ನೀಲಿ ಕಾರುಗಳಿಗೆ ನವಿಲಿನಿಂದ ಸಂಚಕಾರ! ಲಂಡನ್, ಶನಿವಾರ, 6 ಅಕ್ಟೋಬರ್ 2007( 18:31 IST )

ನೀಲಿ ಕಾರನ್ನು ಕಂಡಕೂಡಲೇ ತನ್ನ ಪ್ರೇಮ ಪ್ರತಿಸ್ಪರ್ಧಿಯೆಂದು ಅಪಾರ್ಥ ಮಾಡಿಕೊಂಡು ರೊಚ್ಚಿಗೆದ್ದ ನವಿಲೊಂದು 4,000 ಪೌಂಡ್ ನಷ್ಟಕ್ಕೆ ಕಾರಣವಾಗಿದೆ. ಸಾಮರ್‌ಸೆಟ್‌ನ ನೈಋತ್ಯ ಭಾಗದ ಬ್ರಿಜ್‌ವಾಟರ್‌ನಲ್ಲಿ ನೆಲೆಸಿರುವ ರಾನ್ ಎಂಬ ಹೆಸರಿನ ಈ ಹಕ್ಕಿಯು ಯಾವುದೇ ನೀಲಿ ಬಣ್ಣದ ಕಾರುಗಳನ್ನು ಕಂಡಕೂಡಲೇ ಅದನ್ನು ಗಂಡು ನವಿಲು ಎಂದು ತಿಳಿದು, ಅದರ ಮೇಲೆ ಆಕ್ರಮಣ ಪ್ರಾರಂಭಿಸುತ್ತಿತ್ತು. ತೀವ್ರವಾಗಿ ತನ್ನ ರೆಕ್ಕೆಗಳನ್ನು ಚದುರಿಸಿ, ಬಾಲವನ್ನು ಕೆಲವು ಹೊತ್ತು ತಿರುಗಿಸಿದ ನಂತರ ವಾಹನವನ್ನು ಪರಚಿ ಗಾಯಗೊಳಿಸುತ್ತಿತ್ತು. ಆ ಬಳಿಕ, ಈ ಭವನದ ಒಡೆಯ ಸರ್ ಬೆಂಜಮಿನ್ ಸ್ಲೇಡ್ ಅವರು, ನೀಲಿ (ನವಿಲಿನ) ಬಣ್ಣದ ಕಾರುಗಳನ್ನು ನವಿಲಿನಿಂದ ರಕ್ಷಿಸುವ ನಿಟ್ಟಿನಲ್ಲಿ ಎಚ್ಚರಿಕೆ ಫಲಕಗಳನ್ನು ಅಳವಡಿಸಬೇಕಾಯಿತು. ಉಳಿದ ಕಾರುಗಳ ಬಗ್ಗೆ ಅಷ್ಟಾಗಿ ಆಸಕ್ತಿ ವಹಿಸದ ಈ ನವಿಲು, ಪಿಕಾಕ್ ಬ್ಲೂ ಕಾರನ್ನು ಕಂಡೊಡನೆ ಸಿಟ್ಟುಗೊಂಡು, ತನ್ನನ್ನು ತಾನೆ ನಿಯಂತ್ರಿಸಲಾಗದೆ ಉದ್ರಿಕ್ತಗೊಳ್ಳುತ್ತದೆ ಎಂದು ಬೆಂಜಮಿನ್ ಅವರ ಉಲ್ಲೇಖಿಸಿದ್ದನ್ನು ಡೈಲೀ ಮೇಲ್ ವರದಿ ಮಾಡಿದೆ. ಸಾಮರ್‌ಸೆಟ್‌ನ 13ನೇ ಶತಮಾನದ ಮೌನ್ಸೆಲ್ ಹೌಸ್‌ನಲ್ಲಿ ಈ ರಾನ್ ಎಂಬ ನವಿಲು ಉಳಿದ 12 ನವಿಲುಗಳೊಂದಿಗೆ ವಾಸಿಸುತ್ತಿದೆ. ನವಿಲಿನ ಈ ಹುಚ್ಚು ವರ್ತನೆಯು ಕಡುನೀಲಿ ಬಣ್ಣದ ಕಾರಿನ ಬಗೆಗಿನ ಅದರ ಕಲ್ಪನೆಗೆ ಸಂಬಂಧಿಸಿದೆ ಎಂಬುದು ಪಕ್ಷಿತಜ್ಞ ಕ್ವಂಟನ್ ಸ್ಪ್ರಾಟ್ ಅವರ ಅಭಿಪ್ರಾಯವಾಗಿದೆ.