ಜನರಲ್ ಮೋಟಾರ್ಸ್‌ನಿಂದ ಸಣ್ಣ ಕಾರು ಮುಂಬೈ, ಗುರುವಾರ, 28 ಆಗಸ್ಟ್ 2008( 16:29 IST )

ಭಾರತದಲ್ಲಿ 2009ರೊಳಗೆ ಸಣ್ಣ ಕಾರನ್ನು ಪ್ರಾರಂಭಿಸಲು ಜನರಲ್ ಮೋಟಾರ್ಸ್ ಕಾರ್ಪ್ ಯೋಜಿಸಿದೆ. ಆದರೆ, ಟಾಟಾ ಮೋಟಾರ್ಸ್‌ ಬಿಡುಗಡೆಗೊಳಿಸುವ ನ್ಯಾನೋದಂತಹ ಕಡಿಮೆ ವೆಚ್ಚದ ಸಣ್ಣ ಕಾರನ್ನು ಪ್ರಾರಂಭಿಸುವ ಯೋಜನೆಯನ್ನು ಹೊಂದಿಲ್ಲ ಎಂದು ಜನರಲ್ ಮೋಟಾರ್ಸ್ ಸ್ಪಷ್ಟಪಡಿಸಿದೆ. ಭಾರತವು ಜಾಗತಿಕ ಮಾರುಕಟ್ಟೆಯಲ್ಲಿ ಪ್ರಮುಖ ಮಾರುಕಟ್ಟೆ ಕೇಂದ್ರವಾಗಿ ಹೊರಹೊಮ್ಮುತ್ತಿದ್ದು, ಈ ನಿಟ್ಟಿನಲ್ಲಿ ಭಾರತದಲ್ಲಿ ಸಣ್ಣಕಾರು ಪ್ರಾರಂಭಿಸುವ ಚಿಂತನೆಯನ್ನು ಕಂಪನಿಯು ನಡೆಸಿದೆ ಎಂದು ಜನರಲ್ ಮೋಟಾರ್ಸ್‌ನ ಮುಖ್ಯಸ್ಥರು ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ. 2010ರ ವೇಳೆಗೆ ಭಾರತದಲ್ಲಿ ವಾರ್ಷಿಕ ಪ್ರಯಾಣಿಕ ವಾಹನದ ಮಾರಾಟ ಪ್ರಮಾಣವು ಎರಡು ದಶಲಕ್ಷಕ್ಕೆ ಏರುವ ಸಂಭವವಿದ್ದು, ಇದರಲ್ಲಿ ಸಣ್ಣ ಕಾರಿನ ಪ್ರಮಾಣವು ಮೂರನೇ ಎರಡಂಶದಷ್ಟಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.