ಪುಸಾ 1121 ಮಾದರಿಯ ಅಕ್ಕಿಯನ್ನು ಅಕ್ಟೋಬರ್ 15ರಿಂದ ರಫ್ತು ಮಾಡಲು ಸರಕಾರವು ಅನುಮತಿ ನೀಡಿದೆ ಎಂದು ಹಿರಿಯ ಸರಕಾರಿ ಅಧಿಕಾರಿಗಳು ತಿಳಿಸಿದ್ದಾರೆ.
ಅಕ್ಟೋಬರ್ 15ರಿಂದ ಪುಸಾ 1121 ಅಕ್ಕಿಯನ್ನು ವಿದೇಶಗಳಲ್ಲಿ ಅದರಲ್ಲೂ ಮುಖ್ಯವಾಗಿ ಕೊಲ್ಲಿ ರಾಷ್ಟ್ರಗಳಿಗೆ ರಫ್ತು ಮಾಡಲಾಗುವುದು ಎಂದು ಕೃಷಿ ಮತ್ತು ಸಂಸ್ಕರಣ ಆಹಾರ ಉತ್ಪನ್ನ ರಫ್ತು ಅಭಿವೃದ್ಧಿ ಮಂಡಳಿ(ಅಪೆಡಾ)ದ ಹಿರಿಯ ಅಧಿಕಾರಿಗಳು ಹೇಳಿದ್ದಾರೆ.
ಬಾಸ್ಮತಿ ಅಕ್ಕಿಯಷ್ಟೇ ಗುಣಮಟ್ಟವನ್ನು ಹೊಂದಿರುವ ಪೂಸಾ 1121 ಅಕ್ಕಿ ರಫ್ತು ಮಾಡುವ ವ್ಯಾಪಾರಿಗಳು ಅಪೆಡಾದೊಂದಿಗೆ ಅಕ್ಟೋಬರ್ 15ರೊಳಗೆ ನೋಂದಣಿ ಮಾಡಿಕೊಳ್ಳಬಹುದಾಗಿದೆ.
ಪುಸಾ 1121 ಅಕ್ಕಿಯನ್ನು ಮುಖ್ಯವಾಗಿ ಭಾರತದ ಎರಡು ಪ್ರಮುಖ ಅಕ್ಕಿ ಉತ್ಪಾದನಾ ರಾಜ್ಯಗಳಾದ ಪಂಜಾಬ್ ಮತ್ತು ಹರಿಯಾಣದಲ್ಲಿ ಉತ್ಪಾದಿಸಲಾಗುತ್ತದೆ.
ವಿದೇಶಿ ವ್ಯಾಪಾರದ ಪ್ರಧಾನ ನಿರ್ದೇಶಕರು(ಡಿಜಿಟಿಎಫ್) ಪುಸಾ 1121 ಮೇಲಿನ ರಫ್ತು ನಿಷೇಧವನ್ನು ಹಿಂತೆಗೆದುಕೊಂಡಿದ್ದು, ಇನ್ನಷ್ಟೇ ನಿರ್ಧರಿಸಬೇಕಾಗಿರುವ ಕನಿಷ್ಟ ರಫ್ತು ಬೆಲೆಯಲ್ಲಿ ವ್ಯಾಪಾರಿಗಳು ಈ ಅಕ್ಕಿಯನ್ನು ರಫ್ತು ಮಾಡಬಹುದಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
|