ಫಾರ್ಚುನ್ ಪಟ್ಟಿಯಲ್ಲಿ 500 ಪ್ರಭಾವಿ ಮುಖ್ಯ ಕಾರ್ಯನಿರ್ವಾಹಧಿಕಾರಿಗಳ ಪಟ್ಟಿಯಲ್ಲಿ ಪುರುಷರು ಸ್ಥಾನಪಡೆದಿರಬಹುದು. ಆದರೆ ಮಹಿಳಾ ಮುಖ್ಯ ಕಾರ್ಯನಿರ್ವಾಹಕರ ಪಟ್ಟಿಯಲ್ಲಿ ಭಾರತೀಯ ಮೂಲದ ಸಂಜಾತೆ ಅಮೆರಿಕದ ಪೆಪ್ಸಿಕೊ ಕಂಪೆನಿಯ ಸಿಇಒ ಇಂದ್ರಾನೂಯಿ ನಾಲ್ಕನೇ ಸ್ಥಾನವನ್ನು ಪಡೆದಿದ್ದಾರೆ. ಅಮೆರಿಕದ ಬಿಜಿನೆಸ್ ಮ್ಯಾಗ್‌ಜಿನ್ ಫಾರ್ಚುನ್ ಬಿಡುಗಡೆಗೊಳಿಸಿದ 15 ಮಹಿಳಾ ಸಿಇಒಗಳ ಪಟ್ಟಿಯಲ್ಲಿ ಇಂದ್ರಾ ನೂಯಿ ನಾಲ್ಕನೇ ಸ್ಥಾನವನ್ನು ಪಡೆದಿದ್ದು, ಕಳೆದ 2008ರಲ್ಲಿ ಕಂಪೆನಿಯ ಆದಾಯವನ್ನು ಶೇ.10 ರಷ್ಟು ಹೆಚ್ಚಳಗೊಳಿಸಿ 43.3 ಬಿಲಿಯನ್ ಡಾಲರ್‌ಗಳಿಗೆ ತಲುಪಿದ ಸಾಧನೆಯಿಂದಾಗಿ ಕ್ರಮಾಂಕದಲ್ಲಿ ಏರಿಕೆ ಕಂಡಿದ್ದಾರೆ ಎಂದು ತಿಳಿಸಿದೆ.ಕಳಪೆ ದರ್ಜೆಯ ಗುಣಮಟ್ಟದಿಂದಾಗಿ ಪೆಪ್ಸಿಕೊ ಕಂಪೆನಿ ಗ್ರಾಹಕರಿಗೆ 13.4 ಮಿಲಿಯನ್ ಡಾಲರ್‌ಗಳನ್ನು ಪರಿಹಾರ ರೂಪದಲ್ಲಿ ನೀಡಬೇಕು ಎಂದು ನ್ಯಾಯಾಲಯ ಇಂದ್ರಾನೂಯಿ ಅವರಿಗೆ ಆದೇಶಿಸಿದ ಹಿನ್ನೆಲೆಯಲ್ಲಿ ಎಚ್ಚರಗೊಂಡ ಪೆಪ್ಸಿಕೊ ಕಂಪೆನಿ, ಆರೋಗ್ಯ ಪ್ರಜ್ಞೆ ಮತ್ತು ಮಹಿಳಾ ಗ್ರಾಹಕರಿಗಾಗಿ ಕಡಿಮೆ ಕ್ಯಾಲೋರಿ ಮತ್ತು ಲೋ-ಫ್ಯಾಟ್‌ ಹೊಂದಿರುವಂತಹ ನೂತನ ಉತ್ಪನ್ನಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದ್ದರಿಂದ ವಹಿವಾಟಿನಲ್ಲಿ ಹೆಚ್ಚಳವಾಗಿದೆ ಎಂದು ಕಂಪೆನಿಯ ಮೂಲಗಳು ತಿಳಿಸಿವೆ. ಪೆಪ್ಸಿಕೊ ಕಂಪೆನಿ 3500 ಉದ್ಯೋಗಿಗಳನ್ನು ವಜಾಗೊಳಿಸಿ ಆರು ಘಟಕಗಳನ್ನು ಸ್ಥಗಿತಗೊಳಿಸಿದ್ದರೂ ಭಾರತದಲ್ಲಿ 500 ಮಿಲಿಯನ್ ಡಾಲರ್ ,ಚೀನಾದಲ್ಲಿ 1 ಬಿಲಿಯನ್ ಡಾಲರ್ ಮತ್ತು ಮೆಕ್ಸಿಕೊದಲ್ಲಿ 3 ಬಿಲಿಯನ್ ಡಾಲರ್‌ಗಳ ಹೂಡಿಕೆ ವಿಸ್ತರಣೆಯನ್ನು ನೂಯಿ ಘೋಷಿಸಿದ್ದಾರೆ ಎಂದು ಫಾರ್ಚೂನ್‌ ವರದಿ ಮಾಡಿದೆ. ಉತ್ತರ ಅಮೆರಿಕದಲ್ಲಿ ಪೆಪ್ಸಿ ಮತ್ತು ಮೌಂಟೇನ್ ಡೆವ್‌ ಉತ್ಪಾದನೆಗಳ ಮಾರಾಟವನ್ನು ಹೆಚ್ಚಿಸಲು ಮುಂಬರುವ ಮೂರು ವರ್ಷಗಳ ಅವಧಿಯಲ್ಲಿ ಪ್ರಚಾರಕ್ಕಾಗಿ 1.2 ಬಿಲಿಯನ್ ಡಾಲರ್‌ಗಳನ್ನು ವೆಚ್ಚ ಮಾಡಲು ನಿರ್ಧರಿಸಿದೆ ಎಂದು ಅಮೆರಿಕದ ಬಿಜಿನೆಸ್ ಮ್ಯಾಗ್‌ಜಿನ್ ಫಾರ್ಚುನ್ ವರದಿಯಲ್ಲಿ ಬಹಿರಂಗಪಡಿಸಿದೆ. |
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
