ಸಿಂಗೂರ್-ತೀವ್ರವಾದ ಪ್ರತಿಭಟನೆ: ನ್ಯಾನೋ ಕಾರ್ಯ ಸ್ಥಗಿತ ಸಿಂಗೂರ್, ಶುಕ್ರವಾರ, 29 ಆಗಸ್ಟ್ 2008( 14:33 IST )

ಸಿಂಗೂರಿನಲ್ಲಿರುವ ಟಾಟಾ ಮೋಟಾರ್ಸ್‌ನ ನ್ಯಾನೋ ಸ್ಥಾವರದ ಪ್ರವೇಶವನ್ನು ತೃಣಮೂಲ ಕಾಂಗ್ರೆಸ್ ಪ್ರತಿಭಟನಾಕಾರರು ನಿರ್ಬಂಧಿಸಿದ್ದು, ಘಟಕದ ಕಾರ್ಯವು ಸ್ಥಗಿತಗೊಂಡಿದೆ ಎಂದು ಟಾಟಾ ವಕ್ತಾರರು ತಿಳಿಸಿದ್ದಾರೆ. ನ್ಯಾನೋ ಸ್ಥಾವರದ ಸುತ್ತಲಿನ ಪ್ರದೇಶವನ್ನು ಮಮತಾ ಬ್ಯಾನರ್ಜಿ ಬೆಂಬಲಿಗರು ಸುತ್ತುವರಿದಿದ್ದು, ನ್ಯಾನೋ ನೌಕರರನ್ನು ಘಟಕದೊಳಗೆ ಪ್ರವೇಶಿಸಲು ಬಿಡುತ್ತಿಲ್ಲ. ಹಿಂಸಾಚಾರಕ್ಕೆ ಅಂಜಿ ನ್ಯಾನೋ ನೌಕರರು ಸ್ಥಾವರದಿಂದ ದೂರ ಉಳಿದಿದ್ದಾರೆ ಎಂದು ವಕ್ತಾರರು ಹೇಳಿದ್ದಾರೆ. ಕೃಷಿ ಜಾಮಿ ರಕ್ಷಾ ಸಮಿತಿಯ ಪಾಲುದಾರ ಮತ್ತು ನಕ್ಸಲೈಟ್ ನಾಯಕ ಪೂರ್ಣೇಂದು ಬೋಸ್, ನ್ಯಾನೋ ಘಟಕವನ್ನು ನಿರ್ಬಂಧಿಸುವುದಾಗಿ ಘೋಷಿಸಿದ್ದರು. ಟಾಟಾ ಸ್ಥಾವರದ ತೃಣಮೂಲ ಕಾಂಗ್ರೆಸ್‌ನ ಪ್ರತಿಭಟನೆಯಲ್ಲಿ ಬೋಸ್ ಅವರೂ ಭಾಗಿಯಾಗಿದ್ದರು. ಆಗಸ್ಟ್ 20ರಂದು ಸರಕಾರದೊಂದಿಗಿನ ಮಾತುಕತೆಯಲ್ಲಿ ಭಾಗವಹಿಸಲು ಮಮತಾ ಬೋಸ್ ಹೆಸರನ್ನೂ ಪ್ರಸ್ತಾಪಿಸಿದ್ದರು. ತೃಣಮೂಲ ಕಾಂಗ್ರೆಸ್‌ನ ಈ ಪಟ್ಟುಬಿಡದ ಪ್ರತಿಭಟನೆಯು 400 ಎಕರೆ ಜಮೀನನ್ನು ರೈತರಿಗೆ ಹಿಂತಿರುಗಿಸಬೇಕೆನ್ನುವ ತೃಣಮೂಲ ಬೇಡಿಕೆಯನ್ನು ರಾಜ್ಯ ಸರಕಾರವು ಒಪ್ಪಿಕೊಳ್ಳಲೇಬೇಕಾದ ಪರಿಸ್ಥಿತಿಯನ್ನು ಉಂಟುಮಾಡಿದೆ.