ಜನಪ್ರಿಯ ಸಮುದಾಯ ತಾಣ ಫೇಸ್ಬುಕ್ ಈಗ ಹಿಂದಿ, ಪಂಜಾಬಿ, ಬಂಗಾಳಿ, ತೆಲುಗು, ತಮಿಳು ಮತ್ತು ಮಲಯಾಳಂ ಭಾಷೆಗಳಲ್ಲಿ ಲಭ್ಯವಿದೆ. ಆದರೆ ಅಂತರಜಾಲದಲ್ಲಿ ಅದು ಇನ್ನೂ ಕನ್ನಡದಲ್ಲಿ ಮುಖ ತೋರಿಸಿಲ್ಲ. ಆರು ಭಾರತೀಯ ಭಾಷೆಗಳಲ್ಲಿ ಅದು, ವಿಶ್ವಾದ್ಯಂತ ಹಂಚಿಹೋಗಿರುವ ಆಯಾ ಭಾಷಿಗರನ್ನು ಬೆಸೆಯುವ ಕಾರ್ಯ ಮಾಡಲಿದೆ.
ಫೇಸ್ಬುಕ್ ತಾಣದ ಮುಖಪುಟದಲ್ಲೇ ಆಯಾ ಭಾಷೆ ಆಯ್ದುಕೊಳ್ಳುವ ಅವಕಾಶವೊಂದನ್ನು ನೀಡಲಾಗಿದೆ. ಆದರೆ ಸದ್ಯಕ್ಕೆ ಲಿಪ್ಯಂತರ (ಟ್ರಾನ್ಸ್ಲಿಟರೇಶನ್) ವ್ಯವಸ್ಥೆ ಅದರಲ್ಲಿ ಲಭ್ಯವಿರುವುದಿಲ್ಲ.
ಸುಮಾರು 200 ದಶಲಕ್ಷದಷ್ಟು ಸಕ್ರಿಯ ಬಳಕೆದಾರರ ಸಾಮರ್ಥ್ಯವನ್ನು ಹೊಂದಿರುವ ಫೇಸ್ಬುಕ್, ಈ ಹೊಸ ಲಕ್ಷಣಗಳೊಂದಿಗೆ ತಂತ್ರಜ್ಞಾನದಲ್ಲಿ ಆಸಕ್ತರಾಗಿರುವ ಭಾರತೀಯ ಸಮುದಾಯವನ್ನು ಮತ್ತಷ್ಟು ಸಂಖ್ಯೆಯಲ್ಲಿ ಸೆಳೆದುಕೊಳ್ಳುವತ್ತ ಪ್ರಮುಖ ಹೆಜ್ಜೆ ಇರಿಸಿದೆ. ಆರು ಭಾರತೀಯ ಭಾಷೆಗಳಲ್ಲದೆ, ವಿಶ್ವದ ಒಟ್ಟು 40 ಭಾಷೆಗಳಲ್ಲಿ ಫೇಸ್ಬುಕ್ ಲಭ್ಯವಿದೆ. |