ಐಪಿಐ: ತೆಹ್ರಾನ್‌ನಲ್ಲಿ ತ್ರಿಪಕ್ಷೀಯ ಮಾತುಕತೆ   ಇಸ್ಲಾಮಾಬಾದ್, ಬುಧವಾರ, 16 ಜುಲೈ 2008( 12:44 IST )

ಸಾಗಾಣಿಕಾ ವೆಚ್ಚದ ವಿವಾದಗಳಿಂದಾಗಿ ಮುಂದೂಡಲ್ಪಟ್ಟಿದ್ದ 7.4 ಶತಕೋಟಿ ಡಾಲರ್ ವೆಚ್ಚದ ಇರಾನ್-ಭಾರತ-ಪಾಕಿಸ್ತಾನ ರಾಷ್ಚ್ರಗಳನ್ನೊಳಗೊಂಡ ಐಪಿಐ ಅನಿಲ ಕೊಳವೆ ಯೋಜನೆಯನ್ನು ಮುಂದುವರಿಸುವ ಕುರಿತಾಗಿ ಮಾತುಕತೆ ನಡೆಸಲು, ಮೂರು ರಾಷ್ಟ್ರಗಳು ಮುಂದಿನ ತಿಂಗಳು ಟೆಹ್ರಾನ್‌ನಲ್ಲಿ ಸಭೆ ಸೇರುವ ನಿರೀಕ್ಷೆಯಿದೆ. ಐಪಿಐ ಅನಿಲ ಕೊಳವೆ ಯೋಜನೆಯಲ್ಲಿ ಟೆಹ್ರಾನ್ ಭಾಗಿಯಾಗಿರುವ ಹಿನ್ನೆಲೆಯಲ್ಲಿ ಅಮೆರಿಕದಿಂದ ವಿರೋಧ ವ್ಯಕ್ತವಾಗಿರುವ ಇರಾನ್-ಪಾಕಿಸ್ತಾನ-ಭಾರತ ಅನಿಲ ಕೊಳವೆ ಯೋಜನೆಯ ಕುರಿತಾದ ತ್ರಿಪಕ್ಷೀಯ ಮಾತುಕತೆಯಲ್ಲಿ ಭಾರತ ಭಾಗವಹಿಸಲಿದೆ. ಟೆಹ್ರಾನ್‌ನ ಸಭೆಯ ಮುಂದಾಗಿ ಅನಿಲ ಕೊಳವೆ ಯೋಜನೆಯ ಪಾಕಿಸ್ತಾನದ ಸಂಚಾಲನಾ ಸಮಿತಿಯು ಜುಲೈ 17ರಂದು ಇಸ್ಲಾಮಾಬಾದಿನಲ್ಲಿ ಸಭೆ ಸೇರಲಿದ್ದು, ಪಾಕಿಸ್ತಾನ ಪ್ರದೇಶದ ಮೂಲಕ ಇರಾನ್ ಅನಿಲವನ್ನು ಸಾಗಿಸುವಲ್ಲಿ ಭಾರತದಿಂದ ದೊರೆಯುವ ಸಾಗಾಣಿಕ ವೆಚ್ಚದ ಪ್ರಮಾಣದ ಕುರಿತಾಗಿ ವಿಮರ್ಷೆ ನಡೆಸಲಿದೆ.