ಮಾಹಿತಿ ತಂತ್ರಜ್ಞಾನ ಸಂಸ್ಥೆ ಟೆಕ್ ಮಹೀಂದ್ರಾ ಕಂಪೆನಿ ಸತ್ಯಂ ಕಂಪ್ಯೂಟರ್‌ ಸರ್ವಿಸಸ್‌ನ ಶೇ.51 ರಷ್ಟು ಸೇರುಗಳ ಮೇಲೆ ನಿಯಂತ್ರಣ ಹೊಂದಲು 2,910 ಕೋಟಿ ರೂ.ಗಳನ್ನು ಠೇವಣಿಯಾಗಿರಿಸಿದೆ ಎಂದು ಕಂಪೆನಿಯ ಮೂಲಗಳು ತಿಳಿಸಿವೆ. ಸತ್ಯಂ ಕಂಪ್ಯೂಟರ್‌ನ ಶೇ.31 ರಷ್ಟು ಶೇರುಗಳಿಗಾಗಿ 1,756 ಕೋಟಿ ರೂಪಾಯಿ ಮತ್ತು ಶೇ.20 ಶೇರುಗಳಿಗಾಗಿ 1,150 ಕೋಟಿ ರೂಪಾಯಿಗಳನ್ನು ನಾಳೆ ಆರಂಭವಾಗುವ ಮುಕ್ತ ಮಾರುಕಟ್ಟೆಯಲ್ಲಿ ಖರೀದಿಸಲು ನಿರ್ಧರಿಸಲಾಗಿದೆ ಎಂದು ಸತ್ಯಂ ಅಡಳಿತ ಮಂಡಳಿ ಮುಖ್ಯಸ್ಥ ಕಿರಣ್ ಕಾರ್ನಿಕ್ ಮಹೀಂದ್ರಾ ಪ್ರತಿನಿಧಿಗಳೊಂದಿಗೆ ನಡೆಸಿದ ಸಭೆಯ ನಂತರ ಸುದ್ದಿಗಾರರಿಗೆ ತಿಳಿಸಿದ್ದಾರೆ. ಸತ್ಯಂ ಕಂಪೆನಿ ರೇಸಿಂಗ್ ಕಾರು ಇಲ್ಲದಿರಬಹುದು ಆದರೆ ಮುಳಗುವ ಹಡಗು ಅಲ್ಲ. ಕೆಲ ನಿಯಮಗಳಿಗೆ ಒಳಗಾಗಿರುವುದರಿಂದ ಸಂಪೂರ್ಣ ಮಾಹಿತಿ ನೀಡಲು ಸಾಧ್ಯವಿಲ್ಲ . ನಾಳೆಯಿಂದ ಮುಕ್ತ ಮಾರುಕಟ್ಟೆಯಲ್ಲಿ ಶೇರುಗಳ ಖರೀದಿ ಆರಂಭವಾಗಲಿದೆ ಎಂದು ಹೇಳಿದ್ದಾರೆ.ಸತ್ಯಂ ಅಡಳಿತ ಮಂಡಳಿ ಟೆಕ್ ಮಹೀಂದ್ರಾಗೆ ಮಾಜಿ ಸಿಇಒ ರಾಮ್ ಮೈನಾಮ್‌ಪತಿ ಸೇರಿದಂತೆ 100 ಪ್ರಮುಖ ಉದ್ಯೋಗಿಗಳ ಹೆಸರುಗಳನ್ನು ನೀಡಲಾಗಿದ್ದು, ಅವರ ಮೇಲೆ ಕ್ರಮ ತೆಗೆದುಕೊಳ್ಳುವ ಕುರಿತಂತೆ ಇಲ್ಲಿಯವರೆಗೆ ಯಾವುದೇ ನಿರ್ಧಾರ ತೆಗೆದುಕೊಳ್ಳಲಾಗಿಲ್ಲ ಎಂದು ಕಂಪೆನಿಯ ಅಧಿಕಾರಿಗಳು ತಿಳಿಸಿದ್ದಾರೆ . ಸತ್ಯಂ ಅಡಳಿತ ಮಂಡಳಿಯಲ್ಲಿರುವ ಆರು ಮಂದಿ ಸದಸ್ಯರು ಮುಂದಿನ ಆದೇಶ ಪ್ರಕಟವಾಗುವವರೆಗೆ ತಮ್ಮ ಹುದ್ದೆಯಲ್ಲಿ ಮುಂದುವರಿಯಲಿದ್ದು, ಎ.ಎಸ್‌ ಮೂರ್ತಿ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ಮುಂದುವರಿಸುವುದು ಸೂಕ್ತ ಎನ್ನುವುದು ನಮ್ಮ ಬಯಕೆಯಾಗಿದೆ ಎಂದು ಕಾರ್ನಿಕ್ ತಿಳಿಸಿದ್ದಾರೆ. |
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
