ಮಾರುತಿಯಿಂದ ಎಂ800ಯುನಿಕ್‌ ಕಾರ್ ಬಿಡುಗಡೆ   ನವದೆಹಲಿ, ಶುಕ್ರವಾರ, 25 ಜುಲೈ 2008( 16:41 IST )

ದೇಶದ ಕಾರ್‌‌ ಉತ್ಪಾದನೆಯಲ್ಲಿ ಮೂಂಚೂಣಿಯಲ್ಲಿರುಪ ಮಾರುತಿ ಸುಝುಕಿ ಕಂಪೆನಿ ಎಂ800 ಯುನಿಕ್‌ ಹೆಸರಿನ ನೂತನ ಕಾರನ್ನು ಬಿಡುಗಡೆ ಮಾಡಲು ನಿರ್ಧರಿಸಿದೆ ಎಂದು ಕಂಪೆನಿಯ ಮೂಲಗಳು ತಿಳಿಸಿವೆ. ಕಂಪೆನಿಯ ಹಳೆ ಮಾಡೆಲ್‌ ಎಂ 800 ಕಾರನ್ನು ಅಭಿವೃದ್ಧಿಪಡಿಸಿ ಅತ್ಯಾಧುನಿಕವಾಗಿ ಸಿದ್ಧಪಡಿಸಲಾದ ಎಂ800 ಯುನಿಕ್ ಕಾರನ್ನು ಪಡೆಯಲು 5,200 ರೂ.ಗಳನ್ನು ಹೆಚ್ಚುವರಿಯಾಗಿ ಪಾವತಿಸಬೇಕಾಗುವುದು ಎಂದು ಕಂಪೆನಿಯ ಮೂಲಗಳು ತಿಳಿಸಿವೆ. ಪ್ರಸಕ್ತ ಕಂಪೆನಿಯ ಎಂ 800 ಎಸಿ ಮಾಡೆಲ್ ಕಾರಿನ ದರ 2,11,176 ರೂ.ಗಳಾಗಿದ್ದು 2,16,376 ರೂ.ಗಳನ್ನು ಪಾವತಿಸಿದಲ್ಲಿ ಎಂ800 ಯುನಿಕ್ ಕಾರನ್ನು ಪಡೆಯಬಹುದಾಗಿದೆ. ಮಾರುತಿ ಸುಝುಕಿ ಕಾರನ್ನು ದೇಶಾದ್ಯಂತ ಮಾರುಕಟ್ಟೆಗೆ ಬಿಡುಗಡೆಗೊಳಿಸಲು ಸಿದ್ದತೆ ನಡೆಸಿದ್ದು, ಮುಂಬರುವ ಕೆಲ ದಿನಗಳಲ್ಲಿ ಗ್ರಾಹಕರು ಕಾರುಗಳನ್ನು ಖರೀದಿಸಬಹುದಾಗಿದೆ ಎಂದು ಕಂಪೆನಿ ತಿಳಿಸಿದೆ. ಎಂ800 ಯುನಿಕ್ ಮಾಡೆಲ್ ಕಾರಿನಲ್ಲಿ ಫ್ಯಾಬ್ರಿಕ್ ಪ್ಯಾಚ್, ಡೋರ್ ವಿಶೇಷತೆ ಸೇರಿದಂತೆ ಅತ್ಯಾಧುನಿಕ ತಂತ್ರಜ್ಞಾನವನ್ನು ಉಪಯೋಗಿಸಲಾಗಿದೆ ಎಂದು ಕಂಪೆನಿಯ ಮೂಲಗಳು ತಿಳಿಸಿವೆ.