ವಾರ್ಷಿಕ 2 ಲಕ್ಷ ಕಾರು ರಫ್ತಿಗೆ ಮಾರುತಿ ಯೋಜನೆ ನವದೆಹಲಿ, ಗುರುವಾರ, 21 ಆಗಸ್ಟ್ 2008( 17:52 IST )

ಜಾಗತಿಕ ಮಟ್ಟದಲ್ಲಿ ಪ್ರಮುಖ ಪಾತ್ರವಹಿಸಲು ಜಪಾನ್ ಮೂಲದ ಸುಝುಕಿ ಮೋಟಾರ್ಸ್ ಕಾರ್ಪೋರೇಶನ್‌ನ ಮಾರುತಿ ಸುಝುಕಿ ಇಂಡಿಯಾ, ಮುಂಬರುವ 2010-11ರ ವೇಳೆಗೆ ವಾರ್ಷಿಕವಾಗಿ 2 ಲಕ್ಷ ಕಾರುಗಳನ್ನು ರಫ್ತು ಮಾಡಲು ಉದ್ದೇಶಿಸಿದೆ ಎಂದು ಕಂಪೆನಿಯ ಮೂಲಗಳು ತಿಳಿಸಿವೆ. ದೇಶಿಯ ಮಾರುಕಟ್ಟೆಯಲ್ಲಿ 2010-11ರ ವೇಳೆಗೆ ಒಂದು ಮಿಲಿಯನ್ ಕಾರುಗಳನ್ನು ಮಾರಾಟ ಮಾಡುವ ಗುರಿಯನ್ನು ಹೊಂದಿದೆ. ಮುಂಬರುವ ಮೂರರಿಂದ ಐದು ವರ್ಷಗಳಲ್ಲಿ ಹೆಚ್ಚಿನ ಮೈಲೇಜ್ ಕೊಡುವ ಇಂಜಿನ್‌ಗಳನ್ನು ಮಾರುಕಟ್ಟೆಗೆ ಪರಿಚಯಿಸಲು ನಿರ್ಧರಿಸಿದೆ ಎಂದು ಕಂಪೆನಿ ತಿಳಿಸಿದೆ. 2007-08ರ ಸಾಲಿನಲ್ಲಿ 53 ಸಾವಿರ ಕಾರುಗಳನ್ನು ರಫ್ತು ಮಾಡಿ ಐತಿಹಾಸಿಕ ಸಾಧನೆಯನ್ನು ಮಾಡಿದ್ದು, ಮುಂಬರುವ 2010-11ರ ವೇಳೆಗೆ 2ಲಕ್ಷ ಕಾರುಗಳನ್ನು ರಫ್ತು ಮಾಡುವ ಗುರಿಯನ್ನು ಹೊಂದಿದೆ ಎಂದು ಮಾರುತಿ ಸುಝುಕಿ ಇಂಡಿಯಾದ ವ್ಯವಸ್ಥಾಪಕ ಹಾಗೂ ಕಾರ್ಯನಿರ್ವಾಹಕ ಅಧಿಕಾರಿ ಶಿಂಝೋ ನಕಾನಿಶಿ ತಿಳಿಸಿದ್ದಾರೆ. ಮಾರುತಿ ಸುಝುಕಿ ಉತ್ಪಾದನೆಯಾದ ಮಾಡೆಲ್-ಎ ಸ್ಟಾರ್ ಜಗತ್ತಿನ ಅತ್ಯುತ್ತಮ ಮಾಡೆಲ್‌ ಆಗಿದ್ದರಿಂದ ಮುಖ್ಯವಾಗಿ ಯುರೋಪ್ ಮತ್ತು ಇತರ ರಾಷ್ಟ್ರಗಳಿಗೆ ರಫ್ತು ಮಾಡಲಾಗುವುದು ಎಂದು ಹೇಳಿದ್ದಾರೆ.