ತೈಲ ಸಂಸ್ಥೆಗಳಿಂದ ಜೆಟ್ ಇಂಧನ ಬೆಲೆ ಕಡಿತ ನವದೆಹಲಿ, ಸೋಮವಾರ, 1 ಸೆಪ್ಟೆಂಬರ್ 2008( 10:22 IST )

ಸರಕಾರ ನಿಯಂತ್ರಿತ ತೈಲ ಸಂಸ್ಥೆಗಳು ಜೆಟ್ ಇಂಧನದ ಬೆಲೆಯನ್ನು ಶೇ.16ರಷ್ಟು ಕಡಿತಗೊಳಿಸಿದ್ದು, ಇದು ಮಂಗಳವಾರದಿಂದ ಜಾರಿಗೆ ಬರಲಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿನ ಕಚ್ಚಾತೈಲ ಬೆಲೆಯ ಇಳಿಕೆಯ ಹಿನ್ನೆಲೆಯಲ್ಲಿ ಎಟಿಎಫ್ ಬೆಲೆಯನ್ನು ಇಳಿಕೆಗೊಳಿಸಲಾಗಿದೆ ಎಂದು ದೇಶದ ಅರ್ಧದಷ್ಟು ಇಂಧನ ಮಾರುಕಟ್ಟೆಯನ್ನು ನಿಯಂತ್ರಿಸುವ ಇಂಡಿಯನ್ ಆಯಿಲ್ ಕಾರ್ಪ್‌ನ ಅಧಿಕಾರಿಗಳು ತಿಳಿಸಿದ್ದಾರೆ. ದೇಶೀಯ ವಿಮಾನಗಳಿಗೆ ಜೆಟ್ ಇಂಧನವನ್ನು ಪ್ರತಿ ಕಿಲೋಲೀಟರ್‌ಗೆ 11784 ರೂ.ಗಳಷ್ಟು ಕಡಿತಗೊಳಿಸಿದ್ದು, ಇದು ಸ್ಥಳೀಯ ತೆರಿಗೆ ಪಾವತಿಗೆ ಅನ್ವಯಿಸುವುದಿಲ್ಲ. ಜುಲೈ ಮತ್ತು ಆಗಸ್ಟ್ ತಿಂಗಳಲ್ಲಿನ ನಿರಂತರ ಜೆಟ್ ಇಂಧನ ಬೆಲೆಯ ಏರಿಕೆಯ ನಂತರ, ಎಟಿಎಫ್ ಬೆಲೆಯನ್ನು ತಗ್ಗಿಸಲಾಗಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿನ ತೈಲ ಬೆಲೆಗೆ ಅನುಗುಣವಾಗಿ, ಭಾರತೀಯ ತೈಲ ಮಾರುಕಟ್ಟೆ ಕಂಪನಿಗಳಾದ ಇಂಡಿಯನ್ ಆಯಿಲ್, ಭಾರತ್ ಪೆಟ್ರೋಲಿಯಂ ಮತ್ತು ಹಿಂದೂಸ್ಥಾನ್ ಪೆಟ್ರೋಲಿಯಂ ಪ್ರತಿ ತಿಂಗಳಿಗೊಮ್ಮೆ ತೈಲ ಬೆಲೆ ವಿಮರ್ಷೆಯನ್ನು ನಡೆಸುತ್ತದೆ.