ಜಾಗತಿಕ ಹಣಕಾಸು ಹಿಂಜರಿತದ ಬಿಸಿ ಎದುರಿಸುತ್ತಿರುವ ಈ ಸಂದರ್ಭದಲ್ಲಿ ಮಾರ್ಚ್ ತಿಂಗಳ ಕೈಗಾರಿಕಾ ಉತ್ಪಾದನೆ ಸತತವಾಗಿ ಮೂರನೇ ತಿಂಗಳಿಗೆ ಶೇ.2.3ರಷ್ಟು ಇಳಿಕೆ ಕಂಡಿದ್ದು, ಇದು ಕಳೆದ 16ವರ್ಷಗಳಲ್ಲಿ ಈ ಮಟ್ಟಿಗಿನ ಕುಸಿತ ಕಂಡಿರುವುದು ಇದೇ ಪ್ರಥಮ ಬಾರಿ.
ತಯಾರಿಕಾ ವಲಯದಲ್ಲಿ ಶೇ.3.3ರಷ್ಟು ಉತ್ಪಾದನೆ ಕುಸಿದಿರುವುದು ಇದಕ್ಕೆ ಕಾರಣ. ಕೈಗಾರಿಕಾ ಉತ್ಪಾದನೆಯ ಸೂಚ್ಯಂಕದಲ್ಲಿ ಸುಮಾರು ಶೇ.80ರಷ್ಟು ಉತ್ಪನ್ನಗಳು ತಯಾರಿಕಾ ವಲಯಕ್ಕೆ ಸೇರಿದ್ದು, ಈ ವಲಯ 2008ರ ಮಾರ್ಚ್ನಲ್ಲಿ ಶೇ.5.7ರಷ್ಟು ಬೆಳವಣಿಗೆ ಸಾಧಿಸಿತ್ತು.
ತೀವ್ರವಾದಂಥ ಹಣಕಾಸು ಬಿಕ್ಕಟ್ಟು ಎದುರಿಸಿದ 2008-09ರಲ್ಲಿ ಕೈಗಾರಿಕಾ ಬೆಳವಣಿಗೆ ಶೇ.2.4ಕ್ಕೆ ಇಳಿಮುಖವಾಗಿದೆ. ಇದರ ಹಿಂದಿನ ಹಣಕಾಸು ವರ್ಷದಲ್ಲಿ ಇದು ಶೇ.8.5ರಷ್ಟಿತ್ತು ಎಂದು ಸರ್ಕಾರದ ಐಐಪಿ ಪ್ರಕಟಣೆ ತಿಳಿಸಿದೆ.
ಕೈಗಾರಿಕಾ ಉತ್ಪಾದನೆ ಹೆಚ್ಚಿಸಲು ಮತ್ತೊಂದು ಆರ್ಥಿಕ ಚೇತರಿಕೆ ಪ್ಯಾಕೇಜ್ ಅಗತ್ಯವಿದೇಯ ಎಂಬ ಪ್ರಶ್ನೆಗೆ ಸಾರ್ವತ್ರಿಕ ಚುನಾವಣೆ ನಂತರ ಅಧಿಕಾರ ವಹಿಸಿಕೊಳ್ಳಲಿರುವ ಹೊಸ ಸರ್ಕಾರ ಈ ಬಗ್ಗೆ ನಿರ್ಧಾರ ಕೈಗೊಳ್ಳಬೇಕಿದೆ ಎಂದು ಪ್ರಧಾನಿ ಆರ್ಥಿಕ ವಲಯ ಮಂಡಳಿ ಅಧ್ಯಕ್ಷ ಸುರೇಶ್ ಹೇಳಿದರು. |