ಅಮೆರಿಕ ಆರ್ಥಿಕತೆಯು ಮಂಕು ಹಿಡಿದಿರುವುದರೊಂದಿಗೆ ಮತ್ತು ಹೆಚ್ಚಿನ ಕಂಪನಿಗಳು ಐಟಿ ವೆಚ್ಚವನ್ನು ಕಡಿತಗೊಳಿಸುತ್ತಿರುವ ಹಿನ್ನೆಲೆಯಲ್ಲಿ, ಪ್ರಮುಖ ಭಾರತೀಯ ಐಟಿ ಕಂಪನಿಗಳು ಯುರೋಪ್, ಪಶ್ಚಿಮ ಏಶಿಯಾ, ಲ್ಯಾಟಿನ್ ಅಮೆರಿಕ ಮುಂತಾದ ನೂತನ ಪ್ರದೇಶಗಳತ್ತ ದೃಷ್ಟಿ ಹಾಯಿಸಿವೆ.
ಆದರೆ, ಭಾಷೆ, ಕಾರ್ಮಿಕ ನೀತಿ, ಮುಂತಾದ ಅನೇಕ ವಿಚಾರಗಳಲ್ಲಿ ಭಿನ್ನತೆ ಕಂಡುಬರುವುದರಿಂದ ಈ ಪ್ರದೇಶಗಳಲ್ಲಿ ವ್ಯವಹಾರ ನಡೆಸಲು ಭಾರತೀಯ ಕಂಪನಿಗಳಿಗೆ ಕಷ್ಟಕರವಾಗುವ ಸಾಧ್ಯತೆ ಇದ್ದು, ಇದು ಕಂಪನಿಯ ಲಾಭಾಂಶದ ಮೇಲೆ ಪರಿಣಾಮ ಬೀರಲಿದೆ ಎಂದು ಉದ್ಯಮ ವಿಶ್ಲೇಷಕರು ಹೇಳುತ್ತಾರೆ.
ಅಮೆರಿಕ ಅವಲಂಬನೆಯನ್ನು ಶೇ.40ರಿಂದ ಶೇ.60ರಷ್ಟು ಕಡಿತಗೊಳಿಸಲು ಇನ್ಫೋಸಿಸ್ ನಿರ್ಧರಿಸಿರುವುದಾಗಿ ಈ ವರ್ಷದ ಪ್ರಾರಂಭದಲ್ಲಿ ಇನ್ಫೋಸಿಸ್ ಸಿಇಒ ಗೋಪಾಲಕೃಷ್ಣನ್ ಹೇಳಿದ್ದರು. ಪ್ರಸಕ್ತ ಹಣಕಾಸು ವರ್ಷದ ಎರಡನೇ ತ್ರೈಮಾಸದಲ್ಲಿ ಇನ್ಫೋಸಿಸ್‌ನ ಯುರೋಪ್ ಆದಾಯವು ಶೇ.28.1ರಷ್ಟಿದ್ದು, ಇದರಲ್ಲಿ ಉತ್ತರ ಅಮೆರಿಕದ ಭಾಗವು ಶೇ.61.5ರಷ್ಟಿತ್ತು.
ಇನ್ಫೋಸಿಸ್‌ನಂತೆ, ಟಿಸಿಎಸ್, ಎಚ್‌ಸಿಎಲ್, ವಿಪ್ರೋ, ಸತ್ಯಂ ಮುಂತಾದ ಕಂಪನಿಗಳು ಅಮೆರಿಕ ಹೊರತಾಗಿ ಇತರ ಪ್ರದೇಶಗಳಾದ ಆಸ್ಟ್ರೇಲಿಯಾ, ಪಶ್ಚಿಮ ಏಶಿಯಾ, ಏಶಿಯಾ ಪೆಸಿಫಿಕ್ ಮುಂತಾದ ಕಡೆಗಳಲ್ಲಿ ಬಂಡವಾಳ ಹೂಡಲು ಆಸಕ್ತಿ ಹೊಂದಿವೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ