ಜೈವಿಕ ತಂತ್ರಜ್ಞಾನ ಕ್ಷೇತ್ರದ ದೈತ್ಯ ಸಂಸ್ಥೆ ಬಯೋಕಾನ್ ಈ ವರ್ಷದ ಮಾರ್ಚ್ ಅಂತ್ಯಕ್ಕೆ 1673 ಕೋಟಿ ರೂಪಾಯಿಗಳ ಆದಾಯ ಗಳಿಸಿದೆ.
ಬೆಂಗಳೂರಿನಲ್ಲಿ ಪತ್ರಿಕಾಗೋಷ್ಠಿ ಉದ್ದೇಶಿಸಿ ಮಾತನಾಡಿದ ಬಯೋಕಾನ್ ಅಧ್ಯಕ್ಷೆ ಕಿರಣ್ ಮಜುಂದಾರ್ ಶಾ, ಸಂಸ್ಥೆಯ ಆದಾಯದಲ್ಲಿ ತೆರಿಗೆ ಪಾವತಿಯ ನಂತರ 240 ಕೋಟಿ ರೂಪಾಯಿಗಳ ಲಾಭ ಉಳಿಕೆಯಾಗಿದೆ. ಸಂಶೋಧನಾ ವಲಯದ ಮಾರಾಟದ ಆದಾಯ ಶೇ.28ರಷ್ಟು ಹೆಚ್ಚಿದೆ. ಆದರೆ ಸಂಸ್ಥೆ ಈಬಾರಿ ಸುಮಾರು 147 ಕೋಟಿ ರೂಪಾಯಿಗಳ ಮಾರುಕಟ್ಟೆ ನಷ್ಟ ದಾಖಲಿಸಿದೆ ಎಂದು ತಿಳಿಸಿದರು.
2008-09ರ ಹಣಕಾಸು ವರ್ಷ ತುಂಬ ಕಠಿಣವಾಗಿತ್ತು ಎಂದು ವಿವರಿಸಿದ ಅವರು, ಆರ್ಥಿಕ ಕುಸಿತದ ಪರಿಣಾಮ ಕಂಪನಿಯನ್ನು ಸಾಕಷ್ಟು ತಟ್ಟಿದೆ. ಇದರಿಂದ ನಷ್ಟವೂ ಆಗಿದೆ. ಆದರೆ ಬಯೋಕಾನ್ ಆರೋಗ್ಯ ವಲಯದ ಸಂಸ್ಥೆಯಾದ್ದರಿಂದ ಇತರ ಐಟಿ ವಲಯದಷ್ಟು ಪರಿಣಾಮ ಬೀರಿಲ್ಲ ಎಂದರು. ಡಾಲರ್ ಎದುರು ರೂಪಾಯಿ ಮೌಲ್ಯ ಕುಸಿಯುತ್ತಿರುವ ಪರಿಣಾಮ 2009ರ ವರ್ಷದಲ್ಲೂ ನಷ್ಟ ಕಾಣುತ್ತಿದೆ ಎಂದು ಶಾ ವಿವರಿಸಿದರು.
ಇದಲ್ಲದೆ ಈ ವರ್ಷದಲ್ಲಿ ಆರೋಗ್ಯ ವಲಯದಲ್ಲಿ ಸಾಕಷ್ಟು ಸಂಶೋಧನೆಯನ್ನೂ ಬಯೋಕಾನ್ ಮಾಡಿದೆ ಎಂದ ತಿಳಿಸಿದ ಅವರು, ಬಯೋಕಾನ್ ವಿಶ್ವದ 20ನೇ ಸಂಸ್ಥೆಯಾಗಿ ಗುರುತಿಸಿಕೊಂಡಿದೆ ಎಂದರು. ಅಲ್ಲದೆ, ಭಾರತದ 10 ಪ್ರಮುಖ ಕಂಪನಿಗಳಲ್ಲಿ ಬಯೋಕಾನ್ ಸ್ಥಾನ ಪಡೆದಿದೆ ಎಂದೂ ತಿಳಿಸಿದರು. |