ರೇಪೋ ದರ ಏರಿಕೆ: ಬ್ಯಾಂಕ್ ಬಡ್ಡಿದರ ಹೆಚ್ಚಳ ಸಾಧ್ಯತೆ ನವದೆಹಲಿ, ಮಂಗಳವಾರ, 29 ಜುಲೈ 2008( 16:21 IST )

ಭಾರತೀಯ ರಿಸರ್ವ್ ಬ್ಯಾಂಕ್ ರೇಪೋ ದರ ಮತ್ತು ನಗದು ಮೀಸಲು ಪ್ರಮಾಣ ದರವನ್ನು ಏರಿಸಿರುವುದರೊಂದಿಗೆ, ಬ್ಯಾಂಕುಗಳ ಸಾಲ ಮತ್ತು ಠೇವಣಿ ದರಗಳಲ್ಲಿ ಶೇ.0.5ರಷ್ಟು ಏರಿಕೆ ಉಂಟಾಗುವ ಸಾಧ್ಯತೆ ಇದೆ ಎಂದು ಬ್ಯಾಂಕುಗಳು ಅಭಿಪ್ರಾಯಪಟ್ಟಿವೆ. ನೈಜ ಪರಿಣಾಮದ ಬಗ್ಗೆ ವಿಮರ್ಷೆ ನಡೆಸಿ ಹಂತ ಹಂತವಾಗಿ ನಿರ್ಧಾರವನ್ನು ತೆಗೆದುಕೊಳ್ಳಲಾಗುವುದು, ಸಾಲ ಮತ್ತು ಠೇವಣಿ ದರಗಳಲ್ಲಿ ಕನಿಷ್ಟ 0.5ರಷ್ಟು ಹೆಚ್ಚಳದ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ ಎಂದು ರಾಷ್ಟ್ರೀಕೃತ ಪಂಜಾಬ್ ರಾಷ್ಟ್ರೀಯ ಬ್ಯಾಂಕ್‌ನ ಅಧ್ಯಕ್ಷ ಮತ್ತು ಆಡಳಿತ ನಿರ್ದೇಶಕ ಕೆ.ಸಿ.ಚಕ್ರವರ್ತಿ ತಿಳಿಸಿದ್ದಾರೆ. ಆರ್‌ಬಿಐಯ ಈ ನಿರ್ಧಾರದ ನಂತರ, ಬ್ಯಾಂಕಿನ ದ್ರವೀಕೃತ ಸ್ಥಿತಿಯ ಬಗ್ಗೆ ಬ್ಯಾಂಕ್‌ನ ಆಸ್ತಿ ಹೊಣೆ ಸಮಿತಿ(ಎಎಲ್‌ಸಿಒ)ಯು ಗಮನಹರಿಸಲಿದೆ ಎಂದು ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾದ ಮುಖ್ಯಸ್ಥ ಮತ್ತು ಆಡಳಿತ ನಿರ್ದೇಶಕ ಎಂ.ವಿ.ನಾಯರ್ ಹೇಳಿದ್ದಾರೆ.