ಟರ್ಕಿ ವಿಮಾನಾಪಘಾತ: 56 ಮಂದಿ ಸಾವು ಅಂಕಾರ, ಶುಕ್ರವಾರ, 30 ನವೆಂಬರ್ 2007( 20:52 IST )

ಕೇಂದ್ರೀಯ ಟರ್ಕಿ ವಿಮಾನ ನಿಲ್ದಾಣದಲ್ಲಿ ಇಳಿಯಲು ಅಣಿಯಾಗುತ್ತಿದ್ದ ಅಟ್ಲಾಸ್‌ಜೆಟ್ ವಿಮಾನವೊಂದು ಅಪಘಾತಕ್ಕೀಡಾಗಿದ್ದು, ವಿಮಾನದಲ್ಲಿದ್ದ ಎಲ್ಲ 56 ಮಂದಿ ಸಾವನ್ನಪ್ಪಿರುವ ದುರಂತ ಶುಕ್ರವಾರ ನಸುಕಿನಲ್ಲಿ ಸಂಭವಿಸಿದೆ. ವಿಮಾನದ ಅವಶೇಷಗಳ ಬಳಿಗೆ ಪರಿಹಾರ ಹೆಲಿಕಾಪ್ಟರ್ ತಲುಪಿದ್ದು, ವಿಮಾನದಲ್ಲಿದ್ದ ಯೂರೂ ಬದುಕುಳಿದಿಲ್ಲ ಎಂದು ವರದಿ ಮಾಡಿರುವುದಾಗಿ ಏರ್‌ಲೈನ್ ಸಿಇಒ ಟುಂಕೆ ಡೊಗನರ್ ಹೇಳಿದ್ದಾರೆ. ಇಸ್ಪಾರ್ತ ಪ್ರಾಂತ್ಯದ ಕೆಸಿಬೊರ್ಲು ಪಟ್ಟಣದ ಸಮೀಪ ವಿಮಾನದ ಅವಶೇಷ ಕಂಡು ಬಂದಿದ್ದು, ಹುಡುಕಾಟ ತಂಡವು ಅತ್ತ ಸಾಗಿದೆ ಎಂದು ಸ್ಥಳೀಯ ರಾಜ್ಯಪಾಲ ಅಲ್ಪರ್ ಫಾರೂಕ್ ಗುಂಗೋರ್ ಹೇಳಿದ್ದಾರೆ. ಇಸ್ಪಾರ್ತ ನಗರದ ವಿಮಾನ ನಿಲ್ದಾಣವನ್ನು ಸಮೀಪಿಸುತ್ತಿದೆ ಎಂದು ಸಂದೇಶ ರವಾನಿಸಿರುವ ಬಳಿಕ ವಿಮಾನ ನಾಪತ್ತೆಯಾಯಿತು ಎಂದು ಅಧಿಕಾರಿಗಳು ಹೇಳಿದ್ದಾರೆ. ಎಂಡಿ 83 ಜೆಟ್ ವಿಮಾನ ಸಂಜೆ ಸುಮಾರು ಏಳು(ಇಎಸ್‌ಟಿ) ವೇಳೆ ಇಸ್ತಾಂಬುಲ್‌ನಿಂದ ಇಸ್ಪಾರ್ತ ಕಡೆಗೆ ಹೊರಟಿತ್ತು.