ತೆಂಡೂಲ್ಕರನ್ನು ಕೈಬಿಟ್ಟ ಪೆಪ್ಸಿ   ನವದೆಹಲಿ, ಮಂಗಳವಾರ, 8 ಜುಲೈ 2008( 10:13 IST )

ಪ್ರಸಕ್ತ ಉತ್ಪನ್ನ ರಾಯಭಾರಿಗಳಾಗಿರುವ ಹಿರಿಯ ಕ್ರಿಕೆಟಿಗರನ್ನು ಹಂತಹಂತವಾಗಿ ತೆಗೆದುಹಾಕುವ ಪ್ರಯತ್ನದೊಂದಿಗೆ, ಪ್ರಮುಖ ಸಾಫ್ಟ್‌ಡ್ರಿಂಕ್ ನಿರ್ಮಾಣ ಕಂಪನಿಯಾದ ಪೆಪ್ಸಿ, ತನ್ನ ದೀರ್ಘಾವಧಿಯ ರಾಯಭಾರಿ ಮಾಸ್ಟರ್ ಬ್ಲಾಸ್ಟರ್ ಸಚಿನ ತೆಂಡೂಲ್ಕರ್ ಅವರನ್ನು ಕೈಬಿಟ್ಟಿದ್ದು, ಯುವ ಕ್ರಿಕೆಟಿಗರತ್ತ ತನ್ನ ದೃಷ್ಟಿಯನ್ನು ಹಾಯಿಸಿದೆ. ಈ ವರ್ಷದ ಪ್ರಾರಂಭದಲ್ಲಿ ಭಾರತದ ಪ್ರಮುಖ ಕ್ರಿಕೆಟ್ ಆಟಗಾರರಾದ ರಾಹುಲ್ ದ್ರಾವಿಡ್ ಮತ್ತು ಸೌರವ್ ಗಂಗೂಲಿ ಅವರನ್ನು ಕೈಬಿಟ್ಟ ಬೆನ್ನಲ್ಲೇ, ಪೆಪ್ಸಿಯು, ಸಚಿನ್ ತೆಂಡೂಲ್ಕರ್ ಅವರ ಕುರಿತಾಗಿಯೂ ಈ ನಿರ್ಧಾರವನ್ನು ತೆಗೆದುಕೊಂಡಿದೆ. ಯುವ ಕ್ರಿಕೆಟಿಗರತ್ತ ಕಂಪನಿಯು ದೃಷ್ಟಿ ಹಾಯಿಸಿರುವ ನಿಟ್ಟಿನಲ್ಲಿ, 1990ರಿಂದ ಪೆಪ್ಸಿಯ ಉತ್ಪನ್ನ ರಾಯಭಾರಿ ಆಗಿರುವ ಸಚಿನ್ ತೆಂಡೂಲ್ಕರ್ ಅವರೊಂದಿಗಿನ ಒಪ್ಪಂದವನ್ನು ಪುನರಾರಂಭಿಸಿಲ್ಲ ಎಂಬುದಾಗಿ ಕಂಪನಿ ಮೂಲಗಳು ತಿಳಿಸಿವೆ. ಅಲ್ಲದೆ, ತೆಂಡೂಲ್ಕರ್ ಅವರ ಭಾರಿ ಮೊತ್ತದ ಬೇಡಿಕೆಯು ಕೂಡಾ ಕಂಪನಿಯ ಈ ನಿರ್ಧಾರಕ್ಕೆ ಪುಷ್ಠಿ ನೀಡಿದೆ ಎಂದು ಮೂಲಗಳು ಹೇಳಿವೆ. ಮಾರುಕಟ್ಟೆ ಅಂದಾಜಿನ ಪ್ರಕಾರ, ಪ್ರತಿ ಉತ್ಪನ್ನ ಜಾಹೀರಾತಿಗೆ ಮೂರರಿಂದ ನಾಲ್ಕು ಕೋಟಿಯಷ್ಟು ಸಂಭಾವನೆಯನ್ನು ತೆಂಡೂಲ್ಕರ್ ಪಡೆಯುತ್ತಿದ್ದು, ಅತಿ ಹೆಚ್ಚು ಮೊತ್ತವನ್ನು ಪಡೆಯುವ ಕ್ರಿಕೆಟಿಗ ಎಂಬುದಾಗಿ ಹೆಸರು ಪಡೆದುಕೊಂಡಿದ್ದರು. ಏನೇ ಆದರೂ, ಈ ಕುರಿತಾಗಿ ಹೆಚ್ಚಿನ ಮಾಹಿತಿ ನೀಡಲು ಪೆಪ್ಸಿ ಅಧಿಕಾರಿಗಳು ನಿರಾಕರಿಸಿದರೂ, ಯುವ ಕ್ರಿಕೆಟಿಗರತ್ತ ಕಂಪನಿಯು ದೃಷ್ಟಿ ನೆಟ್ಟಿರುವುದನ್ನು ಪೆಪ್ಸಿ ಸ್ಪಷ್ಟಪಡಿಸಿದೆ.