ನವದೆಹಲಿ: ಕಳಂಕಿತ ಸತ್ಯಂ ಕಂಪ್ಯೂಟರ್ಸ್ ಸಂಸ್ಥೆಯನ್ನು ಖರೀದಿಸಿರುವ ಟೆಕ್ ಮಹೀಂದ್ರಾ ಇದೀಗ ಸತ್ಯಂನ ಶೇ.20 ಷೇರುಗಳನ್ನು ಮುಕ್ತ ಹರಾಜಿಗೆ ಮೀಸಲಿರಿಸಿದೆ.
ಟೆಕ್ ಮಹೀಂದ್ರಾ ಈ ವಿಷಯವನ್ನು ಸಾರ್ವಜನಿಕವಾಗಿ ಪ್ರಕಟಿಸಿದ್ದು, 1,154.66 ಕೋಟಿ ರೂಪಾಯಿಗಳ ಈ ಮುಕ್ತ ಹರಾಜು ಜೂ.12ರಿಂದ ಜು.1ರವರೆಗೆ ಮಾತ್ರ ಲಭ್ಯವಿರುತ್ತದೆ ಎಂದು ತಿಳಿಸಿದೆ. ಶೇ.20ರಷ್ಟು ಅಂದರೆ, 19.90 ಕೋಟಿ ಷೇರುಗಳನ್ನು ಬಿಡ್ ಮೂಲಕ ಗೆದ್ದ ಟೆಕ್ ಮಹೀಂದ್ರ ಈಗ ಅದನ್ನು ಹರಾಜಿಗೆ ಮುಕ್ತಗೊಳಿಸಿದೆ.
ಈ ಮುಕ್ತ ಹರಾಜಿನ ಮೂಲಕ ಟೆಕ್ ಮಹೀಂದ್ರ ಈಗ ಶೇ.51ರಷ್ಟು ಷೇರುಗಳನ್ನು ಸತ್ಯಂನಲ್ಲಿ ಹೊಂದಿದಂತಾಗುತ್ತದೆ. ಪ್ರತಿ ಮುಖಬೆಲೆಯ ಷೇರು 58 ರೂಪಾಯಿಗಳಂತೆ 19.90 ಕೋಟಿ ಷೇರುಗಳನ್ನು ಟೆಕ್ ಮಹೀಂದ್ರ ವಶಪಡಿಸಿಕೊಳ್ಳಲು ನಿರ್ಧರಿಸಿದೆ.
ಈಗಾಗಲೇ ಬಿಡ್ನಲ್ಲಿ ಗೆದ್ದ ನಂತರ ಕಳೆದ ವಾರ ಶೇ.31ರಷ್ಟು ಷೇರುಗಳಿಗೆ 1,756 ಕೋಟಿ ರೂಪಾಯಿಗಳನ್ನು ನೀಡುವ ಮೂಲಕ ಸರ್ಕಾರ ಸತ್ಯಂಗೆ ನೇಮಿಸಿದ್ದ ಮಂಡಳಿಯಿಂದ ಟೆಕ್ ಮಹೀಂದ್ರ ಅನುಮೋದನೆ ಪಡೆದಿತ್ತು. ಶೇ.51 ಷೇರುಗಳಿಗೆ 2,910 ಕೋಟಿ ರೂಪಾಯಿಗಳಿಗೆ ಇತ್ತೀಚೆಗೆ ಇದು ಕಂಪನಿ ಲಾ ಬೋರ್ಡ್ನಿಂದಲೂ ಅಧಿಕೃತವಾಗಿ ಅಂಕಿತ ಪಡೆದಿತ್ತು. |