ವೈಮಾನಿಕ ದಾಳಿ: 17 ತಾಲಿಬಾನಿಗಳ ಸಾವು ಕಾಬೂಲ್, ಶುಕ್ರವಾರ, 7 ಡಿಸೆಂಬರ್ 2007( 15:29 IST )

ನ್ಯಾಟೋ ಮಿತ್ರಪಡೆಗಳು ಪಶ್ಚಿಮ ಅಫಘಾನಿಸ್ಥಾನದಲ್ಲಿ ವೈಮಾನಿಕ ದಾಳಿ ನಡೆಸಿ 17 ತಾಲಿಬಾನ್ ಉಗ್ರರನ್ನು ಹತ್ಯೆ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಇನ್ನೊಂದು ಪ್ರತ್ಯೇಕ ಘಟನೆಯಲ್ಲಿ ತಾಲಿಬಾನ್ ಉಗ್ರರು ಸರಣಿ ಬಾಂಬ್ ಸ್ಪೋಟ ನಡೆಸಿದಾಗ ಜರ್ಮನ್ ಅಂಬುಲೆನ್ಸ್ ವಾಹನ ನಾಶವಾಗಿದೆ ಎಂದು ಹೇಳಿದ್ದಾರೆ. ಅಫಘಾನಿಸ್ಥಾನದ ಪಶ್ಚಿಮ ಪ್ರಾಂತ್ಯವಾದ ಫರ್ಹಾ ನಗರದಲ್ಲಿ ಉಗ್ರರ ದಾಳಿಗೆ ಸಿಲುಕಿದ ನ್ಯಾಟೋ ಪಡೆಗಳನ್ನು ರಕ್ಷಿಸಲು ಅಂತಾರಾಷ್ಟ್ರೀಯ ಭದ್ರತಾ ಸಹಕಾರ ದಳ ವೈಮಾನಿಕ ದಾಳಿ ನಡೆಸಲಾಯಿತು ಎಂದು ಅಫಘಾನಿಸ್ಥಾನದ ಸೇನಾ ಕಮಾಂಡರ್ ಜಲಂಧರ್ ಶಾಹ್ ಬೆಹನಮ್ ತಿಳಿಸಿದ್ದಾರೆ. ಪ್ರಸಕ್ತ ವರ್ಷದಲ್ಲಿ ಭೀಕರ ದಾಳಿಗಳು ನಡೆದಿದ್ದು ಹೆಚ್ಚಿನ ಸಾವು ನೋವುಗಳು ಉಂಟಾಗಿವೆ. ಘರ್ಷಣೆಯಲ್ಲಿ ಸುಮಾರು 6 ಸಾವಿರ ಮಂದಿ ಸಾವನ್ನಪ್ಪಿದ್ದು ಅದರಲ್ಲಿ ಉಗ್ರರು ಹೆಚ್ಚಗಿದ್ದಾರೆ ಎಂದು ಅಫಘಾನಿಸ್ಥಾನ್ ಸೇನಾ ಮೂಲಗಳು ತಿಳಿಸಿವೆ. ಈ ವರ್ಷದಲ್ಲಿ ಸರಕಾರಿ ಕಚೇರಿಗಳು ಹಾಗೂ ಸೇನಾವಾಹನಗಳನ್ನು ಗುರಿಯಾಗಿಸಿಕೊಂಡು 140 ಆತ್ಮಹತ್ಯಾದಳ ದಾಳಿಗಳು ನಡೆದಿವೆ ಎಂದು ಸೇನಾ ವಕ್ತಾರರು ತಿಳಿಸಿದ್ದಾರೆ.