ರಾಜ್ಯದಲ್ಲಿ 'ನ್ಯಾನೋ' ಸ್ಥಾಪನೆಗೆ ಮನವೊಲಿಕೆ: ನಿರಾಣಿ ಹುಬ್ಬಳ್ಳಿ, ಬುಧವಾರ, 10 ಸೆಪ್ಟೆಂಬರ್ 2008( 11:34 IST )

ಪಶ್ಚಿಮಬಂಗಾಳದ ಸಿಂಗೂರ್‌ನಲ್ಲಿ ವಿರೋಧಪಕ್ಷಗಳ ಪ್ರತಿಭಟನೆಗೆ ತತ್ತರಿಸಿರುವ ಟಾಟಾ ಕಂಪೆನಿಯ ನ್ಯಾನೋ ಕಾರು ಉತ್ಪಾದನಾ ಘಟಕವನ್ನು ಕರ್ನಾಟಕದ ಧಾರವಾಡದಲ್ಲಿ ಸ್ಥಾಪಿಸುವಂತೆ ಮನವೊಲಿಸಲು ರಾಜ್ಯ ಸರ್ಕಾರ ಗಂಭೀರ ಚಿಂತನೆ ನಡೆಸಿದೆ. ನಗರದಲ್ಲಿ ಸುದ್ದಿಗಾರರಿಗೆ ಈ ಕುರಿತು ಮಾಹಿತಿ ನೀಡಿದ ಕೈಗಾರಿಕೆ ಸಚಿವ ಮುರುಗೇಶ್ ನಿರಾಣಿ, ಟಾಟಾ ಕಂಪೆನಿಯ ಮಹತ್ವಕಾಂಕ್ಷೆಯ ನ್ಯಾನೋ ಕಾರು ಘಟಕವನ್ನು ಧಾರವಾಡದಲ್ಲಿ ಸ್ಥಾಪಿಸುವಂತೆ ಮತ್ತೆ ಮನವಿ ಮಾಡಲಾಗುವುದು ಎಂದು ತಿಳಿಸಿದರು. ಈ ಸಂದರ್ಭದಲ್ಲಿ ಇದಕ್ಕೆ ಸಂಬಂಧಿಸಿದಂತೆ ಬೇಕಾಗುವ ಅಗತ್ಯ ಸವಲತ್ತು ನೀಡಲು ಸರ್ಕಾರ ಬದ್ಧವಿರುವುದಾಗಿ ರತನ್ ಟಾಟಾ ಅವರಿಗೆ ಆಹ್ವಾನ ನೀಡಲಾಗುವುದು ಎಂದು ಅವರು ತಿಳಿಸಿದರು. ಒಂದು ವೇಳೆ ಸಿಂಗೂರ್ ಸಮಸ್ಯೆ ಬಗೆಹರಿದರೂ, ಎರಡನೇ ಘಟಕವನ್ನು ಕರ್ನಾಟಕದಲ್ಲಿ ತೆರೆಯುವಂತೆ ಕೇಳಿಕೊಳ್ಳಲಾಗುವುದು ಎಂದು ನಿರಾಣಿ ಸ್ಪಷ್ಟಪಡಿಸಿದರು.