ಉಕ್ಕು ದರ ಏರಿಕೆ ಪರಿಶೀಲನೆ ಸದ್ಯಕ್ಕಿಲ್ಲ ನವದೆಹಲಿ, ಶುಕ್ರವಾರ, 22 ಆಗಸ್ಟ್ 2008( 19:11 IST )

ಜಾಗತಿಕ ಮಾರುಕಟ್ಟೆಯಲ್ಲಿ ಉಕ್ಕಿನ ದರ ಸ್ಥಿರವಾಗಿದ್ದರಿಂದ ದೇಶಿಯ ಉಕ್ಕು ಉತ್ಪನ್ನಗಳ ದರ ಏರಿಕೆ ಪರಿಶೀಲನೆ ಸದ್ಯದಲ್ಲಿ ಅಗತ್ಯವಿಲ್ಲ ಎಂದು ಸರಕಾರ ಸ್ಪಷ್ಟಪಡಿಸಿದೆ ಜಾಗತಿಕ ಮಾರುಕಟ್ಟೆಯಲ್ಲಿ ಉಕ್ಕು ಉತ್ಪನ್ನಗಳ ದರಗಳು ನಿಯಂತ್ರಣದಲ್ಲಿರುವುದರಿಂದ ದರ ಏರಿಕೆ ಪರಿಶೀಲನೆ ಮಾಡುವಂತಹ ಯಾವುದೇ ಕಾರಣಗಳಿಲ್ಲ. ಆದರೆ ಉಕ್ಕು ಉತ್ಪಾದಕ ಕಂಪೆನಿಗಳು ದರ ಕಡಿಮೆ ಮಾಡುವ ಕುರಿತಂತೆ ಯೋಚಿಸುವುದು ಅಗತ್ಯವಾಗಿದೆ ಎಂದು ಉಕ್ಕು ಇಲಾಖೆಯ ಕಾರ್ಯದರ್ಶಿ ಪಿ.ಕೆ.ರಸ್ತೋಗಿ ತಿಳಿಸಿದ್ದಾರೆ. ಉಕ್ಕು ಇಲಾಖೆಯ ಕಾರ್ಯದರ್ಶಿ ಪಿ.ಕೆ.ರಸ್ತೋಗಿ ಅವರ ಹೇಳಿಕೆಗೆ ಸಮ್ಮತಿಸಿದ ಭಾರತೀಯ ಉಕ್ಕು ಪ್ರಾಧಿಕಾರದ ಮುಖ್ಯಸ್ಥ ಎಸ್.ಕೆ ರುಂಗ್ಟಾ , ಪ್ರಸ್ತುತ ವಿರುವ ಉಕ್ಕಿನ ದರವನ್ನು ಮುಂದುವರಿಸಿಕೊಂಡು ಹೋಗುವುದಾಗಿ ಹೇಳಿದ್ದಾರೆ. ಮೇ 7 ರಂದು ಪ್ರಧಾನ ಮಂತ್ರಿ ಮನಮೋಹನ್ ಸಿಂಗ್ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಉಕ್ಕು ಉತ್ಪಾದಕರು ಫ್ಲ್ಯಾಟ್ ಉಕ್ಕು ಪ್ರತಿ ಟನ್‌ಗೆ 4 ಸಾವಿರ ಹಾಗೂ ಸ್ಟ್ರಕ್ಚರಲ್ ಉಕ್ಕಿಗೆ ಪ್ರತಿಟನ್‌ಗೆ 2 ಸಾವಿರ ದರ ಇಳಿಕೆ ಮಾಡುವುದಾಗಿ ಭರವಸೆ ನೀಡಿರುವುದನ್ನು ಸ್ಮರಿಸಬಹುದಾಗಿದೆ.