ಜಾಗತಿಕ ಆರ್ಥಿಕ ಬಿಕ್ಕಟ್ಟಿನಿಂದಾಗಿ ಕಾರುಗಳ ಬೇಡಿಕೆ ಕುಸಿದ ಹಿನ್ನೆಲೆಯಲ್ಲಿ ಫಿಯೆಟ್ ಗ್ರೂಪ್ ಪ್ರಥಮ ಬಾರಿಗೆ ಇಟಲಿಯಲ್ಲಿರುವ ಕಾರು ತಯಾರಿಕೆ ಘಟಕಗಳಲ್ಲಿ ಉತ್ಪಾದನೆಯನ್ನು ಸ್ಥಗಿತಗೊಳಿಸಿ 50 ಸಾವಿರ ನೌಕಕರಿಗೆ ಒಂದು ತಿಂಗಳ ಅವಧಿಗೆ ರಜೆ ಘೋಷಿಸಿದೆ.
ಮುಂಬರುವ ಜನೆವರಿ 14 ರ ವರಗೆ ರಜೆಯನ್ನು ಘೋಷಿಸಲಾಗಿದ್ದು, ಇಟಲಿಯಲ್ಲಿರುವ 20 ಘಟಕಗಳನ್ನು ಸ್ಥಗಿತಗೊಳಿಸಿ 80 ಸಾವಿರ ಉದ್ಯೋಗಿಗಳಲ್ಲಿ 48 ಸಾವಿರ ನೌಕರರಿಗೆ ಕಡ್ಡಾಯ ರಜೆ ಘೋಷಿಸಿದೆ ಎಂದು ಕಂಪೆನಿಯ ಮೂಲಗಳು ತಿಳಿಸಿವೆ.
ತಾತ್ಕಾಲಿಕ ವಜಾ ಯೋಜನೆಯಲ್ಲಿ ರಜೆಯಲ್ಲಿರುವ ನೌಕರರಿಗೆ ಸರಕಾರ ಹಾಗೂ ಕಂಪೆನಿ ಜಂಟಿಯಾಗಿ ಸಂಬಳವನ್ನು ನೀಡಲಾಗುವುದು ಎಂದು ಕಂಪೆನಿಯ ಅಡಳಿತ ಮಂಡಳಿಯ ಅಧಿಕಾರಿಗಳು ತಿಳಿಸಿದ್ದಾರೆ.
ಯುರೋಪ್ ಮಾರುಕಟ್ಟೆಯ ನವೆಂಬರ್ ತಿಂಗಳ ಅವಧಿಯಲ್ಲಿ ಕಾರುಗಳ ಮಾರಾಟ ಶೇ.26 ರಷ್ಟು ಇಳಿಕೆಯಾಗಿದ್ದು, ಫಿಯೆಟ್ ಕಾರುಗಳ ಮಾರಾಟದಲ್ಲಿ ಶೇ.30 ರಷ್ಟು ಕುಸಿತವಾಗಿದೆ.
ಯುರೋಪ್ ಮಾರುಕಟ್ಟೆಯಲ್ಲಿ ವಾಹನಗಳ ಮಾರಾಟ ಕುಸಿತ ಕಂಡರೂ ಶೇರುಪೇಟೆಯಲ್ಲಿ ಶೇ.8.3ರಷ್ಟು ಏರಿಕೆ ಕಂಡಿದೆ ಎಂದು ಫಿಯೆಟ್ ಗ್ರೂಪ್ ಅಟೋಮೊಬೈಲ್ಸ್ ಹೊರಡಿಸಿದ ಪ್ರಕಟಣೆಯಲ್ಲಿ ತಿಳಿಸಿದೆ.
ಫಿಯೆಟ್ ಕಳೆದ ವರ್ಷದ ನವೆಂಬರ್ ತಿಂಗಳಿನಲ್ಲಿ 94,600 ಕಾರುಗಳನ್ನು ಮಾರಾಟ ಮಾಡಿ ದಾಖಲೆ ಸ್ಥಾಪಿಸಿತ್ತು. ಆದರೆ ಪ್ರಸಕ್ತ ವರ್ಷ 71 ಸಾವಿರ ಕಾರುಗಳನ್ನು ಮಾರಾಟ ಮಾಡಿದೆ ಎಂದು ಕಂಪೆನಿಯ ಮೂಲಗಳು ತಿಳಿಸಿವೆ. |