ಆವಶ್ಯಕ ವಸ್ತುಗಳ ಬೆಲೆ ಸ್ಥಿರ: ಹಣಕಾಸು ಸಚಿವಾಲಯ   ನವದೆಹಲಿ, ಶುಕ್ರವಾರ, 11 ಜುಲೈ 2008( 17:12 IST )

ಆವಶ್ಯಕ ವಸ್ತುಗಳ ಬೆಲೆಯು ಬಹುತೇಕ ಸ್ಥಿರವಾಗಿದೆ ಎಂದು ಹಣಕಾಸು ಸಚಿವಾಲಯವು ಹೇಳಿದ್ದು, ಈ ಮೂಲಕ, 13 ವರ್ಷಗಳಲ್ಲೇ ಅಧಿಕ ಮಟ್ಟದಲ್ಲಿ ಶೇ.11.89ಕ್ಕೆ ಏರಿದ ಹಣದುಬ್ಬರದಿಂದ ಉಂಟಾಗಿರುವ ಬೆಲೆ ಏರಿಕೆ ಆತಂಕವನ್ನು ದೂರ ಮಾಡಿದೆ. ಆಹಾರ ಧಾನ್ಯ, ಬೇಳೆಕಾಳು, ಖಾದ್ಯತೈಲ, ತರಕಾರಿ, ಹಾಲು ಉತ್ಪನ್ನ ಮತ್ತು ಇತರ ವಸ್ತುಗಳಾದ ಸೀಮೆಎಣ್ಣೆ, ಸೋಪು, ಬೆಂಕಿಕಡ್ಡಿ ಮುಂತಾದವುಗಳ ಬೆಲೆಗಳು ಬಹುತೇಕ ಸ್ಥಿರಾವಾಗಿದೆ ಎಂದು ಹಣಕಾಸು ಸಚಿವಾಲಯವು ಸ್ಪಷ್ಟಪಡಿಸಿದೆ. ಪ್ರಾಥಮಿಕ ವಸ್ತುಗಳ ಸಮೂಹದಲ್ಲಿ ಒಟ್ಟು 98 ವಸ್ತುಗಳಲ್ಲಿ ಗೋಧಿ, ಅಕ್ಕಿ, ಮೆಕ್ಕೆಜೋಳ, ಬೆಳ್ಳುಳ್ಳಿ, ಕ್ಯಾಬೇಜ್, ಜೀರಿಗೆ, ಕರಿಮೆಣಸು, ಶುಂಠಿ, ಸೂರ್ಯಕಾಂತಿ ಬೀಜ ಸೇರಿದಂತೆ 12 ವಸ್ತುಗಳ ಬೆಲೆಯಲ್ಲಿ ಕಳೆದ ವಾರಕ್ಕಿಂತ ಇಳಿಕೆ ಉಂಟಾಗಿದ್ದು, ಇತರ 55 ವಸ್ತುಗಳ ಬೆಲೆಯಲ್ಲೂ ಏರಿಕೆ ಉಂಟಾಗಿಲ್ಲ ಎಂದು ಸಚಿವಾಲಯದ ಹೇಳಿಕೆಗಳು ತಿಳಿಸಿವೆ. ಉತ್ಪಾದಕ ವಸ್ತುಗಳಲ್ಲಿ ಒಟ್ಟು 320 ವಸ್ತುಗಳಲ್ಲಿ 278 ವಸ್ತುಗಳ ಬೆಲೆಯಲ್ಲಿ ಕಳೆದ ವಾರಕ್ಕಿಂತ ಯಾವುದೇ ಏರಿಕೆ ಉಂಟಾಗಿಲ್ಲ ಎಂದು ಅದು ಹೇಳಿದೆ.