿಗೆಯ ಬಗ್ಗೆ ಹೆಚ್ಚಿನ ವಿವರ ನೀಡಲು ರಿಲಾಯನ್ಸ್ ಕಮ್ಯುನಿಕೇಶನ್ಸ್ ಅಧಿಕಾರಿಗಳು ನಿರಾಕರಿಸಿದ್ದಾರೆ.