ಯಮಹಾ, ನೋಕಿಯಾ ಸಂಸ್ಥೆಗಳೂ ಸೇರಿದಂತೆ ಸರ್ಕಾರ ಭಾರತದಲ್ಲಿ 22 ವಿದೇಶೀ ಬಂಡವಾಳ ಹೂಡಿಕೆಯ ಪ್ರಸ್ತಾವವನ್ನು ಇತ್ಯರ್ಥಗೊಳಿಸಿದೆ.
541.25 ಕೋಟಿ ರೂಪಾಯಿಗಳ ಮೊತ್ತದ ಈ ವಿದೇಶೀ ಬಂಡವಾಳ ಹೂಡಿಕೆ ಪ್ರಸ್ತಾವ ಫಾರಿನ್ ಇನ್‌ವೆಸ್ಟ್ಮೆಂಟ್ ಪ್ರೊಮೋಶನ್ ಬೋರ್ಡು ಮೂಲಕ ಸರ್ಕಾರದ ಎದುರಿತ್ತು. ಪ್ರತಿಷ್ಠಿತ ಸಂಸ್ಥೆಗಳಾದ ಯಮಹಾ, ನೋಕಿಯಾಗಳ ಅರ್ಜಿಗಳಿಗೂ ಸರ್ಕಾರ ಅಂತಿಮವಾಗಿ ಹಸಿರು ನಿಶಾನೆ ತೋರಿದೆ.
ನೋಕಿಯಾ ಸಂಸ್ಥೆ ಎಚ್‌ಸಿಎಲ್ ಇನ್ಫೋಸಿಸ್ಟಮ್ಸ್ ಜತೆಗೆ ಕೈಜೋಡಿಸಿ ಸಿಂಗಲ್ ಬ್ರ್ಯಾಂಡ್ ರೀಟೈಲ್ ಸರಣಿಯನ್ನು ಆರಂಭಿಸಲು ಹೊರಟಿದ್ದು, ಇದರಿಂದ ಎಚ್‌ಸಿಎಲ್ ನೋಕಿಯಾ ಹ್ಯಾಂಡ್‌ಸೆಟ್‌ ಮಾರಾಟ ಯೋಜನೆಗೂ ಕೈ ಹಾಕಲಿದೆ. ಈ ಪ್ರಸ್ತಾವಕ್ಕೆ ಸರ್ಕಾರ ಅಂಕಿತ ಇದೀಗ ಬಿದ್ದಂತಾಗಿದೆ.
ಯಮಹಾ ಸಂಸ್ಥೆ ತನ್ನ ಬ್ಯುಸಿನೆಸ್‌ನ ಎಲ್ಲ ವ್ಯವಹಾರಗಳನ್ನೂ ಭಾರತಕ್ಕೆ ವರ್ಗಾಯಿಸಲು ಯೋಚಿಸುತ್ತಿದ್ದು, ಹೊಸ ಸಂಸ್ಥೆ ಯಮಹಾ ಇಂಡಿಯಾ ಮೋಟಾರ್ ಪ್ರೈವೇಟ್ ಲಿಮಿಟೆಡ್ ಮೂಲಕ ನಡೆಸಲು ಯೋಚಿಸಿದೆ. ಈ ಸಂಬಂಧ ಬಂಡವಾಳ ಹೂಡಿಕೆಗೆ ಸರ್ಕಾರದ ಅನುಮತಿ ಪಡೆಯಲು ಯಮಹಾ ಅರ್ಜಿ ಸಲ್ಲಿಸಿತ್ತು. ಈಗ ಅದ್ಕಕೂ ಅಂತಿಮ ಮುದ್ರೆ ಸಿಕ್ಕಿದೆ.
ಇದಲ್ಲದೆ, ಮುಂಬೈ ಮೂಲದ ಬ್ರಾಡ್‌ಬ್ಯಾಂಡ್ ಸಂಸ್ಥೆ ಟಿಕೋನಾ ಡಿಜಿಟಲ್ ನೆಟ್‌ವರ್ಕ್ಸ್ ಸಂಸ್ಥೆ ಅತಿ ಹೆಚ್ಚು ವಿದೇಶೀ ಬಂಡವಾಳ ಹೂಡಿಕೆಗೆ ಅರ್ಜಿ ಸಲ್ಲಿಸಿತ್ತು. ಅದರ ಮೊತ್ತ 237.26 ಕೋಟಿ ರೂಪಾಯಿಗಳು. ಕೋಲ್ಕತ್ತಾ ಮೂಲದ ಎಲೆಕ್ಟ್ರೋ ಸ್ಟೀಲ್ ಬ್ಯುಸಿನೆಸ್ ಸಂಸ್ಥೆ 157.47 ಕೋಟಿ ರೂಪಾಯಿಗಳನ್ನು ಹೂಡಲು ಅವಕಾಶ ಪಡೆದುಕೊಂಡಿದೆ. ಆದರೆ, ಅಲ್ ಖಲೀಜ್‌ರ ಸಕ್ಕರೆ ಸಂಸ್ಕರಣಾ ಘಟಕ ಸ್ಥಾಪನೆಗೆ ಹಾಕಿದ್ದ ಅರ್ಜಿಯನ್ನು ಸರ್ಕಾರ ತಿರಸ್ಕೃತಗೊಳಿಸಿದೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ