ಜಾಗತಿಕ ಹಣಕಾಸು ಬಿಕ್ಕಟ್ಟಿನ ಬಿಸಿ ಅನುಭವಿಸುತ್ತಿರುವ ಭಾರತದಲ್ಲಿ ಆರ್ಥಿಕ ಸ್ಥಿತಿಗೆ ಚೈತನ್ಯ ತುಂಬುವ ನಿಟ್ಟಿನಲ್ಲಿ ಕೇಂದ್ರವು ಬಹುನಿರೀಕ್ಷಿತ ಎರಡನೇ ಉತ್ತೇಜಕ ಪ್ಯಾಕೇಜನ್ನು ಎರಡು-ಮೂರು ದಿನಗಳಲ್ಲೇ ಘೋಷಿಸಲಿದೆ.
"ಈ ಬಗ್ಗೆ ನಾವು ಚರ್ಚೆ ಮಾಡಿದ್ದೇವೆ. ಇನ್ನೆರಡು ದಿನಗಳಲ್ಲಿ ಇದು ಕಾರ್ಯಗತವಾಗಬೇಕಿದೆ" ಎಂದು ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಕಮಲ್ ನಾಥ್ ಸುದ್ದಿಗಾರರಿಗೆ ಮಂಗಳವಾರ ತಿಳಿಸಿದರು.
ಡಿಸೆಂಬರ್ 7ರಂದು ಘೋಷಿಸಿದ ಮೊದಲ ಉತ್ತೇಜನಾ ಪ್ಯಾಕೇಜಿನಲ್ಲಿ ಸರಕಾರವು, ಶೇ.4 ಅಬಕಾರಿ ಸುಂಕ ಕಡಿತ ಮತ್ತು 20 ಸಾವಿರ ಕೋಟಿ ರೂ.ಗಳ ಹೆಚ್ಚುವರಿ ಸಾರ್ವಜನಿಕ ವೆಚ್ಚ ಘೋಷಿಸಿತ್ತು.
ಎರಡನೇ ಆರ್ಥಿಕ ಸ್ಥಿತಿ ಉತ್ತೇಜನಾ ಪ್ಯಾಕೇಜ್ ಹೆಚ್ಚು ಮಹತ್ವ ಪಡೆದುಕೊಂಡಿದೆ. ಇದಕ್ಕೆ ಕಾರಣವೆಂದರೆ, ಕೈಗಾರಿಕಾ ಪ್ರಗತಿ ದರವು ಅಕ್ಟೋಬರ್ ತಿಂಗಳಲ್ಲಿ 15 ವರ್ಷಗಳ ಬಳಿಕ ಶೇ.0.4 ಕುಸಿದಿದ್ದು, ಇದೇ ಅವಧಿಯಲ್ಲಿ ರಫ್ತು ಪ್ರಮಾಣ ಕೂಡ ಶೇ.12.1ರಷ್ಟು ಹಿನ್ನಡೆ ಕಂಡಿದೆ.
ಹಣಕಾಸು ಉತ್ತೇಜನ ಮಾತ್ರವಲ್ಲದೆ, ರಿಸರ್ವ್ ಬ್ಯಾಂಕ್ ಕೂಡ ಹಲವಾರು ಉತ್ತೇಜಕ ಕ್ರಮಗಳ ಮೂಲಕ, ವಿತ್ತ ಸ್ಥಿತಿ ಸುಧಾರಣೆಗೆ ಪ್ರಯತ್ನಿಸಿತ್ತು. ಮಂಗಳವಾರ ಸಂಸತ್ತಿನಲ್ಲಿ ಮಂಡಿಸಲಾದ ಮಧ್ಯ ವಾರ್ಷಿಕ ಆರ್ಥಿಕ ಪರಿಶೀಲನಾ ವರದಿಯಲ್ಲಿ, ಈ ಹಣಕಾಸು ವರ್ಷಕ್ಕೆ ಶೇ.7ರ ಅಭಿವೃದ್ಧಿ ದರ ಅಂದಾಜು ಮಾಡಲಾಗಿದ್ದು, ಇದು ಹಿಂದಿನ ಹಣಕಾಸು ವರ್ಷಕ್ಕಿಂತ ಶೇ.2ರಷ್ಟು ಕಡಿಮೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ