ಭಾರತದ ಬೃಹತ್ ವಾಹನ ತಯಾರಿಕಾ ಸಂಸ್ಥೆ ಟಾಟಾ ಮೋಟಾರ್ಸ್ ಜಾಗತಿಕ ಆರ್ಥಿಕ ಹಿಂಜರಿತದ ಪರಿಣಾಮ ಬೇಡಿಕೆಯಲ್ಲಿ ತೀವ್ರ ಕೊರತೆಯನ್ನು ಅನುಭವಿಸುತ್ತಿದ್ದು, ಇದರಿಂದಾಗಿ ಜೆಮ್‌ಶೆಡ್‌ಪುರದಲ್ಲಿರುವ ತನ್ನ ವಾಣಿಜ್ಯ ವಾಹನ ತಯಾರಿಕಾ ಘಟಕವನ್ನು ಐದನೇ ಬಾರಿಗೆ ಜನವರಿ 27ರಿಂದ 31ತನಕ ಮುಚ್ಚುಗಡೆಗೊಳಿಸುವುದಾಗಿ ತಿಳಿಸಿದೆ.
ಜಾಗತಿಕ ಹಿಂಜರಿತದಿಂದಾಗಿ ವಾಹನ ಉದ್ದಿಮೆಗಳಲ್ಲಿ ಉಂಟಾದ ಬೇಡಿಕೆಯ ಕೊರತೆಯ ಪರಿಣಾಮ ಈ ಹಿಂದೆ ಟಾಟಾ ಮೋಟಾರ್ಸ್ ನವೆಂಬರ್ 6ರಿಂದ 8, ನವೆಂಬರ್ 25ರಿಂದ 29, ಡಿಸೆಂಬರ್ 8ರಿಂದ 13 ಮತ್ತು ಡಿಸೆಂಬರ್ 28-31ರ ವರೆಗೆ ನಾಲ್ಕು ಬಾರಿ ಜೆಮ್‌ಶೆಡ್‌ಪುರ ಘಟಕವನ್ನು ಮುಚ್ಚುಗಡೆಗೊಳಿಸಿತ್ತು.
ವಾಹನ ಉತ್ಪಾದನಾ ಬೇಡಿಕೆಗಳ ವೇಳಾಪಟ್ಟಿಯಲ್ಲಿ ಉಂಟಾದ ಬದಲಾವಣೆಯಿಂದಾಗಿ ಜನವರಿಯಲ್ಲಿ 12ರಿಂದ 17ರ ವರೆಗಿನ ಘಟಕ ಮುಚ್ಚುಗಡೆ ನಿರ್ಧಾರವನ್ನು ಕಂಪೆನಿ ರದ್ದುಗೊಳಿಸಿತ್ತು.
ಬೇಡಿಕೆ ಕೊರತೆಯಿಂದಾಗಿ ಸುಮಾರು ಒಂದು ದಶಕದ ಹಿಂದೆಯೂ ಈ ಘಟಕದಲ್ಲಿ ಟ್ರಕ್ಕುಗಳು, ಟ್ರೈಲರ್‌ಗಳು, ಟಿಪ್ಪರ್‌ಗಳು ಹಾಗೂ ಇತರ ಮಲ್ಟಿ-ಆಕ್ಸಿಲ್ ವಾಹನಗಳ ಉತ್ಪಾದನೆಯನ್ನು ಸ್ಥಗಿತಗೊಳಿಸಲಾಗಿತ್ತು.
| 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ