ದೇಶದ ಪ್ರಧಾನ ನಾಲ್ಕು ಲೆಕ್ಕಪತ್ರ ಘಟಕಗಳ ಭಾಗವಾಗಿರುವ ಡೆಲೊಯ್ಟ್ ಹಸ್ಕಿನ್ಸ್ ಎಂಡ್ ಸೆಲ್ಸ್ ಮತ್ತು ಕೆಪಿಎಂಜಿಗಳನ್ನು ಸತ್ಯಂ ಕಂಪ್ಯೂಟರ್ಸ್ ಸರ್ವಿಸಸ್ಗೆ ಜಂಟಿ ಸ್ವಾಯತ್ತ ಲೆಕ್ಕಪತ್ರಾಧಿಕಾರಿಗಳಾಗಿ (ಆಡಿಟರ್) ನೇಮಿಸಲಾಗಿದೆ.
ಕಳೆದ ಏಳು ವರ್ಷಗಳಿಂದ ಸುಳ್ಳು ಲೆಕ್ಕಪತ್ರ ತೋರಿಸಿರುವುದಾಗಿ ಸತ್ಯಂನ ಮಾಜಿ ಮುಖ್ಯಸ್ಥ ರಾಮಲಿಂಗ ರಾಜು ದೇಶದ ಅತಿದೊಡ್ಡ ಹಗರಣದಲ್ಲಿ ಭಾಗಿಯಾಗಿರುವುದನ್ನು ಒಪ್ಪಿಕೊಂಡ ಬಳಿಕ, ರಚಿಸಲಾಗಿರುವ ತ್ರಿಸದಸ್ಯ ಸತ್ಯಂ ಮಂಡಳಿಯು, ಹೊಸ ಜಂಟಿ ಲೆಕ್ಕಪತ್ರಾಧಿಕಾರಿಗಳನ್ನು ಶೀಘ್ರವೇ ನೇಮಿಸುವುದಾಗಿ ಈ ಮೊದಲು ಹೇಳಿತ್ತು.
ಪ್ರಮುಖ ನಾಲ್ಕು ಅಕೌಂಟಿಂಗ್ ಸಂಸ್ಥೆಗಳಲ್ಲಿ ಹಸ್ಕಿನ್ಸ್, ಕೆಪಿಎಂಜಿ ಅಲ್ಲದೆ, ಸತ್ಯಂನ ಈ ಹಿಂದಿನ ಲೆಕ್ಕಪತ್ರ ಸಂಸ್ಥೆ ಪ್ರೈಸ್ವಾಟರ್ಕೂಪರ್ಸ್ ಕೂಡ ಸೇರಿತ್ತು. ಅರ್ನೆಸ್ಟ್ ಎಂಡ್ ಯಂಗ್ ಎಂಬುದು ಈ 'ಬಿಗ್ ಫೋರ್'ನ ಮತ್ತೊಂದು ಸದಸ್ಯ. ಸತ್ಯಂ ಮಂಡಳಿಯು ಈ ಪ್ರಧಾನ ನಾಲ್ಕು ಲೆಕ್ಕಪತ್ರ ಸಂಸ್ಥೆಗಳಿಂದಲೇ ಆಡಿಟರ್ ನೇಮಿಸಲು ಬಯಸಿದೆ ಎಂಬುದನ್ನು ಲೆಕ್ಕಪತ್ರಾಧಿಕಾರಿಗಳ ಪರಮೋಚ್ಚ ಸಂಸ್ಥೆ ಇನ್ಸ್ಟಿಟ್ಯೂಟ್ ಆಫ್ ಚಾರ್ಟರ್ಡ್ ಅಕೌಂಟೆಂಟ್ಸ್ ಆಫ್ ಇಂಡಿಯಾ ಮೂಲಗಳು ಸ್ಪಷ್ಟಪಡಿಸಿವೆ. |