ಸರಕಾರಿ ಸ್ವಾಮ್ಯದ ಭಾರತ ಸಂಚಾರ್ ನಿಗಮ ಲಿಮಿಟೆಡ್, ಪ್ರಸಕ್ತ 2008-09ರ ಸಾಲಿನ ಆರ್ಥಿಕ ಫಲಿತಾಂಶಗಳನ್ನು ಕುರಿತು ಚರ್ಚಿಸಲು ಏಪ್ರಿಲ್ 27-28 ರಂದು ವಾರ್ಷಿಕ ಪರಿಷ್ಕರಣಾ ಸಭೆಯನ್ನು ಹಮ್ಮಿಕೊಂಡಿದೆ ಎಂದು ಬಿಎಸ್ಎನ್ಎಲ್ ಮೂಲಗಳು ತಿಳಿಸಿವೆ. 2008-09 ರ ಆರ್ಥಿಕ ಸಾಲಿನ ಕಂಪೆನಿಯ ವಾರ್ಷಿಕ ಫಲಿತಾಂಶ, ಸಿಬ್ಬಂದಿಯ ಕೆಲಸ ನಿರ್ವಹಣೆ ಹಾಗೂ ಸೂಚನೆಗಳನ್ನು ಕುರಿತು ಚರ್ಚಿಸಲು ವಾರ್ಷಿಕ ಪರಿಷ್ಕರಣಾ ಸಭೆಯನ್ನು ನಡೆಸಲಾಗುತ್ತಿದೆ ಎಂದು ಹಿರಿಯ ಬಿಎಸ್ಎನ್ಎಲ್ ಅಧಿಕಾರಿಗಳು ತಿಳಿಸಿದ್ದಾರೆ.ಬಿಎಸ್ಎನ್ಎಲ್ ಅಡಳಿತ ಮಂಡಳಿ, ನಿನ್ನೆ ನಡೆದ ಸಭೆಯಲ್ಲಿ ನೆಟ್ವರ್ಕ್ ವಿಸ್ತರಣೆ ಹಾಗೂ ಇತರ ಟೆಲಿಕಾಂ ಕಂಪೆನಿಗಳ ಜೊತೆ ಸ್ಪರ್ಧಿಸಲು ತೆಗೆದುಕೊಳ್ಳಬೇಕಾದ ಕಾರ್ಯತಂತ್ರಗಳ ಕುರಿತಂತೆ ಚರ್ಚಿಸಲಾಯಿತು ಎಂದು ಬಿಎಸ್ಎನ್ಎಲ್ ಮೂಲಗಳು ತಿಳಿಸಿವೆ.ಏತನ್ಮಧ್ಯೆ, ಬಿಎಸ್ಎನ್ಎಲ್ ಸಂಸ್ಥೆ ಮಾರ್ಚ್ ತಿಂಗಳಲ್ಲಿ 2.5 ಮಿಲಿಯನ್ ಗ್ರಾಹಕರನ್ನು ಸೇರ್ಪಡೆಗೊಳಿಸಿ ಟೆಲಿಕಾಂ ಸಂಸ್ಥೆಗಳಲ್ಲಿ ಮೂರನೇ ಸ್ಥಾನವನ್ನು ಪಡೆದಿದೆ. ಇದರಿಂದಾಗಿ ಬಿಎಸ್ಎನ್ಎಲ್ ಒಟ್ಟು ಗ್ರಾಹಕರ ಸಂಖ್ಯೆ 46.68 ಮಿಲಿಯನ್ಗಳಿಗೆ ತಲುಪಿದೆ ಎಂದು ಬಿಎಸ್ಎನ್ಎಲ್ ಮೂಲಗಳು ತಿಳಿಸಿವೆ. |