ಯಾಹೂ ಅಂತರ್ಜಾಲ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಜೆರ್ರಿ ಯಾಂಗ್ ಅವರನ್ನು ಶೀಘ್ರದಲ್ಲಿ ಹುದ್ದೆಯಿಂದ ಬದಲಿಸಲಾಗುವುದು ಎಂದು ಅಡಳಿತ ಮಂಡಳಿಯ ಹೇಳಿಕೆಯ ಹಿನ್ನೆಲೆಯಲ್ಲಿ ಮಂಗಳವಾರದ ಶೇರುಪೇಟೆಯಲ್ಲಿ ಶೇ. 4 ರಷ್ಟು ಶೇರುದರಗಳು ಏರಿಕೆಯಾಗಿವೆ ಎಂದು ಕಂಪೆನಿಯ ಮೂಲಗಳು ತಿಳಿಸಿವೆ.
ಜೆರ್ರಿ ಯಾಂಗ್ ಮತ್ತೆ ಯಾಹೂ ಮುಖ್ಯಸ್ಥರ ಹುದ್ದೆಯನ್ನು ಅಲಂಕರಿಸಲಿದ್ದು, ತಂತ್ರಜ್ಞಾನ ಮತ್ತು ಯೋಜನೆಯನ್ನು ಸಾಧಿಸಲು ಅನುಸರಿಸುವ ನಿಯಮಗಳ ಮೇಲ್ವಿಚಾರಣೆಯನ್ನು ನೋಡಿಕೊಳ್ಳಲಿದ್ದಾರೆ.ಯಾಹೂ ಕಂಪೆನಿಯನ್ನು ಖರೀದಿಸಲು ಆಸಕ್ತಿ ವಹಿಸಿದ್ದ ಮೈಕ್ರೋಸಾಫ್ಟ್‌ ಕಂಪೆನಿಗೆ ಯಾಂಗ್ ಅಡ್ಡಿಯಾಗಿದ್ದರು ಎಂದು ಶೇರುದಾರರು ಅಸಮಧಾನ ವ್ಯಕ್ತಪಡಿಸಿದ್ದರು.
ಎದುರಾಳಿ ಕಂಪೆನಿಯಾದ ಗೂಗಲ್, ಸರ್ಚ್ ಜಾಹೀರಾತು ಪಾಲುದಾರಿಕೆಯಲ್ಲಿ ಯಾಹೂ ಸಂಸ್ಥೆಯ ಕೈ ಬಿಟ್ಟ ಹಿನ್ನೆಲೆಯಲ್ಲಿ ಹೂಡಿಕೆದಾರರು ಹಾಗೂ ತಜ್ಞರಿಂದ ಮುಖ್ಯಕಾರ್ಯನಿರ್ವಹಣಾಧಿಕಾರಿ ಜೆರ್ರಿ ಯಾಂಗ್ ಭಾರಿ ಟೀಕೆಗೆ ಒಳಗಾಗಿ, ಅಧಿಕಾರವನ್ನು ತ್ಯಜಿಸುವಂತೆ ಅಡಳಿತ ಮಂಡಳಿಯ ಮೂಲಕ ಹೂಡಿಕೆದಾರರು ಒತ್ತಡ ತಂದಿದ್ದರು ಎನ್ನಲಾಗಿದೆ.
ಜೂನ್ 2007ರಲ್ಲಿ ಯಾಹೂ ಕಂಪೆನಿಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ಅಧಿಕಾರ ಸ್ವೀಕರಿಸಿದ ಯಾಂಗ್,ಯಾಹೂ ಸಹಸಂಸ್ಥಾಪಕರಲ್ಲಿ ಒಬ್ಬರಾಗಿದ್ದರಿಂದ ಅಂತರ್ಜಾಲ ಸಂಸ್ಥೆಯನ್ನು ಬಲಪಡಿಸುವರೆನ್ನುವ ವಿಶ್ವಾಸ ಹೂಡಿಕೆದಾರರಲ್ಲಿತ್ತು. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ