ಜಮ್ಮುಕಾಶ್ಮೀರದ 21 ಕ್ಷೇತ್ರಗಳಿಗೆ ನಡೆಯಲಿರುವ ಏಳನೆ ಮತ್ತು ಕೊನೆಯ ಹಂತದ ಚುನಾವಣೆಗಾಗಿ ಅಧಿಸೂಚನೆ ಹೊರಡಿಸಲಾಗಿದೆ.
ಕೊನೆಯ ಹಂತದಲ್ಲಿ ಶ್ರೀನಗರ, ಸಾಂಬ ಮತ್ತು ಜಮ್ಮು ಜಿಲ್ಲೆಗಳಲ್ಲಿ ಚುನಾವಣೆ ನಡೆಯಲಿದೆ. ಜಮ್ಮು ಕಾಶ್ಮೀರದ ರಾಜ್ಯಪಾಲ ಎನ್.ಎನ್. ವೋರಾ ಅವರು ಬುಧವಾರ ಅಧಿಸೂಚನೆ ಹೊರಡಿಸಿರುವುದಾಗಿ ಅಧಿಕೃತ ವಕ್ತಾರರು ತಿಳಿಸಿದ್ದಾರೆ.
ಡಿಸೆಂಬರ್ 24ರಂದು ನಡೆಯಲಿರುವ ಚುನಾವಣೆಯಲ್ಲಿ ಶ್ರೀನಗರದ ಹಜ್ರತ್‌ಬಲ್, ಈದ್ಗಾ, ಖನ್ಯಾರ್, ಹಬ್ಬ ಕಾದಲ್, ಅಮಿರ ಕಾದಲ್, ಸೋನಾವರ್ ಮತ್ತು ಬಟಮಲೂ ಕ್ಷೇತ್ರಗಳು, ಸಾಂಬಾ ಜಿಲ್ಲೆಯ ವಿಜಯ್‌ಪುರ ಹಾಗೂ ಜಮ್ಮು ಜಿಲ್ಲೆಯ ನಗ್ರೋತ, ಗಾಂಧಿನಗರ್, ಜಮ್ಮು ಪಶ್ಚಿಮ, ಜಮ್ಮು ಪೂರ್ವ, ಬಿಶ್ನಾ, ಆರ್.ಎಸ್.ಪುರ, ಸುಚೇತ್‌ಗಢ, ರಾಯ್‌ಪುರ ದೋಮಮ, ಅಕ್ತನೂರ್ ಮತ್ತು ಚಂಬ್ ಕ್ಷೇತ್ರಗಳಲ್ಲಿ ಮತದಾನ ನಡೆಯಲಿದೆ.
ಡಿಸೆಂಬರ್ 3 ನಾಮಪತ್ರಗಳನ್ನು ಸಲ್ಲಿಸಲು ಕೊನೆಯ ದಿನಾಂಕ. ನಾಮಪತ್ರಗಳ ಪರಿಶೀಲನೆಯನ್ನು ಮರುದಿನ ಮಾಡಲಾಗುವುದು. ನಾಮಪತ್ರ ಹಿಂತೆಗೆತಕ್ಕೆ ಡಿಸೆಂಬರ್ ಆರು ಕೊನೆಯ ದಿನ.
21 ಕ್ಷೇತ್ರಗಳಲ್ಲಿ 1,872 ಮತದಾನ ಕೇಂದ್ರಗಳಿದ್ದು, ಸುಮಾರು 16,91,797 ಮಂದಿ ಮತದಾನಕ್ಕೆ ಅರ್ಹತೆ ಪಡೆದಿದ್ದಾರೆ. ಮತಎಣಿಕೆ ಡಿಸೆಂಬರ್ 28ರಂದು ನಡೆಯಲಿದೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ