ಜಾಗತಿಕ ಆರ್ಥಿಕತೆ 2009ರಲ್ಲಿ ಇನ್ನೂ ಶೇಕಡಾ ಒಂದರಿಂದ ಎರಡಷ್ಟು ಕುಗ್ಗಲಿದ್ದು, ಆರ್ಥಿಕ ಕುಸಿತ ಪರೋಕ್ಷವಾಗಿ ಹಸುಳೆಗಳ ಸಾವಿಗೂ ಕಾರಣವಾಗಲಿದೆ ಎಂದು ವರ್ಲ್ಡ್ ಬ್ಯಾಂಕ್ ಹೇಳಿದೆ.ಬ್ರುಸೆಲ್ಸ್‌ನಲ್ಲಿ ನಡೆದ ಸಮಾವೇಶವೊಂದರಲ್ಲಿ ಭಾಗವಹಿಸಿ ಮಾತನಾಡಿದ ವರ್ಲ್ಡ್ ಬ್ಯಾಂಕ್ ಅಧ್ಯಕ್ಷ ರಾಬರ್ಟ್ ಝೋಲಿಕ್, ಈಗ ಕಂಡಿರುವ ಆರ್ಥಿಕ ಕುಸಿತ ಹಿಂದೆಂದೂ ಕಾಣದಂತಹುದು. 1930ರ ನಂತರ ಕಂಡ ಬಹುದೊಡ್ಡ ಆರ್ಥಿಕ ಕುಸಿತ ಇದಾಗಿದ್ದು, ಪರೋಕ್ಷವಾಗಿ ಈ ಕುಸಿತ ನಾಲ್ಕು ಲಕ್ಷ ಹಸುಳೆಗಳ ಸಾವಿಗೆ ಕಾರಣವಾಗಬಹುದು ಎಂದು ಎಚ್ಚರಿಕೆ ನೀಡಿದ್ದಾರೆ.ಅಂತಾರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್)ಯ ಅಂದಾಜಿನ ಪ್ರಕಾರ ಈ ವರ್ಷದ ಆರ್ಥಿಕ ಕುಸಿತ ಇನ್ನೂ ಶೇ.1ರಿಂದ 2ರಷ್ಟು ಹೆಚ್ಚಲಿದೆ. ವಿಶ್ವದ ಎರಡನೇ ಮಹಾಯುದ್ಧದ ಸಮಯದಲ್ಲಿ ಕಂಡ ಇಂತಹ ಆರ್ಥಿಕ ಕುಸಿತ ಈವರೆಗೆ ಕಂಡಿರಲಿಲ್ಲ. ಇದು ಆರ್ಥಿಕ ವಲಯಕ್ಕೆ ಆಗಿರುವ ಬಹುದೊಡ್ಡ ಆಘಾತ. ಇದರಿಂದ ಚೇತರಿಸಿಕೊಳ್ಳಲು ಸಮಯ ಬೇಕು. ಆದರೂ ಇಂತಹ ಆಘಾತದಿಂದ ಹೊರಬರಲು ಸಾಕಷ್ಟು ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದರು. ಆರ್ಥಿಕ ಕುಸಿತದ ಪರೋಕ್ಷ ಪರಿಣಾಮದಿಂದಾಗಿ ಈ ವರ್ಷ ನಾಲ್ಕು ಲಕ್ಷ ಹಸುಳೆಗಳ ಸಾವಿಗೆ ಶರಣಾಗಬೇಕಾದೀತು ಎಂದು ಅಂದಾಜಿಸಲಾಗಿದೆ. ಇಂತಹ ಸಂದರ್ಭ ಮಕ್ಕಳಿಗೆ ಪೌಷ್ಠಿಕ ಆಹಾರ ಸಿಗದೇ ಹೋದಲ್ಲಿ ಖಂಡಿತ ಮುಂದಿನ ಜನಾಂಗವನ್ನೇ ನಾವು ಕಳೆದುಕೊಳ್ಳಬೇಕಾದೀತು ಎಂದು ಎಚ್ಚರಿಸಿದ ಅವರು, ಶ್ರೀಮಂತ ದೇಶಗಳು ಈ ದಿಸೆಯಲ್ಲಿ ಸಹಕಾರ ತೋರಬೇಕು ಎಂದು ಕರೆ ನೀಡಿದರು. |
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
