ನವದೆಹಲಿ: ಅಭಿವೃದ್ಧಿ ದರದ ಹೆಸರಿನಲ್ಲಿ ಖಾಸಗಿ ವಿಮಾನ ನಿಲ್ದಾಣಗಳಿಂದ ಸುಂಕ ವಸೂಲಿ ಮಾಡುತ್ತಿರುವ ಸರ್ಕಾರ ಇದೀಗ ದೇಶದ ಒಂಭತ್ತು ಪ್ರಮುಖ ವಿಮಾನ ನಿಲ್ದಾಣಗಳಲ್ಲಿ ಪ್ರಯಾಣಿಕರಿಗೂ ಅಭಿವೃದ್ಧಿ ಸುಂಕ ವಿಧಿಸಲು ನಿರ್ಧರಿಸಿದೆ. ಈ ಹೊಸ ಪ್ರಸ್ತಾಪ ಈಗ ಸರ್ಕಾರದ ಮುಂದಿದ್ದು, ಭಾರತ ವಿಮಾನ ನಿಲ್ದಾಣಗಳ ಪ್ರಾಧಿಕಾರ (ಎಎಐ) ಸದ್ಯದಲ್ಲೇ ಸರ್ಕಾರದ ಅಧಿಕೃತ ಆದೇಶ ಪಡೆಯಲಿದೆ.ಮೂಲಗಳ ಪ್ರಕಾರ, ಈ ಪ್ರಸ್ತಾಪ ಇದೀಗ ಹಣಕಾಸು ಇಲಾಖೆ ಮುಂದಿದ್ದು, ಮೇ ತಿಂಗಳಲ್ಲಿ ಕೇವಲ ತಾತ್ಕಾಲಿಕ ಅವಧಿಗೆ ಇದನ್ನು ಜಾರಿಗೊಳಿಸುವ ಸಂಭವವಿದೆ. ಈ ಅಭಿವೃದ್ಧಿ ದರ ಸ್ಥಳೀಯ ವಿಮಾನ ಪ್ರಯಾಣಿಕರಿಗೆ 200ರಿಂದ 250 ರೂಪಾಯಿಗಳಿರಲಿದ್ದು, ವಿದೇಶ ಪ್ರಯಾಣಿಕರಿಗೆ ಒಂದು ಸಾವಿರ ರೂಪಾಯಿ ಇರಲಿದೆ.ಪ್ರಮುಖ ಖಾಸಗಿ ವಿಮಾನ ನಿಲ್ದಾಣಗಳಾದ ಬೆಂಗಳೂರು, ಹೈದರಾಬಾದ್, ದೆಹಲಿ, ಮುಂಬೈಗಳಿಗೂ ಇದು ಅನ್ವಯಿಸಲಿದೆ. ಪ್ರಾಧಿಕಾರ ದೇಶದ ಒಂಭತ್ತು ವಿಮಾನ ನಿಲ್ದಾಣಗಳನ್ನು ಆಧುನೀಕರಣಗೊಳಿಸುವ ಯೋಜನೆ ರೂಪಿಸಿದ್ದು, ಅದಕ್ಕಾಗಿ ಕೇವಲ ತಾತ್ಕಾಲಿಕ ಅವಧಿಗೆ ಈ ಶುಲ್ಕ ಹೇರುವ ಸಂಭವವಿದೆ. ಕೋಲ್ಕತ್ತಾ, ಚೆನ್ನೈ, ಜೈಪುರ್, ತಿರುವನಂತಪುರಂ, ಅಮೃತಸರ ಹಾಗೂ ತ್ರಿಚಿ ವಿಮಾನ ನಿಲ್ದಾಣಗಳೂ ಈ ಪಟ್ಟಿಯಲ್ಲಿ ಸ್ಥಾನ ಪಡೆದಿವೆ. |
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
