ದೇಶದ ಪರಮಾಣು ಉತ್ಪಾದನಾ ಸಾಮರ್ಥ್ಯವನ್ನು 10,000 ಮೆಗಾವ್ಯಾಟ್ಗೆ ಹೆಚ್ಚಿಸುವ ನಿಟ್ಟಿನಲ್ಲಿ, 700 ಮೆ.ವ್ಯಾ. ಸಾಮರ್ಥ್ಯದ ಪರಮಾಣು ಸ್ಥಾವರವನ್ನು ಸ್ಥಾಪಿಸಲು ಯೋಜನೆಯನ್ನು ಸರಕಾರವು ಹೊಂದಿರುವುದಾಗಿ ಪರಮಾಣು ಇಂಧನ ಆಯೋಗದ ಅಧಿಕಾರಿಗಳು ತಿಳಿಸಿದ್ದಾರೆ.
ಪ್ರಸಕ್ತ ದೇಶವು 4,000 ಮೆ.ವ್ಯಾ, ಸಾಮರ್ಥ್ಯದ ಪರಮಾಣು ಇಂಧನ ಉತ್ಪಾದನೆಯನ್ನು ಹೊಂದಿದ್ದು, ಆದರೆ, ಇದರ ಪರಮಾಣು ರಿಯಾಕ್ಟರುಗಳು ಯುರೇನಿಯಂ ಕೊರತೆಯನ್ನು ಎದುರಿಸುತ್ತಿದೆ.
ನೂತನ ಗಣಿ ಮತ್ತು ಮಿನರಲ್ ಪ್ರಕ್ರಿಯೆಗಳನ್ನು ಪ್ರಾರಂಭಿಸುವ ಮೂಲಕ ಯುರೇನಿಯಂ ಶೋಧವನ್ನು ವೃದ್ಧಿಸುವತ್ತ ಹೆಚ್ಚು ಪ್ರಾಮುಖ್ಯತೆಯನ್ನು ನೀಡಲಿದ್ದು, ಇದರಿಂದ ದೇಶದ ಪರಮಾಣು ಇಂಧನ ಕೊರತೆಯನ್ನು ನೀಗಿಸಲು ಸಾಧ್ಯವಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ನೂತನ ಗಣಿಗಳು ಸಿದ್ಧಗೊಂಡಾಗ ಮತ್ತು ಯುರೇನಿಯಂ ಉತ್ಪಾದನಾ ಪ್ರಮಾಣವು ಹೆಚ್ಚಳಗೊಂಡಾಗ 700 ಮೆ.ವ್ಯಾ. ರಿಯಾಕ್ಟರುಗಳ ಎಂಟು ನೂತನ ಸ್ಥಾವರ ಸ್ಥಾಪಿಸುವ ಯೋಜನೆಯನ್ನು ಹೊಂದಿದ್ದು, ಇದರ ಕಾರ್ಯವನ್ನು ಶೀಘ್ರದಲ್ಲೇ ಪ್ರಾರಂಭಿಸಲಾಗುವುದು ಎಂದು ಬಾಬಾ ಪರಮಾಣು ಸಂಶೋಧನಾ ಕೇಂದ್ರದ ನಿರ್ದೇಶಕ ಶ್ರೀಕುಮಾರ್ ಬ್ಯಾನರ್ಜಿ ತಿಳಿಸಿದ್ದಾರೆ.
ಸುಮಾರು 700 ಮೆ.ವ್ಯಾ. ಸಾಮರ್ಥ್ಯದ ಎಂಟು ರಿಯಾಕ್ಟರುಗಳು ಸುಮಾರು 5,600 ಮೆ.ವ್ಯಾ.ಸಾಮರ್ಥ್ಯವನ್ನು ಉಂಟುಮಾಡುವುದರೊಂದಿಗೆ, ಒಟ್ಟು ಪರಮಾಣು ಇಂಧನ ಉತ್ಪಾದನಾ ಸಾಮರ್ಥ್ಯವು 9,600 ಮೆ.ವ್ಯಾ.ಗಳಿಗೆ ತಲುಪಲಿದೆ ಎಂದು ಅವರು ಹೇಳಿದರು.
|