ದೇಶದ ಪ್ರಮುಖ ಕಾರ್ಪೋರೇಟ್ ಕಂಪೆನಿಗಳಾದ ಎಸ್ಸಾರ್ ಮತ್ತು ಎಲ್ ಆಂಡ್ ಟಿ ಕಂಪೆನಿಗಳು, ಕಳಂಕಿತ ಸತ್ಯಂ ಐಟಿ ಕಂಪೆನಿಯನ್ನು ಖರೀದಿಸುವ ಆಸಕ್ತಿ ತೋರಿಸಿದ ಹಿನ್ನೆಲೆಯಲ್ಲಿ ಶೇರುಪೇಟೆಯಲ್ಲಿ ಸತ್ಯಂ ಶೇರು ದರಗಳಲ್ಲಿ ಶೇ.9 ರಷ್ಟು ಏರಿಕೆಯಾಗಿದೆ. ಸತ್ಯಂ ಅಡಳಿತ ಮಂಡಳಿಯ ನಿರ್ದೇಶಕರು ಮಾಧ್ಯಮಗಳೊಂದಿಗೆ ಮಾತನಾಡಿ, ದೇಶ ವಿದೇಶಗಳ ಕಂಪೆನಿಗಳು ಸತ್ಯಂ ಐಟಿ ಕಂಪೆನಿಯನ್ನು ಖರೀದಿಸುವ ಆಸಕ್ತಿಯನ್ನು ತೋರಿಸಿವೆ ಎಂದು ನಿನ್ನೆ ಹೇಳಿಕೆ ನೀಡಿದ ಹಿನ್ನೆಲೆಯಲ್ಲಿ, ಬುಧವಾರದ ಶೇರುಪೇಟೆ ಆರಂಭವಾಗುತ್ತಿದ್ದಂತೆ ಕೆಲವೇ ನಿಮಿಷಗಳಲ್ಲಿ ಸತ್ಯಂ ಶೇರುದರಗಳಲ್ಲಿ ಶೇ.8.56 ರಷ್ಟು ಏರಿಕೆಯಾಗಿವೆ. ರಾಷ್ಟ್ರೀಯ ಶೇರುಪೇಟೆ ನಿಫ್ಟಿ ಕೂಡಾ ಶೇ.8.75ರಷ್ಟು ಏರಿಕೆಯಾಗಿ ಮುಖಬೆಲೆಯ ಶೇರು ದರ 29.20 ರೂಪಾಯಿಗಳಿಗೆ ತಲುಪಿದೆ. ಸುಮಾರು ಮೂರು ಕೋಟಿ ಸತ್ಯಂ ಶೇರುಗಳ ವಹಿವಾಟು ನಡೆದಿದೆ ಎಂದು ಶೇರುಪೇಟೆಯ ಮೂಲಗಳು ತಿಳಿಸಿವೆ.ಸತ್ಯಂ ಐಟಿ ಕಂಪೆನಿಯನ್ನು ಸುವ್ಯವಸ್ಥೆಗೆ ತರಲು ಸರಕಾರ ಮಧ್ಯಸ್ಥಿಕೆ ವಹಿಸಿರುವುದರಿಂದ ಹೆಚ್ಚಿನ ಲಾಭವಾಗಲಿದೆ ಎಂದು ಭಾವಿಸಿದ ಹೂಡಿಕೆದಾರರು ಸತ್ಯಂ ಶೇರುಗಳ ಖರೀದಿಯಲ್ಲಿ ತೊಡಗಿದ್ದಾರೆ ಎಂದು ಮಾರುಕಟ್ಟೆಯ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. |